Parisi po zbaton masa të reja për personat që drejtojnë skuterë elektrikë, me synimin për të përmirësuar sigurinë në trafikun urban të kryeqytetit francez.

Rregullat e miratuara kërkojnë që përdoruesit e këtyre mjeteve në rrugët e qytetit të mbajnë helmetë, si dhe të pajisen me jelek reflektues ose me një element tjetër reflektues.

Masat janë ndërmarrë pas shtimit të aksidenteve me skuterë elektrikë në Paris. Përmes tyre, autoritetet franceze kërkojnë t’i bëjnë drejtuesit e skuterëve më të dukshëm, sidomos gjatë natës ose kur shikueshmëria është e kufizuar.

Përdorimi i pajisjeve reflektuese pritet t’u mundësojë drejtuesve të automjeteve dhe personave të tjerë në rrugë që t’i vërejnë më shpejt përdoruesit e skuterëve elektrikë. Mbajtja e helmetës, ndërkaq, ka për qëllim të zvogëlojë mundësinë e dëmtimeve serioze gjatë rrëzimeve ose përplasjeve.

Mosrespektimi i këtyre detyrimeve shoqërohet me ndëshkime financiare. Drejtimi i skuterit pa helmetë gjobitet me 135 euro, ndërsa mungesa e jelekut reflektues ose e një pajisjeje tjetër reflektuese dënohet me 35 euro.

Autoritetet e Parisit shpresojnë që rregullat e reja të kenë efekt parandalues dhe të sjellin uljen e numrit të aksidenteve. Skuterët elektrikë po përdoren gjithnjë e më shumë në kryeqytetin e Francës, por përhapja e tyre ka ngritur njëkohësisht shqetësime për sigurinë e drejtuesve, këmbësorëve dhe përdoruesve të tjerë të rrugës.

The post Parisi ashpërson ndjeshëm rregullat për përdoruesit e skuterëve elektrikë appeared first on Albeu.com.

Pas hyrjes në fuqi më 14 korrik të ndryshimeve në Ligjin për Sigurinë në Trafikun Rrugor, policia ka nisur të ndëshkojë drejtuesit e trotinetëve elektrikë që shkelin rregullat e reja. Deri tani janë shqiptuar gjithsej 12 gjoba.

Të dhënat e Ministrisë së Punëve të Brendshme tregojnë se tre drejtues janë gjobitur për përdorimin e trotinetit elektrik pa helmetë mbrojtëse. Për këtë shkelje parashikohet një gjobë prej 50 euro.

Nëntë masa të tjera, secila në vlerën 80 euro, janë vendosur ndaj personave që kanë drejtuar skuterë në zona ku qarkullimi i këtyre mjeteve është i ndaluar.

Po ashtu, është evidentuar një rast i përdorimit të telefonit celular gjatë drejtimit të një trotineti elektrik, për të cilin është shqiptuar gjobë prej 100 euro.

MPB-ja bëri të ditur se të gjitha sanksionet e vendosura deri më tani u përkasin personave të rritur, ndërsa nuk është konfiskuar asnjë trotinet elektrik.

The post Policia nis ndëshkimin e drejtuesve të trotinetëve elektrikë appeared first on Albeu.com.

Policia e rajonit të Shkupit ka bërë të ditur se është privuar nga liria një person i dyshuar për vjedhjen e një trotineti elektrik në Shkup.

Mjeti i marrë është kthyer te pronari i tij.

“Më 04.07.2026, rreth orës 21:00 në Shkup, zyrtarët policorë të SPB Shkup arrestuan A.Ç. (34) nga Shkupi, pas një denoncimi se po atë ditë, në periudhën nga ora 17:00 deri në 20:00, para një objekti në komunën Qendër, kishte vjedhur një trotinet elektrik në pronësi të B.R. (38) nga Shkupi. Trotineti elektrik i është kthyer pronarit, ndërsa pas dokumentimit të plotë të rastit do të parashtrohet kallëzimi përkatës”, thuhet nga MPB.

The post Arrestohet në Shkup i dyshuari për vjedhjen e një trotineti elektrik, mjeti i rikthehet pronarit appeared first on Albeu.com.

Ndryshimet ligjore që parashikojnë rregulla më të forta për përdoruesit e trotineteve elektrikë janë pritur pozitivisht nga qytetarët. Sipas tyre, ky mjet lëvizjeje paraqet rrezik të lartë dhe, madje, në këtë drejtim duhen vendosur edhe kufizime më të ashpra.

“Këto ndryshime dhe vendime janë në rregull sepse jeta e njeriut nuk ka çmim. Vërehet se fëmijë shumë të vegjël vozisin shumë shpejt dhe më së shpeshti janë nga 2 dhe tre në trotinet. Dhe për fat të keq edhe prindërit e bëjnë një gjë të tillë, vozisin fëmijë me trotinet, gjë që nuk është e sigurt….Vlerësoj se secili duhet t’i respektojë.”

Një tjetër qytetar tha se rreziku është i madh dhe kërkohet kujdes maksimal gjatë drejtimit. “Është rrezik, me të vërtetë rrezik është, duhet pasur shumë kujdes, shpejtësia të jetë në minimum, më e ulët, edhe shumë me kujdes të drejtohet…Do të jetë mirë të bëhet kufizimi i shpejtësisë dhe kujdes, vozitësit duhet të jenë shumë të kujdesshëm”, tha ai.

Një qytetar tjetër u shpreh se shqetësimi për sigurinë duhet të jetë parësor dhe se e mirëpret ndërhyrjen ligjore. “Për merak është, më mirë shëndetin…Po shumë janë të rrezikshëm i thyen hundët menjëherë.-Domethënë ju i mirëprisni ndryshimet ligjore– Po si jo, ja në Shqipëri i kanë hequr”, tha ai.

Ka edhe zëra që kërkojnë ndalim të plotë të tyre. “Sipas meje personalisht, duhet tërësisht të ndalohen. Por kur veçmë i vozisin, jo kufizim 20 kilometra në orë, siç parasheh ligjvënësi, sepse për automjetet në nivel botëror jastëkët mbrojtës bëhen që të durojnë goditje deri në 5 kilometra në orë, e ata japin 20, pra të lëndon. Maksimumi 6-7 kilometra në orë.” – qytetar.

Me ndryshimet e reja ndalohet përdorimi i trotineteve për personat nën 18 vjeç. Po ashtu, shpejtësia maksimale kufizohet në 20 kilometra në orë dhe nuk lejohet që në një trotinet të udhëtojnë njëkohësisht dy persona.

Rregullat e reja përcaktojnë se, përveç gjobës, do të zbatohet edhe konfiskim i përkohshëm i mjetit për ngasësit e mitur, për ata që e tejkalojnë shpejtësinë e lejuar, për rastet kur drejtuesi transporton edhe një person tjetër, si dhe kur trotineti drejtohet nën ndikimin e alkoolit.

Ligji i ri obligon që trotinetet të lëvizin në korsitë e biçikletave. Në rastet kur këto korsi mungojnë, ato duhet të lëvizin në trotuar, por jo me shpejtësi më të madhe se 6km/h, çka në praktikë nënkupton se trotineti duhet të shtyhet dhe jo të ngaset.

Drejtuesi i trotineteve është i detyruar të zbresë nga mjeti kur kalon rrugën në vizë bardha.

Po ashtu, ndalohet ngasja pa duar, lëvizja me një rrotë dhe kapja pas ndonjë makine tjetër. Për këto shkelje, gjobat rriten nga 50 në 100 euro. Ndërkaq, për ngasje nën ndikim të alkoolit, gjoba do të jetë 275 euro dhe do të pasojë konfiskimi i mjetit. Për prindërit e fëmijëve nën 18 vjeç, parashihet gjobë prej 225 eurosh, ndërsa mjeti konfiskohet për 30 ditë.

Sipas statistikave të paraqitura në Kuvend, nga viti 2024 deri në maj të vitit 2026, janë evidentuar 2352 aksidente në trafik ku janë përfshirë ngasës të mopedëve, trotineteve elektrikë dhe motoçikletave. Nga këto aksidente, 46 persona kanë humbur jetën, ndërsa 585 të tjerë kanë marrë lëndime të rënda trupore. Mbi 70 për qind e të aksidentuarve kanë qenë fëmijë të mitur. /Alsat.mk

The post Qytetarët mbështesin masat e reja më të forta për trotinete elektrikë appeared first on Albeu.com.