Iker Casillas, ish-kapiteni i Spanjës dhe legjendë e Real Madridit, ka reaguar me kritika të forta ndaj mënyrës sesi Anglia e interpretoi ndeshjen kundër Argjentinës në gjysmëfinalen e Kupës së Botës 2026, të humbur 2-1.

Anglezët morën avantazhin në minutën e 55-të falë golit të Anthony Gordon, por më pas zgjodhën të vendoseshin në mbrojtje me pesë lojtarë dhe t’ia linin kontrollin e lojës Argjentinës.

Sipas Casillas, kjo zgjedhje taktike i kushtoi shtrenjtë Anglisë. Ish-portieri spanjoll publikoi menjëherë pas ndeshjes një reagim në rrjetin social X.

“Shënon një gol dhe pastaj rri duarkryq. Qasje frikacake”, shkroi Casillas.

Ai theksoi gjithashtu se Anglia i dha kampionëve në fuqi gjithë hapësirën dhe iniciativën për të shtyrë lojën përpara.

“Ata nuk e kanë lënë zonën e tyre dhe e kanë lejuar Argjentinën të dalë më përpara. Rezultati logjik ndodh”, përfundoi ai.

Argjentina përfitoi nga tërheqja e kundërshtarit dhe realizoi përmbysjen përmes golave të Enzo Fernandez dhe Lautaro Martinez, duke triumfuar 2-1 e duke siguruar një vend në finalen e madhe.

Në finalen e Kupës së Botës, që do të luhet të dielën, Argjentina do të ndeshet me Spanjën.

The post Casillas sulmon Anglinë dhe Tuchelin pas humbjes: Ishin të frikësuar appeared first on Albeu.com.