Kryetari i Aleancës, Ardian Gjini, shprehet optimist për lirimin e ish-krerëve të UÇK-së, të cilët po gjykohen në Hagë.

Sipas tij, nëse Gjykata Speciale do të shpallte fajtorë ish-drejtuesit e UÇK-së për veprat që u atribuohen, pasojat do të prekën gjithë atë që është ndërtuar në Kosovë.

Gjini vlerëson se një vendim dënues ndaj këtyre personave do të konsiderohej si dënim për gjithçka që është krijuar në vend. Ai thotë se një pjesë e madhe e qytetarëve e kupton këtë rrezik, ndërsa shpreh shqetësimin se disa të tjerë nuk e kanë të qartë se pasojat do t’i bartnin të gjithë qytetarët e Kosovës.

Ai paralajmëron se në një rast të tillë do të dëmtohej edhe rrëfimi i Kosovës për lirinë. Duke iu referuar asaj që është parë gjatë procesit gjyqësor, Gjini thotë se nuk beson se ekziston material i mjaftueshëm për një dënim.

Kreu i Aleancës konfirmon gjithashtu se do të marrë pjesë në marshin e 12 shtatorit dhe se në këtë aktivitet do të mbajë edhe fjalim.

Gjini thekson se një marshim ose manifestim në mbështetje të katër personaliteteve të rëndësishme të Kosovës, përfshirë ish-presidentin, ish-kryetarin e Kuvendit dhe ish-deputetin që po përballen me proces gjyqësor, duhet t’u drejtohet të gjithëve.

Ai shton se lirimi i tyre do të ishte lajm i mirë për secilin, ndërsa një rezultat i kundërt do të ishte lajm i keq. Për këtë arsye, sipas Gjinit, nuk duhet që pjesëmarrja në këtë aktivitet të shihet si diçka thjesht politike.

Gjatë deklarimit të tij, Gjini u ndal edhe te qëndrimi i Ramush Haradinajt për propozimin e Hashim Thaçit në postin e presidentit të Kosovës.

Gjini thotë se nuk i di arsyet e plota të këtij propozimi dhe nënvizon se situata ka shumë të panjohura, pasi për zgjedhjen e presidentit nevojiten vota. Ai kujton se nuk mjafton vetëm një intervistë për të emëruar dikë në atë detyrë.

Sipas tij, Ramush Haradinaj është një personalitet i veçantë dhe ka të drejtë të ketë mendimin e tij, ashtu siç ka të drejtë të propozojë edhe veten. Gjini sqaron se Aleanca, deri tani, nuk ka vendosur asnjë kusht për presidencën, qeverinë apo ndonjë funksion tjetër shtetëror.

Ai shton se gjashtë pikat e Aleancës nuk lidhen me poste shtetërore dhe vlerëson se mesazhi i Haradinajt mund të ketë qenë më i gjerë sesa thjesht vendosja e dikujt në pozitë të vështirë. Gjini pranon se zhvillimet politike mund të interpretohen në mënyra të ndryshme dhe se këndvështrimet e njerëzve shpesh nuk përputhen.

The post Ardian Gjini pret lirimin e ish-drejtuesve të UÇK-së: Një dënim do të cenonte gjithçka të ndërtuar në Kosovë appeared first on Albeu.com.

Pas takimit me kryetarin e LDK-së, Lumir Abdixhiku, kryeministri në detyrë i Kosovës, Albin Kurti, komentoi procesin gjyqësor ndaj ish-drejtuesve të Ushtrisë Çlirimtare të Kosovës në Dhomat e Specializuara në Hagë.

Kurti tha se beson në pafajësinë e tyre dhe shprehu shpresën që ata të kthehen në Kosovën e lirë. Sipas tij, kjo është çështja kryesore, ndërsa pritjet janë për përfundimin më të mirë të mundshëm.

Duke folur për UÇK-në, ai e cilësoi luftën çlirimtare të popullit të Kosovës, të organizuar dhe të udhëhequr nga Ushtria Çlirimtare e Kosovës, si të drejtë, çlirimtare dhe antikolonialiste kundër okupatorit shekullor serb.

Kryeministri në detyrë theksoi se asnjë proces gjyqësor, qoftë brenda apo jashtë vendit, nuk mund ta njollosë UÇK-në.

Vendimi i Dhomave të Specializuara të Kosovës në Hagë në çështjen kundër ish-krerëve të UÇK-së pritet të bëhet publik më 16 shtator 2026.

Kurti sqaroi gjithashtu se gjykimi në Hagë nuk lidhet me bisedimet politike për zgjedhjen e presidentit.

Ai deklaroi se negociatat me Lidhjen Demokratike të Kosovës për një kandidat për president ose presidente përbëjnë një proces më vete, me karakter politik dhe jo një çështje të drejtësisë.

The post Kurti shpreh besimin se ish-krerët e UÇK-së janë të pafajshëm appeared first on Albeu.com.

Ish-eprori i UÇK-së, Naim Miftari, ka reaguar ashpër ndaj ish-presidentit të Kosovës, Hashim Thaçi, pas deklaratës së këtij të fundit se emblemën e UÇK-së e mban në xhepin e majtë të këmishës.

Përmes një shkrimi, Miftari ka vënë në dyshim fjalët e Thaçit dhe e ka pyetur se ku e ruan emblemën e DGSE-së, shërbimit sekret francez, si edhe fotografinë e Arnaud Danjean, të cilin e cilëson si shefin dhe agjentin francez të lidhur me të.

“Hashim, e ku po e mban emblemën e DGSE-së, shërbimit sekret francez, e foton e shefit tënd, dhëndrit serb agjentit francez, Arnaud Danjean?”, ka shkruar Miftari.

Në reagimin e tij përfshihet edhe vëllai i ish-presidentit, Ganiu. Miftari pretendon se ai mban një emblemë që ia atribuon Ivica Stanishiqit të UDB-së.

Ish-eprori i UÇK-së e ka sulmuar Thaçin edhe për pasurinë dhe karrierën e krijuar pas luftës. Sipas tij, nga një person i varfër dhe azilant në Zvicër, i cili kishte vjedhur farmerka Levi’s 501, Thaçi u shndërrua në multimilioner pasi, siç pretendon Miftari, mbi 90 për qind e Fondit “Vendlindja Thërret” iu vodhën UÇK-së.

Miftari e akuzon gjithashtu se pas përfundimit të luftës, për të siguruar pushtet dhe rol politik, Thaçi shiti e përvetësoi pjesën më të madhe të pasurive të Kosovës. Ai e kritikon edhe për Marrëveshjen K-90, duke pretenduar se me një nënshkrim shumica e ushtarëve të UÇK-së mbetën pa mbështetje dhe “në rrugë”.

Sipas Miftarit, Thaçi përfitoi nga lufta e UÇK-së duke u bërë kryeministër, ministër i Jashtëm dhe më pas president. Ai pretendon gjithashtu se korrupsioni gjatë dhe pas luftës e bëri Thaçin multimiliarder dhe se, përmes tij, Gjykata Speciale iu soll UÇK-së.

Miftari shkruan se Thaçi kishte besuar se ndërkombëtarët e kishin mashtruar, pasi mendonte se ai dhe bashkëluftëtarët e tij nuk do të gjykoheshin, ndërsa proceset do të zhvilloheshin ndaj komandantëve realë të luftës.

Në fund, ish-eprori i UÇK-së e lidh reagimin e tij me atdhetarin Bahajdin Allaqi. Ai e pyet Thaçin nëse telefonin apo librin e mban nën jastëk kur fle, duke lënë të kuptohet se kjo lidhet me pyetjen se ku ndodhet varri i Bahajdin Allaqit.

“Hashim, telefonin a librin po e mban nën jastëk kur po fle, për pyetjen se ku gjendet varri i atdhetarit Bahajdin Allaqi, tjetër herë të pyes?”, ka shkruar Miftari.

The post Miftari kritikon Thaçin për deklaratën mbi emblemën e UÇK-së dhe ngre akuza për lidhje me shërbime të huaja appeared first on Albeu.com.

Kryetari i Partisë Demokratike të Kosovës, Bedri Hamza, ka reaguar lidhur me procesin gjyqësor ndaj ish-udhëheqësve të UÇK-së në Hagë, duke bërë të ditur se kanë mbetur edhe 30 ditë deri më 16 shtator, datë kur pritet të shpallet aktgjykimi.

Sipas Hamzës, kjo datë duhet të shënojë përfundimin e gjashtë viteve të paraburgimit për Hashim Thaçin, Kadri Veselin, Jakup Krasniqin dhe Rexhep Selimin.

“Sot na ndajnë 30 ditë nga 16 shtatori, dita kur do të marrë fund procesi gjashtëvjeçar i padrejtë, që i ka mbajtur Hashim Thaçin, Kadri Veselin, Jakup Krasniqin dhe Rexhep Selimin të izoluar në Hagë”, ka shkruar Hamza.

Ai ka theksuar se katër ish-krerët e UÇK-së kanë kaluar një periudhë të gjatë në paraburgim, të ndarë nga familjet e tyre dhe nga Kosova.

“Gjashtë vite paraburgim. Gjashtë vite larg familjeve dhe Kosovës. Gjashtë vite përballje me paragjykime, tendenca, narrativa politike, shkelje të të drejtave dhe padrejtësi të shumta”, ka deklaruar ai.

Kreu i PDK-së ka nënvizuar se pozicioni i tij dhe i subjektit që drejton nuk ka ndryshuar, ndërsa kërkesa mbetet drejtësia dhe lirimi i katër ish-udhëheqësve të UÇK-së.

“Pritshmëritë dhe kërkesat tona janë të qarta: drejtësi dhe lirim”, ka thënë Hamza.

Hamza ka deklaruar se 16 shtatori duhet të shërbejë si pikë përmbyllëse e këtij kapitulli dhe si dita e kthimit në Kosovë të Thaçit, Veselit, Krasniqit dhe Selimit.

“Pas gjashtë vitesh, 16 shtatori duhet të jetë dita kur mbyllet ky kapitull i dhimbshëm për lirinë, pavarësinë dhe shtetndërtimin tonë. Duhet të jetë dita kur katër ish-udhëheqësit e UÇK-së kthehen në shtëpi”, ka shkruar ai.

Në fund të reagimit, kreu i PDK-së ka përsëritur se mbeten edhe 30 ditë deri në vendimin e gjykatës, duke e lidhur pritjen me kërkesën për drejtësi.

“Presim edhe 30 ditë. Presim drejtësi”, ka përfunduar Hamza.

The post Hamza: 16 shtatori duhet të sjellë drejtësi dhe kthimin e katër ish-krerëve të UÇK-së appeared first on Albeu.com.

Protesta e zhvilluar në kryeqytetin shqiptar në ditën e saj të 71-të mori një tjetër drejtim, duke u përqendruar te përfaqësitë diplomatike të Serbisë dhe Ukrainës.

Pjesëmarrësit shprehën mbështetjen e tyre me parrullën “UÇK, UÇK”, teksa adresuan mesazhe të drejtpërdrejta ndaj presidentit ukrainas, Volodymyr Zelensky. Ky veprim erdhi menjëherë pas vizitës së tij në Beograd, ku u takua me homologun serb, Aleksandar Vuçiq.

Gjatë daljes së përbashkët para gazetarëve, Zelensky rikonfirmoi se qëndrimi i vendit të tij mbi pavarësinë e Kosovës mbetet i pandryshuar dhe se Ukraina nuk e njeh shtetësinë e saj.

Kjo deklaratë nxiti reagime të ashpra në Kosovë, ku ministri i Jashtëm në detyrë, Glauk Konjufca, u shpreh se ajo është për të ardhur keq.

Një grup protestuesish vendosën të kryejnë një akt simbolik në Shqipëri, duke ndryshuar emërtimin e rrugës që njihet aktualisht si “Ukraina e Lirë”.

Si pasojë e qëndrimit të Zelenskyt, ata e pagëzuan rrugën “Dardania e Lirë”, duke vijuar njëkohësisht me brohoritjet në nder të Ushtrisë Çlirimtare të Kosovës.

Në një zhvillim paralel në Prishtinë, është hequr nga fasada e Grand Hotelit banderola e madhe me mbishkrimin “Free Ukraine”.

The post Marshimi i 71-të në Tiranë me thirrje për UÇK-në, rruga “Ukraina e Lirë” riemërtohet simbolikisht “Dardania e Lirë appeared first on Albeu.com.

Fatos Geci, ish-deputet, ka reaguar ndaj incidentit me vezë, duke e cilësuar të papranueshme përdorimin e një veprimi të tillë si përgjigje ndaj përpjekjeve për krijimin e institucioneve.

Sipas Gecit, vezët mund të përdoren si shenjë kundërshtimi ndaj projekteve si Zajednica ose Demarkacioni, por jo kundër procesit për ndërtimin e institucioneve. Ai theksoi se përgjegjësia për këtë proces u takon të gjithë përfaqësuesve të zgjedhur nga qytetarët.

Në reagimin e tij të plotë, Geci shkroi se është njëkohësisht ironike dhe tejet qesharake që dikush të ftohet në një takim për të diskutuar arritjen e një marrëveshjeje mbi formimin e institucioneve dhe t’i përgjigjet ftesës duke hedhur vezë në fytyrë.

Ai e quajti këtë një turp të madh, veçanërisht për faktin se veprimi erdhi nga një ish-pjesëtare e UÇK-së.

“Sa keq për ju!”, përfundoi Geci.

The post Fatos Geci dënon veprimin e Time Kadrijajt: Turp, sidomos për një ish-pjesëtare të UÇK-së appeared first on Albeu.com.

Ali Ahmeti, kryetar i BDI-së, ka bërë të ditur se disponon informacione për iniciativa në Gjykatën Kushtetuese, të cilat mund të çojnë në rihapjen e dosjeve të Tribunalit të Hagës, përfshirë pretendimet për hetimin e UÇK-së lidhur me krime lufte.

Ahmeti vlerëson se rikthimi te këto raste, të mbyllura prej më shumë se 20 vjetësh, do të sillte rihapjen e plagëve të vjetra.

“Jam informuar se në Gjykatën Kushtetuese ka iniciativa për rihapjen e çështjeve të Tribunalit të Hagës, me synimin që Ushtria Çlirimtare Kombëtare të paditet për krime lufte.

Kjo nuk më frikëson, por rikthimi te një plagë e vjetër shkakton më shumë dhimbje sesa hapja e një plage të re. Bëhet fjalë për çështje që i kemi përmbyllur më shumë se 20 vjet më parë”, deklaroi Ahmeti.

Profesori Sulejman Mehazi, në një prononcim për “Bota sot”, paralajmëron se çdo tentativë për t’i rikthyer rastet që lidhen me luftën e vitit 2001 mund të prodhojë pasoja të rënda politike dhe ta çojë Maqedoninë e Veriut drejt destabilizimit.

“Nëse është i saktë pohimi i Ali Ahmetit se Gjykata Kushtetuese e RMV-së, pas 22 vjetësh, mund të rikthejë, gjurmojë apo hetojë krimet e pretenduara të luftës të UÇK-së në Maqedoninë e Veriut gjatë vitit 2001, atëherë kjo do të nënkuptonte nxitjen e trazirave të rrezikshme për vetë Gjykatën Kushtetuese, qeverinë e Mickoskit dhe shtetin e brishtë të RMV-së.

Nëse informacionet e kreut të BDI-së, Ali Ahmeti, rezultojnë të vërteta, atëherë mund të thuhet pa ngurrim se RMV-ja e Mickoskit po shkon drejt ndarjes dhe shpërbërjes. Megjithatë, nuk besoj se Mickoski dhe VLENI mund të pajtohen që Gjykata Kushtetuese të ndërmarrë veprime të mbrapshta kundër qytetarëve shqiptarë, por edhe atyre maqedonas”, shprehet Mehazi.

Sipas profesorit, deklarata e Ahmetit mund të jetë vetëm propagandë politike. Ai nënvizon, megjithatë, se një veprim kundër UÇK-së së vitit 2001 nuk do të prekte vetëm persona të veçantë, por të gjithë shqiptarët që dhanë kontribut gjatë konfliktit.

“Ndoshta kemi të bëjmë thjesht me propagandë politike nga Ali Ahmeti dhe me asgjë tjetër. Mundet që synimi të jetë frikësimi i tij, në mënyrë që t’i mbyllet goja nacionaliste si opozitar.

Nëse Tribunali i Hagës ngre padi ndaj UÇK-së së RMV-së, nuk është vetëm Ali Ahmeti ai që paditet, i cili gjatë luftës së vitit 2001 qëndroi në Prizren, por të gjithë qytetarët shqiptarë në RMV që kontribuuan gjatë luftës, nga më i riu deri te më i moshuari”, thotë ai.

Ndryshe nga Mehazi, profesori Kolë Krasniqi thotë për “Bota sot” se deklarata e Ali Ahmetit duhet analizuar me kujdes, pa u shndërruar në objekt dramatizimi politik.

Krasniqi sqaron se bëhet fjalë për një iniciativë të dorëzuar në Gjykatën Kushtetuese të Maqedonisë lidhur me interpretimin e Ligjit për Amnisti dhe jo për ndonjë padi të re të Tribunalit të Hagës. Sipas tij, kjo gjykatë nuk ka kompetencë të ngrejë aktakuza ose të rikthejë procese penale, por mund të vlerësojë vetëm kushtetutshmërinë e ligjit. Çdo hap i mëvonshëm do të ishte në varësi të prokurorisë dhe gjykatave kompetente.

“Pohimi i z. Ali Ahmeti kërkon trajtim të kujdesshëm, pa dramatizim politik, por edhe pa nënvlerësuar ndërlikimin juridik dhe ndjeshmërinë ndëretnike të çështjes së pretenduar që ka të bëjë me Ligjin për Amnisti.

Në të vërtetë, më 16 shkurt 2024, Pavle Trajanov paraqiti publikisht në Gjykatën Kushtetuese të Maqedonisë një iniciativë për shfuqizimin e interpretimit autentik të nenit 1 të Ligjit për Amnisti. Përmes këtij interpretimi ishte bërë i mundur ndërprerja e procedurave në katër dosjet e njohura me emrat: “Udhëheqja e UÇK-së”, “Liqeni i Likovës”, “Varreza e Neproshtenit” dhe “Punëtorët e Mavrovës”. Për këtë arsye, duhet sqaruar nëse z. Ahmeti po flet për këtë iniciativë apo për një nismë tjetër të re.

Nga pikëpamja juridike dhe terminologjike, nuk bëhet fjalë për raste mbi të cilat Tribunali i Hagës ka nxjerrë vendime gjyqësore përfundimtare. Këto kanë qenë dosje në fazën e hetimeve paraprake të hetuesve të Tribunalit të Hagës, të cilat Prokuroria e këtij Tribunali ia kishte kaluar drejtësisë maqedonase për hetime dhe procedim të mëtejshëm.

Gjykata Kushtetuese e Maqedonisë nuk ka kompetencë ta padisë UÇK-në, të hartojë aktakuzë apo të rikthejë drejtpërdrejt procedurat penale. Kompetenca e saj kufizohet në vlerësimin e kushtetutshmërisë së Ligjit për Amnisti ose të interpretimit të tij autentik. Vetëm në rast se vlerësohet se pengesa juridike duhet hequr, prokuroria dhe gjykatat përkatëse mund të analizojnë nëse plotësohen kushtet ligjore dhe nëse ka prova të mjaftueshme për nisjen e procedurave konkrete penale.

Duhet kujtuar se në vitin 2012 Gjykata Kushtetuese e Maqedonisë kishte konstatuar se ‘interpretimi autentik nuk përbënte akt të përshtatshëm për kontroll kushtetues’, ndërsa Ligji për Amnisti ishte vlerësuar më herët si në përputhje me Kushtetutën. Rrjedhimisht, as pranueshmëria e iniciativës së re, as efektet e mundshme juridike dhe as pasojat politike që mund të rrjedhin prej saj nuk janë të vetëkuptueshme dhe aq më pak mund të paragjykohen”, deklaron Krasniqi.

Sa i përket mundësisë së rikthimit të procedurave, profesori vlerëson se do të kishte padrejtësi nëse ato do të drejtoheshin në mënyrë selektive vetëm kundër ish-pjesëtarëve shqiptarë të UÇK-së ose nëse do të shfrytëzoheshin politikisht. Sipas tij, drejtësia duhet të mbështetet te provat dhe përgjegjësia individuale. Rastet mund të rihapen vetëm kur përmbushen kushte të caktuara ligjore, siç është paraqitja e provave të reja, si dhe duke respektuar parimin se askush nuk mund të gjykohet dy herë për të njëjtën vepër.

“Nëse një procedurë rikthehet vetëm sepse të dyshuarit janë shqiptarë apo ish-pjesëtarë të UÇK-së, kjo mund të perceptohet si një padrejtësi ndaj shqiptarëve.

Një proces i tillë do të ishte seriozisht i padrejtë nëse zhvillohet në mënyrë përzgjedhëse vetëm ndaj ish-pjesëtarëve shqiptarë, nëse lihen mënjanë krimet e pretenduara kundër civilëve shqiptarë, nëse shndërrohet në mjet hakmarrjeje politike, nëse krijon idenë e fajësisë kolektive të shqiptarëve ose nëse shkelen standardet e një gjykimi të drejtë, siguria juridike dhe prezumimi i pafajësisë.

Krimet e kryera ndaj shqiptarëve janë shqyrtuar gjithashtu nga Tribunali i Hagës. Për rastin e Ljubotenit, Johan Tarçulovski u gjet fajtor për vrasje, trajtim mizor dhe shkatërrim të pronës së civilëve shqiptarë, kurse Ljube Boškoski u shpall i pafajshëm. Ky rast tregon se drejtësia duhet të mbështetet te provat dhe përgjegjësia personale, pavarësisht etnisë së të akuzuarit ose viktimës.

Në të njëjtën kohë, standardet ndërkombëtare vendosin kufizime shumë të rrepta për amnistitë që përfshijnë krime lufte apo shkelje të rënda të të drejtave të njeriut. Në rastin Marguš kundër Kroacisë, Gjykata Evropiane për të Drejtat e Njeriut ka pranuar se ndjekja penale për krime lufte mund të vijojë edhe kur një procedurë e mëparshme ishte mbyllur për shkak të amnistisë.

Kjo, sidoqoftë, nuk nënkupton se çdo pretendim mund të cilësohet vetvetiu si krim lufte. Një cilësim i tillë kërkon prova të besueshme dhe duhet konfirmuar përmes një procedure të rregullt gjyqësore.

Për secilin person duhet të verifikohet individualisht nëse ka një vendim përfundimtar dhe nëse gjen zbatim parimi ne bis in idem, sipas të cilit një person nuk mund të gjykohet dy herë për të njëjtën vepër. Konventa Evropiane e lejon rikthimin e procedurës vetëm në rrethana të përcaktuara, për shembull kur dalin fakte ose prova të reja, apo kur procesi i mëparshëm ka pasur mangësi themelore që kanë ndikuar në përfundimin e tij”, thekson profesori.

Në përmbyllje, Krasniqi paralajmëron se rikthimi i politizuar i këtyre rasteve mund të përkeqësojë raportet ndëretnike dhe të dëmtojë frymën e Marrëveshjes së Ohrit. Ai vlerëson se konflikti i vitit 2001 duhet të jetë politikisht një kapitull i mbyllur, ndërsa përgjegjësia për krime të rënda mund të shqyrtohet vetëm ligjërisht, mbi bazën e provave dhe përgjegjësisë individuale.

“Sipas vlerësimit tim, rihapja selektive dhe e politizuar mund të shkaktojë pasoja të rënda për marrëdhëniet mes etnive në Maqedoninë e Veriut. Ajo mund të rikthejë rrëfimet e kohës së konfliktit, të shtojë mosbesimin e shqiptarëve ndaj institucioneve, të provokojë protesta dhe të dëmtojë frymën e Marrëveshjes së Ohrit.

Rreziku kryesor nuk lidhet vetëm me shqyrtimin ligjor të rasteve, por edhe me mundësinë që drejtësia të shihet si instrument i njëanshëm për ta rishkruar natyrën e konfliktit të vitit 2001 apo për ta portretizuar kolektivisht UÇK-në dhe shqiptarët si palë kriminale.

Në këtë kontekst, është e domosdoshme të ndahet përmbyllja politike e konfliktit nga përgjegjësia personale për krime të rënda.

Konflikti ushtarak dhe politik duhet të trajtohet si i përfunduar. Marrëveshja e Ohrit duhet mbrojtur si themeli i paqes, barazisë dhe funksionimit multietnik të shtetit. Veprat e zakonshme që lidhen me konfliktin dhe që janë përfshirë ligjërisht nga amnistia duhet të mbeten përgjithmonë të mbyllura, në funksion të sigurisë juridike, harmonisë ndëretnike dhe stabilitetit të institucioneve”, përfundon Krasniqi për “Bota sot”.

The post Çështja e UÇK-së në Maqedoninë e Veriut, ekspertët analizojnë pohimet e Ahmetit appeared first on Albeu.com.

Organizata e Veteranëve të Luftës së UÇK-së ka kundërshtuar nderimin e njësive ushtarake serbe, duke deklaruar se një veprim i tillë institucionalizon mohimin e krimeve të luftës dhe mbron pandëshkueshmërinë.

Sipas OVL-së së UÇK-së, ceremonitë në nderim të këtyre njësive nuk mund të cilësohen si përkujtimore për sa kohë që arkivat shtetërore, ushtarake dhe policore të Serbisë mbahen të mbyllura, ndërsa fati i personave të zhdukur ende nuk është zbardhur.

“Nderimi i njësive ushtarake serbe, ndërsa vazhdohet të mbahen të mbyllura arkivat shtetërore të Serbisë dhe të fshihen provat për krimet e luftës, nuk është përkujtim. Është institucionalizim i mohimit dhe mbrojtje e pandëshkueshmërisë”, thuhet në reagim.

Organizata ka kërkuar që Beogradi t’i hapë arkivat ushtarake dhe policore, si dhe të bëhet i ditur fati i personave të zhdukur gjatë luftës në Kosovë. Ajo ka theksuar se e vërteta nuk mund të mbulohet “as me medalje, as me nderime shtetërore dhe as me rrëfime të rishkruara”.

OVL-ja vlerëson se mosreagimi ndaj glorifikimit të njësive serbe e forcon më tej mohimin e krimeve. Njëkohësisht, organizata ka përsëritur se Kosova do të kërkojë pa kompromis të vërtetën dhe llogaridhënien për krimet e luftës.

The post OVL e UÇK-së: Nderimi i njësive serbe zyrtarizon mohimin e krimeve të luftës në Kosovë appeared first on Albeu.com.

Organizata e Veteranëve të Luftës së UÇK-së reagoi pas deklaratës së kryetarit të BDI-së, Ali Ahmeti, i cili tha se disponon informacione sipas të cilave Gjykata Kushtetuese ka iniciativa për rihapjen e rasteve të Tribunalit të Hagës, përfshirë edhe aktakuzën ndaj Ushtrisë Çlirimtare Kombëtare (UÇK). Ahmeti theksoi se rikthimi i plagëve të vjetra është më i dhimbshëm se krijimi i një plage të re.

OVL e UÇK-së deklaroi se kundërshton kategorikisht çdo përpjekje për të hapur procese të reja të Hagës kundër Ushtrisë Çlirimtare Kombëtare.

Sipas organizatës, bëhet fjalë për manovra të revizionizmit politik, të cilat synojnë ta paraqesin si kriminale një luftë të drejtë çlirimtare dhe të dëmtojnë bazat e Marrëveshjes së Ohrit.

“Luftëtarët shqiptarë paguan çmimin që solli dinjitet, barazi dhe stabilitet. Plagët e së kaluarës nuk duhet të preken me synimin për të goditur vlerat e luftës ose për të destabilizuar rajonin.

Qarqet shoviniste të Maqedonisë së Veriut nuk duhet të përpiqen ta shtrembërojnë historinë për interesat e tyre politike”, thuhet në reagimin e Organizatës së Veteranëve të Luftës së UÇK-së.

The post OVL e UÇK-së kundërshton çdo nismë për aktakuzë ndaj Ushtrisë Çlirimtare Kombëtare pas deklaratës së Ali Ahmetit appeared first on Albeu.com.

Organizata e Veteranëve të Luftës së UÇK-së ka zhvilluar një takim pune me zyrtarë të Ambasadës së Shteteve të Bashkuara të Amerikës në Kosovë.

Gjatë këtij takimi janë diskutuar çështjet kryesore që lidhen me veteranët, si dhe shqetësimet e tyre.

Sipas njoftimit të organizatës, në bisedime janë përfshirë tema me interes për veteranët e luftës dhe është vënë në pah nevoja për vijimin e bashkëpunimit me partnerët ndërkombëtarë.

“Në këtë takim theksuam rëndësinë e jashtëzakonshme që ka miqësia e përhershme dhe partneriteti ynë me partnerin tonë më të madh e të pazëvendësueshëm, Shtetet e Bashkuara të Amerikës”, thuhet në njoftim.

The post Organizata e Veteranëve të UÇK-së zhvillon takim me përfaqësues të Ambasadës amerikane appeared first on Albeu.com.