Faton Pollozhani nga BDI ishte i ftuar në emisionin PodGo, ku foli për qeverisjen lokale në Strugë, BDI-në dhe Qeverinë e RMV-së.

Sipas tij, Struga përballet me vështirësi të ngjashme me qytetet e tjera të vendit, ku ndër problemet kryesore renditen infrastruktura, deponitë dhe çështje të tjera.

Pollozhani tha se BDI-ja, si forcë opozitare në nivel lokal, nuk synon ta paraqesë situatën vetëm në mënyrë negative. Megjithatë, ai theksoi se projektet që po zbatohen aktualisht në Strugë kanë nisur gjatë mandatit të kaluar dhe janë iniciativa strategjike që shtrihen në disa vite.

“Projektet që po realizohen janë miratuar përmes thirrjes së Qeverisë dhe kredisë hungareze. Ndërkohë, nga premtimet e kryetarit aktual të Strugës nuk ka nisur asnjë projekt. Ai kishte premtuar parkingje me kate dhe çerdhe të reja”, deklaroi Pollozhani, duke e cilësuar qeverisjen në Strugë si kaotike dhe pa një vizion për të ardhmen.

Duke folur për zhvillimet politike, ai u shpreh se BDI-ja është e përgatitur për zgjedhje dhe se mbajtja e zgjedhjeve të parakohshme është e domosdoshme.

“Zgjedhjet e parakohshme janë të detyrueshme, sepse duhet të rikthehemi te çështja nga e cila buron problemi. Në zgjedhjet e fundit parlamentare u shkel në mënyrë brutale vullneti i qytetarëve shqiptarë, ndërsa partia që fitoi zgjedhjet u la në opozitë në mënyrë të padrejtë. Ky është një nga shkaqet që duhet të çojë vendin në zgjedhje, në mënyrë që legjitimiteti i qytetarëve të respektohet”, tha ai.

Për përfaqësuesit e VLEN-it në Qeveri, Pollozhani deklaroi se ata nuk kanë përfunduar asnjë projekt që e kishin premtuar para qytetarëve.

“VLEN-i nuk po bën asgjë në pushtet. BDI-ja ka kapacitete dhe kuadro që mund t’i realizojnë gjërat më mirë se ata, siç e kemi dëshmuar edhe më parë. Ishte BDI-ja ajo që krijoi kushtet që RMV-ja të drejtohej nga një kryeministër shqiptar. Për dy vite, VLEN-i nuk ka përmbushur asnjë angazhim të marrë përsipër dhe të premtuar para qytetarëve. Në vend të punës, ata përpiqen të imponojnë një retorikë ku për çdo problem fajësohet e kaluara”, u shpreh Pollozhani.

I pyetur për situatën brenda BDI-së, ai tha se vendimet e marra në kongresin e fundit të kësaj partie kërkonin guxim të veçantë.

“Në BDI nuk jemi kundër njëri-tjetrit. Të gjithë duhet të japim kontributin tonë për forcimin e partisë. Ajo që BDI-ja bëri në kongresin e fundit, ku ndryshoi mbi 80 përqind të strukturave partiake, është një hap që pak parti apo liderë politikë do të kishin guximin ta ndërmerrnin”, tha Pollozhani.

The post Pollozhani: RMV duhet të shkojë në zgjedhje të parakohshme, BDI-ja realizoi kryeministrin shqiptar appeared first on Albeu.com.

Deputetja e VLEN-it, Saranda Imeri-Stafai, ishte e ftuar në emisionin “PodGo”, ku foli për qeverisjen, përvojën e saj në BDI, funksionimin e VLEN-it dhe situatën në Komunën e Gostivarit, prej nga vjen.

Gjatë intervistës, ajo deklaroi se koalicioni VLEN po përballet me një sërë problemesh të trashëguara, pasi sipas saj, shumë çështje nuk janë trajtuar siç duhet nga qeveritë e mëparshme. Imeri-Stafai tha gjithashtu se është e kënaqur me punën e deritanishme si deputete dhe se, në rast zgjedhjesh, do të përballet hapur me qytetarët.

“VLEN-i po përballet me probleme të trashëguara. Ka shumë çështje që në ligj janë të rregulluara në një mënyrë, ndërsa në praktikë zbatohen ndryshe. Me ardhjen në pushtet të OBRM-PDUKM-së, këto probleme po shfrytëzohen dhe përgjegjësia po bie mbi ne. Në vitin 2020 u distancova nga BDI-ja për shkak të mosmarrëveshjeve të brendshme. Jam një person i hapur dhe komunikoj me njerëzit. Deri tani jam krenare për punën që kam bërë në Kuvend dhe jashtë tij. Kur bëhet fjalë për shërbimet ndaj qytetarëve, nuk bëj ndasi partiake”, u shpreh ajo.

Duke folur për raportet me OBRM-PDUKM-në, deputetja tha se, pavarësisht fuqisë së kësaj partie, bashkëpunimi mes partnerëve të koalicionit ka qenë i mirë. Ajo shpreson që kjo marrëdhënie të vijojë deri në përfundim të mandatit.

“OBRM-PDUKM-ja është një forcë e fuqishme, por kjo nuk nënkupton se nuk na trajton si partnerë të koalicionit. Deri tani kemi pasur një bashkëpunim shumë të mirë dhe shpresoj që kështu të vazhdojmë deri në fund. Gjatë periudhës BDI-OBRM-PDUKM janë miratuar ligje pa u zhvilluar fare konsultime”, deklaroi Saranda Imeri-Stafai.

Për situatën në Komunën e Gostivarit, ajo tha se pushteti lokal ndodhet në vështirësi të mëdha financiare dhe ka një nivel të lartë borxhesh.

“Komuna e Gostivarit është në gjendje të rëndë dhe e zhytur në borxhe. Për punë të vogla janë nënshkruar kontrata me vlerë trefish më të lartë. Kohët e fundit po i bëj publike këto kontrata. Problemet janë të shumta”, tha deputetja.

Imeri-Stafai foli edhe për mënyrën e funksionimit të VLEN-it, duke e cilësuar këtë subjekt si një faktor që ka sjellë ndryshim të madh në politikën shqiptare. Në këtë kuadër, ajo përmendi edhe bashkëpunimin mes Izet Mexhitit dhe Bilall Kasamit.

“VLEN-i funksionon në mënyrë të shkëlqyer. Nëse duhet të kërkojmë një shembull për mënyrën se si duhet të funksionojë ky koalicion, ai është grupi parlamentar. Izet Mexhiti dhe Bilall Kasami kanë komunikim shumë të mirë dhe shpesh i shoh duke bashkëpunuar. Nuk është e domosdoshme që çdo herë të ndjekim modelet e të tjerëve. Me bashkëkryetarët e tij, VLEN-i ka sjellë revolucion në skenën politike shqiptare”, tha ajo.

Sa i përket perspektivës së Maqedonisë së Veriut, deputetja u shpreh se e imagjinon vendin më pranë Bashkimit Evropian pas disa vitesh.

“Maqedonia e Veriut është një shtet problematik. Fillimisht pati çështjen e emrit, ndërsa tani përballet me probleme që lidhen me historinë dhe kishën. Në vitin 2030 e shoh Maqedoninë e Veriut më afër BE-së. Megjithatë, dua që në atë vit ta shoh vendin me institucione të forta, me zhvillim ekonomik dhe me kushte më të mira për të rinjtë tanë”, theksoi Saranda Imeri-Stafai.

The post Saranda Imeri-Stafai: VLEN-i po përballet me trashëgiminë e pushteteve të kaluara, kemi ndryshuar politikën shqiptare appeared first on Albeu.com.

Fatmir Bytyqi, deputet i LSDM-së, ka qenë i ftuar në emisionin PodGo të Telegrafi Maqedoni, ku ka folur për ekonominë e vendit, partinë e tij dhe Qeverinë.

Ai e cilësoi gjendjen ekonomike të vendit si serioze, duke shtuar se mungesa e fondeve publike mund ta detyrojë Qeverinë të shpallë zgjedhje të parakohshme.

“Përballja me këtë realitet ekonomik do ta shtyjë ekzekutivin drejt kutive të votimit. Kjo lëvizje do të shërbente për të fituar kohë, sepse atyre u mungon një plan i qartë për përmirësimin e situatës. Arka e shtetit është bosh. Ne mbyllëm vitin me një rënie prej 8% të të hyrave, një dukuri e paprecedentë në historinë e shtetit tonë modern, dhe kjo u konfirmua edhe nga ribalancimi i buxhetit. Gjendja është alarmante dhe po reflektohet në sektorin e biznesit, i cili po vuan nga mungesa e likuiditetit. Në krizat e mëparshme, qytetarët nuk e ndjenin mungesën e parasë, por tani kriza është reale,” deklaroi Bytyqi.

Duke folur për LSDM-në, ai theksoi se partia po kalon një proces reformimi.

“Ajo çka po ndodh aktualisht, sipas tij, është pjesë e reformimit të LSDM-së që nisi dy vite më parë. Unë kam qenë gjithmonë kritik dhe i sinqertë gjatë kësaj faze, duke kërkuar hapjen e partisë për të gjithë ata që ndajnë të njëjtat parime dhe ideologji. Unë nuk jam i përfshirë në ristrukturimin e partisë, unë jam deputet i saj. Sondazhet janë pjesë e këtij procesi reformues dhe ato tregojnë një rënie të interesit të qytetarëve për të marrë pjesë në zgjedhje,” shtoi ai.

Në lidhje me incidentin e deputetëve shqiptarë të ndaluar në Shqipëri, Bytyqi e quajti një sinjal negativ nga të dy palët.

“Në atdhe shkojmë si fëmijët e tyre. Edhe kur nuk isha në politikë, nuk ndërhyja në politikën e tyre të brendshme. Ky është një sinjal i keq si nga ana e shtetit amë, ashtu edhe nga ata që mbajnë poste zyrtare. Ne kemi shumë punë për të bërë këtu,” tha ai.

Ndërsa për koalicionin VLEN, Bytyqi pati një këshillë të qartë për ta në raport me partnerin e tyre të qeverisjes, OBRM-PDUKM-në.

“Unë i këshilloj që në tryezën e bisedimeve me partnerët e tyre të jenë më të ashpër dhe t’i tregojnë qartë se kanë kaluar kufijtë. OBRM-PDUKM-ja erdhi në pushtet me një narrativë superioriteti, ku ata janë lart dhe të tjerët janë të nënshtruar. Qytetarët e këtij vendi u përkasin etnive të ndryshme, por meritojnë të trajtohen si të barabartë. OBRM-PDUKM-ja duhet ta kuptojë se duhet t’i trajtojë të gjithë shtetasit njësoj, përndryshe së shpejti do të përballet me probleme në qeverisjen e saj,” përfundoi Bytyqi./Telegrafi/

The post Bytyqi paralajmëron: Gjendja ekonomike në Maqedoninë e Veriut është kritike, arka e shtetit është bosh appeared first on Albeu.com.

Zëdhënësja e Qeverisë së Maqedonisë dhe ish-gazetarja Venera Azizi ishte e ftuar në edicionin e 100-të të emisionit PodGo në Telegrafi Maqedoni, ku u diskutua për dyvjetorin e VLEN-it në Qeveri, punët e realizuara deri më tani, si edhe për rikonstruimin e qeverisë të paralajmëruar së fundmi.

Lidhur me rikonstruimin e Qeverisë, Azizi u shpreh se nuk është e udhës të flitet në këtë fazë, pasi bisedimet ende po vazhdojnë. Sipas saj, janë kryetarët e VLEN-it ata që do të dalin para opinionit për të bërë të ditur emrat dhe ministritë përkatëse.

“Është jokorrekte të flasim pasi bisedimet janë në rrjedhë. Kryetarët do të dalin vetë të komunikojnë emrat dhe ministritë. Dhe do ta kisha lënë që ta dëgjojmë nga kryetarët”, theksoi Azizi.

Duke folur për çështjen që është aktualizuar ditët e fundit për emërtimet e rrugëve në Tetovë, ajo tha se qytetarët duhet ta dinë qartë se emrat nuk i ka hequr Bilall Kasami, për të cilin shtoi se është duke punuar për ta zgjidhur këtë problem.

“Popullata duhet ta dijë që emrat nuk i ka hequr Bilall Kasami. Emrat janë sjellë në këshillin komunal në vitin 2007 dhe prej atëherë kanë kaluar 20 vite. BDI ka pasur qeveri të tëra dhe nuk mund ta perceptoj se si nuk kanë mundur ta zgjidhin këtë çështje. Vendimi është sjellë nga ana e komunës dhe është dashur të që ketë vendim edhe nga Qeveria dhe tani protestojnë, pikërisht si ata fëmijët kur bëjnë faj. Ata i dijnë problemet ku i kanë lënë dhe thuajse zgjidhjet janë gjysmake dhe tani protestojnë kundër vetvetes”, tha Azizi.

Sa i përket pretendimeve se VLEN po shtypet nga OBRM-PDUKM, Azizi i hodhi poshtë këto vlerësime, duke numëruar disa nga projektet dhe vendimet që, sipas saj, dëshmojnë të kundërtën.

“Ndoshta na shohin se na shtyp OBRM-PDUKM-ja, por kjo nuk është e vërtetë. Si jemi të dobët kur ne po e përmbyllim rrugën Shkup – Bllacë, kur i kemi përshpejtuar punimet në Korridorin 8, po e ndërtojmë kampusin më modern të Universitetit Nënë Tereza, kemi ndarë 20 milionë euro për sheshin Skënderbeu, po e zgjidhin çështjen e Jurisprudencës, kemi rritur rrogat në polici, shëndetësi, kemi rritur pensionet. Për 24 muaj kemi bërë atë që ata nuk e kanë bërë për 24 vjet”, theksoi Azizi.

Në intervistë u trajtua edhe Ligji për përfaqësim të drejtë dhe adekuat, për të cilin Azizi tha se pas 24 vitesh po procedohet një ligj që synon të rregullojë këtë çështje.

“Ligji për përfaqësim të drejtë dhe adekuat është i qeverisë dhe VLEN ka bërë shumë për këtë. Ne nuk punojmë si individë, punojmë si grup. Ligji ndodhet në Kuvend dhe në debat, nëse do të ketë amendamente. Për herë të parë pas 24 viteve po sillet ligj i cili do ta rregullojë çështjen e përfaqësimit të drejtë dhe adekuat. Ligji ka sanksione, dënimi më i madh që mund të ndodh është dënimi politik. Ka trupin mbikëqyrës dhe kryesori i këtij trupi është zv.kryeministri i parë. Ky organ do ta ketë kontrollin e plotë dhe do ta shohë se cili institucion nuk e respekton këtë ligj”, theksoi Azizi.

Venera Azizi mori pjesë në emisionin e 100-të të PodGo dhe me këtë rast solli edhe një dhuratë për redaksinë, duke uruar që të ketë edhe shumë emisione të tjera./Telegrafi/

The post Venera Azizi në PodGo: Në 24 muaj, VLEN ka realizuar më shumë sesa opozita në 24 vjet appeared first on Albeu.com.

Sipas Snopçes, bashkimi i ASH-së me VLEN-in nuk e përmbushi qëllimin e synuar, megjithëse, siç u shpreh ai, u arrit ndryshimi përmes dërgimit të BDI-së në opozitë.

“Ne synonim të ndryshonim status quo-në. BDI kishte qenë në pushtet për 20 vite dhe të rinjtë e kishin humbur shpresën, prandaj edhe ndodhi kjo shpërngulje e madhe. Gruevskin e rrëzuam ne, tre deputetët e Aleancës për Shqiptarët. Edhe pse nuk ia dolëm ta realizonim qëllimin, pas një kohe të shkurtër dolëm nga Qeveria”, deklaroi ai.

Snopçe tha se problemi u shfaq në periudhën kur ishin në pushtet, kur vendosën t’i bashkoheshin opozitës shqiptare me idenë që të sillnin një garniturë të re politike dhe me bindjen se gjërat do të zhvilloheshin ndryshe.

“Ndryshimi nuk erdhi. Ishte një lëvizje që ua riktheu shpresën qytetarëve. BDI-në e çuam në opozitë. Por marrëveshja që bëmë me OBRM-PDUKM-në dhe Mickoskin nuk u realizua. Madje, doli në pah edhe më shumë ajo dogma ‘Maqedonia e maqedonasve’ dhe nisi nëpërkëmbja dhe lufta ndaj shqiptarëve. OBRM-PDUKM-ja filloi të sillet si fuqi. Unë kam qenë i pari që kam thënë se, nëse vazhdon nëpërkëmbja e interesave shqiptare, ne do të dalim nga qeveria”, tha Snopçe.

Lidhur me mundësinë e zgjedhjeve të reja parlamentare, ai u shpreh se gjithçka varet nga kryeministri Hristijan Mickoski.

“Kjo çështje varet nga Hristijan Mickoski. Ai i ka numrat. Por ai deklaron se nuk do të ketë ndryshime kushtetuese. Mendoj që ai do të bëjë zgjedhje, pasi e ka mandatin e fundit dhe nuk mund ta mbajë këtë rejting të partisë. Unë mendoj se duhet të ketë zgjedhje për shumë arsye. Kemi krizë ekonomike, kemi borxhe dhe ai do ta mbajë këtë rejting të partisë. Sipas mendimit tim në fund të vitit do të kemi qeveri teknike, ndërsa në pranverën e vitit të ardhshëm do të ketë zgjedhje”, tha Snopçe, duke shtuar se marrëveshja me AKI-në do të vazhdojë edhe më tej, në rast se ka zgjedhje të reja të parakohshme./Telegrafi/

The post Halil Snopçe: U larguam nga Qeveria pasi OBRM-PDUKM nisi të shkelë interesat e shqiptarëve appeared first on Albeu.com.