Mitrovica e ka nisur me një barazim 0:0 përballjen ndaj Metalist 1925 të Ukrainës, në raundin e parë kualifikues të UEFA Women’s Europa Cup.

Ndeshja e parë u zhvillua të mërkurën pasdite në stadiumin “Zahir Pajaziti” në Podujevë, ku asnjëra prej skuadrave nuk arriti të shënonte.

Edhe pse ekipi ukrainas pati më shumë raste gjatë 90 minutave, futbollistet mitrovicase treguan organizim të mirë në mbrojtje dhe e përfunduan takimin me portën të paprekur.

Skuadra që do ta sigurojë kualifikimin do të përcaktohet pas ndeshjes së kthimit, e planifikuar për 1 shtator në Shkup.

Women’s Europa Cup po zhvillohet vetëm për herë të dytë dhe përbën nivelin e dytë të garave evropiane për klubet e futbollit të femrave. Kosova po merr pjesë për herë të parë në këtë kompeticion.

Mitrovica e fitoi të drejtën për të luajtur në Europa Cup pas paraqitjeve të suksesshme në UEFA Women’s Champions League. Në raundin e parë kualifikues të kësaj gare, kampionia e Kosovës kaloi në finale pasi mposhti kampionen e Moldavisë në gjysmëfinale, ndërsa më pas në finale triumfoi kundër kampiones së Bullgarisë.

Në raundin e dytë kualifikues të Champions League, skuadra mitrovicase pësoi humbje nga Brann i Norvegjisë. Megjithatë, fitorja ndaj Ferencvárosit të Hungarisë i mundësoi Mitrovicës të vazhdonte garat në Europa Cup.

Pas barazimit në ndeshjen e parë, kualifikimi mbetet i hapur dhe do të përcaktohet në duelin e kthimit në Shkup.

The post Mitrovica ndalet në barazim ndaj Metalist 1925, gjithçka vendoset në Shkup appeared first on Albeu.com.