Sot mbushen 63 vjet nga tërmeti shkatërrues që goditi Shkupin më 26 korrik 1963, duke marrë jetën e 1.070 banorëve dhe duke lënë të plagosur rreth 3.000 të tjerë.

Kjo katastrofë njihet si një nga momentet më të zeza në historinë e Shkupit, por njëkohësisht shërbeu edhe si një provë e solidaritetit ndërkombëtar, i cili u mobilizua për të mbështetur komunitetin në rindërtim.

Goditja kryesore u regjistrua në orën 5 e 17 minuta, teksa lëkundje më të dobëta vijuan deri në orën 5 e 43 minuta. Si pasojë, 15.800 shtëpi u shembën plotësisht, 28.000 të tjera pësuan dëmtime dhe mbi 200.000 njerëz mbetën pa strehë.

Menjëherë pas tragjedisë, Kryqi i Kuq Ndërkombëtar u bëri thirrje të gjitha organizatave që të grumbullonin ushqime, ndërsa Unioni Ndërparlamentar rekomandoi që parlamentet dhe qeveritë anembanë botës të kontribuonin për rimëkëmbjen e Shkupit.

Nisma humanitare u shtri në shumë shtete, ku filluan fushatat për mbledhjen e ndihmave. Edhe Kombet e Bashkuara ndërmorën veprime konkrete për t’i ofruar qytetit të shkatërruar mbështetje afatgjatë.

Më 23 shtator 1963, përfaqësues nga 35 shtete kërkuan që Asambleja e Përgjithshme të përfshinte në rendin e ditës masat lidhur me tërmetin në Shkup. Katër ditë më pas, më 27 shtator, Asambleja i dha përparësi aksionit ndërkombëtar për t’i ardhur në ndihmë Shkupit.

Kulmi i kësaj lëvizjeje erdhi më 14 tetor, kur Asambleja e Përgjithshme e OKB-së miratoi unanimisht një rezolutë për ndihmën ndaj Qeverisë jugosllave gjatë procesit të rindërtimit. Në atë debat historik, u dëgjuan fjalimet e përfaqësuesve të më shumë se 20 shteteve nga të gjitha kontinentet dhe kjo datë mbeti e shënuar në arkivat e Kombeve të Bashkuara si Dita e Shkupit.

Përgjatë shekujve, Shkupi është rrënuar dhe ringritur disa herë. Qyteti antik i Skupit, që shtrihej midis fshatrave Zllokuçan dhe Bardovcë dhe shërbente si mitropoli i provincës së Dardanisë, u fshi krejtësisht nga faqja e dheut nga një tërmet në vitin 518. Atëherë, dridhjet arritën intensitetin 10-11 ballë dhe shkatërruan 24 kala qytetare në trevën e Dardanisë, duke çarë tokën dhe duke bërë që masivë shkëmborë të rrokulliseshin nga kodrat. Më vonë, Shkupi u ngrit në lokacionin e sotëm.

Një tjetër tërmet katastrofik e goditi qytetin në vitin 1555, me një intensitet rreth 10 ballë, duke e lënë atë në gërmadha për herë të dytë.

Shkatërrimi i tretë i madh ndodhi pikërisht 63 vjet më parë, më 26 korrik 1963, kur Shkupi u lëkund nga një tërmet me magnitudë nëntë ballë sipas shkallës së Merkalit, ose gjashtë ballë sipas shkallës Rihter, me epiqendër në sheshin “Maqedonia”.

The post 63 vjet nga tragjedia që rrafshoi Shkupin, qyteti kujton viktimat dhe solidaritetin botëror appeared first on Albeu.com.