Gjatë kësaj jave, kërkesat publike për dorëheqjen e kryetarit Lumir Abdixhiku u artikuluan nga emra të rëndësishëm të partisë, mes tyre kryetari i Degës së LDK-së në Lipjan, Imri Ahmeti, dhe kryetari i Degës së LDK-së në Pejë, Gazmend Muhaxhiri.

Sipas tyre, Abdixhiku duhet të mbajë përgjegjësi për rezultatin zgjedhor dhe për mungesën e një rritjeje të dukshme elektorale të LDK-së.

Nga ana e tij, Abdixhiku iu kundërpërgjigj këtyre kritikave duke u bërë thirrje vetë kritikëve që të japin dorëheqje, çka e ka ashpërsuar edhe më shumë debatin e brendshëm për të ardhmen e partisë.

Këto zhvillime kanë hapur diskutime për situatën aktuale në LDK, mënyrën se si po menaxhohen sfidat paszgjedhore dhe drejtimin politik të saj në vijim. Në këtë kuadër, po shtrohen pyetje për ndikimin që këto përplasje mund të kenë në unitetin e partisë, rrezikun e thellimit të ndasive dhe hapat që mund të ndërmerren në ditët dhe javët e ardhshme.

Mjaki: Lumiri nuk është ai që e bashkon LDK-në

Për këto zhvillime foli fillimisht për “Bota sot” veprimtari i LDK-së në Zvicër, Ismet Mjaki, i cili u shpreh i pakënaqur me drejtimin aktual të partisë.

Sipas Mjakit, Abdixhiku ka vepruar sipas vullnetit të tij, duke zgjedhur ta afrojë Osmanin, por pa përfshirë në parti figura të rëndësishme të LDK-së, si Bisimi dhe Murtezaj.

“Po e përcjellim nga larg atë që po ndodh në LDK pas zgjedhjeve. Pra, Lumiri kishte kërkuar votëbesim nga Kuvendi dhe atë e ka marrë nga 55% e delegatëve, që në demokraci është në rregull. Por, si lider, pa asnjë kundërkandidat, me dalë kundër 45% është tmerr me vazhdu. Megjithatë, Lumiri bëri si të dojë vetë, pa e bërë as Kryesinë e LDK-së për disa kohë, që ai vetë të vendosë, bash si pasha, dhe këtë e ka bërë me cep më cep.

Lumiri e afroi Vjosën për ta shpëtuar veten, dhe Vjosa, meqë ishte e vdekur politikisht, Lumiri e shpëtoi. Unë mendoj që mirë ka bërë Lumiri që e ka sjellë Vjosën, por nuk ka afruar as Faton Bislimin, as Valon Murtezajn nga mërgata, e as plot të tjerë që ishin ADN-ja e LDK-së”, deklaroi ai.

Mjaki vlerëson gjithashtu se Abdixhiku nuk është figura që mund ta mbajë të bashkuar LDK-në, pasi, sipas tij, merr vendime të pamenduara dhe dëmton veten edhe para elektoratit.

“Lumiri i ka shfrytëzuar kompetencat e Kuvendit, edhe pse vendimi ishte që të mos angazhohen ata që kanë poste. Prapë se prapë, sekretar e ka bërë Ilir Feratin, edhe pse mban postin e kryetarit të komunës, dhe Sokol Halitin sekretar për jashtë, që s’kemi asnjë nevojë për këso filmash në mërgatë.

Lumiri nuk është ai që e bashkon LDK-në. Është idhnak i madh dhe merr vendime pa menduar, duke dalë keq para elektoratit. Një kryetar që ka problem me një kryetar komune, e merr makinën, shkon e ha një darkë dhe sqarohen, e jo me deklarata fëmijërore: “Le të ma dërgojnë dorëheqjen, ua pranoj.” Kjo tregon se ky e përçan LDK-në”.

Më tej, ai u rreshtua në mbështetje të thirrjeve për dorëheqjen e kryetarit, duke thënë se ai duhet të përgjigjet për gjendjen e krijuar në parti.

“Me statutin e LDK-së, që ky as gjallë s’ka qenë kur është bërë, anëtarët kanë të drejtë të kërkojnë përgjegjësi, dorëheqje dhe ta thërrasin Kuvendin me 1/3 e votave. Lumiri mundet me e përça, por jo me e bashku LDK-në”, përfundoi Ismet Mjaki për “Bota sot”.

Dajaku: LDK-ja ka nevojë për reformim dhe rigjallërim

Për zhvillimet e fundit në LDK dhe përplasjet që po e shoqërojnë atë, foli edhe Xhevat Dajaku, vëllai i ish-truprojës së presidentit Rugova, Besim Dajaku.

Ai theksoi fillimisht se një post drejtues në një parti politike nuk duhet parë si privilegj, por para së gjithash si përgjegjësi. Në këtë kuadër, ai vlerësoi se brenda LDK-së ka individë që partinë e konsiderojnë thjesht si mjet për interesa personale.

“Partitë politike janë formacione të organizuara rreth një programi dhe vizioni politik, të ndërtuar nga ekspertë dhe njerëz me ide e koncepte për të ardhmen e shoqërisë dhe të shtetit. Prandaj, marrja e një pozite udhëheqëse në një parti politike nuk është vetëm privilegj, por mbi të gjitha përgjegjësi ndaj partisë, qytetarëve dhe vendit në tërësi.

Megjithatë, shpesh ndodh që individë të caktuar ta shohin partinë si mjet për realizimin e interesave personale ose të grupeve të papërgjegjshme, duke dëmtuar interesin publik dhe duke krijuar pengesa që në shumë raste i kanë kushtuar shtrenjtë shtetit dhe shoqërisë”.

Dajaku rikujtoi edhe periudhën kur LDK-ja drejtohej nga presidenti historik Ibrahim Rugova, duke theksuar se pas vdekjes së tij, sipas tij, në vazhdimësi janë shfaqur ndarje dhe mospajtime brenda partisë.

Në këtë frymë, ai mbështeti kërkesat për dorëheqje të kryetarit, duke theksuar se ato nuk duhen parë si sulm ndaj vetë subjektit politik.

“LDK-ja ka një histori të pasur dhe të lavdishme. Gjatë rrugëtimit të saj ka ndërmarrë hapa të matur dhe vendimtarë, veçanërisht në organizimin e institucioneve paralele në rrethana jashtëzakonisht të vështira, të njohura për të gjithë ata që gjykojnë me arsye dhe objektivitet. Ajo u sulmua dhe u kritikua si nga armiqtë serbë, ashtu edhe nga shqiptarë me qëndrime të ndryshme politike. Megjithatë, vazhdoi rrugëtimin e saj deri në vdekjen e Presidentit historik, Ibrahim Rugova. Pas asaj periudhe filluan të shfaqen ndarje dhe mospajtime të brendshme, të cilat janë të njohura për opinionin publik dhe që vazhdojnë të reflektohen edhe sot.

Prandaj, kërkesat për dorëheqje apo për përgjegjësi politike nuk duhet të interpretohen si sulme apo kundërshti ndaj subjektit, por si thirrje për debat të hapur, transparent dhe demokratik brenda organeve legjitime të partisë. Në çdo subjekt politik ka individë dhe grupe me qëllime të mira, por mund të ketë edhe të tillë që udhëhiqen nga interesa të ngushta dhe dëmtuese. Pikërisht për këtë arsye nevojiten debate serioze, analiza të thelluara dhe vlerësime të bazuara në argumente, duke pranuar realitetin politik, shkaqet, rrethanat dhe pasojat e zhvillimeve të ndryshme”.

Në fund, ai tha se LDK-së i duhen reforma të thella, pasi, sipas tij, bashkëpunimet joparimore me subjekte të caktuara e kanë dëmtuar ndjeshëm.

Madje, ai paralajmëroi se në mungesë të ndryshimeve të nevojshme, ekziston rreziku që partia të vazhdojë të humbasë mbështetjen qytetare.

“LDK-ja ka nevojë për reformim dhe rigjallërim. Një pjesë e madhe e elektoratit të saj tradicional, i cili sot mbetet kryesisht i heshtur, ka qenë i lidhur me vlerat dhe politikat që dikur e karakterizonin këtë subjekt. Megjithatë, zhvillimet e brendshme, jo gjithmonë të drejta, si dhe bashkëpunimet jo parimore me subjekte ku janë përmendur elemente të dyshuara për veprimtari kriminale, kanë ndikuar që shumë votues të humbin besimin dhe të distancohen nga procesi politik, deri në abstinim.

LDK-së i nevojitet rikthimi i meritokracisë, ashtu siç ishte një nga parimet themelore në kohën e Presidentit Rugova. Pa meritokraci, pa debat të lirë dhe pa kulturën demokratike që dikur e dallonte këtë parti, jo vetëm që do të dështojnë përpjekjet aktuale për kërkim llogarie dhe reformim, por ekziston rreziku që LDK-ja të vazhdojë të humbasë mbështetjen qytetare dhe të shtyhet edhe më tej drejt margjinave të skenës politike”, përmbylli Xhevat Dajaku për “Bota sot”

The post Presioni mbi Abdixhikun rritet pas rezultatit zgjedhor, brenda LDK-së shtohen thirrjet për dorëheqje dhe paralajmërimet për krizë më të thellë appeared first on Albeu.com.

Gjatë këtij takimi, vëmendje e veçantë iu kushtua shkëmbimit të përvojave institucionale, trajtimit të rasteve me karakter ndërkufitar dhe fuqizimit të mekanizmave të bashkëpunimit për çështje që prekin drejtpërdrejt qytetarët e të tria shteteve.

Avokati i Popullit në Kosovë, Naim Qelaj, vuri në pah rëndësinë që ka koordinimi ndërinstitucional dhe ndarja e përvojave mes institucioneve homologe.

Sipas tij, bashkëpunimi në nivel rajonal krijon mundësi për trajtim më efikas të rasteve dhe për adresim më të shpejtë të sfidave që lidhen me të drejtat e njeriut, veçanërisht kur ato kanë natyrë ndërkufitare.

“Shkëmbimi i përvojave tregon ku është rajoni, jo vetëm ku është vendi respektiv dhe mundëson marrjen e veprimeve konkrete në adresimin e çështjeve prioritare për të drejtat e njeriut. Bashkëpunimi nënkupton edhe ofrimin e shërbimeve të ndërsjella në situata kur qytetarët përballen me vështirësi në shtetet respektive”, tha Qelaj.

Ai bëri të ditur se mes temave kryesore të trajtuara në këtë takim trepalësh ishin problemet me dokumentacionin, të drejtat civile dhe mundësia për ngritjen e mekanizmave të përbashkët për monitorimin e zbatimit të marrëveshjeve shtetërore. Gjithashtu, ai theksoi se vëmendje e posaçme duhet t’u kushtohet edhe shërbimeve shëndetësore për qytetarët që lëvizin mes këtyre shteteve.

Nga ana tjetër, Avokati i Popullit në Shqipëri, Endrit Shabani, nënvizoi kufizimet territoriale që kanë institucionet dhe domosdoshmërinë e një bashkëpunimi të ngushtë për trajtimin e rasteve ndërkufitare.

Ai përmendi raste konkrete kur qytetarë të Kosovës marrin shërbime në Shqipëri dhe hasin vështirësi institucionale, duke theksuar se koordinimi mes zyrave të Avokatit të Popullit mbetet thelbësor për mbrojtjen efektive të të drejtave të tyre.

“Ne kemi krijuar dhe po krijojmë pika kontakti dhe mekanizma bashkëpunimi për të trajtuar me prioritet ankesat që vijnë nga qytetarët e tri vendeve”, tha Shabani.

Ai shtoi se problematikat ndërkufitare lidhen edhe me pronat, proceset gjyqësore, marrëdhëniet familjare mes personave me shtetësi të ndryshme, si dhe me çështje mjedisore, përfshirë ndotjen e lumenjve të përbashkët mes shteteve.

Ndërkohë, Avokati i Popullit në Maqedoninë e Veriut, Faton Selami, mbështeti forcimin e koordinimit rajonal, duke e cilësuar atë si një hap të rëndësishëm drejt arritjes së standardeve më të larta për mbrojtjen e të drejtave të qytetarëve në rajon.

Në fund, në takim u theksua se ky bashkëpunim rajonal nuk ka për synim vetëm trajtimin e rasteve individuale, por edhe ngritjen e mekanizmave të qëndrueshëm të bashkëpunimit institucional, të cilët do të mundësojnë reagim më të shpejtë dhe më efektiv ndaj shkeljeve të të drejtave të njeriut.

The post Avokatët e Popullit të Kosovës, Shqipërisë dhe Maqedonisë së Veriut kërkojnë forcim të bashkëpunimit rajonal appeared first on Albeu.com.