Izet Mexhiti, bashkëkryetar i VLEN-it, u ka bërë thirrje forcave politike shqiptare në të gjitha trevat që të bashkohen në mbështetje të procesit të apelimit për ish-krerët e UÇK-së në Gjykatën Speciale në Hagë.

Sipas Mexhitit, dënimi i shqiptuar në shkallën e parë është pritur me indinjatë. Ai vlerësoi se në këtë fazë subjektet politike duhet t’i lënë mënjanë dallimet dhe të bashkërendojnë angazhimin e tyre për procedurën në Gjykatën e Apelit.

Bashkëkryetari i VLEN-it theksoi se vendimi i shkallës së parë nuk e mbyll betejën juridike. Për këtë arsye, ai kërkoi mobilizimin e të gjitha forcave për ta fituar, siç e cilësoi, betejën e dytë, duke nënvizuar se lufta ende nuk është humbur.

Mexhiti deklaroi gjithashtu se Ushtria Çlirimtare e Kosovës dhe Kombëtare përfaqëson pjesën më të lavdishme të shqiptarëve në Maqedoni, Kosovë dhe kudo tjetër.

The post Mexhiti kërkon unitet për procesin në Apel: Beteja ligjore për ish-krerët e UÇK-së vazhdon appeared first on Albeu.com.

Ministri i Drejtësisë i Maqedonisë së Veriut, Jeton Shasivari, ka reaguar ndaj përpjekjeve për të deformuar qëndrimin e tij mbi Gjykatën Speciale dhe zhvillimet e pritshme më 16 shtator.

Shasivari ka theksuar se deklarata e tij nuk përbën mbështetje për këtë gjykatë. Sipas tij, në datën 16 shtator vendimin nuk duhet ta përcaktojnë rruga, politika apo emocionet, por vetë gjykata.

“Mos më atribuoni një qëndrim që nuk e kam thënë”, ka shkruar ai, duke nënvizuar se nuk e ka përkrahur themelimin e Gjykatës Speciale dhe as nuk ka siguruar vota për krijimin e saj.

Ai është shprehur se votat për themelimin e Gjykatës Speciale i kanë mbledhur Ali Ahmeti dhe Berat Buzhala, gjë që, sipas tij, është pranuar edhe prej tyre.

Sipas ministrit, Gjykata Speciale tashmë përbën një realitet, i krijuar si rezultat i angazhimit të dikujt tjetër. Për këtë arsye, ai thotë se tani mbetet përballja me pasojat.

“Ajo sot është realitet si pasojë e angazhimit të dikujt. Neve na mbetet të merremi me pasojat”, ka deklaruar Shasivari.

Ai ka sqaruar se thirrja e bërë më herët kishte për qëllim interesin e Republikës së Kosovës, ruajtjen e imazhit të UÇK-së dhe mbrojtjen e interesit të shqiptarëve në përgjithësi.

Shasivari u ka bërë thirrje të gjithëve që të lexojnë deklaratën e tij ashtu siç është shprehur, në vend që t’i atribuojnë fjalë që nuk i ka thënë.

Ai ka shtuar se keqinterpretimet vijnë nga “ata që përdorin çdo gjë të shenjtë në betejë politike”.

The post Shasivari sqaron qëndrimin për Gjykatën Speciale: Nuk e kam mbështetur, tani duhet të përballemi me pasojat appeared first on Albeu.com.