Trupa Archives - Albeu.com

Trajnohet trupa e inspektorëve të ILD sipas udhëzuesve të Komsionit Evropian

D Marku — Fri, 04 Jul 2025 16:16:29 +0000

Njësia e inspektorëve dhe ajo e ndihmës inspektorëve në Zyrën e Inspektorit të Lartë të Drejtësisë zhvilluan një trajnim dyditor me fokus rritjen e aftësive inspektuese sipas udhëzuesve të CEPEJ (Komisioni Evropian për Efikasitetin e Drejtësisë).

Aktiviteti është pjesë e strategjisë së punës të Zyrës së Inspektorit të Lartë të Drejtësisë për trajnim të vazhdueshëm të stafit dhe u mbështet nga projekti HFIII, Forcimi i Cilësisë dhe Efikasitetit të Drejtësisë në Shqipëri (SEJ IV) i Bashkimit Evropian dhe Këshillit të Evropës.

Në nisje të trajnimit, Inspektori i Lartë i Drejtësisë, Artur Metani shprehu falenderimet për CEPEJ, që e ka mbështetur Zyrën e Inspektorit të Lartë të Drejtësisë që në fillimet e punës së vet dhe vuri theksin tek rëndësia që i kushton institucioni përditësimit të stafit të inspektimit me njohuritë më të mira profesionale mbi metodikat e proceset e punës për verifikimin e hetimin e gjyqtarëve e prokurorëve.

Ekspertët e CEPEJ, José Manuel Santos Pais, prokuror në Prokurorinë e Përgjithshme të Portugalisë dhe Gilles Accomando, drejtor i Qendrës së Trajnimit të Dhomës së Avokatëve të Parisit, ish-kryetar Gjykate Apeli, i njohën inspektorët e ILD-së me parimet udhëzuese për vlerësimin e gjyqtarëve dhe prokurorëve dhe transparencën e kritereve të vlerësimit, menaxhimin e kohës nga prokurorët dhe listën e kontrollit për menaxhimin e kohës.

Inspektorët dhe ndihmës inspektorët e ILD-së zhvilluan diskutime me ekspertët duke krahasuar metodologjinë e udhëzimet e CEPEJ me kuadrin ligjor dhe praktikat kombëtare në Shqipëri, me fokus te rekomandimet që mund të përshtaten dhe zbatohen në kontekstin vendas

The post Trajnohet trupa e inspektorëve të ILD sipas udhëzuesve të Komsionit Evropian appeared first on Albeu.com.

Përdhunime dhe trupa të ngrënë nga kafshët, emigrantët akuzojnë Arabinë Saudite për vrasje makabër: Nuk ndalonin së qëlluari

D Marku — Fri, 28 Feb 2025 07:44:37 +0000

Forcat e Arabisë Saudite akuzohen për përdorimin e forcës pa dallim kundër emigrantëve në kufijtë e tyre, me raportime për vdekje dhe raportime të shumta të grave të përdhunuara.

Emigrantët etiopianë që tentuan të kalonin nga Jemeni fqinj midis 2019 dhe 2024 kanë treguar për Guardian se ndodheshin nën breshëritë automatikut dhe se kanë parë trupa të kalbur në zonën kufitare.

“Unë personalisht pashë tre njerëz të vdisnin pranë meje”, tha një etiopian, i cili tentoi të kalonte natën në provincën Najran të Saudisë me dhjetëra të tjerë në vitin 2022. “Rreth meje kishte pjesë trupash të të plagosurve dhe të vdekurve.”

Një tjetër emigrant foli për plagët e predhave në këmbë dhe në shpinë. Një i tretë dyshohet se ishte dëshmitar i përdhunimit të tre grave etiopiane nga burra me uniforma të rojeve kufitare saudite. Të tjerë përshkruan rrahje dhe sulme seksuale.

Një burrë tjetër, i cili tentoi të kalonte në janar 2023, tha për Guardian: “Udhëtimi ishte i tmerrshëm. Gjatë rrugës, ne hasëm shumë trupa të dekompozuar që ishin ngrënë nga kafshët. Rojet kufitare vazhduan të qëllonin drejt nesh ndërsa ne ecnim nëpër terrene të huaja.”

Plumbat kanë goditur dy vajza të reja, tha ai. “Njëra është goditur në gjoks dhe tjetra në pjesën e pasme të qafës. Të dyja vajzat kanë gjetur vdekjen e menjëhershme. Shumë emigrantë ranë nga një shkëmb ndërsa përpiqeshin të arratiseshin. Të tjerët u kapën ose u plagosën me armë zjarri. Nuk e kemi idenë se çfarë ka ndodhur me ta. Nuk e dimë nëse dy vajzat janë varrosur ndonjëherë”.

The post Përdhunime dhe trupa të ngrënë nga kafshët, emigrantët akuzojnë Arabinë Saudite për vrasje makabër: Nuk ndalonin së qëlluari appeared first on Albeu.com.

SHBA dërgon mijëra trupa shtesë në Lindjen e Mesme

D Marku — Mon, 30 Sep 2024 17:03:01 +0000

Shtetet e Bashkuara do të dërgojnë “disa mijëra” trupa shtesë në Lindjen e Mesme për të rritur sigurinë – dhe ata do të jenë të përgatitur për të mbrojtur Izraelin nëse është e nevojshme, thotë Pentagoni.

Skuadriljet e shumta të avionëve luftarakë dhe personeli i nevojshëm për t’i mbështetur ata do të përbëjnë praninë e shtuar, tha zëdhënësja Sabrina Singh.

Avionët fillimisht supozohej të zëvendësonin skuadriljet tashmë atje, por tani të dy do të qëndrojnë në vend për të dyfishuar fuqinë ajrore.

The post SHBA dërgon mijëra trupa shtesë në Lindjen e Mesme appeared first on Albeu.com.

Suedia dërgon trupa në vijën e frontit të NATO-s, ushtria përgatitet për anëtarësim

Xh — Sat, 10 Feb 2024 17:44:24 +0000

Suedia do të dërgojë trupa luftarake në Letoni, ndërsa vendi po përgatitet për anëtarësimin e mundshëm në NATO.

Ushtarët suedezë do të jenë pjesë e linjës së parë të mbrojtjes kundër një pushtimi të mundshëm rus në Baltik, shkruan Euronews.

Ndërsa vendi ende nuk është anëtarësuar zyrtarisht në aleancën ushtarake të udhëhequr nga SHBA-ja, Suedia tashmë ka filluar të operojë në mënyrë aktive brenda kornizave të NATO-s.

Stokholmi do të dërgojë një njësi batalioni prej rreth 600-800 ushtarësh dhe forca të blinduara të rënda për t’u bërë pjesë e “Pranisë së Përparuar të Përmirësuar” të NATO-s.

Batalioni do të qëndrojë në Letoni me rotacion gjashtëmujor.

Pas pushtimit rus të Ukrainës, Suedia nisi një përpjekje për t’u bashkuar me aleancën në maj 2022, duke hequr dorë nga një politikë e gjatë e neutralitetit, megjithëse ishte e lidhur ngushtë me bllokun.

The post Suedia dërgon trupa në vijën e frontit të NATO-s, ushtria përgatitet për anëtarësim appeared first on Albeu.com.

NATO-ja e gatshme të dërgojë më shumë trupa në Kosovë në rast të tensioneve të reja

E S — Tue, 20 Sep 2022 12:36:10 +0000

NATO-ja është e gatshme të rrisë numrin e trupave në Kosovë, nëse ka rritje të tensioneve në mesin e minoritetit serb, lidhur me vendimin e Qeverisë së Kosovës për regjistrimin e makinave me targa RKS – Republika e Kosovës.

“Ne jemi vigjilentë dhe të gatshëm për të vepruar… nëse kemi rritje të tensioneve, mirëpo edhe mund të rrisim numrin e forcave rezervë… mund ta marrim këtë vendim brenda një kohe të shkurtër”, ka thënë zëvendëskomandanti i misionit të NATO-s në Kosovë (KFOR), Luca Piperni.

Ai i ka bërë këto deklarata para gazetarëve në selinë e KFOR-it në Prishtinë. Situata në veri të Kosovës është tensionuar më 31 korrik, një ditë para se Qeveria e Kosovës të niste zbatimin e vendimit për dokumentet për hyrje/dalje dhe regjistrimin e targave të makinave në RKS.

Serbët lokalë kanë vendosur barrikada në rrugët që çojnë në pikëkalimet kufitare mes Kosovës dhe Serbisë – Jarinjë dhe Bërnjak.

Për shkak të tensioneve, dhe me kërkesë të mekanizmave ndërkombëtarë, Qeveria e Kosovës e pati shtyrë zbatimin e vendimit për një muaj dhe barrikadat më pas janë hequr. Ndërkohë palët janë dakorduar për çështjen e dokumenteve për hyrje/dalje, ndërsa vendimi për regjistrim të makinave, ka hyrë në fuqi më 1 shtator dhe do të zgjasë deri më 31 tetor.

Autoritetet në Kosovë nuk kanë ofruar hollësi se si do të veprojnë pas skadimit të këtij afati. Në Kosovë vlerësohet se janë rreth 10.000 makina me targa të qyteteve të Kosovës – kryesisht KM (Mitrovicë e Kosovës) të cilat i lëshon Serbia. Kosova i konsideron këto targa ilegale, meqë Prishtina dhe Beogradi kanë marrëveshje për liri të lëvizjes prej vitit 2011.

Piperni ka thënë se situata aktualisht është e qetë, mirëpo e brishtë, andaj NATO-ja nuk përjashton mundësinë e tensioneve të reja, apo dhunës, kur të skadojë afati i regjistrimit të makinave më 31 tetor.

“Nëse situata përkeqësohet, ne jemi gati të intervenojmë, ne jemi të gatshëm që të jemi në mes të protestuesve dhe organizatave të sigurisë”, ka thënë ai.

“Ne kemi forca të mjaftueshme për t’u përballur me situatën. Me një numër të tillë trupash, ne mund t’i japim fund secilit lloj të tensionit”, ka thënë Piperni, duke iu referuar trupave jashtë Kosovës, që mund t’i angazhojë NATO-ja si përforcime.

Autoritetet në Serbi kanë thënë se vendimet e tilla të Qeverisë së Kosovës synojnë dëbimin e serbëve nga veriu i Kosovës. Megjithatë, ato nuk kanë paraqitur një provë për pretendime të tilla. Dialogu për normalizim të marrëdhënieve mes Kosovës dhe Serbisë, ka nisur më 2011. Palët kanë nënshkruar disa marrëveshje, por jo të gjitha janë zbatuar. Kosova insiston që dialogu të finalizohet me njohje të ndërsjellë, derisa Serbia përmend zgjidhje kompromisi./REL/

The post NATO-ja e gatshme të dërgojë më shumë trupa në Kosovë në rast të tensioneve të reja appeared first on Albeu.com.

Gjenden trupa të dekompozuar në Meksikë, viktima më e re është vetëm 16 vjeç

E S — Wed, 13 Jul 2022 05:30:50 +0000

Foto ilustruese

Policia meksikane ka gjetur 23 trupa pranë burimeve termale. Pas një kërkimi 3-javor për personat e zhdukur, policia gjeti eshtrat e 23 personave në shtetin perëndimor meksikan të Michoacan.

Prokuroria bëri me dije se deri tani janë identifikuar 8 prej tyre.

Viktimat janë nga 16 deri në 60 vjeç dhe janë vrarë në periudha të ndryshme, nga 3 vjet më parë deri në 6 muaj më parë.

Trupat e tjerë janë dekompozuar totalisht dhe është kërkuar testi i ADN-së për t’i identifikuar.

Trupat u gjetën në qytetin Los Negritos në komunën e Villamar.

Është një nga 13 qytetet e rajonit të njohur si “Rruga e vdekjes”, “Corredor de la Muerte” ku raportohet për luftën midis bandave, dy fraksioneve të kartelit të drogës Jalisco New Generation.

Nuk dihet nëse kriminelët i kanë hedhur qëllimisht trupat në Los Negritos, i cili njihet për depozitat shëruese të baltës së zezë, me shpresën për t’i zhdukur më shpejt.

Zona ndodhet jo shumë larg qytetit të La Barca, ku në vitin 2013 autoritetet gjetën rreth 60 trupa në varreza masive të lidhura me kartelin Jalisco.

Kartelet e drogës në Meksikë shpesh përdorin gropa të fshehta varrimi për të asgjësuar trupat e viktimave të rrëmbimit ose rivalëve. Më shumë se 100,000 njerëz janë aktualisht të zhdukur në Meksikë./albeu.com

The post Gjenden trupa të dekompozuar në Meksikë, viktima më e re është vetëm 16 vjeç appeared first on Albeu.com.

Një tjetër varr masiv me 900 trupa zbulohet në Kiev

E S — Fri, 29 Apr 2022 20:50:30 +0000

Një tjetër varr masiv që mban 900 trupa është gjetur në rajonin e Kievit.

Lajmin e bëri të ditur presidenti ukrainas Volodymyr Zelensky. Në një intervistë me mediat polake, ai akuzoi trupat ruse për “pastrimin e gjurmëve” dhe përdorimin e krematoriumeve të lëvizshëm për të djegur kufomat.

“Askush nuk e di se sa njerëz kanë vdekur në total. Do të ketë pasoja, do të ketë një hetim,” tha Zelensky.

Detaje të tjera presidenti i Ukrainës nuk dha. Vendi më herët akuzoi trupat ruse për vrasjen e qindra civilëve në Bucha, Borodyanka dhe Irpin, qytete pranë kryeqytetit Kiev, të cilat janë pushtuar për javë të tëra nga Rusia./albeu.com

The post Një tjetër varr masiv me 900 trupa zbulohet në Kiev appeared first on Albeu.com.

Zelensky nënshkruan dekretin: Tërheq ushtarët ukrainas nga Kosova për të luftuar kundër Rusisë

E S — Tue, 08 Mar 2022 07:52:07 +0000

Presidenti i Ukrainës, Volodymyr Zelensky, ka nënshkruar një dekret ku u bën thirrje forcave ushtarake që janë jashtë vendit me mision paqeruajtës të kthehen në Ukrainë për të luftuar agresionin rus, përfshirë edhe 40 ushtarët që shërbejnë në Kosovë në kuadër të KFOR-it.

Zëvendës shefi i Zyrës së Presidentit, Andriy Sibiga ka publikuar dekretin e nënshkruar nga Zelensky.

“Presidenti i Ukrainës, Zelensky, ka vendosur të thërrasë paqeruajtësit Ukrainës me përvojë të lartë ushtarake nga të gjitha misionet në botë së bashku me pajisjet e tyre për të forcuar ushtrinë ukrainase tani kundër agresionit rus”, ka shkruar ai. /Express

The post Zelensky nënshkruan dekretin: Tërheq ushtarët ukrainas nga Kosova për të luftuar kundër Rusisë appeared first on Albeu.com.

500 trupa të tjera amerikane do të vendosen në Poloni, Rumani, Gjermani dhe Greqi, thotë Pentagoni

E S — Mon, 07 Mar 2022 22:32:38 +0000

Pentagoni njoftoi të hënën se 500 trupa të tjera amerikane do të vendosen në Evropë për të përforcuar krahun e NATO-s, duke përfshirë Poloninë, Rumaninë, Gjermaninë dhe Greqinë.

Sekretari i shtypit i Pentagonit, John Kirby, njoftoi dislokimet e reja të hënën, të cilat ai tha se po pozicionohen për të mbështetur forcat amerikane tashmë në Evropë, në përgjigje të pushtimit rus të Ukrainës.

Dislokimet e reja përfshijnë aeroplanë furnizues me karburant KC-135 nga Baza e Forcave Ajrore Fairfield në Spokane, Uashington, në Greqi, së bashku me 150 personel për mbështetjen e karburantit. Një qendër operacionesh mbështetëse ajrore e përbërë nga 40 trupa nga Fort Stewart, Gjeorgji, po vendosen në Poloni dhe Rumani.

Dhe 300 personel amerikan po vendosen në Gjermani për të krijuar një kompani municionesh modulare nga Fort Bragg, Karolina e Veriut dhe një kompani mirëmbajtjeje mbështetëse nga Fort Stewart.

The post 500 trupa të tjera amerikane do të vendosen në Poloni, Rumani, Gjermani dhe Greqi, thotë Pentagoni appeared first on Albeu.com.

SHBA: Rusia ka grumbulluar rreth 190 mijë trupa ushtarakë në Ukrainë

E S — Fri, 18 Feb 2022 13:31:20 +0000

SHBA ka deklaruar se numri i trupave ruse në kufijtë e Ukrainës është më i lartë se sa është raportuar. Michael Carpenter, ambasadori i SHBA-së në Organizatën për Siguri dhe Bashkëpunim në Europë tha në një deklaratë në një takim të OSBE-së se numri mund të jetë dyfishuar që nga fundi i muajit të kaluar.

“Ne vlerësojmë se Rusia ka të ngjarë të ketë vendosur midis 169,000-190,000 trupa ushtarakë në kufi me Ukrainën në krahasim me rreth 100,000 në 30 janar”.

Sipas tij, ky është mobilizimi më i madh ushtarak në Europë që nga Lufta e Dytë Botërore.

The post SHBA: Rusia ka grumbulluar rreth 190 mijë trupa ushtarakë në Ukrainë appeared first on Albeu.com.