Deri para pak muajsh, fermerët në Kosovë deklaronin se rreth 30 për qind e qumështit të freskët mbetej pa u shitur. Ata e shpjegonin këtë situatë, ndër të tjera, me konkurrencën e produkteve të përgatitura nga qumështi pluhur dhe yndyra bimore.

Pas vendimit të Qeverisë për kufizimin e përdorimit të këtyre lëndëve në industrinë e qumështit, disa fermerë thonë se në treg po vërehet një përmirësim.

Shifrat e Shoqatës së Prodhuesve të Qumështit, të siguruara nga Radio Evropa e Lirë, dëshmojnë gjithashtu një rritje të sasisë së qumështit që fermerët kanë shitur.

Gjatë gjashtëmujorit të parë të këtij viti, fermerët bashkëpunues të Shoqatës grumbulluan dhe shitën më shumë se 45 milionë litra qumësht. Në të njëjtën periudhë të vitit të kaluar, kjo sasi ishte rreth 35 milionë litra.

Ndërkohë, ka rënë edhe vlera e importeve të vajit të palmës dhe qumështit pluhur.

Arbnor Binakaj, fermer nga rrethina e Gjakovës, kujdeset për rreth 40 lopë dhe prodhon çdo ditë nga 270 deri në 300 litra qumësht.

Ai tregon se në vitet e mëparshme pasiguria për shitjen e prodhimit e kishte bërë të hezitonte për investime dhe zgjerim të fermës.

Sipas tij, zhvillimet e fundit kanë ndryshuar situatën.

“Kemi kaluar kriza të herëpashershme dhe periudha kur qumështi nuk kishte treg. Tash ka shenja stabiliteti dhe nuk po mbetet qumësht pa u shitur. Për këtë arsye do t’i shtoj investimet dhe kapacitetet e prodhimit, pasi deri tani vaji i palmës dhe qumështi pluhur e kanë zëvendësuar produktin tonë të freskët”, tha Binakaj për Radion Evropa e Lirë.

Plani i tij është që numrin e lopëve ta rrisë nga 40 në 100, megjithëse realizimi i këtij investimi do të varet edhe nga vazhdimi dhe zbatimi i masave të marra.

“Qeveria duhet t’i mbajë në fuqi masat që ka ndërmarrë, sepse ato u japin fermerëve siguri, perspektivë dhe qëndrueshmëri”, u shpreh Binakaj.

Edhe Xhevdet Morina, fermer nga Rogova e Hasit, pret ndryshime në treg. Ai ka rreth 70 lopë dhe prodhon deri në 900 litra qumësht në ditë.

Megjithatë, Morina vlerëson se ndalimi ose kufizimi i vajit të palmës dhe qumështit pluhur nuk është i mjaftueshëm në vetvete.

Ai kërkon që blerësit të informohen qartë për përbërjen e produkteve që marrin.

“Në markete duhet të ketë ndarje dhe etiketim të qartë të produkteve me yndyrë bimore nga ato me yndyrë shtazore, në mënyrë që konsumatori ta dijë saktësisht se çfarë po blen”, tha Morina për Radion Evropa e Lirë.

Masat e Qeverisë u ndërmorën pas ankesave të fermerëve se një sasi e madhe e qumështit të freskët nuk po gjente blerës.

Më 28 prill, Ministria e Bujqësisë miratoi një paketë kufizimesh për tregun e qumështit, e cila synonte mbrojtjen e prodhimit vendor dhe të konsumatorëve.

Kjo paketë parashikon kategorizim dhe deklarim më të qartë të produkteve, ndalon përzierjen e qumështit të freskët me produkte që përmbajnë qumësht pluhur ose vaj palme dhe përfshin kontrolle bashkë me analiza laboratorike.

Qumështi pluhur u përfshi gjithashtu në skemën e akcizës.

Megjithatë, rregullat e reja nuk nënkuptojnë se çdo produkt me yndyrë bimore ose qumësht pluhur është ndaluar përgjithmonë.

Operatorët që përdorin këta përbërës duhet të përmbushin kushtet e reja për licencim, kategorizim dhe deklarim. Nëse përbërja nuk e arsyeton një emërtim të tillë, këto produkte nuk mund të shiten si produkte tradicionale të qumështit.

Kontrollet e zhvilluara pas hyrjes në fuqi të masave zbuluan mospërputhje në treg.

Në fillim të gushtit, Agjencia e Ushqimit dhe Veterinarisë njoftoi se afërsisht 20 për qind e mostrave të produkteve të qumështit kishin dallime mes përbërjes reale dhe informacionit të shënuar në etiketë.

Në pjesën më të madhe të rasteve u konstatua prani e vajit të palmës që nuk ishte deklaruar.

AUV-i tha se operatorët që përdorin vaj palme ose qumësht pluhur duhet të pajisen me licenca të veçanta. Po ashtu, produktet e tyre nuk mund të shiten me emërtime tradicionale si “qumësht”, “djathë”, “gjizë” ose “krem”.

Pas këtyre vendimeve, Ministria e Industrisë, Ndërmarrësisë, Tregtisë dhe Inovacionit nisi inspektime në markete, depo dhe te importuesit, si dhe te shitësit me shumicë e pakicë.

Bizneseve iu kërkua të hiqnin nga raftet produktet ku autoritetet përgjegjëse kishin gjetur mospërputhje.

Radio Evropa e Lirë i kërkoi MINTI-t informacion për sasinë e produkteve të larguara nga tregu, por Ministria nuk iu përgjigj kërkesës.

Në disa markete tashmë mungojnë produkte të qumështit që më herët ishin pjesë e ofertës.

Të dhënat e Doganës së Kosovës paraqesin një tjetër tregues të ndryshimeve në këtë sektor.

Gjatë periudhës janar-korrik, vlera e importeve të vajit të palmës dhe qumështit pluhur ishte më e ulët se në të njëjtën periudhë të vitit të kaluar.

Në shtatë muajt e parë të këtij viti, Kosova importoi vaj palme me vlerë rreth 2.3 milionë euro. Në të njëjtën periudhë të vitit 2025, importet kapnin rreth 3 milionë euro.

Diferenca u bë më e dukshme pas muajit maj.

Vetëm nga maji deri në korrik, importi i vajit të palmës ishte rreth 270 mijë euro më i ulët se gjatë të njëjtëve muaj të vitit të kaluar.

Megjithatë, këto shifra nuk dëshmojnë se rënia e importeve është pasojë e drejtpërdrejtë e masave qeveritare.

Vaji i palmës përdoret edhe jashtë industrisë ushqimore, përfshirë sektorin e kozmetikës.

Prandaj, ndryshimi në vlerën totale të importeve të këtij produkti nuk mund t’i atribuohet vetëm tregut të qumështit.

Rënie është shënuar edhe te importi i qumështit pluhur.

Vlera e tij ra nga rreth 1.8 milion euro në shtatë muajt e parë të vitit 2025, në afërsisht 1.3 milion euro gjatë së njëjtës periudhë të këtij viti.

Naser Bajraktari, kryetar i Shoqatës së Prodhuesve të Qumështit, beson se masat mund t’ua lehtësojnë fermerëve shitjen e qumështit të freskët.

Ai pret që kufizimi i vajit të palmës dhe i produkteve alternative në qumështore të shtojë kërkesën për qumështin vendor. Sipas tij, ndikimi i plotë i këtyre masave mund të bëhet më i dukshëm në periudhën e ardhshme.

Bajraktari thotë se fermerët kanë mundësi ta rrisin prodhimin dhe të mbulojnë një pjesë më të madhe të kërkesës së tregut.

Radio Evropa e Lirë kontaktoi edhe disa kompani përpunuese që e përdorin qumështin e freskët si lëndë të parë.

Disa prej kompanive, të cilat kërkuan të mos identifikoheshin, thanë se kanë shtuar blerjet e qumështit të freskët, por nuk dhanë shifra për këtë rritje.

Kompani të tjera njoftuan se e kanë ndalur përkohësisht prodhimin e disa artikujve, derisa të përmbushin kushtet e licencimit.

Pavarësisht optimizmit të fermerëve, industria nuk e konsideron ende ndryshimin si një prirje të qëndrueshme.

Gani Durmishi nga Shoqata e Industrisë së Qumështoreve të Kosovës deklaron se disa kompani kanë ende rezerva produktesh të pashitura dhe se kërkesa për qumësht të freskët nuk është rritur ndjeshëm.

Ai thotë se shitjet e disa produkteve, pa i specifikuar ato, kanë rënë deri në 50 për qind.

Durmishi e lidh këtë rënie me pasigurinë e krijuar te konsumatorët pas kontrolleve dhe zbulimit të përbërësve të padeklaruar.

Ai i kërkon AUV-it të publikojë se cilat produkte vendore i kanë kaluar analizat dhe i përmbushin standardet e sigurisë. Sipas tij, një informacion i tillë do të ndihmonte në rikthimin e besimit të konsumatorëve.

Durmishi konfirmon gjithashtu se disa fabrika kanë pezulluar përkohësisht prodhimin e artikujve të caktuar me vaj palme ose qumësht pluhur, derisa të sigurojnë licencat dhe të përfundojnë kategorizimin sipas kërkesave të reja.

Sipas tij, vështirësia kryesore e industrisë nuk është përpunimi, por shitja e produkteve të gatshme.

Industria ka kapacitet për të përpunuar rreth një milion litra qumësht në ditë, ndërsa aktualisht përpunon deri në 300 mijë litra.

Kjo e nxjerr në pah paradoksin e tregut të qumështit në Kosovë.

Prodhimi vendor nuk është i mjaftueshëm për të përmbushur të gjitha nevojat e konsumit.

Ndërkohë, industria deklaron se punon shumë poshtë kapacitetit të saj përpunues.

Prapëseprapë, fermerët kanë raportuar se një pjesë e qumështit të freskët nuk ka gjetur blerës.

Sipas Ministrisë së Bujqësisë, prodhimi në Kosovë mbulon vetëm rreth 66 për qind të nevojave të tregut, ndërsa pjesa tjetër plotësohet nga importi.

Gjatë vitit 2024, industria e qumështit në Kosovë prodhoi produkte me vlerë 135.2 milionë euro.

Në të njëjtën kohë, numri i lopëve qumështore në vend ka shënuar rënie.

Në vitin 2024, Kosova kishte 126.549 lopë qumështore, ose 3.348 më pak se në vitin paraprak, kur numëroheshin 129.897.

Fermerët thonë se një nga arsyet e kësaj rënieje është pasiguria e zgjatur në treg.

Për të nxitur prodhimin, Ministria e Bujqësisë u jep fermerëve subvencion prej 90 eurosh në vit për secilën lopë. Për çdo litër qumësht, ata marrin nga 2 deri në 7 centë, në varësi të cilësisë.

Megjithëse Kosova importon rreth një të tretën e produkteve të qumështit që konsumon, fermerët vendorë kanë hasur vështirësi në shitjen e prodhimit. Kjo tregon se problemi nuk përcaktohet vetëm nga sasia e qumështit të prodhuar.

Çmimet, përdorimi i produkteve zëvendësuese, importet, mënyra e furnizimit të industrisë me lëndë të parë dhe aftësia e tregut për të përthithur prodhimin vendor janë elemente të një zinxhiri më të ndërlikuar. / REL

The post Tregu i qumështit në Kosovë shfaq shenja stabilizimi për fermerët appeared first on Albeu.com.

Inspektorati Qendror i Mbikëqyrjes së Tregut (IQMT) ka vijuar inspektimet në tregun e Kosovës, me qëllim kontrollin e produkteve të qumështit.

Kontrollet janë zhvilluar në markete të rajoneve të Prizrenit, Ferizajt, Vushtrrisë dhe Gjilanit. Gjatë verifikimeve, inspektorët kanë gjetur në disa pika shitjeje produkte që Agjencia e Ushqimit dhe Veterinarisë (AUV) i kishte ndaluar për tregtim.

Produktet e larguara nga raftet e marketeve janë: Qumësht 3.2% VIDAS – 1 L; Holla Cooking Cream – 1 L; Garden Milk – 1 L; Spec me krem VIDAS – 1 kg; Magic Cream – 400 g; Schmand 18% – 800 g; Djathë i bardhë 100% – 250 g.

QMT u ka kërkuar operatorëve ekonomikë që t’i heqin menjëherë këto artikuj nga hapësirat e shitjes, në zbatim të vendimeve të institucioneve përgjegjëse dhe legjislacionit në fuqi.

Njëkohësisht, inspektorati u ka bërë thirrje operatorëve ekonomikë të zbatojnë pa vonesë urdhrat për tërheqjen e produkteve të ndaluara.

The post IQMT urdhëron heqjen nga tregu të produkteve të qumështit të ndaluara appeared first on Albeu.com.

Pas kontrolleve zyrtare dhe ekzaminimeve laboratorike, Agjencia e Ushqimit dhe Veterinarisë (AUV) ka urdhëruar që 12 produkte të Qumështores VITA të tërhiqen nga tregu, pasi rezultatet kanë treguar mospërputhje me përmbajtjen e deklaruar për konsumatorët.

Sipas njoftimit të Agjencisë, te produktet që prezantoheshin dhe shiteshin si produkte me përmbajtje shtazore janë zbuluar vaj palme, qumësht pluhur dhe niseshte, pa u deklaruar në etiketim.

AUV sqaron se gjithsej 12 produkte janë vlerësuar si jokonforme për shkak të pranisë së padeklaruar të vajit të palmës, qumështit pluhur dhe/ose niseshtes. Për këtë arsye, është kërkuar largimi i tyre nga tregu.

Gjetjet më serioze, sipas Agjencisë, kanë të bëjnë me produktet që tregtoheshin dhe deklaroheshin si qumësht.

Nga katër mostra të marra prej katër produkteve të shitura, paraqitura dhe etiketuara si qumësht, të gjitha kanë rezultuar jokonforme. Në dy prej tyre është konstatuar vaj palme, ndërsa në dy të tjerat qumësht pluhur, pa qenë të deklaruara për konsumatorin.

Agjencia njofton se të gjitha këto produkte kanë origjinën nga i njëjti objekt dhe aktivitet, i cili është i aprovuar për prodhimin dhe përpunimin e qumështit.

Mes produkteve të qumështit që iu nënshtruan analizave, vetëm një markë nuk rezultoi me prani të vajit të palmës apo qumështit pluhur dhe, rrjedhimisht, nuk u klasifikua si jokonforme.

Pavarësisht këtij rezultati, produkti është vendosur nën kontroll të përforcuar dhe do t’i nënshtrohet ritestimit të vazhdueshëm, pasi prodhohet në të njëjtin objekt dhe në linjën e qumështit ku u evidentuan mospërputhjet.

Gjatë kontrollit janë identifikuar gjithashtu 26 produkte me përmbajtje bimore, të cilat prodhoheshin jashtë fushëveprimit të aprovimit që kishte operatori.

Për këtë veprimtari, AUV ka vendosur pezullimin e prodhimit deri në sigurimin e aprovimit përkatës nga Agjencia.

Raporti ka konstatuar edhe zhvillimin e një aktiviteti me bazë yndyre bimore dhe proteine qumështi, për të cilin në momentin e kontrollit nuk ishte paraqitur autorizimi i posaçëm.

Masat e vendosura nga AUV përfshijnë tërheqjen nga tregu të 12 produkteve jokonforme, shtimin e mbikëqyrjes dhe ritestimin e pandërprerë të linjës së qumështit, si dhe ndalimin e prodhimit të 26 produkteve që gjendeshin jashtë aprovimit.

Agjencia ka kërkuar njëkohësisht ndërprerjen e paraqitjes mashtruese të produkteve dhe pezullimin e lëshimit të certifikatave veterinare derisa të korrigjohen të gjitha mospërputhjet e evidentuara.

The post AUV kërkon largimin nga tregu të 12 produkteve të Qumështores VITA appeared first on Albeu.com.

Kryetari i Aleancës, Ardian Gjini, ka dhënë përkrahjen e tij për iniciativën e Institutit të Kosovës për Drejtësi, e cila kërkon të penalizojë mosrespektimin e vendimeve të Gjykatës Kushtetuese dhe shpërdorimin e thesarit publik në periudhë zgjedhore.

IKD ka filluar grumbullimin e firmave për një propozim ligjor qytetar që synon ndryshime në Kodin Penal.

Sipas propozimit, zyrtarët që nuk zbatojnë aktgjykimet e Kushtetueses do të përballeshin me pasoja penale, njësoj si edhe përdorimi i parave të buxhetit për të manipuluar vullnetin e zgjedhësve dhe për të siguruar përparësi të paligjshme gjatë garës elektorale.

Në një deklaratë për publikun, Gjini u shpreh se megjithëse respektimi i ligjit themelor dhe ndalimi i abuzimit me fondet publike duhet të jenë norma në një demokraci të shëndoshë, shkeljet e hapura të ndodhura në vitet e fundit e bëjnë të domosdoshme kodifikimin e këtyre çështjeve.

Ai vuri në dukje se shpërndarja e ndihmave nga arka shtetërore në prag të votimeve nuk është kujdes social, por një mekanizëm për të blerë vota me të ardhurat e taksapaguesve.

“Procesi zgjedhor duhet të jetë një konkurrencë e ndershme, jo një pazar ku qeveria hyn në lojë me kasafortën publike nën sqetull”, citohet të ketë thënë Gjini, raporton KosovaPress.

Ai insistoi se duhet të vendoset llogaridhënie penale si për shpërfilljen e vendimeve të Gjykatës Kushtetuese, ashtu edhe për financimin e fushatave me para të taksapaguesve.

“Ky abuzim duhet të dënohet ligjërisht, pavarësisht se kush e kryen. Edhe unë do të vë firmën time”, deklaroi Gjini, duke iu bashkuar radhëve të përkrahësve të kësaj nisme të IKD-së.

Ndërkohë, hulumtuesi i lartë në IKD, Naim Jakaj, njoftoi të enjten se për ta çuar këtë propozim përpara në Kuvend, nevojiten të paktën 10 mijë nënshkrime të vlefshme.

The post Gjini përkrah nismën për ndëshkimin penal të shkeljeve kushtetuese dhe keqpërdorimit të fondeve shtetërore në zgjedhje appeared first on Albeu.com.

Si rezultat i operacionit, u arrestuan në flagrancë: Alesio Brungaj, 19 vjeç, banues në Shkodër, një i mitur 17 vjeç, banues në Tiranë, Serxhio Lala , 26 vjeç, banues në Tiranë, Enis Aliaj, 19 vjeç, banues në Tiranë.

Ndërkohë, A. P., 19 vjeç, banues në Krujë, u shpall në kërkim.

Sipas policisë, S. L., E. A. dhe i mituri u kapën në flagrancë në një postë në Tiranë, teksa tentonin të tërhiqnin 11 pako me kartëmonedha euro të dyshuara të falsifikuara. Këto dërgesa ishin bërë nga A. B., i cili përdorte një emër tregtar të rremë për të maskuar aktivitetin dhe për të shpërndarë kartëmonedhat falsifikate.
Policia bën me dije se vijon puna për kapjen e shtetasit të shpallur në kërkim, A. P., si dhe për dokumentimin e plotë të veprimtarisë kriminale.

Materialet procedurale i janë referuar Prokurorisë së Tiranës për veprime të mëtejshme.

The post Falsifikonin eurot dhe i nxirrnin në treg, arrestohen katër të rinj në Tiranë, mes tyre një i mitur appeared first on Albeu.com.

Nospace është krijuar nga Tiffany Zhong, e cila vetë është anëtare e “Gjeneratës Z”, dhe siç tha kompania, tashmë janë 500 mijë persona në listën e pritjes.

Aplikacioni do të inkurajojë përdoruesit të ndajnë mendimet e tyre për gjëra të përditshme. Aplikacioni bazohet kryesisht në postimet me tekst, dhe ekziston gjithashtu mundësia që përdoruesit të kalojnë në opsionin për të parë vetëm postimet e miqve të tyre. Çdo profil mund të modifikohet – ngjyra e llogarisë, sfondi dhe fonti.

“Përdoruesit mund të jenë aq të çuditshëm ose autentikë sa të duan”, ka thënë Zhong. Qëllimi i rrjetit të ri social është t’u tregojë përdoruesve të rinj se si ishte koha kur MySpace dhe Facebook ishin mjetet më të njohura (dhe pak a shumë të vetmet) për të krijuar lidhje dhe njohje përmes internetit.

“Mos harroni se sa argëtues ishte interneti përpara reklamave dhe algoritmeve? Ne e bëjmë dhe duam ta kthejmë atë”, thuhet në përshkrimin e aplikacionit në AppStore.

The post Një rrjet i ri social gati të hyjë në treg, synon të rinjtë appeared first on Albeu.com.

Rënia e prodhimit të qumështit të lopës nga fermat aktualisht ka shtuar në tregje mungesën e djathit të lopës. Fabrikat pohojnë se me vështirësi po plotësojnë kërkesën me qumësht importi. Kërkesa nga konsumatori shfaqet me rënie për shkak të rritjes së çmimeve.

Përpunuesit e qumështit parashikojnë edhe rritje tjetër të çmimeve të qumështit të deles dhe të dhisë deri 30% më shtrenjtë nga mars 2023 për shkak të kërkesës së lartë dhe ofertës së ulët. Shtrenjtimi i çmimit të qumështit pritet të rrisë sërish çmimet e bulmetit.

Donjaldo Hoxha drejtori i shoqatës Industria e Përpunuesve së Qumështit pohoi për Monitor se aktualisht në frigoriferët e produkteve të stazhinuara të fabrikave prodhuese ka më pak sasi të djathit të lopës krahasuar me vitin e kaluar. “Kjo ka ardhur si pasojë e sasisë së ulët të qumështit të grumbulluar në muajt e verës, por gjithashtu edhe për shkak se prodhuesit në këtë periudhë iu përgjigjën kërkesës më lartë për produkte në periudhën e sezonit turistik. Vështirësitë janë paralajmëruar prej muajsh nga fabrikat e përpunimit të qumështit dhe gjendja e tanishme është si rezultat i mosmarrjes së masave nga institucionet përgjegjëse”.

Fabrikat e qumështit thanë për Monitor se aktualisht gjenden në vështirësi për gjetjen e qumështit të lopës edhe pse çmimi i tij është rritur 30 deri 40% . Nga fermat e vogla çmimi i qumështit të lopës shitet 70 lekë për litër, ndërsa nga fermat më të mëdha 80 lekë për litër.

“Tashmë u bë 1 vit që në treg qumështi i lopës gjendet me vështirësi. Në muajt korrik -gusht kemi qenë me mungesë të djathit të stazhinuar. Kjo ka ardhur për shkak të rënies së numrit të fermave të vogla. Edhe pse fermat e mëdha të mbajtjes së lopëve janë rritur në raport me reduktimin e fermave të vogla zgjerimi i tyre nuk ka efekt te prodhimi. Rënia e fermave të vogla ka ardhur për shkak të emigrimit të rinjve. Kërkesa për djathë lope po plotësohet me vështirësi me qumësht nga jashtë, pasi edhe qumështi i importit po gjendet me vështirësi”, pohoi një nga fabrikat prodhuese në vend.

Sasia e qumështit të lopës së grumbulluar në 2021 në raport me 2020 ishte 7% më pak sipas të dhënave të INSTAT. Vitin e kaluar rënia e qumështit të grumbulluar krahasuar me periudhën para pandemisë, vitin 2019 ishte 25%.

Përveç rënies së prodhimit të qumështit të lopës që gjendet në çdo sezon, përpunuesit parashikojnë vështirësi edhe në gjetjen e qumështit të deles dhe dhisë me prodhimin e ri të pranverës. Kërkesa e lartë për qumësht sipas parashikimeve të bizneseve mund të sjellë një tjetër rritje të çmimit të qumështit të deles dhe dhisë deri 30%. Nëse çmimi do të rritet kjo do të detyrojë përpunuesit të shtrenjtojnë çmimit e bulmetit, çka sipas tyre riskon uljen e konsumit./Monitor

The post Shtohet në treg mungesa e djathit të lopës, çfarë pritet të ndodhë në pranverë ? appeared first on Albeu.com.

Kur erdhëm me Blinda Ballukun në qarkun Dibër, detyrat që na dhanë fermerët ishte mungesa e daljes në treg për fermerët e vogël. U përgatit një projekti ri, për një treg në Bulqizë. Por nëse ka një kryefjalë për aksesin në treg është Rruga e Arbrit. Në Tiranë nuk do të kemi vetëm një monopol të tregut privat, por një treg publik-privat. Do të kemi një treg tjetër ku do të shesin rreth 2000 fermerë, jo vetëm ata të Tiranës por edhe të Dibrës dhe gjithë vendin. Tregtimi do të bëhet falas”, tha Krifca.

The post Krifca-fermerëve të Bulqizës: Do të hapet treg në Tiranë ku mund të tregtoni falas appeared first on Albeu.com.

Në Kinë, shitjet e automjeteve do të kalojnë gjatë këtij viti niveli para pandemisë, por kjo gjë nuk pritet të ndodhë në Shtetet e Bashkuara para vitit 2023, ndërkohë që për Bashkimin Europian një rikthim i tillë nuk parashikohet para vitit 2025.

Një pikëpyetje e madhe sipas analistëve ekonomikë vjen nga kuota e tregut të makinave elektrike, fronti i ri i prodhimit industrial në kë të fushë.

Të gjithë emrat më të fuqishëm në treg, edhe ato më skeptikë në fillim, po projektojnë, ose kanë prezantuar tashmë modelin ose modelet e tyre elektrike, ose të paktën hibride.

Në treg mjetet totalisht elektrike përfaqësojnë më pak se 3 % të totalit. Por një institut si Alix Partners gjykon se kjo fetë torte do të zmadhohet gjatë viteve, nga 11% e vitit 2025 deri tek 24% i parashikuar në 2030. Hibridet ndërkohë mund të arrijnë 67% të tregut po në atë vit. Një kohë jo aq e largët.

Faktorët që ndihmojnë këtë revolucion në prodhimin industrial janë të ndryshëm, nga stimujt ekonomik të qeverive lokale, pritshmëritë pozitive për rritjen ekonomike pas pandemisë por edhe një klimë më e mirë besimi, që shpesh herë bllokon çdo sipërmarrje.

Nuk mungojnë pikëpyetjet, në veçanti për mungesën në tregun ndërkombëtar të materialeve të nevojshme për mjetet, që mund të kufizojë prodhimin.

The post Si po ndryshon tregu i makinave, në epokën post-pandemi? appeared first on Albeu.com.

“Ditën e martë, datë 15 qershor 2021, ora 11:00, në ambientet e Bankës së Shqipërisë do të organizohet prezantimi i dy prerjeve të radhës së serisë së re të kartëmonedhës shqiptare, përkatësisht 1000 Lekë dhe 10000 Lekë”,-njofton Banka e Shqipërisë.

Me 15 Qershor këto prerje do të nisin qarkullimin. Në ambientet e Bankës së Shqipërisë do të prezantohet kartëmonedha prej 1000 lekë dhe risia, kartëmonedha 10.000 lekë. Ndërkohë, gjatë vitit 2021 pritet që të hidhet në qarkullim edhe kartëmonedha e re 2000 lekë, pasi kartëmonedhat me vlerë 200 dhe 5000 lekë u hodhën në treg në 30 shtator të vitit 2019.

The post Për herë të parë, hidhet në treg kartëmonedha 10.000 lekëshe appeared first on Albeu.com.