“Emirati Islamik tenton të rregullojë të gjitha çështjet që lidhen me Ligjin e Sheriatit”, ka thënë zëdhënësi i talibanëve, Zabihullah Mujahid përmes një deklarate.

“Duke marrë parasysh përgjegjësinë që ka ndaj popullit dhe fesë, Emirati Islamik nuk mund të lejojë akte kundër Sheriatit brenda shtetit”.

Zëdhënësi i talibanëve u ka bërë thirrje shteteve dhe organizatave ndërkombëtare që të kuptojnë kërkesat fetare në shoqërinë tradicionale të Afganistanit dhe të mos i lidhin ato me ndihmën humanitare dhe çështjet politike.

Të premten, 11 shtete u kanë bërë thirrje talibanëve “që menjëherë të kthejnë mbrapsht masat shtypëse kundër grave dhe vajzave” në Afganistan, duke përfshirë sektorin politik, ekonomik, të edukimit dhe hapësirave publike.

Pas kthimit të talibanëve në pushtet, në gusht të vitit 2021, udhëheqësit e linjës së ashpër kanë kufizuar në masë të madhe të drejtat dhe lëvizjen e grave.

Aktualisht gratë dhe vajzat nuk mund të shkollohen pas klasës së gjashtë dhe as të shkojnë në universitet.

Shumë vende të punës tani janë të ndaluara dhe ato nuk mund të udhëtojnë vetëm në distanca të gjata./Albeu.com/

The post Talibanët refuzojnë kërkesën e OKB-së për të drejtat e grave appeared first on Albeu.com.

Talibanët njoftuan për ndalesën që gratë të ndjekin shkollimin në universitete më 20 dhjetor, përmes një letre që Ministria e Arsimit iu dërgoi institucioneve të arsimit të lartë. Ky vendim u dënua nga komuniteti ndërkombëtar dhe Kombet e Bashkuara.

Një grup prej afër 50 grash të veshura me hixhabë dhe disa duke mbajtur maska, u mblodhën në kryeqytetin afgan, Kabul, më 22 dhjetor për të protestuar paqësisht kundër vendimit. Ato brohoritën slogane kundër ndalesës, por u sulmuan dhe protesta u shpërnda nga forcat e sigurisë së talibanëve, thanë për Radion Evropa e Lirë pjesëmarrëset dhe dëshmitarët.

Pjesëmarrëset në protestë kishin planifikuar që të mblidheshin jashtë ndërtesës së Universitetit të Kabulit, që është institucioni më i madh dhe më prestigjioz i edukimit në Afganistan. Por, ato ndryshuan vendin e protestës, pasi një numër i madh i forcave të sigurisë u dislokuan para këtij universiteti.

Basira, që ishte pjesëmarrëse në protestë, i tha REL-it se forcat e sigurisë rrahën disa nga pjesëmarrëset dhe i arrestuan, ndërsa të tjerat arritën të largoheshin. Raportohet se edhe një numër i gazetarëve që po mbulonin protestën, janë arrestuar.

“Fatkeqësisht, talibanët sërish e shndërruan protestën tonë në dhunë”, tha ajo.
Ajo shtoi se nuk e di numrin e saktë të grave të arrestuara, por tha se e di që një grua e quajtur Zahra Mandaj është arrestuar së bashku me katër gra të tjera.

Autoritetet talibane nuk kanë komentuar për këtë incident, por Ministria e Arsimit të Lartë, në qeverinë talibane, ka mbrojtur vendimin për ndalimin e shkollimit të grave në arsimin e lartë.

Nida Mohammad Nadim tha gjatë një interviste për televizionin afgan se ndalesa ishte e domosdoshme për të parandaluar përzierjen e studentëve me studentet në universitete, sepse ai beson se disa prej lëndëve që jepeshin në këto universitete shkelin parimet e islamit.

Ai po ashtu tha se studentet kanë injoruar instruksionet islamike, përfshirë edhe mënyrën e veshjes, dhe po ashtu nuk kanë respektuar rregullin që të shoqërohen nga një familjar mashkull sa herë që udhëtojnë.

“Ato po visheshin sikur të shkonin në dasma. Këto vajza nuk kanë ndjekur rregullin e hixhabit”, tha ai.
Autoritetet po ashtu kanë bërë të ditur se vendimi për ndalimin e shkollimit të grave në universitete do të jetë në fuqi deri në një njoftim të ri.

Sekretari amerikan i Shtetit, Antony Blinken, tha se talibanët po tentojnë të dënojnë gratë afgane “me një të ardhme të errët dhe pa mundësi” duke ua pamundësuar atyre që të ndjekin shkollimin në universitete.

Më 22 dhjetor, Turqia dhe Arabia Saudite u bënë shtetet e fundit me shumicë myslimane që dënuan vendimin e talibanëve.

Kombet e Bashkuara kanë kërkuar nga talibanët që të tërheqin menjëherë vendimin.

Shtetet e Grupit Shtatë (G7) po ashtu thanë se ndjekja në bazë gjinore përbën krim kundër njerëzimit, duke dënuar fuqishëm vendimin për ndalimin e grave që të shkollohen në universitete./REL

The post Talibanët shpërndajnë me dhunë protestën kundër ndalimit të shkollimit të grave appeared first on Albeu.com.

Ministri i Jashtëm në detyrë, Amir Khan Muttaqi, u tha gazetarëve në një konferencë për media se Frerichs u këmbye me Haji Bashir Noorzai në aeroportin e Kabulit, herët më 19 shtator.

Noorzai u arrestua në vitin 2005 dhe u akuzua për kontrabandë me heroinë, në vlerë më shumë se 50 milionë dollarë në Shtetet e Bashkuara të Amerikës, dhe u dënua me burgim të përjetshëm në vitin 2009.

Frerichs është një inxhinier dhe veteran i marinës amerikane që ka punuar në Afganistan për një dekadë në projekte zhvillimi. Ai u rrëmbye në fillim të shkurtit 2020.

Në fillim të tetorit të vitit 2021, zyrtarët amerikanë zhvilluan bisedime me përfaqësuesit talibanë.

Ky ishte takimi i parë që prej se SHBA-ja u tërhoq nga Afganistani dhe grupi islamik mori kontrollin e vendit në muajin gusht të të njëjtit vit.

Ky takim nuk do të thotë se SHBA-ja zyrtarisht e njeh sundimin e talibanëve në Afganistan, kishte deklaruar vitin e kaluar Departamenti i Shtetit./REL/

The post Talibanët thonë se kanë këmbyer të burgosur me Amerikën appeared first on Albeu.com.

“Ndalesat e ashpra ndaj të drejtave të grave dhe vajzave, veprimet hakmarrëse ndaj kundërshtarëve dhe kritikëve dhe shtypja e lirisë së shprehjes nga talibanët përbëjnë rrëshqitje drejt autoritarizmit”, tha Richard Bennett, raportues i posaçëm i OKB-së për situatën e të drejtave të njeriut në Afganistan.

Këto komente ai i bëri gjatë takimit të Këshillit për të Drejtat e Njeriut të OKB-së që u mbajt në Gjenevë më 12 shtator.

Ky këshill kishte dhënë mandat për të monitoruar shkeljet e të drejtave të njeriut në Afganistan një vit pasi talibanët morën pushtetin dhe tani ky mandat duhet të shqyrtohet sërish.

Talibanët morën pushtetin në Afganistan në gushtin e vitit 2021. Që atëherë, vajzat afgane nuk lejohen që të shkojnë në shkollë dhe gratë detyrohen që të mbulohen krejtësisht – me përjashtim sytë – gjatë daljeve në publik.

Qeveria e udhëhequr nga talibanët ka vendosur ndalesa të rrepta në qasjen në edukim dhe punësim për gratë dhe vajzat, pavarësisht se fillimisht kishte premtuar se nuk do të vendoste kufizime të tilla.

Më 10 shtator, autoritetet talibane mbyllën shkollat në provincën Paktia për vajzat që vijonin mësimin nga klasa e gjashtë dhe më lartë. Shkollat ishin hapur përkohësisht pas rekomandimeve nga udhëheqësit fisnorë.

Shkolla për vajzat janë mbyllur edhe gjetkë në vend, përfshirë në provincën Gardez./REL

The post Eksperti i OKB-së: Afganistani po shkon drejt autoritarizmit appeared first on Albeu.com.

Mullah Mohammad Yaqoob u tha gazetarëve gjatë një konference për media në Kabul më 28 gusht, se dronët amerikanë kanë hyrë në Afganistan përmes Pakistanit.

“Sipas informacioneve tona, dronët po hyjnë përmes Pakistanit në Afganistan. Ata përdorin hapësirën ajrore të Pakistanit. Ne kërkojmë nga Pakistani që të mos përdorë hapësirën e tij ajrore kundër nesh”, tha ai.

Ministria e Punëve të Jashtme e Pakistanit nuk ka reaguar menjëherë për Reuters lidhur me këto akuza.

Autoritetet pakistaneze kanë mohuar përfshirjen ose që kishin njohuri për me dron që Shtetet e Bashkuara thanë se kanë kryer në Kabul në korrik, sulm në të cilin u vra lideri i Al-Kaidës, Ayman al-Zawahiri.

Komentet e Yaqoob vijnë teksa talibanët afganë po ndërmjetësojnë bisedimet midis Pakistanit dhe grupit militant të talibanëve pakistanezë. Afganistani po ashtu varet shumë nga tregtia me Pakistanin.

Talibanët kanë thënë se po hetojnë sulmin ajror të korrikut dhe kanë thënë se nuk e kanë gjetur trupin e liderit të Al-Kaidës./REL

The post Talibanët: Dronët e SHBA-së po përdorin hapësirën ajrore të Pakistanit appeared first on Albeu.com.

“Popullsia, duke përfshirë grupet etnike dhe fetare, në veçanti popullatën Shiite, po përjetojnë abuzim të institucionalizuar dhe sistematik të të drejtave të tyre ekonomike, sociale, kulturore, civile dhe politike,”- tha më 14 gusht, Nabila Massrali, zëdhënëse e BE-së për çështjet e Jashtme.

“Më konkretisht, ata kanë shkelur dhe abuzuar rëndë të drejtat e grave dhe vajzave afgane, të cilat mbeten të privuara nga arsimi i mesëm, ndërsa kufizimet e reja në kodet e veshjes dhe lëvizjes i kanë përjashtuar ato nga shumica e aspekteve të jetës ekonomike dhe publike”, tha Massrali.

Në deklaratë thuhet se nuk ka mekanizëm që mbron gratë dhe vajzat dhe se dhuna në familje është rritur.

“Mekanizmat për të mbrojtur gratë dhe vajzat nga dhuna dhe martesat e detyruara janë çmontuar dhe dhuna në familje është në rritje”.

Talibanët pushtuan Kabulin më 15 gusht 2021, duke u rikthyer në pushtet në Afganistan gati 20 vjet pasi ata u rrëzuan nga pushtimi i SHBA-së pas sulmeve të 11 shtatorit 2001. Asnjë vend nuk e ka njohur ende sundimin e talibanëve. Pasi fillimisht deklaruan se do të ishin më të moderuar se në kohën e tyre të mëparshme, talibanët u kthyen në një linjë të ashpër, duke shtypur të drejtat e grave, duke lejuar pak kritika dhe duke vendosur kontroll më të madh mbi median.

Vërejtja e BE-së vjen një ditë pasi një protestë e grave në Kabul u shpërnda me dhunë nga luftëtarët talibanë, të cilët qëlluan me armë në ajër dhe rrahën protestuesit që kishin kërkuar “bukë, punë dhe liri”.

Rreth 40 gra marshuan para ndërtesës së Ministrisë së Arsimit më 13 gusht përpara se luftëtarët t’i shpërndanin.

Fotot dhe videot e protestës të postuara në mediat sociale tregojnë forcat talibane që gjuajnë dhe sulmuan fizikisht gratë. Disa gra u ndoqën nga luftëtarët talibanë, të cilët i qëlluan ato me kondakët e pushkëve. Talibanët gjithashtu arrestuan tre gazetarë të huaj dhe një punëtor afgan për mbulimin e protestës, ndërsa dy gazetarë të tjerë vendas u plagosën lehtë, sipas Shoqatës së Gazetarëve të Pavarur Afganistan (AIJA).

Hujatullah Mujadidi, anëtar i lartë i AIJA-s me bazë në Kabul, tha se gazetarët e huaj të arrestuar ishin nga Gjermania, Danimarka dhe Norvegjia. Amnesty International shprehu shqetësimin për raportimet se talibanët përdorën “forcë të tepruar” për të shpërndarë gratë. Në postimin e tyre në Twitter thuhet se gratë kishin “protestuar në mënyrë paqësore për të kërkuar të drejtat e tyre njerëzore”./REL

The post BE: Talibanët kanë dështuar të krijojnë sistem politik gjithëpërfshirës appeared first on Albeu.com.

Grupi ekstremist ka monopolizuar pushtetin, duke mënjanuar shumë grupe etnike dhe politike. Ai, po ashtu, ka burgosur dhe rrahur gazetarë dhe mbrojtës të të drejtave të njeriut, të cilët kanë protestuar kundër kufizimeve të ashpra të talibanëve ndaj të drejtave të grave dhe lirisë së shtypit.

Rezistenca e vogël, ndonëse e qëndrueshme, ndaj sundimit taliban ka dështuar të bëjë depërtime të rëndësishme. Ndërkohë, militantët kanë zhvilluar një luftë të përgjakshme kundër grupit ekstremist rival, Shteti Islamik- Khorasan (IS-K).

Fushata e talibanëve ka mposhtur, por nuk e ka mundur IS-K, që ka vazhduar të vendosë bomba vdekjeprurëse në qytetet e mëdha.

Ekspertët thonë se kërcënimi më i madh për talibanët është përçarja në rritje. Përçarjet janë zgjeruar ndërsa fraksionet rivale luftojnë për fuqinë politike dhe burimet ekonomike.

Asnjë shtet nuk i ka njohur talibanët. Por, fuqitë perëndimore të prira për të zbutur politikat e ashpra të talibanëve dhe për të shmangur një katastrofë humanitare në Afganistan, kanë vazhduar dialogun me grupin ekstremist.

Akuzat se talibanët strehonin liderin e Al-Kaidës, Ayman al-Zawahirin, i cili u vra në një sulm të SHBA-së me dron në Kabul, vënë në rrezik qëllimin e grupit për të fituar legjitimitet dhe ndihmë ndërkombëtare, thanë vëzhguesit.

Pjesëtarë të sigurimit talibanë duke bërë roje në lagjen ku një sulm me dron amerikan vrau liderin e Al-Kaidës, Ayman al-Zawahiri, në Kabul më 31 korrik. Foto e bërë më 2 gusht 2022.

Opozita e armatosur dhe e paarmatosur

“Për talibanët, është shumë e rëndësishme që qeveria e tyre aktuale është i vetmi regjim në historinë e kaluar prej katër dekadash të Afganistanit që kontrollon gjithë vendin”, tha Sami Yousafzai, një gazetar dhe komentues veteran afgan që nga paraqitja e talibanëve në vitet 1990.

Dominimi territorial i talibanëve, tha ai, ka të ngjarë të parandalojë një luftë civile si në vitet 1990, kur vendet fqinje armatosën fraksionet rivale afgane që mbajti terren në pjesë të ndryshme të vendit. Edhe pasi talibanët mbizotëruan në luftën civile më 1996, ata nuk ishin në gjendje të pushtonin gjithë Afganistanin para se të rrëzohej nga pushteti pas pushtimit të udhëhequr nga SHBA-ja më 2001.

“Fqinjët e Afganistanit janë befasuar me fuqinë ushtarake të talibanëve, pavarësisht nga dobësia e tyre ekonomike”, tha Yousafzai. “Ata të gjithë e dinë se një luftë tjetër civile në Afganistan nuk do të zgjidhë asgjë, por do të hapë një kuti të re të Pandorës”.

Një pjesë e grupeve të vogla të armatosura kanë kundërshtuar sundimin taliban në rajone të ndryshme të vendit. Por, ato mbeten të dobëta, të ndara dhe nuk kanë asnjë strehë apo ndihmë nga jashtë, thanë ekspertët.

“Ato kryesisht shkaktojnë bezdi, jo një kërcënim për regjimin taliban”, tha Marvin Weinbaum, drejtor i studimeve për Afganistanin dhe Pakistanin në Institutin e Lindjes së Mesme në Uashington.

Grupi më i fuqishëm kundër talibanëve është Fronti i Rezistencës Kombëtare (NRF), i udhëhequr nga Ahmad Masud, djali i ish-komandantit muxhahedin Ahmad Shah Masud, i cili përdori vendlindjen e tij, Luginën Panjshir në Afganistanin verior, si bazë për të luftuar forcat sovjetike në vitet 1980 dhe talibanët në vitet 1990.

NRF-ja ka organizuar sulme vdekjeprurëse, sporadike kundër talibanëve, por nuk ka mundur ta luftojë kontrollin e luginës. Grupi militant ka përdorur forcë brutale për të shuar rezistencën, duke përfshirë vrasjen dhe torturimin e pretenduar të luftëtarëve të rezistencës dhe ndalimin dhe rrahjen e civilëve.

Weinbaum tha se fqinjët e Afganistanit dhe fuqitë e huaja nuk janë të interesuara të ndezin luftë më të gjerë civile duke armatosur grupet e rezistencës.

“Ata do të preferonin të kishte një qeveri në Kabul, mjaftueshëm të qëndrueshme për të lehtësuar përpjekjet ndërkombëtare për t’u marrë me një krizë humanitare që mund të sjellë një valë refugjatësh”, tha ai, duke shtuar se komuniteti ndërkombëtar gjithashtu dëshiron të frenojë kërcënimin e paraqitur nga grupe militantësh transnacionalë si IS-K në Afganistan.

Talibanët, gjithashtu, kanë shtypur dhunshëm opozitën paqësore ndaj sundimit të tyre.

Aktivistët e të drejtave të njeriut kanë akuzuar talibanët për kryerjen e vrasjeve jashtëgjyqësore, ndalimeve arbitrare, zhdukjeve të detyruara, torturave dhe rrëfimeve të detyruara, si pjesë e përpjekjeve të tyre për të shtypur mospajtimin. Militantët kanë vënë në shënjestër mbrojtësit e të drejtave të njeriut, gratë aktiviste, gazetarët dhe intelektualët.

Talibanët kanë shpërndarë me dhunë protestat paqësore të organizuara nga gratë që kërkojnë të drejtat e tyre themelore.

Mediat dikur të zëshme afgane gjithashtu janë heshtur kryesisht përmes frikësimit, ndalimit dhe rrahjes së gazetarëve.

‘Fraksionet’ e brendshme

Ekspertët thanë se kërcënimi më i madh për talibanët janë ndarjet e brendshme. Ndërkohë që talibanët janë përpjekur të shndërrohen nga një kryengritje në një qeveri funksionale pas marrjes së pushtetit, ka pasur raporte në rritje për konflikte të brendshme brenda grupit militant.

Mosmarrëveshjet për shpërndarjen e pushtetit dhe burimeve ekonomike kanë kaluar edhe në dhunë. Talibanët zhvilluan një fushatë ushtarake vdekjeprurëse kundër një komandanti disident në veri të Afganistanit në qershor. Vëzhguesit thanë se konfliktet kishin të bënin me kontrollin e minierave fitimprurëse të qymyrit.

Sipas ekspertëve, talibanët, kryesisht të përbërë nga pashtunë, janë të ndarë sipas linjave etnike, rajonale dhe fisnore. Ka gjithashtu dallime midis militantëve lidhur me politikën, thanë ata.

Besohet se ekziston një konkurrencë në rritje mes rrjetit Haqqani – një fraksion taliban me bazë në lindje – dhe një fraksioni të bashkëthemeluesve talibanë në jug të vendit. Gijthashtu, ekziston një fraksion më i vogël dhe më pak i fuqishëm i komandantëve talibanë etnikë taxhikë dhe uzbekë, të cilët janë të vendosur në Afganistanin verior.

Po ashtu, ka pasur përçarje midis figurave politike relativisht pragmatike të talibanëve, komandantëve të linjës së ashpër në terren dhe klerikëve radikalë, të cilët janë të vendosur të zbatojnë interpretimin e tyre fundamentalist të ligjit islamik.

Weinbaum tha se ka pasur mosmarrëveshje të forta midis fraksioneve rivale talibane. Por, ai theksoi se fraksioni i udhëhequr nga krerët e talibanëve jugorë ka fjalën e fundit.

“Duket një përpjekje e ndërgjegjshme për të shmangur llojin e thyerjeve që mund të minojnë kontrollin e regjimit në pushtet dhe për këtë arsye, një nxitje e fortë për t’i zbutur dallimet”, tha ai.

Pikë kthese

Ekspertët thanë se vrasja e Zawahirit më 31 korrik në një sulm me dron të SHBA-së në Kabul, mund të jetë një pikë kthese për talibanët.

Menjëherë pas vrasjes, Shtetet e Bashkuara akuzuan talibanët për strehimin e Zawahirit në kundërshtim me marrëveshjen e Dohas të vitit 2020. Sipas kësaj marrëveshjeje, e cila hapi rrugën për tërheqjen e trupave të huaja nga Afganistani, talibanët u zotuan për mosstrehim të rrjetit terrorist. Talibanët pretenduan se nuk dinin për praninë e Zawahrit në Kabul.

Shtetet e Bashkuara pushtuan Afganistanin pasi talibanët refuzuan të dorëzonin liderët e Al-Kaidës që Uashingtoni i konsideroi përgjegjës për sulmet terroriste të 11 shtatorit.

“Zbulimi i Zawahirit në qendër të Kabulit vë një kthesë në përpjekjet e talibanëve për të fituar legjitimitet dhe ndihmë nga bota perëndimore”, tha Asfandyar Mir, analist i lartë në Institutin e Paqes të Shteteve të Bashkuara në Uashington.

“Unë mendoj se në të ardhmen kjo do të jetë një sfidë e madhe për talibanët”.

Graeme Smith, një analist i Afganistanit për Grupin Ndërkombëtar të Krizave, tha se operacioni amerikan “përtej horizontit” që vrau Zawahrin, ka të ngjarë të ishte i vetëm. Ai nuk parashikon një fushatë më të gjerë ushtarake të SHBA-së kundër terroristëve me bazë në Afganistan.

Smith shtoi se vrasja e Zawahrit ka komplikuar bashkëpunimin perëndimor me talibanët. Ai iu referua pezullimit të bisedimeve mes zyrtarëve amerikanë dhe talibanëve lidhur me rezervat e ngrira të Bankës Qendrore afgane me 3.5 miliardë dollarë, që Uashingtoni tregoi se mund të lironte për të mbështetur stabilitetin makroekonomik në Afganistan.

“Mosbesimi thellohet kur talibanët nuk janë aspak të sinqertë për kërcënimin e Al-Kaidës në terren”, tha Smith./REL

The post Një vit pas marrjes së pushtetit, a do të qëndrojnë talibanët? appeared first on Albeu.com.

Afganistani është në mes të një krize humanitare dhe ekonomike, dhe Abdul Qahar Balkhi, një zyrtar i lartë i talebanëve, tha se qeveria ishte “e paaftë financiarisht të ndihmojë njerëzit në masën që është e nevojshme”.

Agjencitë e ndihmës, vendet fqinje dhe fuqitë botërore po ndihmojnë, tha ai, por “ndihma duhet të rritet në një masë shumë të madhe, sepse ky është një tërmet shkatërrues që nuk është përjetuar në dekada”

Kreu i Kombeve të Bashkuara, António Guterres tha se agjencia ishte mobilizuar plotësisht për katastrofën. Ekipet shëndetësore, furnizimet mjekësore, ushqimi dhe strehimoret e urgjencës ishin rrugës për në zonën e tërmetit, thanë zyrtarët e OKB-së.

Provinca juglindore Paktika është goditur më së shumti dhe OKB-ja po përpiqet të sigurojë strehim emergjent dhe ndihmë ushqimore. Përpjekjet e shpëtimit po pengohen nga reshjet e dendura të shiut dhe mungesa e burimeve..

Tërmeti më vdekjeprurës që goditi vendin në dy dekada është një sfidë e madhe për talibanët, lëvizjen islamike e cila rifitoi pushtetin vitin e kaluar pas rënies së qeverisë së mbështetur nga perëndimi./REL

The post Tërmeti shkatërrues në Afganistan, Talibanët bëjnë thirrje për ndihmë ndërkombëtare appeared first on Albeu.com.

Pasi talebanët u rikthyen në pushtet në gusht të vitit 2021, pas tërheqjes së forcave ndërkombëtare të udhëhequra nga SHBA-ja, një grup opozitar i njohur si Fronti i Rezistencës Kombëtare (NRF) u zotua të luftojë duke kundërshtuar regjimin e tyre.

E vendosur në lartësi në Hindu Kush, Lugina Panjshir ka vetëm një hyrje të ngushtë. Atje, luftëtarët vendas zmbrapsëm sovjetikët në vitet 1980, dhe talibanët një dekadë më vonë, nën udhëheqjen e Ahmad Shah Massoud, një luftëtar gueril që u bë simbol i rezistencës së muxhahedinëve përpara se të vritej në një sulm vetëvrasës.

Tashmë, NRFA udhëhiqet nga Ahmad Masud, djali i tij, dhe në kontingjentin e tyre ka mijëra luftëtarë me përvojë, përfshirë disa që shërbyen në ish-Forcat e Sigurisë Kombëtare afgane. Që nga muaji i kaluar, NRF ka shtuar sulmet në rajon ndaj njësive dhe pikave të kontrollit talibane, sipas një deklarate më 10 qershor të HRW, duke bërë që grupi radikal të vendosë mijëra luftëtarë në Panjshir.

HRW tha se luftëtarët talebanë kanë nisur një fushatë hakmarrjesh kundër komuniteteve që ata pretendojnë se po mbështesin NRF-në. “Forcat talebane në provincën Panjshir kanë përdorur dhunën ndaj civilëve në kundërpërgjigje të luftimeve kundër Frontit të Rezistencës Kombëtare të opozitës”, tha në deklaratë Patricia Gossman, drejtoreshë për rajonin e Azisë në ‘Human Rights Watch’./REL/

The post Talibanët po arrestojnë dhe torturojnë civilët në Afganistan appeared first on Albeu.com.

BBC po ashtu raportoi të dielën, më 27 mars se edicionet e lajmeve në disa gjuhë ishin hequr nga transmetimi në Afganistan.

Ky veprim ndodhi pasi talebanët urdhëruan partnerët e BBC TV, duke përfshirë stacionet televizive lokale Shamshad, Ariana dhe Arezo që t’i heqin transmetuesit ndërkombëtarë nga valët e tyre.

Ndërkohë një burim në gjigantin mediatik afgan ‘MOBY Group’ tha për agjencinë e lajmeve DPA se kishte ndaluar transmetimin e materialit të Zërit të Amerikës (VOA) që nga e diela, pas urdhrave të agjencisë së inteligjencës së talibanëve.

Më herët, zëdhënësi i Ministrisë së Informacionit dhe Kulturës, Abdul Haq Hammad, konfirmoi për DPA-në se transmetimet televizive të Zërit të Amerikës në kanalet afgane ishin ndalur.

Zyrtari taliban tha se kulturalisht dhe politikisht, televizioni i Zërit të Amerikës binte në kundërshtim me politikat e qeverisë.

Talibanët kohët e fundit arrestuan për pak kohë 11 punonjës të medias, duke përfshirë tre punonjës të ‘TOLOnews’, pas ndalimit të telenovelave nga jashtë.

Pasi talibanët u kthyen në pushtet, shumë gazetarë afganë u larguan. Media të shumta u mbyllën, kryesisht për shkak të problemeve ekonomike.

Ndërkohë shumë gazetarë që janë ende në Afganistan nuk ndihen më në gjendje të raportojnë hapur, nga frika e hakmarrjeve nga talebanët. Shumë prej tyre janë burgosur ose torturuar gjatë kryerjes së punës së tyre./REL

The post Talibanët marrin vendimin tjetër ekstrem, ndalohet transmetimi i programeve të huaja appeared first on Albeu.com.