Klinika Universitare për Kirurgji Plastike dhe Rindërtuese në Shkup zhvilloi konsultime të specializuara disaditore për përcaktimin e trajtimit të mëtejshëm të pacientëve të prekur nga zjarri tragjik në Koçan.

Vizita e ekspertëve u organizua me iniciativën e drejtoreshës së Klinikës, prim. dr. Jasmina Gjorgjievska Pavllovska. Në të mori pjesë sub. spec. dr. Igor Malkoviq, kirurg plastik dhe rekonstruktiv me përvojë shumëvjeçare në trajtimin e rasteve më të rënda të djegieve, njoftoi institucioni.

Gjatë qëndrimit të tij u kryen vlerësime të hollësishme dhe konsultime profesionale për secilin pacient. Mjekët hartuan plane individuale për trajtimin e tyre në etapa, duke shqyrtuar rikthimin e funksioneve, mundësinë e ndërhyrjeve të tjera kirurgjikale dhe rezultatet që pritet të arrihen.

Në kuadër të kësaj vizite u krye gjithashtu një operacion kompleks rekonstruktiv te një pacient i cili ishte ndër të plagosurit më rëndë nga zjarri në Koçan.

Ndërhyrja u realizua falë bashkëpunimit dhe angazhimit të përbashkët profesional të dr. Malkoviqit, prim. dr. Gjorgjievska Pavllovskës, prim. dr. Trençev, as. dr. Naceska Gjorgjevska, as. dr. Jovanovski, spec. dr. Maksutlar, spec. dr. Trajkov, si dhe specializantëve dr. Stavriq, dr. Shemov dhe dr. Pejoska, dr. Onçev. Në këtë proces asistuan edhe ekipi i anesteziologjisë, infermierët e sallës së operacionit dhe i gjithë stafi i Klinikës, thuhet në njoftim.

Sipas Klinikës, pjesëmarrja e tij ishte me rëndësi për planifikimin e hapave të ardhshëm të trajtimit. Nisma synon të zbatojë praktikat bashkëkohore të kirurgjisë rekonstruktive dhe të nxisë shkëmbimin e njohurive e përvojës me ekspertë të njohur të rajonit. Në të njëjtën kohë, ajo dëshmon se kujdesi ndaj pacientëve nga Koçani vijon të jetë ndër prioritetet kryesore të institucionit.

Trajtimi i një pacienti me djegie të rënda nuk mbyllet me shpëtimin e jetës apo me shërimin e plagëve. Pas kësaj nis një proces i gjatë dhe i ndërlikuar, që përfshin ndërhyrje rekonstruktive, rehabilitim dhe rikthim gradual të funksioneve, pavarësisë dhe cilësisë së jetës.

Kujdesi për këta pacientë kërkon dije, përvojë, durim dhe bashkëpunim të ngushtë mes profesionistëve. Rezultati nuk vlerësohet vetëm nga suksesi i një operacioni, por edhe nga çdo përparim i mëtejshëm që i ndihmon pacientit të përdorë sërish duart, të rikthehet në përditshmëri dhe të rifitojë shpresën për të ardhmen.

Klinika Universitare për Kirurgji Plastike dhe Rindërtuese deklaron se do të vijojë të ofrojë kujdes shëndetësor të pandërprerë, bashkëkohor dhe gjithëpërfshirës për personat e lënduar në zjarrin e Koçanit.

Përmes angazhimit të specialistëve, profesorëve, specializantëve, infermierëve dhe pjesëtarëve të tjerë të personelit shëndetësor, si dhe bashkëpunimit me ekspertë të njohur nga rajoni dhe bota, Klinika synon të arrijë rezultatet më të mira të mundshme për çdo pacient, thuhet në njoftimin e këtij institucioni publik shëndetësor.

The post Ndërhyrje e ndërlikuar rekonstruktive në Klinikën e Kirurgjisë Plastike për një të mbijetuar të zjarrit në Koçan appeared first on Albeu.com.

Dokumentacioni urbanistik i Qytetit të Koçanit, nga viti 1998 e deri më sot, si dhe Ligji për ndërtim, nuk lejonin që objekti industrial në lokacionin ku funksiononte diskoteka/kabare “Puls” të ridestinohej për veprimtari gastronomike. Megjithatë, investuesi kishte nisur që në vitin 2012 ta përdorte një pjesë të tij si diskotekë/kabare, në kundërshtim me PHU-në dhe legjislacionin për planifikim urbanistik dhe ndërtim. Këtë e deklaroi ekspertja Dushica Tërpçevska Angellkoviq në seancën e sotme për zjarrin në diskotekën e Koçanit, të zhvilluar në sallën e gjykatës në “Idrizovë”. Nga tragjedia humbën jetën 63 persona dhe u lënduan mbi 200 të tjerë.

Në hapje të seancës, prokurori Darko Jakimovski bëri të ditur se ekspertiza ndërtimore është hartuar duke përfshirë disa fusha. Shqyrtimi vijoi me çështjet që lidhen me urbanizmin dhe me dëshminë e Dushica Tërpçevska Angellkoviq, pjesëtare e ekipit që punoi në përgatitjen e ekspertizës ndërtimore.

Sipas shpjegimit të ekspertes për planifikimin urbanistik, zona G10 e Qytetit të Koçanit, në të cilën ndodhet diskoteka, e ka ruajtur të njëjtin destinim. Si Plani i parë i hollësishëm urbanistik, i paraqitur në vitin 1998, ashtu edhe plani i fundit në fuqi, i miratuar më 2013, e përcaktojnë këtë zonë për industri të lehtë dhe ekonomi të vogël.

Ekspertja iu referua nenit 97 të Ligjit për ndërtim, sipas të cilit çdo objekt duhet të përdoret vetëm për qëllimin për të cilin është projektuar dhe ndërtuar. Në Planin urbanistik të vitit 2013, objekti ka destinacionin G3 – servise, ndërsa si destinacione kompatibile renditen B1, B2, B4, D2, D3, D4, G2, G4 dhe E2. Në këtë listë nuk përfshihet destinacioni B3, i cili ka të bëjë me objektet e mëdha hotelierike, ku klasifikohen edhe diskotekat dhe klubet kabare.

Për hapjen e ligjshme të diskotekës, sipas ekspertes, fillimisht duhej të dorëzohej në Komunën e Koçanit një nismë për ndryshimin e PHU-së, me qëllim që destinacioni B3 të përcaktohej si bazë ose si kompatibil. Më pas duhej të paraqitej në komunë kërkesa për ridestinimin e objektit në kategorinë B3 dhe të hartohej projekti themelor për këtë ndryshim. Në projekt duhej të përfshiheshin të gjitha kërkesat për kushtet minimale teknike që objekti ishte i detyruar t’i plotësonte sipas Ligjit për veprimtari hotelierike. Mundësia tjetër ishte që diskoteka të hapej në një objekt të ndryshëm, të vendosur në një zonë me destinacion B3.

E pyetur nëse Komuna e Koçanit kishte mundësi të ndërhynte pasi në objekt tashmë zhvillohej veprimtari hotelierike, ekspertja shpjegoi se Ligji për ndërtim përcakton, ndër të tjera, edhe mënyrën e përdorimit të objekteve. Ajo tha se bëhej fjalë për një objekt të kategorisë së dytë, pra me rëndësi lokale, për të cilin lejet lëshohen nga komuna. Për këtë arsye, komuna duhej të vepronte brenda kompetencave të saj dhe të verifikonte nëse objekti përdorej në përputhje me lejet e dhëna për ndërtim dhe përdorim.

Në lidhje me pyetjen nëse licenca e dhënë për diskotekë/kabare i pengonte shërbimet inspektuese komunale të reagonin, Dushica Tërpçevska Angellkoviq sqaroi se këto dy çështje nuk kushtëzohen nga njëra-tjetra.

Prokurori kërkoi gjithashtu shpjegim se si ishte e mundur që në afërsi të ndodhej një hotel. Ekspertja u përgjigj se në PHU ekziston një parcelë me destinacionin B5 – hotel, por rubrika e destinacioneve kompatibile për atë parcelë është e zbrazët.

Në seancën e mëparshme kishte dëshmuar eksperti gjyqësor dhe profesori në Fakultetin e ndërtimtarisë pranë USHCM, Goran Markovski. Ai, në kohën kur po përgatitej ekspertiza ndërtimore, mbante postin e dekanit të Fakultetit të ndërtimtarisë. Markovski deklaroi se gjetjet e ekspertizës tregonin pa asnjë dyshim se në rastin e “Puls”-it kishin dështuar plotësisht sistemi, institucionet dhe individët, ndërsa nuk ishin zbatuar standardet, rregullat dhe procedurat.

Markovski tha se ekipi i ekspertëve të Fakultetit të ndërtimtarisë kishte konstatuar me keqardhje se në objektin ku ndodhej diskoteka “Puls” nuk ishte zbatuar asnjë masë për mbrojtje nga zjarri. Numri i daljeve të rregullta për evakuim ishte zero. Duke u bazuar në sipërfaqen e objektit, kapaciteti i lejuar ishte 363 mysafirë, ndërsa natën kritike brenda tij ndodheshin mbi 600 persona.

Sipas paralajmërimeve, me këtë fazë pritet të mbyllet paraqitja e provave nga Prokuroria.

Procesi gjyqësor drejtohet nga gjykatësja Dijana Gruevska-Ilievska, ndërsa Prokuroria përfaqësohet nga një ekip i përbërë prej 15 prokurorësh publikë.

Zjarri në diskotekën “Puls” në Koçan shpërtheu më 16 mars 2025, gjatë koncertit të grupit DNK. Në këtë ngjarje humbën jetën 63 persona dhe u plagosën mbi 200 të tjerë. Tragjedia konsiderohet ndër më të rëndat në historinë më të re të vendit.

The post Ekspertiza urbanistike: Objekti “Puls” në Koçan ishte kthyer në diskotekë në mënyrë të paligjshme appeared first on Albeu.com.

Seanca e radhës për rastin “PULSE” vijoi sot me paraqitjen e ekspertëve të Fakultetit të Ndërtimtarisë. Ata shpjeguan ndarjen e kompetencave dhe përgjegjësive ndërmjet institucioneve të ndryshme lidhur me kontrollin e objekteve.

Ekspertët deklaruan se Ministria e Ekonomisë nuk ka kompetencë dhe as detyrim apo obligim ligjor për të inspektuar objekte. Sipas tyre, kontrolli i objekteve hotelierike dhe verifikimi i kushteve në to u takojnë institucioneve dhe inspektorateve përkatëse, të cilat veprojnë në bazë të kompetencave të përcaktuara me ligjet që rregullojnë këtë fushë.

Në kuadër të përgjegjësive të saj, Ministria e Ekonomisë zbaton Ligjin për veprimtarinë hotelierike dhe mbështetet në konstatimet dhe mendimet e organeve kompetente të inspektimit.

Eksperti që mori pjesë në hartimin e ekspertizës së ndërtimit tha se, sipas dispozitave të Ligjit për veprimtarinë hotelierike, Ministria e Ekonomisë nuk kishte kompetencë të kontrollonte apo të trajtonte brenda veprimtarisë së saj çështjen e lejes së përdorimit të objektit.

Ekspertiza përcakton se përgjegjësia për këtë çështje u takon institucioneve të tjera, në përputhje me Ligjin për Ndërtim. Po ashtu, u sqarua se licenca për kabare, e lëshuar nga Ministria e Ekonomisë, nuk shërben si bazë që inspektimi i ndërtimit të ndërmarrë veprime ndaj objektit.

Sipas shpjegimeve të ekspertëve, destinimi dhe mënyra e përdorimit të objekteve ku ushtrohet veprimtaria hotelierike nuk rregullohen nga Ligji për veprimtarinë hotelierike. Këto çështje trajtohen nga Ligji për planifikim urbanistik dhe Ligji për ndërtim, të cilët përcaktojnë procedurat dhe kushtet për destinimin dhe shfrytëzimin e objekteve.

Për rrjedhojë, gjatë procedurës së lëshimit të licencës, Ministria e Ekonomisë vepron sipas Ligjit për veprimtarinë hotelierike dhe vetëm brenda kompetencave që i cakton ky ligj.

Në këtë pjesë, ekspertiza ndan qartësisht përgjegjësitë e Ministrisë së Ekonomisë nga ato të institucioneve që kanë kompetenca për ndërtimin, përdorimin dhe kontrollin teknik të objekteve.

The post Rasti “PULSE” në Koçan: Ekspertët thonë se Ministria e Ekonomisë nuk është përgjegjëse për kontrollin e objekteve appeared first on Albeu.com.

Qytetarët e Koçanit dhe familjarët e viktimave të tragjedisë në diskotekën “Puls” u mblodhën sot për herë të 47-të në marshin protestues “Marshi për engjëjt”. Ata theksuan se kjo nuk është thjesht një çështje gjyqësore, por një katastrofë që mori 63 jetë njerëzish, plagosi 218 të tjerë dhe zhyti gjithë qytetin në dhimbje.

Protesta nisi nga Parku i Revolucionit dhe u drejtua fillimisht drejt ndërtesës së Komunës së Koçanit, ku ndodhen edhe zyrat e Inspektoratit Shtetëror të Tregut. Më pas, turma vijoi rrugëtimin përpara Inspektoratit Shtetëror të Punës, Drejtorisë së të Ardhurave Publike, stacionit policor të Koçanit dhe godinës së gjykatës.

Përpara çdo institucioni, prindërit dhe qytetarët ngritën zërin për të kërkuar shpjegime mbi neglizhencat dhe mosveprimet që, sipas bindjes së tyre, i hapën rrugën tragjedisë.

Aleksandar Naunov, duke folur para Gjykatës në Koçan, shtroi një sërë pyetjesh për dështimet institucionale. “Përpara Komunës pyetëm për lëshimet dhe mosveprimet që sollën tragjedinë. Përpara Inspektoratit Shtetëror të Punës pyetëm se si është e mundur që për 13 vite të mos jetë bërë as edhe një inspektim. Përpara MPB-së pyetëm pse nuk u mbrojtën jetët e qytetarëve”, deklaroi ai.

Ai vijoi duke drejtuar pyetje edhe ndaj Inspektoratit Shtetëror të Tregut, Drejtorisë për Mbrojtje dhe Shpëtim, kompanisë së sigurimit të objektit dhe pronarit të lokali, duke kërkuar llogari për dështimet që, sipas tij, rezultuan në humbjen e jetëve. Naunov nënvizoi se procesi gjyqësor nuk është një gjykim i zakonshëm, por një “provë për drejtësinë dhe besimin e qytetarëve në institucionet”.

“Nga Gjykata nuk presim vendime të nxitura nga presioni. Ne duam një vendim që bazohet ekskluzivisht në fakte, prova, ligj dhe ndërgjegje. Vendimi juaj nuk do t’i kthejë dot fëmijët tanë, por mund të dëshmojë se në këtë vend askush nuk është mbi ligjin dhe se jeta e njeriut është vlera supreme”, u shpreh Naunov.

Prindërit theksuan se kërkesa e tyre për drejtësi nuk buron nga hakmarrja, por nga përgjegjësia ndaj viktimave dhe brezave të ardhshëm, me qëllimin e vetëm që një tragjedi e ngjashme të mos ndodhë kurrë më.

The post Koçani marshon sërish për drejtësi: Prindërit kërkojnë përgjegjësi për 63 jetët e humbura në “Puls” appeared first on Albeu.com.

Në Prokurorinë Themelore Publike në Koçan është paraqitur kallëzim penal ndaj S. Sh. S. (53) nga Makedonski Brod, S. Gj. (59) nga Shkupi, si edhe ndaj Z. M. (64), S. Z. (61), T. K. (42), N. D. (43), G. P. (41) dhe M. Z. S. (44), të gjithë nga Koçani. Ata dyshohen për veprën penale “punë e pandërgjegjshme në shërbim”.

Sipas të dhënave në kallëzim, në periudhën nga viti 2022 deri më 16 mars 2025, të dyshuarit, si persona zyrtarë në Inspektoratin Shtetëror të Punës, ndonëse e kishin për detyrim ligjor të ushtronin mbikëqyrje inspektuese, nuk kanë hapur në asnjë rast procedurë sipas detyrës zyrtare për kontroll ndaj objektit hotelierik “Pulse” në Koçan.

Policia thekson se, megjithëse bëhej fjalë për të vetmin lokal të këtij lloji në territorin e Komunës së Koçanit gjatë një periudhe 13-vjeçare, aty nuk ishte realizuar asnjë inspektim, në kundërshtim me obligimet që dalin nga Ligji për Mbikëqyrje Inspektuese.

Në kallëzim përmendet se mosveprimi ka bërë që të mos pengohej funksionimi i paligjshëm i objektit, ndërsa të punësuarit të përballeshin me rrezik, pasi ushtronin punën në një hapësirë që nuk ishte kontrolluar për kushtet e sigurisë dhe shëndetit në punë, si edhe për respektimin e të drejtave themelore që burojnë nga marrëdhënia e punës.

Sipas policisë, përmes këtij mosveprimi, objektit “Puls” iu krijua mundësia që në mënyrë të paligjshme të vazhdonte ushtrimin e veprimtarisë hotelierike dhe të siguronte dobi pasurore të kundërligjshme në shumën e përgjithshme prej 1.255.977 denarësh.

Ky kallëzim penal shënon vazhdimin e hetimeve për përgjegjësinë e mundshme institucionale që lidhet me funksionimin e diskotekës “Pulse”, e cila ndodhet në qendër të vëmendjes së organeve hetimore pas zjarrit tragjik të ndodhur në këtë objekt.

The post Tetë inspektorë kallëzohen për rastin “Pulse”, dyshohet se për vite të tëra nuk ushtruan kontrolle appeared first on Albeu.com.

Në seancën e sotme gjyqësore që po zhvillohet në “Idrizovë”, procesi për zjarrin në diskotekën “Puls” vazhdoi me paraqitjen e provave materiale nga Prokuroria. Nga kjo tragjedi humbën jetën 63 persona, ndërsa mbi 200 të tjerë mbetën të lënduar.

Gjatë seancës, Prokuroria prezantoi materiale që kanë të bëjnë me Inspektoratin Shtetëror të Tregut (ISHT). Sipas paralajmërimit, në seancën e ardhshme, e caktuar për më 6 korrik, do të paraqiten listat e komunikimeve telefonike, me çka nga provat materiale të prokurorisë do të mbeten vetëm ekspertiza e ndërtimit dhe dëshmia e personave ekspertë, ndërsa më pas do të vazhdojë paraqitja e provave nga mbrojtja.

Prokuroria e vazhdoi paraqitjen e provave duke lexuar vetëm titujt e tyre, ashtu siç figurojnë në listën e provave. Mes tyre ishin raportet e kontrollit, konfirmimi i sendeve të sekuestruara përkohësisht nga MPB-së, shkresat, njoftimet dhe raportet nga SPB-së Shtip, raportet e Inspektoratit Shtetëror të Tregut, si edhe rastet nga ISHT-së për Klasik DM dhe MMMM Kafe, urdhrat për kryerjen e mbikëqyrjes inspektuese dhe raportet nga inspektimet e realizuara nga ISHT-ja.

Pas prezantimit të këtyre provave, mbrojtja paraqiti një varg vërejtjesh. Ato kishin të bënin me pjesë të procesverbaleve dhe raporteve të ISHT-së, me mangësi në raporte, licenca dhe ankesa, si dhe me çështjen se kush i ka nënshkruar ato dhe nëse janë nënshkruar.

The post Procesi gjyqësor për rastin “Pulse” vijoi sot me provat e ISHT-së, seanca e ardhshme më 6 korrik appeared first on Albeu.com.

Sipas Prokurorisë, në seancë u dorëzuan dëshmi të siguruara nga Ministria e Ekonomisë dhe Punës, përkatësisht nga Sektori i Turizmit dhe Mikpritjes, të cilat lidhen me rrethanat në të cilat objekti kishte nisur të funksiononte, ndonëse nuk i kishte të plotësuara kushtet formale dhe thelbësore, si dhe kërkesat minimale teknike të nevojshme për punë.

Prokurorja Natasha Saramandova prezantoi disa prej këtyre provave para gjykatës, mes tyre edhe një kërkesë të 10 tetorit 2012, të paraqitur nga pronari Dejan Jovanov për marrjen e licencës së kabaresë.

Gjatë seancës, mbrojtja kërkoi që provat të lexoheshin nga pjesa e dokumenteve të detyrueshme të bashkëngjitura me kërkesën, por Prokuroria u përgjigj se provat nuk janë lexuar asnjëherë të gjitha dhe se ato nuk mund të lexohen fjalë për fjalë.

Siç theksoi Prokuroria, nga vetë kërkesa shihet qartë se ajo i referohet një adrese në rrugën Dimitar Vlahov bb, ku gjendet selia e Klasik M, ndërsa në atë periudhë nuk kishte asnjë degë të regjistruar. Po ashtu, sipas saj, ishin verifikuar të gjitha kushtet e përmbushura, me përjashtim të pjesës që kishte të bënte me sigurimin e një numri të mjaftueshëm të daljeve ndihmëse për 200 vizitorë.

Zjarri në diskotekën “Pulse” në Koçan shpërtheu më 16 mars 2025, gjatë një performance të grupit DNA, dhe konsiderohet një prej tragjedive më të rënda në historinë e afërt të vendit. Procesi gjyqësor udhëhiqet nga gjyqtarja Dijana Gruevska-Ilievska, ndërsa Prokuroria përfaqësohet nga një ekip prej 15 prokurorësh publikë.

The post Prokuroria: Diskoteka “Pulse” nisi punën pa i plotësuar kushtet minimale teknike appeared first on Albeu.com.

Në kuadër të këtij rasti, Grnçishtanov akuzohej për veprën penale “Krime të rënda kundër sigurisë publike”.

Ai ka ushtruar detyrën e Inspektorit të Përgjithshëm, përkatësisht Shef i Shërbimit të Inspektimit, në Drejtorinë për Mbrojtje dhe Shpëtim nga 15 janari 2013 deri më 16 mars 2025.

Sipas të dhënave në dispozicion, Grnçishtanov qëndroi 77 ditë në paraburgim efektiv, ndërsa më pas u vendos në arrest shtëpiak për afro 14 muaj./Telegrafi/

The post Ndahet nga jeta një tjetër i pandehur në çështjen e tragjedisë në Koçan appeared first on Albeu.com.