Eksperti i sigurisë Gurakuç Kuçi ka reaguar pas deklaratave të presidentit serb Aleksandar Vuçiç, duke thënë se thirrjet e tij për “mbrojtje të serbëve në Kosovë” janë në kundërshti me përkrahjen që, sipas tij, Beogradi vijon t’u japë personave të lidhur me sulmin në Banjskë dhe me rrjete kriminale.

Sipas Kuçit, Milan Radoiçiç nuk po ndiqet për arsye politike, por për akuza të rënda, ku përfshihen krime lufte dhe terrorizëm. Ai rikujton se Radoiçiç ndodhet nën sanksione amerikane, kërkohet nga drejtësia e Kosovës dhe, përmes avokatit të tij, ka marrë përgjegjësinë për sulmin në Banjskë.

Kuçi vlerëson se përkrahja politike dhe financiare që Serbia ua jep personave të lidhur me këtë rrjet dëshmon se çështja nuk lidhet vetëm me krimin e organizuar, por me përdorimin e tij si mjet i politikës shtetërore ndaj Kosovës.

“Ndarja reale nuk është mes serbëve dhe shqiptarëve, por mes drejtësisë dhe krimit”, përfundon ai.

Kuçi e ka titulluar reagimin e tij me pyetjen: “Mbrojtje për serbët, apo mbrojtje për Radoiçiqin?”

Ai thotë se këtu qëndron paradoksi më i madh i politikës serbe ndaj Kosovës: ndërsa Vuçiq i kërkon KFOR-it dhe NATO-s “mbrojtje për serbët në Kosovë”, sipas tij Beogradi njëkohësisht mbron dhe relativizon individë të lidhur me krimin e organizuar, sulmet ndaj KFOR-it, sulmin terrorist në Banjskë dhe destabilizimin e veriut të Kosovës.

Sipas tij, nuk mund të kërkohet siguri për një komunitet në të njëjtën kohë kur u jepet mbështetje politike strukturave që prodhojnë terrorizëm për të gjitha komunitetet.

Kuçi thekson se rasti i Milan Radoiçiqit dhe Zvonko Veselinoviqit nuk është thjesht një histori kriminale, por mënyra sesi krimi i organizuar, nacionalizmi shtetëror dhe politika e Vuçiqit bashkohen në një mekanizëm të vetëm presioni ndaj Kosovës.

Më tej, ai rendit faktet një nga një.

Së pari, Kuçi thotë se Radoiçiq dyshohet për vrasjen e 106 civilëve shqiptarë dhe keqtrajtimin e 300 të tjerëve në Gjakovë. Ai kujton se në prill 2025, Gjykata Themelore në Prishtinë lëshoi urdhër-arrest ndaj Radoiçiqit dhe 19 personave të tjerë të dyshuar për krime lufte në Gjakovë.

Së dyti, ai nënvizon se para se Vuçiqi dhe SNS-ja të vinin në pushtet, institucionet serbe i kishin identifikuar Radoiçiqin dhe Veselinoviqin si figura të lidhura me rrjete kriminale që përfshinin drogë, armë, naftë, fajde dhe pastrim parash. Më vonë, Departamenti amerikan i Thesarit e përshkroi rrjetin e Veselinoviqit si organizatë kriminale të përfshirë në trafikim mallrash, parash, narkotikësh dhe armësh mes Kosovës dhe Serbisë.

Së treti, sipas Kuçit, Radoiçiq dhe Veselinoviq lidhen edhe me vrasjen e Oliver Ivanoviqit në vitin 2018, pasi aktakuza në Kosovë i përshkroi si drejtues të një grupi të organizuar kriminal që, sipas prokurorisë, mbante përgjegjësi për atë vrasje.

Së katërti, ai rikujton se në vitin 2021, SHBA-ja vendosi sanksione ndaj Radoiçiqit dhe Veselinoviqit, bashkë me persona dhe kompani të lidhura me ta. OFAC theksoi se ky rrjet ishte i përfshirë në korrupsion dhe në trafikim të paligjshëm të mallrave, parave, narkotikëve dhe armëve.

Së pesti, Kuçi sjell në vëmendje ngjarjet e 29 majit 2023, kur grupe të dhunshme serbe sulmuan pjesëtarët e KFOR-it në Zveçan, duke lënë të plagosur 30 paqeruajtës, 11 italianë dhe 19 hungarezë. KFOR-i i cilësoi këto sulme si të paprovokuara. Më pas u raportua se një ushtar hungarez humbi këmbën si pasojë e plagëve të marra.

Së gjashti, ai përmend sulmin e 24 shtatorit 2023 në Banjskë, kur një grup i armatosur sulmoi Policinë e Kosovës, ku mbeti i vrarë rreshteri Afrim Bunjaku, ndërsa më pas u vranë tre sulmues serbë. Kuçi thekson se Milan Radoiçiq e pranoi përgjegjësinë për ngjarjet në Banjskë përmes avokatit të tij, Goran Petronijeviq. Në Serbi ai u arrestua përkohësisht, por më vonë u lirua.

Së shtati, Kuçi thotë se në dhjetor 2023, Interpoli lëshoi fletarrest ndërkombëtar për Radoiçiqin në lidhje me sulmin në Banjskë.

Së teti, ai thekson se në shtator 2024, Prokuroria Speciale e Kosovës ngriti aktakuzë ndaj 45 personave për sulmin në Banjskë, mes tyre edhe ndaj Milan Radoiçiqit. Sipas tij, aktakuza përfshin terrorizëm, cenim të rendit kushtetues, financim të terrorizmit dhe pastrim parash.

Së nënti, Kuçi thotë se edhe pas aktakuzës për sulmin në Banjskë, institucionet e Serbisë kanë vazhduar të financojnë rrjete të lidhura me këtë rast. Ai i referohet një zbulimi të Radios Evropa e Lirë, sipas të cilit kompania “Rad 028”, në pronësi të Radulle Steviqit, i cili është nën sanksione amerikane dhe i akuzuar në Kosovë për përfshirje në rastin Banjska, ka përfituar kontrata milionëshe nga institucionet serbe. Vetëm që nga fillimi i vitit 2026, kjo kompani ka lidhur dhjetë kontrata me vlerë mbi një milion euro, ndërsa gjatë vitit 2025 kishte fituar mbi 30 kontrata me vlerë mbi 6.4 milionë euro. Sipas aktakuzës së Kosovës, Steviq, përmes kompanive të tij, e kishte ndihmuar Milan Radoiçiqin në pastrimin e parave. Për Kuçin, kjo dëshmon se lidhja e Beogradit me rrjetin e Banjskës nuk është vetëm politike dhe propagandistike, por edhe financiare dhe institucionale.

Ai kujton gjithashtu se ambasadori amerikan Jeffrey Hovenier e ka cilësuar Radoiçiqin si kriminel dhe ka kërkuar që ai të përballet me drejtësinë. Po ashtu, ish-emisari amerikan Gabriel Escobar ka kërkuar përgjegjësi për Banjskën dhe ka theksuar se ka pasur lidhje financiare e organizative me shtetin serb.

Sipas Kuçit, edhe Parlamenti Evropian e ka dënuar sulmin në Banjskë dhe ka kërkuar që autorët të mbajnë përgjegjësi. Ai shton se më 3 qershor 2026, Komiteti për Punë të Jashtme i Parlamentit Evropian, AFET, shprehu keqardhje që Serbia nuk i ka ndjekur penalisht përgjegjësit për sulmin në Banjskë, në veçanti Milan Radoiçiqin, dhe kërkoi bashkëpunim me Kosovën për sjelljen e autorëve para drejtësisë.

Kuçi përmend edhe qëndrimin e Britanisë së Madhe, e cila në tetor 2025 kërkoi në Këshillin e Sigurimit të OKB-së që Serbia të luajë rolin e saj për sjelljen para drejtësisë të përgjegjësve për Banjskën, përfshirë Milan Radoiçiqin. Ai shton se në prill 2026, Britania e Madhe e përsëriti këtë kërkesë dhe kërkoi drejtësi edhe për sulmet ndaj KFOR-it dhe Policisë së Kosovës në maj 2023.

Po ashtu, ai vëren se edhe Sekretari i Përgjithshëm i NATO-s, Mark Rutte, ka kërkuar nga Serbia përgjegjësi për sulmin në Banjskë dhe për sulmin ndaj trupave të KFOR-it në Zveçan.

Kuçi thekson se Ambasada gjermane dhe përfaqësues të vendeve partnere kanë kërkuar vazhdimisht përgjegjësi për sulmin në Banjskë. Sipas tij, ambasadori gjerman në Kosovë ka nënvizuar se Radoiçiqi dhe të gjithë të përfshirët në Banjskë duhet të dalin para drejtësisë.

Në fund, ai ndalet te deklarata më e fundit e Vuçiqit, për të cilën thotë se presidenti serb sërish i doli në mbrojtje Radoiçiqit duke deklaruar se ai nuk ndiqet “për krim”, por “për Kosovë e Metohi”. Për Kuçin, kjo nuk është një deklaratë e rastësishme, por mbrojtje politike për një figurë të sanksionuar nga SHBA-ja, të kërkuar nga Interpoli, të akuzuar në Kosovë dhe që ka pranuar përgjegjësinë për Banjskën. Ndërkohë, ai thotë se raportimi i Radios Evropa e Lirë tregon se institucionet serbe vazhdojnë t’u japin kontrata milionëshe kompanive të lidhura me persona të akuzuar për Banjskën. Sipas tij, kjo mbrojtje nuk kufizohet te deklaratat, por shfaqet edhe përmes parave publike, tenderëve dhe kontratave shtetërore.

Për këtë arsye, Kuçi shtron pyetjen se kur Vuçiq kërkon “mbrojtje për serbët në Kosovë”, dilema e vërtetë është: mbrojtje nga kush?

A është fjala për mbrojtje nga institucionet e Kosovës që kërkojnë rend dhe ligj?

Ose, siç shprehet ai, nga strukturat kriminale dhe paramilitare që vetë Beogradi i ka ushqyer, mbrojtur dhe përdorur për vite me radhë?

Sipas Kuçit, serbët e Kosovës nuk janë të rrezikuar nga drejtësia, por nga instrumentalizimi politik i Beogradit, nga strukturat kriminale që flasin në emër të tyre dhe nga një regjim që dhunën e paraqet si patriotizëm.

Ai shton se siguria nuk ndërtohet duke mbrojtur kriminelët.

Paqja, vijon ai, nuk ndërtohet duke amnistuar sulmet ndaj KFOR-it, Policisë së Kosovës dhe rendit kushtetues.

Sipas tij, drejtësia nuk mund të zbatohet në mënyrë selektive: ose Radoiçiq dhe rrjeti i tij përballen me drejtësinë, ose Serbia pranon hapur se krimi i organizuar është pjesë e politikës së saj shtetërore ndaj Kosovës.

Kuçi përfundon se kur një shtet nuk i ndjek penalisht rrjetet e dhunës, por vazhdon t’i ushqejë ato me kontrata publike, atëherë problemi nuk mbetet më vetëm te krimi i organizuar. Sipas tij, problemi është vetë shteti që e përdor krimin si instrument politik.

Në fund, ai e përmbledh qëndrimin e tij me vlerësimin se ndarja e vërtetë nuk është mes serbëve dhe shqiptarëve, por mes drejtësisë dhe krimit.

The post Kuçi rendit 9 argumente: Pse Vuçiq s’mund të pretendojë se po kërkon “mbrojtje për serbët” appeared first on Albeu.com.

Gjatë kësaj jave, në komuna të ndryshme të Kosovës janë regjistruar disa ngjarje të rënda që kanë lënë pas viktima dhe persona të plagosur.

Në Ferizaj, një person humbi jetën nga arma e zjarrit pas një përleshjeje brenda një banese, ndërsa si e dyshuar për rastin raportohet partnerja e tij.

Një rast tjetër me armë zjarri është raportuar edhe në Podujevë, ku u plagosën tre persona të dyshuar si dhe një kalimtar i rastit. Në vendin e ngjarjes, policia ka konfiskuar armë dhe municion.

Këto raste kanë shtuar shqetësimin për gjendjen e sigurisë dhe përdorimin e armëve në vend.

Sipas ekspertëve të sigurisë, pjesa më e madhe e krimeve me armë zjarri ndërlidhen me armë ilegale dhe me konflikte të natyrave të ndryshme, përfshirë ato personale, familjare, pronësore apo që lidhen me krimin e organizuar.

Po ashtu, ata kërkojnë rritje të kontrolleve policore, luftim më të fortë të armëve pa leje dhe masa ndëshkuese më të rënda për posedim të jashtëligjshëm, duke vlerësuar se vetëm parandalimi dhe bashkërendimi institucional mund të ndikojnë në uljen e dhunës në vend.

Dashevci: Duhet strategji urgjente kundër armëve ilegale

Eksperti i sigurisë Arben Dashevci, në një deklaratë për “Bota sot”, është shprehur se shumica e krimeve kryhen me armë ilegale, teksa ka renditur edhe disa prej shkaqeve kryesore.

“Viteve të fundit vendi ynë është tronditur nga shumë vrasje me armë, të cilat kanë shkaktuar shqetësim te qytetarët. Vrasjet, sipas statistikave, janë kryer kryesisht me armë ilegale.

Motivet e kësaj dukurie janë të ndryshme:

Motive të ulëta ose konflikte ndërpersonale, borxhe etj.

Dhuna në familje, alkooli, droga.

Konflikte pronësore.

Konflikte mes grupeve rivale, krim i organizuar.

Fajdet”, ka thënë ai.

Ai ka kërkuar shtim të kontrollit ndaj armëve ilegale, përmes patrullimeve dhe kontrolleve më të shpeshta nga Policia.

Dashevci ka paraqitur edhe disa masa parandaluese, duke përmendur si shembull edhe rastin e amnistimit të Londrës.

“Mendoj se duhet të ashpërsohet kontrolli mbi armët ilegale dhe posedimin e tyre, përmes patrullimeve dhe kontrolleve të shpeshta e efikase.

Masat konkrete që duhet të ndërmarrin Policia, organet e akuzës dhe drejtësia për të parandaluar raste të tilla, duhet të jenë të koordinuara, me qëllim që të ulet numri i rasteve të vrasjeve. Sipas mendimit tim, nevojitet një kombinim masash parandaluese (preventive):

Luftimi i armëve ilegale: kontrolle edhe më të shpeshta nga Policia në çdo vend ku ka dyshime, hetime efektive ndaj rrjeteve të kontrabandës me armë ilegale, si dhe fushata të vazhdueshme për dorëzimin e armëve ilegale, siç është shembulli i amnistisë (modeli i Londrës).

Dënime të zbatueshme, të shpejta dhe efektive, pra ashpërsim i masave kundrejt personave që posedojnë armë ilegale. Ashpërsimi i këtyre masave ndëshkuese duhet të shërbejë si parandalim primar”, ka shtuar ai.

Më tej, ai ka nënvizuar se asnjë masë e vetme nuk mund ta zgjidhë plotësisht këtë problem, por mund të ndikojë në uljen e numrit të rasteve.

Sipas Dashevcit, në qarkullim ka rreth 260 mijë armë ilegale, çka sipas tij kërkon reagim të menjëhershëm nga shteti dhe shoqëria.

“Asnjë masë nuk e zgjidh problemin në tërësi, por mund të zvogëlojë numrin e rasteve, që sipas statistikave sillet rreth 260 mijë armë ilegale, gjë që është shqetësuese dhe kërkon veprim të menjëhershëm nga të gjitha instancat shtetërore dhe shoqëria civile.

Rajoni i Ballkanit njihet si vend me shumë armë ilegale, si pasojë e luftërave, por ne kemi institucione të konsoliduara dhe nuk duhet të lejojmë assesi që pasiguria të dominojë mbi sigurinë.

Andaj, nevojitet bashkëpunim, bashkëveprim dhe koordinim i organeve ligjzbatuese për hartimin e një strategjie urgjente për luftimin e kësaj dukurie të rrezikshme dhe shqetësuese”, ka deklaruar Dashevci për “Bota sot”.

Berisha kërkon kontrolle më të rrepta mbi armët

Edhe njohësi i sigurisë Fidair Berisha, në një prononcim për “Bota sot”, ka shprehur shqetësim të madh për ngjarjet e fundit, duke theksuar se humbja e çdo jete mbetet një plagë e rëndë për familjet dhe për gjithë shoqërinë.

“Së fundmi, ngjarjet tragjike me armë që kanë ndodhur në vend më kanë shqetësuar thellësisht. Besoj se çdo humbje jete është një plagë e rëndë për familjet, komunitetin dhe shoqërinë në tërësi. Mendoj se dhuna nuk mund të jetë kurrë zgjidhje për konfliktet apo mosmarrëveshjet. Për këtë arsye, konsideroj se kontrolli mbi armët duhet të jetë më i rreptë dhe zbatimi i ligjit të zbatohet në përpikmëri”, ka thënë ai.

Ai ka theksuar më tej se mbajtja e armëve duhet të kufizohet vetëm te personat që i përmbushin në mënyrë rigoroze kriteret ligjore.

Sipas Berishës, edhe dënimet duhet të jenë të drejta dhe të zbatohen pa vonesë, në mënyrë që të japin efekt real në parandalimin e rasteve të tilla.

“Patjetër kërkohet që posedimi i armëve duhet të monitorohet me kujdes dhe vetëm personat që plotësojnë të gjitha kriteret ligjore duhet të kenë të drejtë t’i mbajnë ato. Po ashtu, besoj se kontrollet periodike dhe verifikimet e vazhdueshme do të ndihmonin në parandalimin e keqpërdorimit të armëve. Mendoj se Policia duhet të intensifikojë kontrollet në terren, të luftojë fuqishëm armët pa leje dhe të reagojë shpejt ndaj çdo informacioni që sinjalizon rrezik”, ka theksuar eksperti.

Në fund, Berisha ka vlerësuar se bashkëpunimi mes policisë, prokurorisë, gjykatave dhe qytetarëve është vendimtar për të parandaluar ngjarje të tilla.

“Nga ana tjetër, drejtësia duhet të veprojë me efikasitet, duke trajtuar me prioritet të gjitha rastet që kanë të bëjnë me armët dhe dhunën. Besoj se dënimet duhet të jenë të drejta dhe të zbatohen pa vonesa, në mënyrë që të kenë efekt parandalues. Gjithashtu, konsideroj se institucionet duhet të investojnë më shumë në edukimin e qytetarëve, veçanërisht të rinjve, për zgjidhjen paqësore të konflikteve. Bashkëpunimi mes policisë, prokurorisë, gjykatave dhe qytetarëve është thelbësor për të parandaluar ngjarje të tilla. Vetëm përmes zbatimit të ligjit, përgjegjësisë institucionale dhe angazhimit të përbashkët mund të ndërtojmë një mjedis më të sigurt për të gjithë. Ky duhet të jetë një prioritet i përhershëm për institucionet dhe për shoqërinë në tërësi”, ka shtuar Berisha për “Bota sot”.

The post Ngjarjet me armë në Kosovë shtojnë alarmin, ekspertët bëjnë thirrje për masa të menjëhershme ndaj armëve ilegale appeared first on Albeu.com.

Ngjarja që dërgoi disa persona në spital, mes tyre dhëndri dhe nusja ndodhi më 13 janar në Pistoia.

Në video, çifti dhe miqtë e tyre shihen duke kërcyer kur papritur hapet një vrimë në dysheme dhe të gjithë bien nga një lartësi prej rreth 8 metrash.

“Papritur e gjeta veten në një dimension tjetër, në errësirë, në boshllëk”, tha dhëndri Paolo Munaini.

“Brenda një momenti dëgjova trupa që binin mbi mua së bashku me mbeturinat”, shtoi ai për Corriere della Sera.

“Kishte gjak gjithandej, fillova të bërtas, po thërrisja gruan time Valerie. Ajo nuk reagonte dhe mendova se ishte zhdukur. Kisha frikë se ajo ishte varrosur nën rrënoja”, vazhdoi ai përshkrimin e tij për atë që ndodhi me festën e dasmës.

Në aksident mbetën të lënduar gjithsej 37 persona, ku 28 prej tyre duhet të qëndrojnë në spital për të paktën një 24 orë.

Dy, në fakt, u desh të shtroheshin në kujdes intensiv një fëmijë megjithëse burimet mjekësore, thonë se kjo është bërë për arsye paraprake dhe jo sepse jeta e tyre ishte në rrezik.

Çifti i porsamartuar, vendosi të padisë pronarin e sallës me hetimin e prokurorit, për të parë nëse ka pasur dështime në ndërtim në lokal.

Sipas mediave italiane, ishte hera e parë që ky vend përdorej për një event.

The post E rëndë, dasma kthehet në momente tmerri, dyshemeja “përpin” të ftuarit dhe çiftin (VIDEO) appeared first on Albeu.com.

Lajmin tronditës e ka bërë me dije Ministria e Punëve të Brendshme në Maqedoninë e Veriut.

“Më datë 01.12.2023 rreth orës 06 në Shkup është arrestuar G.R. nga Shkupi për shkak të ekzistimit të dyshimit se në territorin e Shkupit ua ka mundësuar dy meshkujve të moshuar të kenë marrëdhënie seksuale me dy të mitura nga Shkupi, pas çfarë të njëjtat i ka xhiruar.

Është njoftuar prokurori publik dhe ndërmerren masat për zbardhjen e rastit”, thuhet në njoftimin e MPB-së së Maqedonisë së Veriut.

The post Tmerr në Shkup, dy burra abuzojnë me të miturat, tutorja i filmonte appeared first on Albeu.com.

“Isha vetëm në shtëpi, kur tre persona hynë me forcë në banesë dhe më dhunuan. Por nuk arritën të më vidhnin gjë. Mungesa e energjisë elektrike e bëri situatën më të vështirë, pasi më me tytën e armës, te të armatosurit më godisnin pa pushim në kokë”, ka dëshmuar 54-vjeçari.

54-vjeçari ndodhet në spitalin rajonal te Fierit, ku dëmtimet me të mëdha i ka marrë në fytyrë. Ndërkohë që policia ka shoqëruar disa persona në lidhje me ketë ngjarje dhe po punon për zbardhjen e plotë të rrethanave dhe identifikimin dhe kapjen e autoreve.

The post U dhunua barbarisht nga gabitësit, 54-vjeçari nga Fieri rrëfen tmerrin: Më godisnin pa pushim me tytën e armës në kokë appeared first on Albeu.com.

Prindërit e vajzës janë njoftuar nga kopshti në orën 15:00 kur dyshohet se dhuna ndaj të miturës ka ndodhur rreth orës 10:20 të mëngjesit.

Denoncuesi: Ka qenë data 1 Nëntor 2023. Vajza u çua nga ime shoqe në orën 8 e 20 dhe ne ikëm në punë siç çdo ditë. Kur e çuam vajzën në mëngjes ishte në rregull, si çdo ditë tjetër. Në orën 3, njoftohet nusja që “hajde merre vajzën sepse ka dhimbje tek këmba dhe po grindet, diçka e ka pickuar”. Nusja niset direkt dhe kur mbërrin aty, goca ishte futur poshtë një tavoline. Këmba ishte e enjtur dhe ishte fryrë sa koka e vajzës. Nusja kishte ndeshur edukatoren dhe drejtoreshën të cilat po e prisnin duke qarë. Thoshte me veten e vet se “çfarë i kam bërë unë vetes”. Nusja nuk e pati mendjen në ato momente se çfarë po ndodhte me edukatoren, por pa edhe drejtoreshën duke qarë dhe drejtoresha i tha që “hajde të hipim në makinë dhe ta çojmë direkt në pediatri”. U nisën në pediatri dhe më mori nusja direkt në telefon dhe më tha që po ikim në pediatri. Kur shkova, mora fëmijën dhe u shokova kur i pashë këmbën që ishte e enjtur në një gjendje skandaloze. Më pas morëm letrën e hyrjes që ta kontrollojë mjekja dhe kur mjekja pa tha “që nuk është rast për mua, ka diçka tek këmba dhe nuk di të ju kthej përgjigje. Ju sugjeroj që të shkoni tek “Ushtaraku”. Kur mbërritëm në Urgjencën e “Ushtarakut”, u futëm brenda dhe kërkuam ndihmën e shpejtë dhe aty dolën mjekët që ishin specialist të kësaj fushe dhe në momentin që i bënë grafinë, grafia doli në një thyerje shumë të keqe, ishte thyer këmba, pjesa e kofshës në një gjendje skandaloze.

Sabri Hoxha, ekspert mjekoligjor: Grafia është tregues i një thyerje të kofshës së majtë, të kockës femorale. Është një thyerje me zhvendosje, futet tek thyerjet e rënda e cila ka nevojë për ndërhyrje, por është në varësi se si e vlerësojnë mjekët specialistë në rastin konkret.

“Stop” ka siguruar pamje filmike që tregojnë se edukatore Lina ushtron dhunë ndaj vajzës së vogël.

“Emisioni Stop ka siguruar pamjet filmike të kopshtit “Stinët”, këtu jemi tek dhoma e vizatimit të këtij kopshti. Ajo që dyshohet është se rreth orës 10 të mëngjesit, diçka ka ndodhur me vajzën 3-vjeçare. Nuk dimë nëse ka qenë aksident apo dhunë e ushtruar nga personeli, por ajo që dimë është se vajzës 3-vjeçare i është thyer këmba. Kjo është edukatore Lina. Nga pamjet kuptojmë se diçka nuk shkon me të. Ajo është e tensionuar, ku për disa minuta rri me kokë ulur vetëm në dhomën e vizatimit.”

“Kjo është ora 10 e 36 minuta. Vogëlushja e lënduar futet në dhomë nga sanitarja. Pas pak, edukatore Lina e acaruar çohet dhe godet me vizore vajzën. Duket qartë që këmba e vajzës në këto momente është e lënduar nga dridhjet dhe lëvizjet që ajo bën”.

“Edukatore Lina mesa duket po shqetësohet nga të qarat e vajzës dhe i kthehet përsëri duke e goditur në fytyrë që vajza të pushojë së qari.”

“Sikur të mos mjaftonte kjo, vajza e vogël tërhiqet zvarrë nga dora dhe ulet brutalisht në një karrige.”

“Dallohet qartë se vajza ka dhimbje nga këmba dhe qan nën zë pasi ka frikë nga edukatorja, por kjo e fundit tregohet e pamëshirshme dhe vazhdon duke e goditur me vizore në trup vajzën e vogël që ajo të pushojë.”

“Pra, nga këto pamje kuptojmë që vajza është lënduar rreth orës 10 të mëngjesit, por mosdhënia e ndihmës nga personeli dhe mbajtja për orë të tëra me këmbën e lënduar ka çuar në thyerje totale të kockës, ndërsa prindërit e vajzës u njoftuan 5 orë më vonë, në orën 3 të pasdites, atëherë kur situata kishte dalë jashtë kontrollit.”

Fillimisht Spitali i Traumës nuk ka bërë kallëzim për këtë ngjarje skandaloze, megjithëse ishte konstatuar këmba e thyer e vajzës. Po kështu, Oficeri i Policisë Gjyqësore, Ergys Brahimaj, nuk i ka marrë një denoncim prindërve në momentin kur e vogla ka shkuar me traumë në spital.

Babai i vajzës tregon se drejtoresha e kopshtit ka biseduar me OPGJ-në atë ditë duke i thënë se nuk kishte asnjë problem dhe ishte e afërmja e të miturës. Denoncimi është bërë të nesërmen nga e ëma e vajzës.

Gazetari: Ndërkohë ishte edhe drejtoresha e kopshtit që ju kishte shoqëruar?

Denoncuesi: Po. Unë ju ktheva dhe e pyeta: Të lutem ku është vrarë se mua doktori më kërkon një informacion për ta mjekuar. Drejtoresha më kthehet që “kërkoj të hapen kamerat”, por nuk është vrarë asgjëkundi, por është pickuar, ndërkohë pickim nuk kishte fare. Drejtoresha u kontaktua nga kopshti i saj privat, “ne i kapëm filmimet dhe vajza në orën 3 para se të merrnin në telefon ka qenë në gjumë dhe është ngritur nga krevati dhe sa është ngritur, nga forca e ngritjes, ka thyer këmbën”. Në atë moment, unë nga mërzia i thashë që “kjo nuk është një përgjigje që mua më nevojitet si prind dhe mjekut që të bëjë detyrën e tij me informacionet që ju japim ne si prindër”.

Gazetari: Ndërkohë një detaj që dua unë të ju pyes: Oficerët e Policisë Gjyqësore a ju pyetën tek Spitali i Traumës sepse është procedura kur kemi të tilla aksidente?

Denoncuesi: Unë ika para me vajzën, por një oficer i ishte drejtuar drejtoreshës, e cila i ishte përgjigjur që “jam njeriu i saj dhe jam duke i shoqëruar” dhe më tej kishte ardhur pas nesh. Oficeri e kishte lënë si rast familjar, ka ndodhur diçka dhe po sjellin fëmijën për ndërhyrje urgjence. Denoncimi u bë ditën e nesërme, datë 2 pasdite. Tek spitali dhe urgjenca, oficeri quhej Ergys Brahimaj.

Nga informacionet që emisioni “Stop” ka siguruar, kemi të bëjmë dhe me një shkelje të mjekëve të spitalit të Traumës të cilët nuk i janë drejtuar organeve kompetente për zbardhjen e kësaj ngjarje, pasi duhet të ishin drejtuar prokurorisë apo policisë.

Arben Llangozi, avokat: Njëkohësisht, edhe drejtoresha e kopshtit ka pasur detyrim që të kallëzojë në institucionet përkatëse këtë krim të ndodhur në këtë kopsht, gjë që nuk e ka kryer. Personeli mjekësor ka detyrimin ligjor të bëjë kallëzim për vepra penale të cilat i konstaton gjatë ushtrimit të detyrës së saj, por nuk e ka përmbushur spitali apo personat përgjegjës që janë marrë me këtë punë ose akuzohen për moskallëzim krimi dhe shpërdorim detyre.

The post Tmerr, edukatorja rreh barbarisht të miturën në një kopësht privat në Tiranë, i thyen këmbën appeared first on Albeu.com.

“Pas sulmit terrorist dhe kriminal të 24 shtatorit të kryer nga grupe paramilitare me sponsorim dhe pjesëmarrje të Serbisë, ndëshkimi është vendimtar për mospërsëritje”, tha Kurti. Rreth dy muaj para sulmit ndaj Policisë së Kosovës nga një grup serbësh të armatosur në Banjskë të Zveçanit më 24 shtator – ku mbeti i vrarë rreshteri Afrim Bunjaku – Kearns kishte thënë se “armët po kontrabandohen në autoambulanca dhe më pas po ruhen në objektet e kishave”.

Policia e Kosovës ka gjetur arsenal të jashtëzakonshëm armës në veri pas sulmit, për të cilat tha se janë futur në Kosovë përmes Serbisë. Kosova e ka akuzuar Serbinë se tentoi ta “aneksojë tërë veriun e Kosovës”, gjë të cilën Serbia e ka mohuar, megjithëse përgjegjësinë për sulmin e mori Millan Radoiçiq, nënkryetari i atëhershëm i Listës Serbe, partisë më të madhe të serbëve në Kosovë që ka mbështetjen e Beogradit.

Kurti, sipas njoftimit të Qeverisë, shprehu edhe “përkushtimin e plotë” për zbatimin e Marrëveshjes Bazë dhe aneksit të zbatimit të saj, që Kosova dhe Serbia i arritën në fillim të këtij viti. Takimi i Kurtit me Kearns vjen vetëm një ditë pasi lideri kosovar i priti emisarët perëndimorë në Prishtinë të shtunën.

Emisarët perëndimorë i kërkuan Prishtinës dhe Beogradit gjatë takimeve të së shtunës me Kurtin në Prishtinë, dhe presidentin serb Aleksandar Vuçiq në Beograd, që t’i normalizojnë marrëdhëniet dhe ta zbatojnë Marrëveshjen drejt normalizimit. Kearns, ndërkohë, qëndroi në Kosovë këtë fundjavë me ftesë të presidentes së Kosovës, Vjosa Osmani, me të cilën u takua dje. Ajo u prit edhe nga kryeparlamentari i Kosovës, Glauk Konjufca.

The post Kurti pret deputeten më të zëshme britanike për Kosovën: Të merren masa për ndëshkimin e Serbisë pas sulmit në Banjskë appeared first on Albeu.com.

Dëshmitarët në vendngjarje thanë se Catorreia Hutto, 31 vjeç doli nga makina dhe u hodh ne liqenin Jesup. Pasi policia gjeti dhe identifikoi trupin shkoi në shtëpinë e saj, ku zbuloi gjatë kontrollit dy fëmijët e saj binjakë 5-vjeçarë të vdekur në shtretërit e tyre. Policia gjeti gjithashtu një armë në shtëpinë e 31-vjeçares, por fëmijët nuk kanë asnjë shenjë në trup që tregon se është përdorur arma e zjarrit. Prandaj, shkaku i saktë i vdekjes së fëmijëve do të përcaktohet nga mjeku i cili do të bëjë autopsinë e trupave të tyre.

Dy binjakët, Ahmed dhe Ava, ishin fëmijë me nevoja të veçanta dhe u konstatua se ata nuk kishin ndjekur shkollën që nga 13 tetori. Siç njoftoi policia lokale, në shtëpi nuk u gjetën as shumë ushqime dhe as mobilje të mjaftueshme.

Nëna e 31-vjeçares tha se vajza e saj kishte probleme kronike me depresionin, por nuk kishte konstatuar shenja të përkeqësimit të gjendjes së saj. Ajo në fakt kishte marrë një telefonatë nga shtëpia e vajzës së saj të enjten mbrëma, por nuk iu përgjigj pasi mendonte se njëri nga dy fëmijët e kishin telefonuar gabimisht.

The post Tmerr, nëna vret dy vajzat binjake dhe më pas veten appeared first on Albeu.com.

Operacioni i koduar “LUNA”m vuri në pranga R. N., 19 vjeç, E. N., 46 vjeç dhe G. N., 43 vjeç, të tre banues në Tiranë.

Nga këqyrja e pamjeve filmike dhe veprimet e tjera hetimore ka rezultuar se këta shtetas, më datë 09.10.2023, kanë vjedhur një automjet tip “Benz”, në Yrshek. Pasi e kanë vjedhur automjetin, dyshohet se këta shtetas e kanë çmontuar atë dhe pjesët e tij i kanë shitur në pika shitjesh për pjesë të përdorura automjetesh.

Njoftimi:

Finalizohet nga Komisariati i Policisë Nr. 6, operacioni policor i koduar “Luna”, për goditjen e veprimtarisë kriminale në fushën e vjedhjes së pronës dhe pasurisë.

Identifikohen, kapen dhe vihen në pranga 3 shtetas që vodhën një automjet, të cilin dyshohet se e kanë çmontuar në pjesë dhe i kanë shitur ato.

Sekuestrohet automjeti me të cilin autorët e dyshuar dyshohet se kanë kryer veprën penale.

Specialistët për Hetimin e Krimeve të Komisariatit të Policisë Nr. 6, në vijim të punës për goditjen e paligjshmërisë në fushën e vjedhjes së pronës dhe pasurisë, identifikimin e autorëve të vjedhjeve dhe vënien e tyre përpara përgjegjësisë ligjore, bazuar dhe në informacionet e siguruara përmes inteligjencës informative, kanë organizuar dhe finalizuar operacionin policor të koduar “Luna”.

Si rezultat i këtij operacioni u bë identifikimi, kapja dhe ndalimi i shtetasve:

– R. N., 19 vjeç, E. N., 46 vjeç dhe G. N., 43 vjeç, të tre banues në Tiranë.

Nga këqyrja e pamjeve filmike dhe veprimet e tjera hetimore ka rezultuar se këta shtetas, më datë 09.10.2023, kanë vjedhur një automjet tip “Benz”, në Yrshek. Pasi e kanë vjedhur automjetin, dyshohet se këta shtetas e kanë çmontuar atë dhe pjesët e tij i kanë shitur në pika shitjesh për pjesë të përdorura automjetesh.

Materialet procedurale i kaluan Prokurorisë, për veprime të mëtejshme.

The post Ishin kthyer në tmerrin e qytetarëve, arrestohen 3 hajdutët e makinave në Tiranë appeared first on Albeu.com.

Vogëlushja Zoe Felix u gjet e plagosur rëndë të hënën në një pikë karburanti pranë vendit ku jetonte me familjen e saj, sipas Departamentit të Policisë Topeka. Vajza e vogël, e cila gjithashtu kishte pësuar abuzim seksual, u dërgua me urgjencë në spital, por mjekët nuk mundën ta mbanin në jetë. Të nesërmen u arrestua 25-vjeçari Mikel G. Cherry i cili akuzohet për përdhunimin dhe vrasjen e vajzës. Sipas banorëve vendas, i riu ka jetuar më parë për një kohë në të njëjtën shtëpi me vogëlushen, prindërit dhe motrën e saj, përpara se nëna e Zoes t’i nxirrte të gjithë nga shtëpia.

Mjedisi familjar i vajzës ka qenë veçanërisht problematik vitet e fundit, siç raportojnë fqinjët për mediat lokale. Vogëlushja nuk shkonte në kopsht dhe bridhte rrugëve gjithë ditën, pa mbikëqyrje. Disa anëtarë të komunitetit kujdeseshin herë pas here t’i jepnin rroba, ushqim dhe ta mbanin për disa orë në shtëpinë e tyre që ajo të lahej dhe të pushonte.

Vajza e vogël, me sa duket nuk merrte kujdesin që i duhej në shtëpi, vizitonte shpesh shtëpitë e fqinjëve që njihte. “Ajo gjithmonë më pyete ‘a mund të qëndroj më gjatë?’ Zakonisht kur një fëmijë këmbëngul në këtë mënyrë, diçka ndodh në shtëpi”, tha Sanika Bradley, e cila jeton pranë nënës së vajzës.

Si Bradley ashtu edhe fqinjët e tjerë u kishin thënë më parë agjencive në Kansas për “kushtet e mjerueshme” në shtëpinë e familjes së Zoe, e cila ishte plot papastërti dhe nuk kishte as ujë të rrjedhshëm. Siç raportojnë ata, përpjekjet e tyre për të interesuar dikë në krye nuk sollën asnjë rezultat.

“Kam raportuar për neglizhencën e saj. Ajo ishte gjithmonë pis, nuk hante nëse dikush nga ne nuk e ushqente, por mesa duket nuk më kishin marrë seriozisht”, thotë një tjetër banore e zonës.

Më në fund, 2-3 javë më parë, fqinjët e Zoes mësuan se nëna e saj e kishte përzënë nga shtëpia me babanë dhe motrën e saj, të cilët kishin vendosur një çadër në një pyll aty pranë ku jetojnë të pastrehë të tjerë.

Lajmi për vrasjen e vogëlushes tronditi ata që e njihnin vajzën e dashur. “Të gjithë e donin Zoen, përveç prindërve të saj”, tha një grua që e njihte.

The post E tmerrshme, 5-vjeçarja përdh*nohet dhe më pas vritet, nëna e kishte nxjerrë nga shtëpia appeared first on Albeu.com.