Qyteti përzgjidhet brenda pak sekondash, ndërsa kërkimi mund të filtrohet më tej sipas kombësisë, moshës, gjatësisë, peshës, ngjyrës së flokëve e syve dhe madje edhe preferencave seksuale.

Me vetëm një klikim, përdoruesit i paraqiten në ekran dhjetëra profile grash që reklamojnë shërbime eskorte në Kosovë.

Megjithatë, autoritetet kosovare thonë se pas disa prej këtyre llogarive mund të mos qëndrojnë gra që e bëjnë këtë me vullnet të lirë, por viktima të trafikimit me qenie njerëzore.

Radio Evropa e Lirë identifikoi një numër të madh profilesh të grave nga shtetet e Amerikës Latine në një platformë që edhe Policia e Kosovës e ka evidentuar për shitjen e shërbimeve seksuale.

Platforma, e cila operon në mbarë Evropën, pretendon se disa prej këtyre profileve janë verifikuar prej saj.

Zana Sadiku-Sertolli nga Prokuroria Themelore në Prishtinë shpjegon për Radion Evropa e Lirë se personat që sillen nga jashtë, veçanërisht nga vendet e Amerikës Latine, rekrutohen përmes kontratave të rregullta.

“Ato që rekrutohen nga jashtë, sidomos nga shtetet e Amerikës Latine, rekrutohen me kontrata të rregullta. Paraqiten si punëtore të rregullta në Kosovë, me lejeqëndrim dhe pajisen me kontratë pune”, thotë ajo.

Sipas Sadiku-Sertollit, e cila shërben si koordinatore për veprat penale të trafikimit me qenie njerëzore, kjo mënyrë organizimi dhe rekrutimi ua ka bërë më të vështirë autoriteteve ndjekjen penale të rasteve.

Ministrisë së Punëve të Brendshme, institucioni përgjegjës për pajisjen e shtetasve të huaj me leje pune dhe lejeqëndrime, REL-i i kërkoi sqarime për strategjitë dhe politikat kundër këtij fenomeni. Përgjigje nuk pati as pas tri javësh.

Pyetje iu dërguan edhe Autoritetit Rregullativ të Komunikimeve Elektronike dhe Postare lidhur me platformën e eskortave, përkatësisht nëse ishte paraqitur ndonjë kërkesë që qasja në këtë ueb-faqe të bllokohej në Kosovë. As ARKEP-i nuk u përgjigj.

Në raste të mëparshme, ARKEP-i ka urdhëruar operatorët mobilë dhe ofruesit e internetit që t’i bllokonin faqet e mediave ruse të sanksionuara në Kosovë. Në anën tjetër, në Kosovë vazhdojnë të jenë të qasshme shumë platforma të basteve online që operojnë nga jashtë vendit, ndonëse shërbimet e tyre bien ndesh me ligjin.

Policia e Kosovës i tha REL-it se po i mbikëqyr ueb-faqet e dyshimta, përfshirë edhe platformën ku figurojnë gra nga Amerika Latine, por theksoi se “në këtë fazë nuk mund të ofrojmë informata të tjera”.

Në një raport të publikuar vitin e kaluar, Policia vlerëson se Kosova “vazhdon të mbetet vend i origjinës, transitit dhe destinacionit për viktimat e trafikimit”. Në dokument përmendet si formë e re edhe ofrimi i shërbimeve seksuale nëpërmjet faqeve online të eskortave.

Raporti thekson se viktimat zakonisht janë nga 18 deri në 30 vjeç dhe mbërrijnë në mënyrë të organizuar nga vende si Brazili, Venezuela, Kolumbia dhe Peruja.

Në vitin 2024, në Prishtinë u arrestua pikërisht një shtetase e Perusë, nën dyshimin se ishte një nga organizatoret e këtij rrjeti trafikantësh.

REL-i iu drejtua Prokurorisë Speciale për më shumë hollësi rreth vazhdimit të procedurave në këtë rast, por nuk mori përgjigje.

Disa muaj më parë, Kallxo.com raportoi se kishte siguruar një pjesë të dosjes hetimore. Sipas asaj pjese të dosjes, dyshohet se organizatorët ua merrnin vajzave të trafikuara më shumë se 50 për qind të fitimeve dhe i rrihnin nëse ato nuk u bindeshin udhëzimeve.

Raste të lidhura me të njëjtën platformë janë identifikuar edhe në Bosnje e Hercegovinë. Zyra e Prokurorëve atje i tha REL-it se, gjatë viteve 2025 dhe 2026, janë evidentuar disa shtetase braziliane që ishin shfrytëzuar seksualisht.

Sipas kësaj zyre, transporti dhe strehimi i viktimave siguroheshin nga një grup i organizuar kriminal, ndërsa të ardhurat u transferoheshin organizatorëve nëpërmjet kriptovalutave. Në procesin hetimor janë përfshirë autoritetet braziliane, Europol-i dhe Interpol-i.

Në Kosovë, bashkëpunimi juridik me shtetet prej nga vijnë viktimat është treguar më i ndërlikuar kur vendi nuk ka marrëdhënie diplomatike me shtetin e origjinës, sipas prokurores Sadiku-Sertolli.

“Ka shtete që nuk e njohin Kosovën dhe duhet të ekzistojë një marrëveshje bilaterale me shtetin ku e ka origjinën ajo viktimë, pasi që duhet të vlerësohet se a do të ishte e sigurt viktima që të kthehej atje [ose jo]”, thotë ajo.

Megjithatë, Sadiku-Sertolli shton se kjo pengesë zakonisht tejkalohet përmes Zyrës për bashkëpunim juridik ndërkombëtar, e cila funksionon në kuadër të Ministrisë së Drejtësisë.

Trafikimi i grave për shfrytëzim seksual nuk është dukuri e kufizuar vetëm në Ballkanin Perëndimor.

Europol-i, agjencia policore e Bashkimit Evropian, thotë se trafikimi për qëllime të shfrytëzimit seksual, përfshirë rastet me gra nga Amerika Latine, zhvillohet përmes rrjeteve kriminale që shtrihen në disa kontinente.

Në qershor të këtij viti, Europol-i, Interpol-i, Frontex-i dhe Ameripol-i bashkërenduan një operacion ndërkombëtar kundër trafikimit me qenie njerëzore. Në të morën pjesë edhe autoritetet e Kosovës.

Nga ky operacion rezultuan më shumë se 1.000 arrestime, si dhe identifikimi i një numri të madh viktimash me origjinë nga Amerika Latine.

“Gjatë fazës operative, vendet pjesëmarrëse kryen veprime të synuara për zbatimin e ligjit, duke përfshirë kontrolle të përforcuara në pikat e nxehta, si kufijtë dhe aeroportet, si dhe hetime proaktive për rastet në vazhdim, që kërkojnë bashkëpunim operativ të nivelit të lartë”, deklaroi Europol-i në përgjigjen dërguar REL-it.

Kosova nuk përmendet në listën e shteteve ku u kryen arrestime.

Edhe mediat në Shqipëri kanë raportuar për një situatë të ngjashme me atë në Kosovë, ku përfshihen eskorta nga shtetet e Amerikës Latine. Autoritetet shtetërore shqiptare, megjithatë, nuk iu përgjigjën pyetjeve të REL-it për këtë çështje.

Në Serbi është shënuar rritje e numrit të viktimave të identifikuara të trafikimit. Por, raportuesi kombëtar për këto raste, Zoran Pashalliq, i tha REL-it se deri tani nuk ekzistojnë të dhëna për viktima nga Amerika Latine.

Në dallim nga Serbia, të dhënat statistikore për Kosovën tregojnë se numri i viktimave të identifikuara të trafikimit është zvogëluar gjatë viteve të fundit.

Ndonëse statistikat nuk tregojnë se sa prej tyre janë shfrytëzuar seksualisht, Policia e Kosovës e konsideron këtë ndër format më të përhapura të trafikimit. Ajo pranon gjithashtu se numri i vërtetë i viktimave besohet të jetë më i madh.

Gjatë këtij muaji, Policia e Kosovës ndërmori një aksion në sallone masazhi dhe në lokale nate me muzikë, duke arrestuar disa persona.

Të arrestuarit, sidoqoftë, nuk u dyshuan për trafikim me qenie njerëzore, por për veprën penale të mundësimit të prostitucionit.

Sipas prokurores Sadiku-Sertolli, dallimi mes këtyre veprave lidhet me lirinë e personit. Trafikimi ndodh kur viktima rekrutohet, mbahet nën kontroll ose detyrohet për t’u shfrytëzuar, kurse mundësimi i prostitucionit nënkupton organizimin e prostitucionit ose nxjerrjen e përfitimeve prej saj.

Ajo thotë se trafikantët kujdesen që të mos lënë gjurmë materiale. Për këtë arsye, organet hetimore në Kosovë e kanë të vështirë të sigurojnë dëshmi të tjera përveç deklaratave të viktimave.

“Këtu, sfidë tjetër është që viktimën ta bindësh që është viktimë e trafikimit”, shprehet Sadiku-Sertolli, duke nënvizuar se kjo vështirësi është posaçërisht e pranishme te viktimat që nuk e kanë mbushur moshën 18-vjeçare.

Një raport i Policisë së Kosovës tregon se, nga viti 2021 deri më 2024, në këtë grup-moshë u identifikuan 42 viktima. Tetë prej tyre ishin nga 12 deri në 14 vjeç, ndërsa shumica besohet se janë shfrytëzuar për shërbime seksuale.

Megjithatë, sipas Sadiku-Sertollit, mungesa e provave materiale të lëna nga trafikantët nuk është pengesa e vetme për ndjekjen penale.

Prokurorja thotë se bashkëpunimi ndërinstitucional është i mirë, por disa institucione vazhdojnë të kenë kapacitete të kufizuara. Ajo përmend veçanërisht mungesën e personelit në shërbimet sociale dhe mungesën e pajisjeve të punës për zyrtarët policorë.

Të dhënat që Radio Evropa e Lirë i siguroi nga Këshilli Gjyqësor i Kosovës tregojnë se, gjatë tre vjetëve të fundit, për trafikim me qenie njerëzore janë dhënë vetëm dy dënime me burgim.

Sipas Kodit Penal, trafikimi me qenie njerëzore dënohet me pesë deri në 12 vjet burgim. Në rastet më të rënda, masa ndëshkuese mund të shkojë deri në burgim të përjetshëm.

Pikërisht politika e ndëshkimeve në Kosovë kritikohet në raportin e Departamentit amerikan të Shtetit për trafikimin me qenie njerëzore për vitin 2025.

Në të thuhet se dënimet më të ulëta se minimumi i përcaktuar me ligj dhe “shqiptimi i gjobave si ndëshkim i vetëm minojnë përpjekjet për t’i mbajtur trafikuesit përgjegjës, dobësojnë efektin parandalues, krijojnë shqetësime të mundshme për sigurinë e viktimave dhe nuk pasqyrojnë seriozitetin e kësaj vepre penale”.

Dokumenti evidenton edhe një shqetësim tjetër, të cilin e ngre po ashtu prokurorja Sadiku-Sertolli: mungesën e ekspertizës dhe trajnimeve të nevojshme.

Sipas raportit, pjesa më e madhe e gjyqtarëve dhe prokurorëve nuk kanë përvojë dhe trajnim të mjaftueshëm, sidomos kur rastet përfshijnë kontrollin emocional ose psikologjik të viktimave. Kjo mund të çojë në dënime më të buta ose në rikualifikimin e rasteve si vepra penale që ndëshkohen më lehtë sesa trafikimi me qenie njerëzore.

Radio Evropa e Lirë i kërkoi Këshillit Gjyqësor të Kosovës të tregonte se me çfarë vështirësish përballen gjykatat gjatë trajtimit të rasteve të trafikimit me qenie njerëzore dhe cilat masa po merren për rritjen e kapaciteteve të gjyqtarëve në këtë fushë. Deri në publikimin e artikullit, Këshilli nuk kishte kthyer përgjigje. / REL

The post Nga vendet e Amerikës Latine drejt Kosovës: Rrugët e trafikimit të grave për shfrytëzim seksual appeared first on Albeu.com.

Sipas Vangjelit, “Ministrja e Mjedisit Mirela Kumbaro, ka vendosur në dispozicion dokumentat respektive dhe ka bërë me dije KM, por kjo situatë i fshihen publikut për të mbrojtur trafikun e mbetjeve të rrezikshme”.

DEKLARATA:

Kryeministri Edi Rama mohoi përfshirjen e Shqipërisë në linjën ndërkombëtare të trafikut të mbetjeve të rrezikshme, por deklarimet e tij u hodhën poshtë nga emisioni investigativ Plug në Syri Televizion, i cili publikoi pak ditë më parë dokumentat lidhur me skandalin e transportit të mbetjeve të rrezikshme nga Shqipëria në drejtim të Tajlandës apo Kinës.

Kështu, pas denoncimit të kryer nga Rrjeti i Bazelit, që zbuloi se nga vendi ynë ishin nisur drejt Tajlandës kontenierë me 816 tonë mbetje të rrezikshme, u zbuluan të dhëna për sasinë por edhe për origjinën e prodhimit të këtyre mbetjeve.

Vlen të theksohet se Ministrja e Mjedisit Mirela Kumbaro, ka vendosur në dispozicion dokumentat respektive dhe ka bërë me dije KM, por kjo situatë i fshihen publikut për të mbrojtur trafikun e mbetjeve të rrezikshme.

Dy javë pas publikimit të skandalit Ministrja Kumbaro urdhëroi “Verifikimin e subjekteve që gjenerojnë mbetje industriale”, ku janë kontrolluar 26 subjekte.

Nga kontrolli i kompanisë Sokolaj, rezultoi se nuk janë 816 ton, por kjo kompani ka eksportuar nga Porti i Durrësit plot 20 mijë ton lëndë të rrezikshme të zhdukura pa destinacion, dhe me origjinë të panjohur, për të cilat kompania Sokolaj pretendon se i ka marrë nga Kurum.

Në konfirmim të inspektimit me urdhër të ministres Kumbaro, Ministria e Mjedisit, dha një tjetër detaj, që shtoi dyshimet për origjinën e 20 mijë ton mbetjeve të rrezikshme.

Rezultoi se kompania Kurum nuk kishte kontratë aktive për transferimin e mbetjeve të rrezkishme, ndaj dhe është gjobitur me 1.5 milionë lekë gjobë, dhe pezullimin e aktivitetit të transferimit deri në lidhjen e një kontrate.

Kjo gjetje në Kompaninë Kurum, konfirmon se jo vetëm 816 tonët me destinacion Tajlandën, por edhe 20 mijë tonët e eksportuara nga Sokolaj, nuk mund të jenë marrë te Kurum, për sa kohë mes dy kompanive nuk ka një marrëveshje.

Edhe kompania Kurum, në një deklaratë për mediat u shpreh se 816 tonët me mbetje të rrezikshme nuk janë të sajat.

Ekspertët e mjedisit konfirmuan faktin se Shqipëria nuk mund të prodhojë një sasi të tillë mbetjesh

Nga të dhënat e Agjencisë Kombëtare të Mjedisit rezultoise: Mbetje të ngurta nga trajtimet e gazeve, qëpërmbajnë substanca të rrezikshme, të identifikuara me Kodin 10 02 07*, në një vit, e gjithë industria shqiptare e marrë sëbashku prodhon 8.6 ton.

Dokumentat zyrtare të publikuara në emision ngarkojnë me përgjegjësi direkte MIE dhe autoritetin portual Durrës, si institucionet që do të duhet të kishin parandaluar këtë aferë.

Trafiku i mbetjeve të rrezikshme, duket se nuk është një histori e re për Shqipërinë.

Prej vitit 2020, Ministria e Mjedisit në bashkëpunim me gjermanët e GIZ kanë hartuar Dokumentin e Politikave Strategjike dhe Planin Kombëtar të Menaxhimit tëIntegruar të mbetjeve, ku pjesë e këtij studimi është edhe harta e zonave me ndotjen më të lartë nga mbetjet e rrezikshme.

Sipas këtij dokumenti, janë dhjetëra zona të ndotura në territorin e vendit, që prej vitesh janë kthyer në një rrezikpër jetën e qytetarëve, pasi këto mbetje nga shiu dhe uji përhapen në natyrë e gjallesa duke u kthyer në rrezik serioz për jetën e qyetarëve.

The post Genta Vangjeli: Trafikimi i 20 mijë ton të lëndëve të rrezikshme nga Shqipëria drejt Azisë, skandali që përfshin dhe autoritetet shtetërore appeared first on Albeu.com.

Hetuesit pretendojnë se katër të dyshuar – siç raportohet, bëhet fjalë për 36-vjeçarin Tate, vëllain e tij, Tristan, dhe dy gra rumune – formuan një grup kriminal për trafikimin e njerëzve në Rumani dhe vende të tjera, si Shtetet e Bashkuara të Amerikës dhe Britania e Madhe. Në mesin e krimeve për të cilat dyshohen është edhe përdhunimi.

Ish-kikboksieri, i lindur në SHBA, me nënshtetësi britanike, Tate ka ndërtuar një markë multimilionëshe në internet mbi konceptet e maskulinitetit, mizogjinisë dhe “krijimit të pasurisë”. Pas arrestimeve, një gjykatë e Bukureshtit urdhëroi të dyshuarit të qëndrojnë në paraburgim për të paktën një muaj.

Problemi i trafikimit me qenie njerëzore dhe për shërbime seksuale në Rumani nuk pritet të zhduket brenda natës. Përderisa numri i rasteve ka rënë që kur Rumania krijoi një Agjenci Kombëtare për ta luftuar trafikimin me njerëz, autoritetet vazhdojnë të raportojnë për rreth 30 viktima të reja çdo muaj.

Në gusht të vitit 2022, Departamenti i Shtetit i SHBA-së e vlerësoi Qeverinë rumune për “përpjekje të rëndësishme”, por paralajmëroi se ajo ende “nuk i plotëson plotësisht standardet minimale për eliminimin e trafikimit”.

Policia rumune pretendon se rrjeti i influencuesit Tate futi në grackë shtetasit britanikë duke përdorur metodën “djali i dashuruar” – taktikë sipas së cilës trafikantët joshin viktimat me perspektivën e një marrëdhënieje dashurie deri kur ato të mund të detyrohen të qëndrojnë në situata abuzive ose skllavëri.

Shërbimi Rumun i Radios Evropa e Lirë ka hulumtuar të dhënat zyrtare dhe dëshmitë gjyqësore të viktimave rumune të trafikimit për të identifikuar disa taktika kryesore të trafikantëve të njerëzve. REL-i ka përdorur pseudonime për gratë e përmendura në këtë tekst, me qëllim për ta mbrojtur identitetin e tyre.

Gjahtari i internetit

Andreea lindi në një familje të varfër dhe u rrit në Qarkun Alba, në regjionin historik të Transilvanisë në Rumani. Ajo e la shkollën në klasën e dytë dhe u la, menjëherë më pas, nga nëna e saj nën kujdesin e gjyshes, pasi prindërit e saj u ndanë dhe të dy u larguan në kërkim të mundësive jashtë vendit.

Vite më vonë, si një 20-vjeçare, Andreea do të dëshmonte se si kishte kërkuar me dëshpërim një vend pune në Rumani përpara se të udhëtonte drejt Britanisë me shpresën se do të punonte në një fabrikë çokollate, por ku përfundoi si prostitutë.
Ajo dëshmoi në gjykatë se udhërrëfyesi i saj në botën e errët të trafikimit me qenie njerëzore ishte një burrë i quajtur Sebastian Z.

Ata u “takuan” në Facebook në dhjetor të vitit 2020. Pas vetëm disa bisedave, tha ajo, Sebastiani kishte deklaruar dëshirën e tij për t’u martuar me Andreean. Por, kishte një kusht: asaj do t’i duhej të shkonte me të në Britani, ku ai do ta ndihmonte të gjente punë.

Një psikolog gjyqësor që ekzaminoi Andreean theksoi cenueshmërinë e saj si një 18-vjeçare me pak përvojë jetësore dhe arsimim. Ajo nuk kishte aftësi leximi apo në matematikë.

Sebastiani i thoshte se e donte dhe kishte një respekt të veçantë për gratë, tha ajo, dhe se do ta bënte të lumtur dhe do ta mbronte.

Ajo udhëtoi për në Britani në janar të vitit 2020 pa i treguar askujt në familjen e saj. Ajo nuk mbante me vete shumë më shumë se rrobat që kishte veshur dhe një telefon përderisa udhëtonte me autobus për në Birmingham dhe më pas për në Wolverhampton, ku “i dashuri” i saj dhe një mik i tij me gruan e vet kishin një shtëpi me qira. Pas mbërritjes në Angli, ajo u përfshi shpejt në prostitucion për të mos përfunduar në rrugë.

Sebastian krijoi një profil të rremë në internet për të, tha Andreea, dhe “klientët fillonin të mbërrinin në orën 11 të mbrëmjes deri rreth orës 3 të mëngjesit”.
Pas dy muajsh, ajo u kthye në Rumani pasi një anëtar i familjes atje u sëmur. “Më tha se nëse i tregoja dikujt apo policisë, do të vinte të më therte me një thikë dhe do të më vriste”, dëshmoi ajo. Por, Andreea gjeti guximin t’ia tregonte gjyshes, e cila menjëherë iu drejtua policisë.

Sebastian Z. dhe trafikantët e tjerë të saj u dënuan me deri në katër vjet burgim.
Agjencia Kombëtare e Rumanisë për luftimin e trafikimit të qenieve njerëzore thotë se gati një e katërta e të gjithë atyre që raportojnë se janë trafikuar, janë rekrutuar në këtë mënyrë.

“Djali i dashuruar”

Që nga arrestimi i vëllezërve Tate, vajza 19-vjeçare e një ish-ligjvënësi rumun i ka akuzuar publikisht se u përpoqën t’i fusnin në këtë grackë atë dhe shoqet e saj të shkollës me mesazhe telefonike të padëshiruara, “mjaft sugjestive” që kur ishte 16 vjeç.

Daria Gusa tha se Tate “në thelb më kishte kërkuar të dilja me të” dhe kishte aplikuar një strategji të ngjashme edhe me vajzat e tjera në zonat e Ilfov dhe Prahova, pranë shtëpisë së tij.

“Në thelb, ishte metoda e ‘djalit të dashuruar’”, tha ajo për mediat lokale.

Ajo nuk do të ketë qenë e vetmja në mesin e grave rumune.

Në mars të vitit 2020, Maria filloi një lidhje romantike me burrin që do të bëhej torturuesi i saj. Ajo mendoi se ishte dashuri dhe u shpërngul në një shtëpi me të në Qarkun Giurgiu, afër kufirit bullgar, siç dëshmoi ajo më vonë, pasi ai i premtoi hënën dhe yjet dhe iu betua se do të martohej me të.

Dy muaj më vonë, në maj të vitit 2021, ajo mbërriti me makinën e një shoqeje në qytetin gjerman të Nurembergut, ku priste të bëhej shtëpiake, ndërsa i fejuari i saj punonte në një kantier ndërtimi. Por, ajo shpejt zbuloi se ishte mashtruar.

“Unë qëndrova në një apartament me dy kolegë [të të dashurit tim]”, tha ajo.

“Njëri prej tyre më tha të shkoja të punoja në Puff [bordello lokale]gjë që e bëra”.
Ajo punonte çdo natë dhe “i dashuri” e merrte në orët e para të mëngjesit dhe i merrte të gjitha paratë e fituara. Ata kishin debate të shpeshta dhe “shumica përfundonin me rrahje”.

Një natë, pasi ajo refuzoi të pranonte më klientë, ai erdhi për ta marrë dhe e çoi në shtëpi, “ku më goditi me grushte dhe shkelma derisa unë … humba vetëdijen”.
Disa muaj pas shpërnguljes, përpjekja e saj e parë e arratisjes dështoi. Përpjekja tjetër pati sukses pasi ajo bleu një biletë minibusi për në Rumani me paratë e fituara një natë. Por, një grua tjetër e zbuloi dhe i tregoi trafikantit të saj, i cili shpejt mbërriti në shtëpinë e nënës së saj në Rumani. Ata u pajtuan.

Brenda disa muajsh, ajo pranoi të kthehet në Gjermani për të punuar si prostitutë. Me kalimin e kohës, ajo do të mësonte se “i dashuri” i saj ishte martuar me një grua tjetër, e cila gjithashtu punonte si prostitutë në Gjermani.

Hetuesit arritën në përfundimin se Maria kishte qenë e varur emocionalisht nga dhunuesi i saj dhe u besonte me të vërtetë premtimeve të tij për “dashuri dhe mbrojtje”. Ata, gjithashtu, besonin se “i dashuri” kishte bërë disa pagesa për nënën e Marias. Gjatë ndjekjes penale dhe dënimit eventual në lidhje me trafikimin e grave të tjera, Maria vazhdoi të përpiqej ta mbronte atë nga drejtësia.

I njohuri ose i afërmi

Diana ishte një grua e re me probleme mendore. Ajo kishte një diagnozë mjekësore të çrregullimit afektiv bipolar. Në vitin 2015, ajo ishte 22 vjeçe dhe jetonte në varfëri në kryeqytetin e qarkut Prahova, Ploesti.

Një person i dënuar për mundësim dhe organizim prostitucioni në Greqi mori vesh disi për situatën e saj dhe kontaktoi me të nëpërmjet një xhaxhai. Ajo kishte humbur kohët e fundit kartën e saj të identitetit dhe së shpejti xhaxhai i saj – me paratë që mori nga trafikanti – i ndihmoi asaj të nxirrte një të re. Ai gjithashtu i bleu rroba dhe, në fund, një biletë avioni për në Britani të Madhe.

Pasi mbërriti në Liverpool në gusht të vitit 2015, Diana u mor në aeroport nga dy burra dhe u dërgua në qytetin skocez të Glasgow. Asaj ia morën menjëherë dokumentet e identifikimit dhe i thanë se tani ishte prostitutë. Ata i rekrutuan klientët e saj përmes faqeve të specializuara të internetit. Ajo u përball me rrahje të shpeshta për shkak se kundërshtonte udhëzimet e tyre.

Në tetor të vitit 2015, Diana kishte mbledhur guximin dhe energjinë për t’u arratisur. Ajo ndaloi makinën e parë që kaloi pranë saj dhe, duke qarë, i tregoi gjithçka shoferit, i cili e thirri policinë. Autoritetet skoceze hapën rast hetimi, i cili që nga atëherë është marrë përsipër nga Drejtoria e Rumanisë për Hetimin e Krimit të Organizuar dhe Terrorizmit (DIICOT).

Shantazhuesi

Kur Elena takoi dhunuesin e saj, ajo nuk ishte ende 17 vjeç. Ishte fillimi i vitit 2020 dhe adoleshentja kishte një marrëdhënie të tensionuar me prindërit e saj dhe kishte vendosur të ikte nga shtëpia. Pikërisht atëherë një shoqe e prezantoi me një burrë, të cilin e takoi një mbrëmje, afër mesnatës, për një pije në një pikë karburanti në vendlindjen e saj.

“Fillova të dilja me të, të flisja në telefon – i fshihja këto gjëra nga prindërit e mi, duke përfshirë këtu edhe faktin që ai kishte një fëmijë të vogël”, u tha ajo më vonë hetuesve.

“Që nga hera e parë që u takuam, i thashë se isha 16 vjeç e gjysmë, [pra kjo është] diçka që ai e dinte gjithmonë”.

Në një moment, ajo pranoi që ai ta filmonte përderisa bënin seks. Elena më vonë u largua nga shtëpia e prindërve të saj dhe u zhvendos me atë person. Prindërit e saj kontaktuan shpesh policinë në një përpjekje të pasuksesshme për ta kthyer vajzën e tyre në shtëpi.

Thuhet se qëllimi i burrit ishte ta çonte Elenën në Gjermani – siç duket për ta bërë prostitutë atje – por mosha e pengonte ta linte vendin pa lejen e prindërve.

Ai u dërgoi të njohurve dhe familjarëve të saj imazhe eksplicite të Elenës nga videoja e incizuar në një përpjekje për t’i shantazhuar që t’ia plotësonin dëshirën. Dhjetëra individë morën imazhe eksplicite në WhatsApp dhe Facebook.

Në fund, Elena u kthye në shtëpinë e prindërve të saj.

“Pasi mësova për atë video nga të afërmit e mi, shumë shpejt mora vesh se ajo po qarkullonte në të gjitha rrjetet sociale dhe mund ta shihnin të gjithë, prandaj thirra policinë”, u tha autoriteteve nëna e saj.

Por, prindërit e saj thonë se përvoja e ka dëmtuar Elenën për gjithë jetën, duke e lënë atë të heshtur dhe vazhdimisht në depresion, aq sa për të tentuar vetëvrasjen, gjë që u shmang vetëm sepse një mik ndërhyri për ta shpëtuar./REL

The post Pas arrestimit të Andrew Tate, zbulohen taktikat e trafikantëve për mashtrimin e vajzave appeared first on Albeu.com.

Midis këtyre viktimave, ka një përqindje të lartë të fëmijëve dhe të rinjve, ndërkohë që vajzat e moshës 14-18 vjeç kanë më shumë gjasa të shënjestrohen për trafikim seksual.

Kjo është ajo çfarë vërehet në një studim të kohëve të fundit të UNICEF dhe qeverisë së Mbretërisë së Bashkuar mbi marrëdhëniet ndërmjet viktimave të trafikimit dhe trafikantëve të qënieve njerëzore në Shqipëri.

Një analizë e fundit e 99 rasteve të trafikimit të qenieve njerëzore tregoi se 68 për qind e trafikantëve ishin ose anëtarë të ngushtë të familjes, ose kishin lidhje të ngushta shoqërore me viktimat.

Nga të 99 rastet, 31 përqind u raportuan se ishin raste ku të dashurit kishin shfrytëzuar viktimat, 25 përqind ishin miq të viktimës dhe 12 për qind përfshinin anëtarë të familjes.

Në 19 për qind të rasteve viktimat janë shfrytëzuar nga njerëz që kishin takuar në mediat sociale.

Studimi ngre pikëpyetje se ndonëse shqiptarët shpesh trafikohen nga dikush me të cilin ata janë të afërt, mbetet më tepër për t’u kuptuar mënyrat se si trafikantët rekrutojnë, shfrytëzojnë dhe kontrollojnë viktimat të cilat ata i njohin, si ndikohen marrëdhëniet pas arratisjes së viktimave dhe cili është niveli i cënueshmërisë së ritrafikimit.

Për këtë arsye janë intervistuar mes të tjerash të mbijetuar(a) të trafikimit dhe persona me njohuri mbi çështjen. Nga 30 të mbijetuarit(at) e intervistuar, 90% ishin femra dhe 10% meshkuj.

47% nga të mbijetuarit(at) e intervistuar ishin fëmijë në kohën e shfrytëzimit të tyre, 13% nga të mbijetuarit(at) u përkisnin pakicave etnike ndërsa (87%) e identifikuan veten si shqiptarë etnikë.

Nga të mbijetuarit(at), 77% prej tyre ishin trafikuar brenda vendit ( në Shqipëri) ,zakonisht në qendrat kryesore urbane si Tirana dhe 7% ishin trafikuar më parë.

77% prej tyre ishin trafikuar për shfrytëzim seksual dhe 23% për punë të detyruar, duke përfshirë aktivitete kriminale dhe lypje.

Marrëdhëniet midis viktimave dhe trafikantëve
Studimi tregon se shumica e të mbijetuarve të trafikimit dhe konkretisht 84 përqind e të mbijetuarve ishin trafikuar nga dikush shumë i afërt me ta.

Kështu, 47% përqind e tyre ishin trafikuar nga një partner intim (i dashuri, i fejuari, bashkëshorti).

27% prej tyre raportuan se trafikantët e tyre ishin miq të tyre. Ndërsa 10% identifikuan anëtarët e familjes, prindin/prindërit ose gjyshin/gjyshërit si trafikantët e tyre.

Trafikantë të tjerë që u identifikuan ishin punëdhënësit (2; 7%), pronarët (1; 3%) dhe partneri intim i motrës (1; 3%).

Profilet e trafikantëve
Njëzet e tre nga 30 të mbijetuarit(at) e intervistuar (77%) identifikuan trafikantin(ët) e tyre si meshkuj dhe pesë (16.5%) thanë se trafikantet e tyre ishin femra.

Në të pesta rastet, trafikantet femra ishin shoqe apo mike të viktimës.

Të mbijetuarit(at) e intervistuar sugjeruan se trafikantët e tyre ishin me arsim të kufizuar. Vetëm pesë të mbijetuar(a) të intervistuar (16.5%) raportuan se trafikantët e tyre ishin të punësuar në kohën e shfrytëzimit të tyre.

Shumë femra të mbijetuara të intervistuara të trafikuara nga partneri intim raportuan se e kishin takuar trafikantin në zonën e tyre.

Nga katërmbëdhjetë të mbijetuar(a) të intervistuar (47%) raportuan se trafikantët e tyre ishin të organizuar në grupe të vogla ose të mesme të krimit të organizuar,(40%) thanë se trafikantët e tyre kishin shfrytëzuar viktima të tjera, (20%) thanë se trafikantët e tyre ishin gjithashtu të përfshirë në trafikun e drogës dhe (10%) thanë që trafikantët e tyre ishin të përfshirë edhe në vjedhje ose grabitje.

13% raportuan se, përveç veprave penale të trafikimit të qenieve njerëzore, trafikantët e tyre ishin përfshirë gjithashtu në trafik droge dhe vjedhje ose grabitje.

Motivimet e trafikantëve
Të gjithë të mbijetuarit(at) e intervistuar raportuan se motivimi kryesor i trafikantëve të tyre ishte përfitimi financiar. Sipas tyre, trafikantët ishin ose shumë të pasur, ose shumë të varfër. Edhe trafikantët e përshkruar si të pasur u raportuan si të përfshirë në aktivitete të tjera kriminale.

Trafikantët e përshkruar si të varfër shpesh përshkruheshin se kishin borxhe të grumbulluara

për shkak të përfshirjes në lojërat e fatit ose varësisë ndaj alkoolit ose drogës, të cilat ata përpiqeshin t’i paguanin përmes shfrytëzimit të viktimave.

Taktikat e rekrutimit
Ky studim identifikon disa taktika të reja të përdorura nga trafikantët e qenieve njerëzore për të rekrutuar viktima të mundshme.

Aktualisht, trafikantët e qenieve njerëzore në Shqipëri i vlerësojnë me kujdes cënueshmëritë dhe dëshirat e viktimave të tyre të mundshme, në mënyrë që të vendosin qasjen më të mirë për të krijuar një marrëdhënie me ta.

Trafikantët bëjnë gjithashtu përpjekje për të krijuar marrëdhënie me familjen e viktimës duke u futur në jetën e viktimës dhe duke fituar besimin e familjes. Trafikantët, veçanërisht meshkujt e rinj, krijojnë marrëdhënie romantike me viktimat e trafikimit seksual (veçanërisht vajzat adoleshente), duke u premtuar viktimave martesë dhe fëmijë së bashku.

Raporti thekson qartë se një tregues i trafikimit të qenieve njerëzore sot në Shqipëri është natyra e nxituar e krijimit të një marrëdhënieje romantike.

Trafikantët futen shpejt në jetën e viktimës dhe familjen e tyre dhe më pas i zhvendosin viktimat me shpejtësi në një qytet tjetër ose jashtë shtetit.

Mediat sociale, mjet për trafikim
Mediat sociale po përdoren gjithnjë e më shumë si një mjet nga trafikantët meshkuj për të identifikuar viktima të reja femra të mundshme me të cilat mund të krijojnë një marrëdhënie të rreme përpara se t’i trafikojnë ato për shfrytëzim seksual në Shqipëri apo gjetkë.

Autoret femra luajnë një rol shumë të rëndësishëm në veprat penale të trafikimit të qenieve njerëzore: ato veprojnë si mikesha e viktimës, por më pas i joshin ato drejt vendit të shfrytëzimit.

Shumë autore femra janë vetë ish-viktima të trafikimit.

Për fëmijët që trafikohen nga anëtarët e familjes, nuk përdoren taktikat e rekrutimit, por përkundrazi, ata manipulohen nëpërmjet përgjegjësisë së fëmijës për të mbështetur financiarisht familjen dhe detyrohen të bëjnë punë shfrytëzuese.

Taktikat e kontrollit
Disa nga taktikat e kontrollit të identifikuara në studim janë ato që janë identifikuar më parë në literaturën mbi trafikimin e qenieve njerëzore. Trafikantët përdorin taktikat e kontrollit nëpërmjet kërcënimit, dhunës, izolimit dhe konfiskimit të dokumenteve të identitetit,udhëtimit dhe të telefonit, për të kontrolluar viktimat e tyre. Përveç kësaj, ata mund t’i bëjnë viktimat të binden përmes përdorimit të drogës në mënyrë të rregullt.

Studimi zbulon disa gjetje të reja dhe të rëndësishme në lidhje me taktikat e kontrollit të trafikantëve ndaj viktimave.

I njohur për viktimën, trafikanti mund ta manipulojë më lehtë atë (se sa trafikantët që nuk njihen nga viktimat) përmes borxheve të pavërteta dhe kërcënimeve.

Për shkak se viktima beson se është në një marrëdhënie, ose se janë miq të ngushtë me trafikantin, ajo bie dakord kur i thuhet se duhet të shlyejë një borxh të pavërtetë. Viktimat që e njohin trafikantin e tyre gjithashtu kontrollohen lehtësisht përmes kërcënimeve ndaj anëtarëve të familjes së tyre, sepse viktima e di që trafikanti është i vetëdijshëm për cenueshmëritë e tyre dhe ka adresën dhe të dhënat e tjera personale të anëtarëve të familjes. Trafikantët që njihen nga viktima gjithashtu mund ta kontrollojnë lehtësisht viktimën duke e ndarë atë nga familja.

Për shembull, trafikantët mund të krijojnë mosmarrëveshje midis viktimës dhe anëtarëve të familjes së tyre dhe, më vonë, ta bëjnë viktimën të kontaktojë me familjen për t’i thënë se janë shpërngulur jashtë shtetit me partnerin ose shokun e tyre intim (trafikantin) dhe nuk duan të komunikojnë më me familjen.

Kjo e lë viktimën të ndjehet se nuk ka mbështetje familjare dhe, për rrjedhojë, të mos ketë ku të shkojë dhe të mos ketë askënd për ta ndihmuar. Për pjesëmarrësit në intervista që ishin trafikuar kur kishin qenë fëmijë, sipas tyre, në atë moshë ata kishin një kuptim të kufizuar të faktit se po shfrytëzoheshin.

“Trafikantët (shpesh anëtarë të familjes) thjesht e shfrytëzonin këtë mungesë njohurie dhe mirëkuptimi për t’i mbajtur fëmijët të bindur. Kërcënimet e vazhdueshme mbi fëmijën që detyrohet të jetojë në rrugë kanë një efekt të fortë dhe e pengojnë atë të largohet nga situatat e shfrytëzimit dhe abuzimit.”,- vërehet në studim.

Studimi tregon se viktimat që trafikohen nga dikush që ata e njohin mund t’i vonojnë përpjekjet për t’u arratisur për shkak të ndjenjave të detyrimit, dashurisë dhe dhembshurisë ndaj trafikantëve të tyre. Për fëmijët viktima, ndjenja e detyrimit ndaj familjes luan një rol shumë të rëndësishëm në hezitimin për t’i shpëtuar shfrytëzimit. Viktimat që trafikohen nga një partner intim përjetojnë mosbesim që janë shfrytëzuar nga dikush që ata e duan. Ata mund të shtyjnë çdo përpjekje për t’u larguar sepse shpresojnë se shfrytëzimi do të mbarojë dhe marrëdhënia e tyre me trafikantin do të kthehet si ka qenë më parë.

Nga ana tjetër, studimi identifikon se marrëdhëniet midis viktimave dhe trafikantëve mund të kenë efekt negativ mbi cenueshmërinë e viktimave ndaj ritrafikimit nga i njëjti autor.

Fëmijët që trafikohen nga anëtarët e familjes dhe viktimat që trafikohen nga një partner intim, duket se janë në rrezik më të madh për t’u ritrafikuar nga i njëjti autor.

Megjithatë, nëpërmjet shërbimeve mbështetëse gjithëpërfshirëse, viktimat mund të ndihmohen ta kalojnë traumën dhe të marrin vendimin që të ndërpresin çdo kontakt me trafikantin, duke ulur kështu cenueshmërinë e tyre ndaj ritrafikimit.

Përpjekjet për të parandaluar fenomenin e trafikimit për të rinjtë shqiptarë (meshkuj dhe femra) mund të zvogëlojnë rrezikun e kryerjes së krimeve. Studimi tregon se meshkujt dhe femrat e reja shqiptare luajnë një rol kryesorë në veprat penale të trafikimit të qenieve njerëzore.

“Nëpërmjet edukimit në shkollë të mesme mbi treguesit e trafikimit të qenieve njerëzore, ndërgjegjësimit për dëmin që u shkakton trafikimi i qenieve njerëzore viktimave dhe dënimeve të rrepta në rast deklarimi fajtor, të rinjtë mund të frenohen për kryerjen e veprave të tilla në të ardhmen.

Në Shqipëri duhet të futen ose zgjerohen programe arsimore që të përmirësojnë aftësinë e prindërve për të folur me fëmijët e tyre për shëndetin seksual, dhunën dhe abuzimin seksual dhe marrëdhëniet e shëndetshme.”

Nga ana tjetër vërehet se agjencitë përkatëse qeveritare dhe OJQ-të duhet të përpiqen më shumë për të identifikuar familjet që jetojnë në varfëri, borxhe, abuzojnë me drogën dhe alkoolin ose dhunohen dhe për t’u ofruar këtyre familjeve mbështetje sociale dhe ekonomike.

Tiparet karakteristike të trafikantit/es

Anëtarët e familjes që trafikojnë fëmijët zakonisht shfrytëzojnë vetëm një ose dy prej tyre./GazetaSi

The post Direkt pas nigerianëve! Shqiptarët trafikohen me shumicë nga familjarët ose të afërm të tyre, strategjia që përdorin ata për t’i futur në “rrjetë” appeared first on Albeu.com.

“Trendi aktual i trafikimit të qenieve njerëzore në Ballkan” ishte tema në forumin e sotëm, teksa amvasadorja u shpreh optimiste se vendi jonë është i përkushtuar për t’u përballuar me plagët e trafikimit.

“Është çështje e rëndësishme që na mbledh të gjithëve bashkë. Për 4 mijë vite trafikimi dhe skllavëria kanë qenë plotësisht të pranuara.

Trafikimi , skllavëria është e ndaluar. Jam e sigurt që Shqipëria është e përkushtuar të mbajë qëndrim në çështjen e trafikimit të qenieve njerëzore. Vlerësoj që Shqipëria ka ndërmarrë hapa për të ndëshkuar personat e dyshuar për trafikim.

Viktimat e trafikimit duhet të jenë të përshtatura, po flasim për qenie njerëzore me emër me fytyrë. Qeveria ka miratuar një plan kombëtar për trafikimi, por mbetet ende shumë punë për tu bërë,” tha Kim./albeu.com

The post Yuri Kim: Shqipëria e përkushtuar të përballet me plagët e trafikimit appeared first on Albeu.com.

Ambasadorja tha se njerëzit humbasin besimin në sistem kur shohin politikanë të korruptuar dhe sipas saj, e vetmja mënyrë për të luftuar krimin e organizuar është të kemi institucione të pavarura që mbështesin zbatimin e ligjit.

Më tej u shpreh se arrestimi i politikanëve të korruptuar është vetëm fillimi.

“Kur njerëzit e ndershëm shohin politikanë të korruptuar ata humbasin besimin në sistem. Atyre duhet t’u garantohet se do të kenë çdo shans përballë njerëzve të tillë. E vetmja mënyrë për të luftuar krimin e organizuar është të kemi institucione të pavarura që mbështesin zbatimin e ligjit.

Shqipëria ka arritur suksese të vërteta në vitin 2021 që nga largimi i gjyqtarëve dhe prokurorëve të korruptuar, arrestimi i politikanëve. Ky është vetëm fillimi. Ne po shohim një epokë të re. Ekziston ndjesia se pandëshkueshmëria po merr fund. 60-65 ton heroinë kontrabandohen në rajon gjatë vitit. Kjo tregon që trafikimi mund të ndodhë vetëm me ndihmën e aktorëve shtetërorë”, tha ambasadorja.

Kim u ndal dhe te trafikimi i qenieve njerëzore, dhe tha se është rritur duke theksuar se mijëra emigrantë kalojnë përmes Shqipërisë për në BE.

“Trafikimi i qenieve njerëzore është rritur gjithashtu. Mijëra emigrantë kalojnë përmes Shqipërisë për në BE. Korrupsioni luan një rol në këtë gjë. Grupe e krimit të organizuar vazhdojnë të pastrojnë paratë. Ajo për të cilën jemi për të folur këtu sot është se si ministria e Brendshme mund ta bëjë Shqipërinë një vend më të mirë për të gjithë. Duhet të rritet transparenca dhe llogaridhënia”, tha Yuri Kim./albeu.com

The post Arrestimi i politikanëve të korruptuar, Yuri Kim: Ky është vetëm fillimi appeared first on Albeu.com.