Sipas të dhënave më të reja nga Instituti i Shëndetit Publik (ISHP), Komuna e Tetovës ka bërë të ditur se banorët mund ta përdorin ujin e rrjetit pa asnjë shqetësim për të pirë dhe për të gjitha aktivitetet shtëpiake.

“Të gjithë qytetarët e Tetovës informohen se, duke u mbështetur në analizat më të fundit të realizuara nga Instituti i Shëndetit Publik, cilësia e ujit në qytet lejon konsumimin e tij të lirë për çdo nevojë të përditshme”, thuhet në njoftim.

Ndërkohë, për zonën e Kodrës së Diellit, rekomandimi është i ndryshëm. Komuna sqaron se uji që furnizon këtë pjesë duhet trajtuar si ujë teknik dhe nuk këshillohet për t’u pirë, për shkak se nuk kalon në procesin e dezinfektimit me klor, çka e bën të papërshtatshëm për konsum njerëzor.

The post Njoftim nga Komuna e Tetovës: Uji i qytetit i sigurt për konsum appeared first on Albeu.com.

Valon Zeqiri, drejtori i Ndërmarrjes Publike Komunale “Sharri”, njoftoi sot se uji në Tetovë është i sigurt për konsum, duke i ftuar banorët ta përdorin pa shqetësim.

Ai sqaroi se testimet e cilësisë kryhen rregullisht çdo ditë, një praktikë kjo e përforcuar pas incidentit të ndotjes në Gostivar.

Rezultatet më të fundit, të cilat dolën vetëm një orë më parë, i cilësoi si më të qartat deri tani, duke konfirmuar pastërtinë e ujit.

Zeqiri theksoi se autoritetet kanë forcuar mbikëqyrjen dhe se cilido që paraqet kërcënim për rrjetin e furnizimit do të përballet me sanksione.

The post Valon Zeqiri: Uji i Tetovës i sigurt për t’u pirë, analizat ditore e vërtetojnë appeared first on Albeu.com.

Këshilli Komunal i Tetovës ka vendosur të heqë nga rendi i ditës pikën që parashikonte emërtimin e 67 rrugëve. Propozimi u tërhoq me 20 vota pro, ndërsa nuk pati asnjë votim kundër apo abstenim.

Seanca u braktis fillimisht nga grupi i këshilltarëve të BDI-së, por në momentin e vazhdimit të mbledhjes, në sallë u paraqit vetëm koordinatori i tyre, Berat Murati.

Pas një diskutimi të zgjatur, përfaqësuesit e Këshillit arritën në përfundimin që kjo çështje të rikthehet për vlerësim në Komisionin përgjegjës për emërtimin e rrugëve.

Ky komision e ka filluar aktivitetin e tij disa vite më parë dhe, bazuar në informacionet e dhëna gjatë seancës, deri tani janë realizuar dy diskutime me publikun rreth kësaj teme.

Kryetari i Komunës së Tetovës, Bilall Kasami, e cilësoi të gabuar propozimin e ardhur nga BDI, duke theksuar se procedurat për riemërtimin e rrugëve tashmë kanë nisur.

The post Hiqet nga axhenda propozimi për emrat e rrugëve në Tetovë, mungojnë këshilltarët e BDI-së appeared first on Albeu.com.

Seanca e 15-të e Këshillit të Komunës së Tetovës u shoqërua me tensione dhe u deshën katër orë diskutime e dy pauza koordinuese për të miratuar rendin e ditës. Pavarësisht se u pranua kërkesa e tyre për të shtuar në axhendë një pikë për riemërtimin e 67 rrugëve, këshilltarët e BDI-së vendosën të largohen nga mbledhja.

Propozimi i BDI-së për riemërtimin e rrugëve mori mbështetje jo vetëm nga anëtarët e kësaj partie, por edhe nga këshilltarët e koalicionit VLEN. Grupet e tjera politike në këshill e kundërshtuan ose abstenuan gjatë procesit të votimit.

Pakënaqësia e përfaqësuesve të BDI-së buronte nga fakti që pika e propozuar prej tyre do të trajtohej e fundit, pas 25 çështjeve të tjera të parashikuara në rendin e ditës. Pas një pauze të dytë koordinuese, ata zgjodhën të braktisnin seancën.

Berat Murati, që drejton grupin këshillimor të BDI-së, shpjegoi arsyet e këtij veprimi: “Ne e lamë mbledhjen sepse, edhe pse disa herë insistuam që çështja jonë të ishte e para në axhendë, kolegët e VLEN-it dhe kryetari e refuzuan vazhdimisht. Patëm tri apo katër konsultime, por sërish u mor vendimi që pika jonë të mos ishte prioritare.”

Nga ana tjetër, nënkryetari i komunës, Albi Qamili, i cili bën pjesë në radhët e VLEN-it, i interpretoi veprimet e BDI-së si një tentativë për të krijuar përçarje artificiale. Sipas tij, qëllimi ishte që të errësoheshin arritjet e pushtetit vendor, si fillimi i punimeve në aksin rrugor Tetovë-Prizren.

“Sot dëshmuam një qëndrim të çuditshëm nga këshilltarët e BDI-së, të cilët, duke u përpjekur të vënë në skenë një shfaqje politike, kërkuan që emrat e rrugëve të rivotoheshin. Pasi ua miratuam kërkesën, ata thjesht u larguan,” deklaroi Qamili. Ai njoftoi gjithashtu se Komisioni për Riemërtimin e Rrugëve do të mblidhet të nesërmen për të filluar zgjidhjen e problematikës në përputhje me procedurat ligjore.

Çështja e emërtimit të rrugëve u rikthye në fokus pasi më 17 qershor Gjykata Kushtetuese e shfuqizoi vendimin e mëparshëm të Këshillit të Komunës së Tetovës, të marrë në vitin 2007.

The post Përplasje në Këshillin e Komunës së Tetovës, këshilltarët e BDI-së braktisin mbledhjen appeared first on Albeu.com.

Në Tetovë, Bashkimi Demokratik për Integrim (BDI) organizoi edhe sot një protestë kundër vendimit të Gjykatës Kushtetuese, e cila shfuqizoi emrat në shqip të rrugëve dhe shesheve të qytetit.

Marshi i protestuesve nisi nga sheshi “Iliria” dhe përfundoi para ndërtesës së Komunës së Tetovës. Aty u vendosën pankarta me thirrjet “Edhe rrugët flasin shqip” dhe “Historia nuk abrogohet”, ndërsa pjesëmarrësit kërkuan edhe dorëheqjen e kryetarit të Komunës së Tetovës, Bilall Kasami.

Para nisjes së protestës, kryetari i degës së BDI-së në Tetovë, Bajram Rexhepi, deklaroi se Komuna e Tetovës ka penguar qytetarët për të marrë pjesë në këtë protestë të dytë.

Sipas Rexhepit, veprimet e tyre të mëtejshme do të varen nga mënyra se si do të reagojë Komuna e Tetovës lidhur me këtë çështje.

“Shihni një mal me njerëz të cilët janë duke treguar mllefin ndaj kthimit të emrave të vjetër të rrugëve të Komunës së Tetovës. Ajo që na ka befasuar është se si Komuna e Tetovës po mundohet të pengojë pjesëmarrjen e qytetarëve në protestë. Kemi njoftuar policinë për protestën. Por edhe korin diplomatik në Shkup, të cilët janë duke monitoruar protestën. Protestat do të vazhdojnë dhe ato varen nga reflektimi të cilin do të tregojë Komuna e Tetovës”, tha Rexhepi.

Kjo shënon protestën e dytë të organizuar nga BDI në Tetovë për të kundërshtuar vendimin e Gjykatës Kushtetuese për heqjen e emrave të rrugëve dhe shesheve.

Disa ditë më parë, Gjykata Kushtetuese e shfuqizoi vendimin e Komunës së Tetovës të vitit 2007 për riemërtimin e rrugëve dhe shesheve, me arsyetimin se për këtë nuk ishte marrë pëlqimi i Qeverisë.

The post BDI proteston sërish në Tetovë: “Historia nuk abrogohet” dhe “Edhe rrugët flasin shqip” appeared first on Albeu.com.

Në protestën e zhvilluar sot, kryetari i degës së BDI-së në Tetovë, Bajram Rexhepi, deklaroi se Komuna e Tetovës ka penguar qytetarët të marrin pjesë në protestën e dytë.

Sipas tij, hapat që do të ndërmarrin më tej do të varen nga mënyra se si do të reagojë Komuna e Tetovës ndaj kësaj çështjeje.

“Shihni një mal me njerëz të cilët janë duke treguar mllefin ndaj kthimit të emrave të vjetër të rrugëve të Komunës së Tetovës. Ajo që na ka befasuar është se si Komuna e Tetovës po mundohet të pengojë pjesëmarrjen e qytetarëve në protestë. Kemi njoftuar policinë për protestën. Por edhe korin diplomatik në Shkup, të cilët janë duke monitoruar protestën. Protestat do të vazhdojnë dhe ato varen nga reflektimi të cilin do të tregojë Komuna e Tetovës”, tha Rexhepi.

I pyetur për mundësinë që në Tetovë të mbahen zgjedhje për këshilltarë, Rexhepi u shpreh se janë të përgatitur për zgjedhje, por theksoi se propozimi i tyre nuk është i njëjtë me atë që është shfuqizuar nga Gjykata Kushtetuese.

The post BDI mban sërish protestë në Tetovë, Rexhepi: Ka një numër të madh pjesëmarrësish, komuna ka penguar ardhjen e qytetarëve appeared first on Albeu.com.

BDI – Dega Tetovë ka bërë të ditur se më 11 korrik do të mbajë një protestë qytetare, në reagim ndaj vendimit të Gjykatës Kushtetuese për shfuqizimin e emrave të rrugëve dhe të sheshit në Tetovë.

Sipas kumtesës së kësaj dege, Komuna e Tetovës nuk e ka paraqitur dokumentacionin që ishte kërkuar nga Gjykata Kushtetuese, dhe kjo, sipas BDI-së, ka ndikuar që të anulohet vendimi për emërtimin e rrugëve dhe të rikthehen emërtimet e mëparshme.

“Prandaj, për ne është më se e qartë se Bilall Kasami mban përgjegjësi të drejtpërdrejtë politike për këtë vendim skandaloz. Heshtja dhe mosveprimi i tij ndaj kërkesave të Gjykatës Kushtetuese përbëjnë përgjegjësi të rëndë ndaj interesit, historisë dhe dinjitetit të qytetarëve të Tetovës”, thuhet në kumtesën e BDI-së.

Nga Dega e BDI-së në Tetovë u është bërë thirrje të gjithë qytetarëve që të marrin pjesë në këtë protestë, të cilën ata e përshkruajnë si një reagim për mbrojtjen e dinjitetit, historisë dhe identitetit të qytetit.

The post BDI në Tetovë paralajmëron protestë më 11 korrik pas vendimit për emrat e rrugëve appeared first on Albeu.com.

Temperaturat e larta kanë sjellë rritje prej më shumë se 50 për qind të numrit të intervenimeve të Ndihmës së Shpejtë në Tetovë. Rastet që paraqiten më shpesh lidhen me persona që vuajnë nga sëmundje kronike të zemrës ose të traktit respirator, por ka edhe qytetarë që humbin vetëdijen gjatë lëvizjes në vapë, si dhe lëndime të shpeshta nga vozitësit e motoçikletave të malit.

Shefi i Ndihmës së Shpejtë në Tetovë, Igor Mlladenovski, deklaroi se numri më i madh i thirrjeve regjistrohet gjatë fundjavave, kur qytetarët angazhohen në aktivitete të lira, çka sipas tij ndikon më shumë në ekspozimin ndaj të nxehtit, aksidentet me motorë nëpër male dhe rritjen e ngarkesës për ekipet mjekësore. “Më së shumti thirrje kemi gjatë fundjavave, kur njerëzit dalin për aktivitete të lira e që janë shkaku më i madh për lëvizje në të nxehtë, aksidente me motorë nëpër male, dhe tepër jemi të angazhuar. Afërsisht 40 – 50 për qind është rritur numri. Rekomandimi është që këto temperatura të kenë kujdes dhe t’i shmangin, sidomos ata mbi 60 vjeç dhe që kanë sëmundje kronike të zemrës, tension”, deklaroi Igor Mlladenovski, Shef i Ndihmës së shpejtë Tetovë.

Për trajtim mjekësor, qytetarët po paraqiten edhe në urgjencën e Tetovës.

Mjekja Rezearta Elezi tha se zakonisht ndihmë kërkojnë pacientë mbi moshën 40 vjeçe, të cilët kanë komorbiditete, përkatësisht vuajnë nga tensioni i lartë, astma dhe sëmundjet bronkiale. Sipas saj, shqetësimet më të zakonshme janë lodhja, djersitja, mundimi, kokëdhimbja dhe plogështia e përgjithshme. “Zakonisht kemi pacientë mbi moshën 40 vjeçe e që kanë komorbiditete pra që vuajnë nga tensioni i lartë, astma, sëmundjet bronkiale, dhe ankesat më të shpeshta janë lodhja, djersitja, mundimi kokëdhimbja dhe plogështia e përgjithshme. Banorët duhet ti ndjekin mediat ku janë paralajmërimet dhe të bëjnë kujdes kulmin e të nxehtit. Pra lëvizjet të bëhen nga ora tetë në mëngjes deri në ora 10 apo 11 maksimum dhe pas orës pesë. Të mbajnë një kaçkëte dhe një ujë të vogël me vete”, tha Rezearta Elezi, Mjeke.

Vetëm gjatë ditëve të fundit, ekipet e Ndihmës së Shpejtë kanë ndërhyrë në dhjetëra raste të shkaktuara nga i nxehti, përcjell Zhurnal.mk .

The post Shtohen me mbi 50 për qind ndërhyrjet e Ndihmës së Shpejtë në Tetovë për shkak të vapës appeared first on Albeu.com.

Rreth orës 23:15 të datës 26.06.2026, në kryqëzimin e rrugëve „Iliria“ dhe „Jane Sandanski“ në Tetovë, efektivët e policisë kanë konstatuar praninë e një grupi më të madh të miturish, të cilët kanë tentuar të përfshihen në një përleshje fizike me një grup tjetër.

Pas reagimit të zyrtarëve policorë, të miturit janë shpërndarë, ndërsa dy prej tyre janë ndaluar.

Në të njëjtën kohë, R.O. (43) nga Tetova ka raportuar se grupi i të miturve i ka dëmtuar me sende të forta automjetin e tij të udhëtarëve „Audi“ me targa të Tetovës.

Autoritetet po ndërmarrin masa për zbardhjen e plotë të rastit.

The post Policia ndërhyn në Tetovë pas tentativës për përleshje mes të miturve, dëmtohet edhe makina e një 43-vjeçari appeared first on Albeu.com.

Me afrimin e mërgimtarëve dhe zhvillimin e verës kulturore tetovare, në Tetovë do të ketë prani të shtuar të policisë në rrugë. Sipas paralajmërimeve, efektivë policorë do të vendosen përgjatë akseve të qytetit afërsisht në çdo tridhjetë metra, ndërsa ekipe të posaçme do të angazhohen në hyrje dhe dalje të Tetovës për të orientuar automjetet dhe për të shmangur krijimin e tollovive.

Zëdhënësi i SPB Tetovë, Fatmir Rexhepi, bëri të ditur se është planifikuar që në çdo udhëkryq të ketë pjesëtarë policie, si edhe në hapësira të tjera problematike, për të ndaluar parkimin e dyfishtë dhe bllokimin e zonave pranë kryqëzimeve, me synim lirimin e komunikacionit. Ai shtoi se në funksion do të jetë edhe merimanga, e cila do të largojë automjetet që pengojnë qarkullimin. Sipas tij, gjatë kësaj periudhe do të angazhohen shtesë edhe inspektorë të policisë me jelekë policie, të cilët do të ndërmarrin masa dhe aktivitete edhe për vepra të mundshme penale.

Ndërkaq, kryetari i Komunës së Tetovës, Bilall Kasami, u ka bërë thirrje qytetarëve që në këtë periudhë të përdorin sa më tepër transportin publik, në mënyrë që mërgimtarët të kenë lëvizje më të lehtë nëpër qytet.

Kasami theksoi se Tetova tashmë ofron transport publik falas dhe për këtë arsye u kërkoi banorëve rezidentë të komunës që të mos i përdorin veturat për të dalë në qytet, por të zgjedhin transportin publik. Ai njoftoi gjithashtu se në mbledhjen e ardhshme të këshillit do të rregullohen disa rrugë që do të bëhen njëkahëshe, gjë që pritet të ndikojë në lehtësimin e qarkullimit të veturave.

Kryetari i komunës foli edhe për një risi të këtij viti, duke thënë se puna do të vazhdojë intensivisht për përfundimin e këtij bulevardi, i cili gjatë muajit të ardhshëm do të shndërrohet në zonë vetëm për këmbësorë nga ora shtatë e mbrëmjes deri në dymbëdhjetë të natës. Sipas tij, pikërisht në këtë bulevard do të organizohen të gjitha aktivitetet e verës kulturore që lidhen me të rinjtë./Alsat.mk.

The post Tetova shton kontrollet dhe rregullimin e qarkullimit para ardhjes së mërgimtarëve appeared first on Albeu.com.