“Asnjë nostalgji për reliket e vjetra të komunizmit. Vetëm respekt për pronën publike dhe pasurinë publike,” shkruan deputetja demokrate, duke vënë theksin te menaxhimi i këtyre hapësirave nga institucionet shtetërore.

Tabaku ka lëshuar akuza të forta ndaj Korporatës së Investimeve, duke deklaruar se ky institucion po sillet me pronat e përbashkëta sikur t’i kishte private. Ajo ka ngritur pikëpyetje të mëdha mbi mungesën e transparencës në vendimmarrje, duke listuar edhe zona të tjera të vendit ku po ndodh e njëjta gjë.

“Korporata e investimeve sillet me pronën publike si ta kenë pasurinë e tyre. Kush janë këta që i marrin vendimet pa asnjë proces transparent? E njëjta situatë në Zvërnec, në aeroportin e Vlorës, në Durrës, etj. Nuk ka asnjë vendimmarrje transparente,” nënvizon Tabaku.
Sipas deputetes së PD-së, kjo mënyrë veprimi e pushtetit, e cila përqendron pasurinë në duart e një pakice, po i detyron qytetarët të dalin në rrugë për të kërkuar të drejtat e tyre.

“Ky sistem i nxjerr njerëzit në rrugë për të protestuar. Sistemi që ka përqendruar pasuritë tek pakica, sistemi që e trajton pronën publike si private. Duhet të ketë meritokraci edhe në ekonomi,” mbyll reagimin e saj Jorida Tabaku.

The post Kulla te Pallati i Kongreseve/ Tabaku reagon ashpër: Kush janë këta që marrin vendime pa transparencë? Prona publike po trajtohet si private! appeared first on Albeu.com.

Tabaku kujtoi se ka qenë ndër deputetet që kundërshtoi ndryshimet në ligjin për zonat e mbrojtura si dhe ligjin e investimeve strategjike, duke argumentuar se këto ndërhyrje ligjore i kanë hapur rrugë një sistemi ku vendimet merren për një grusht përfituesish, ndërsa qytetarët dhe komunitetet lokale përjashtohen nga procesi.

Sipas saj, problemi i sotëm nuk është vetëm Zvërneci, por fakti që për vite me radhë janë miratuar ligje që trajtojnë Shqipërinë si pronë të pushtetit dhe jo si pasuri të përbashkët të shqiptarëve.

“Qytetarët nuk po protestojnë vetëm për një copë tokë apo për një projekt. Ata po protestojnë kundër një sistemi që ka krijuar privilegje për pakicën, ka deformuar ekonominë dhe ka bërë që çdo projekt i madh të shoqërohet me mosbesim”, u shpreh Tabaku.

Deputetja e PD-së theksoi se ndryshimet në ligjin e zonave të mbrojtura dhe zgjatja e vazhdueshme e ligjit të investimeve strategjike janë shembuj të një modeli ku ligjet nuk ndërtohen për interesin publik, por për t’i hapur rrugë projekteve të caktuara dhe interesave të veçanta.

Fjala e Tabakut:

Për vite me radhë e kam dëgjuar veten të flas në këtë sallë dhe shpesh jam ndjerë në siklet. Jo sepse kam gabuar, por sepse shqiptarët e zakonshëm e kanë kuptuar të vërtetën shumë më herët se ne. Ata e ndjejnë çdo ditë kur paguajnë faturat, kur bëjnë llogaritë në fund të muajit, kur përballen me vështirësitë ekonomike dhe kur shohin se si funksionon ky sistem.

Sot nuk jam këtu për të folur për një projekt të vetëm. Nuk jam këtu për të folur as për një investitor të vetëm. Sot dua të flas për sistemin. Për sistemin që ka mbledhur sot qytetarët përballë qeverisë. Për sistemin që ka bërë të mundur që çdo projekt i madh në Shqipëri të shoqërohet automatikisht me mosbesim, sepse shqiptarët e dinë nga përvoja se ligji nuk i trajton të gjithë njësoj.

Kjo është arsyeja pse qindra qytetarë, me parti apo pa parti, aktivistë të shoqërisë civile dhe njerëz të zakonshëm janë mbledhur prej ditësh në protestë. Që ditën e parë unë iu bashkova asaj proteste jo si politikane, por si qytetare. Pa kamera, pa foto dhe pa deklarata, sepse besoj se kauza e tyre është e drejtë.

Tre vite më parë organizata të shoqërisë civile trokitën në derën e zyrës sime dhe ngritën shqetësimin për ndryshimet në ligjin e zonave të mbrojtura. I dëgjova me vëmendje dhe iu bashkova betejës së tyre. Së bashku arritëm ta çonim çështjen e Aeroportit të Vlorës dhe të ligjit për zonat e mbrojtura në dyert e Komisionit Europian dhe të Parlamentit Europian. Ishin dy ligje problematike, efektet e të cilëve po i shohim sot.

Po ashtu, prej dhjetë vitesh kam folur kundër ligjit të investimeve strategjike. E kam konsideruar gjithmonë një rrezik për ekonominë dhe për shtetin e së drejtës. Një ligj që ndërhyn në marrëdhëniet e pronësisë, që i jep shtetit kompetenca të panevojshme në konfliktet mes privatëve dhe që krijon privilegje për një grup të kufizuar njerëzish. Një ligj që lindi si i përkohshëm dhe u shndërrua në një mekanizëm të përhershëm.

Është normale që projektet e mëdha të shoqërohen me debat. Është normale që qytetarët të kërkojnë transparencë, konsultim dhe informacion. Pikërisht kjo po ndodh sot. Qytetarët nuk protestojnë vetëm për Zvërnecin. Ata protestojnë edhe për pamundësinë ekonomike, për arrogancën e pushtetit, për mungesën e besimit tek politika dhe për një sistem që nuk u krijon mundësi të barabarta.

Një investitor serioz është gjithmonë i mirëpritur në Shqipëri. Por vendi nuk mund të trajtohet si pronë private e askujt. Shqipëria nuk mund të qeveriset me ligje të shkruara sipas porosisë. Do të ishte normale që projektet e mëdha të diskutoheshin publikisht, që të paraqiteshin kostot dhe përfitimet, që parlamenti të ushtronte kontroll dhe që qytetarët të dëgjoheshin.

Përkundrazi, për vite me radhë kemi parë vendimmarrje të mbyllura, mungesë transparence dhe ndryshime ligjore të bëra për interesa të ngushta. Pikërisht kjo ka krijuar mosbesimin që shohim sot.

Dëgjoj shpesh protestues që thonë se “janë të gjithë njësoj”. Jo, nuk jemi të gjithë njësoj.

Unë kam folur kundër ligjit të investimeve strategjike që ditën e parë. Kam folur kundër ndryshimeve në ligjin e zonave të mbrojtura. Kam folur kundër koncesioneve dhe partneriteteve publik-private që kanë deformuar tregun. Kam paraqitur amendamente dhe nisma ligjore për të ndalur këtë model.

Vitin e kaluar, me ftesë të organizatave të shoqërisë civile, vizitova Zvërnecin dhe Nartën bashkë me fëmijët e mi. Pashë nga afër flamingot dhe pasurinë e jashtëzakonshme natyrore që ka Shqipëria. Atë ditë e kuptova edhe më qartë se sa e rëndësishme është të ruajmë atë që kemi.

Jam bashkuar këtyre kauzave sepse besoj se Shqipëria mund të jetë ndryshe. Besoj se për të tërhequr investime serioze duhet të zbatojmë ligjin. Besoj se duhet të jemi jo vetëm në germë, por edhe në frymë në përputhje me legjislacionin europian. Dhe besoj se duhet të shkatërrojmë këtë sistem që ka kapur ekonominë dhe po detyron shqiptarët të largohen.

Fatkeqësisht, kjo sallë është kthyer në noter të vendimeve të qeverisë. Këtu janë votuar ligji i investimeve strategjike, ligjet e koncesioneve dhe miliarda euro kontrata që kanë prodhuar përfitime për pakicën dhe kosto për shumicën.

Ndërkohë investimet publike janë në nivele minimale, shërbimet publike degradojnë, klasa e mesme po shpërbëhet dhe periferia po zbrazet. Kukësi, Dibra, Bulqiza dhe shumë zona të tjera vazhdojnë të mbeten pas, ndërsa të rinjtë largohen çdo vit.

Prandaj pyetja nuk është kush ndërton. Pyetja është: për kë ndërtohet Shqipëria?

Për një grusht kompanish që marrin pjesën më të madhe të tenderëve? Për investitorë të privilegjuar? Për kullat bosh që askush nuk mund t’i blejë? Apo për familjet që punojnë me dy paga dhe përsëri nuk arrijnë të blejnë një shtëpi?

Ne nuk po bëjmë politikë. Po bëjmë aritmetikë. Dhe aritmetika tregon qartë se ky sistem transferon pasurinë e shumicës tek pakica, vit pas viti, përmes ligjeve dhe vendimeve të miratuara në këtë sallë.

Prandaj sot kërkoj diçka të thjeshtë: riktheni parlamentit rolin e tij. Riktheni qytetarëve transparencën. Riktheni drejtësinë fiskale.

Nuk mund të flasim për integrim europian kur modeli ynë i zhvillimit bie ndesh me vlerat europiane. Nuk mund të pretendojmë demokraci kur pyetjet themelore mbeten pa përgjigje: kush përfiton nga paratë publike, si merren vendimet dhe kush mban përgjegjësi?

Shqipëria meriton të jetë ndryshe. Pavarësisht bindjeve tona politike, një gjë na bashkon: nevoja për të ndryshuar këtë model që ka prodhuar pabarazi, privilegje dhe mosbesim.

Unë nuk bie dakord me çdo slogan që dëgjohet në protestë. Por bie dakord me nevojën urgjente për të ndryshuar mënyrën se si qeveriset ky vend. Për të ndryshuar modelin ekonomik. Për t’i shtrirë dorën çdo qytetari që ende beson se politika mund të sjellë ndryshim.

Le t’ua rikthejmë shqiptarëve shpresën. Le ta fillojmë nga politika. Le ta fillojmë nga vetja

The post Tabaku: Protesta kundër një sistemi që ndryshon ligjet për pakicën dhe përjashton shumicën appeared first on Albeu.com.

Në një fjalim që u dallua më shumë për tonin bashkues sesa për retorikën e zakonshme të përplasjes politike, Tabaku argumentoi se problemi më i madh i Shqipërisë sot nuk është vetëm korrupsioni, varfëria apo emigracioni, por humbja e besimit.

“Shumë shqiptarë sot nuk besojnë se puna e ndershme shpërblehet. Nuk besojnë se mund të ecësh përpara pa njohur njeriun e duhur. Nuk besojnë se shteti punon për ta. Dhe kur nuk beson, largohesh. Ose qëndron, por e mbyll zemrën”, u shpreh ajo.

Sipas Tabakut, kjo është pasoja e një sistemi që ka krijuar privilegje për pakicën e lidhur me pushtetin, ndërsa ka lënë barrën mbi familjet, shtresën e mesme, sipërmarrësit dhe të rinjtë.

“Familjet bëjnë llogari çdo mbrëmje se çfarë të lënë pa paguar. Sipërmarrësi i ndershëm paguan taksën e korrupsionit për të mbijetuar. I riu me diplomë emigron, ndërsa promovohet ai që ka lidhjet e duhura”, tha ajo.

Megjithatë, thelbi i mesazhit të saj nuk ishte kritika ndaj qeverisë, por nevoja për të ndërtuar një shumicë të re shoqërore që shkon përtej ndarjeve politike.

Duke iu drejtuar jo vetëm demokratëve, por edhe qytetarëve të zhgënjyer, sipërmarrësve, të rinjve dhe votuesve socialistë që ndihen të tradhtuar nga premtimet e qeverisë, Tabaku tha se ndryshimi nuk mund të vijë pa bashkimin e të gjithë atyre që kërkojnë një Shqipëri më të drejtë.

“Socialistit të trishtuar dhe të dëshpëruar që sheh se si besimi i tij është keqpërdorur, dua t’i them se nuk është kundërshtari ynë. Ai është Shqipëria jonë. Nuk po i kërkojmë të ndryshojë bindjet e tij. Po i shtrijmë dorën për të punuar së bashku për një Shqipëri më të mirë”, deklaroi deputetja demokrate.

Në fjalimin e saj, Tabaku paraqiti edhe vizionin për një Shqipëri ku prona respektohet, biznesi konkurron me meritë, shtresa e mesme nuk mban barrën e sistemit dhe të rinjtë nuk e shohin emigrimin si të vetmen mundësi.

Ajo theksoi se Shqipëria nuk ka nevojë për “heronj”, por për njerëz të ndershëm në çdo nivel të shoqërisë dhe institucioneve.

Në pjesën përmbyllëse, Tabaku e vendosi Partinë Demokratike përballë një misioni më të madh se vetja, duke argumentuar se sfida e saj nuk është vetëm të përfaqësojë demokratët, por të bëhet shtëpia politike e çdo shqiptari që kërkon ndryshimin e sistemit aktual.

“Partia Demokratike ka pasur brezin që rrëzoi komunizmin. Ka pasur brezin që ndërtoi pluralizmin. Sot Shqipëria ka nevojë për brezin që rikthen besimin, bashkon njerëzit dhe e bën vendin sërish një vend ku njerëzit duan të jetojnë”, u shpreh ajo.

Mesazhi qendror i fjalës së Tabakut ishte se ndryshimi nuk do të vijë vetëm nga rotacioni politik, por nga bashkimi i të gjithë shqiptarëve që besojnë se Shqipëria mund të qeveriset ndryshe dhe se Partia Demokratike duhet të jetë instrumenti politik i këtij bashkimi.

The post Tabaku nga Kuvendi i PD: Partia Demokratike duhet të bëhet shtëpia e çdo shqiptari që kërkon të ndryshojë këtë sistem appeared first on Albeu.com.

Gjatë diskutimit, Tabaku ndau me përfaqësuesit e biznesit gjerman jo vetëm potencialin e Shqipërisë, por edhe kufizimet reale të modelit aktual ekonomik, i cili – sipas saj – nuk po prodhon zhvillim të qëndrueshëm dhe nuk po tërheq investime cilësore.

“Shqipëria nuk mund të vazhdojë me këtë model ekonomik. Duhet të kalojmë drejt një modeli tjetër – një modeli që prodhon vlerë, që mbështet industrinë dhe që tërheq investime produktive, të cilat sot mungojnë”, u shpreh ajo.

Deputetja e PD theksoi se rruga e vetme strategjike për vendin mbetet integrimi në Bashkimi Evropian, por nënvizoi se integrimi nuk mund të vijë në kushtet e një ekonomie të deformuar nga mungesa e konkurrencës dhe nga orientimi i gabuar i investimeve.

“S’ka integrim europian me një ekonomi që nuk prodhon. S’ka zhvillim me investime që nuk krijojnë vlerë. Shqipëria duhet të tërheqë investime që ndërtojnë industri, që krijojnë punë të mirëpaguar dhe që lidhen me zinxhirët europianë të furnizimit”, theksoi Tabaku.

Ajo i ftoi bizneset gjermane të konsiderojnë Shqipërinë si një destinacion për investime afatgjata në sektorë strategjikë si energjia, data centers, industria e përpunimit dhe teknologjitë e avancuara, duke theksuar se vendi ka potencial real për t’u bërë pjesë e zinxhirëve të rinj të furnizimit në Europë.

“Shqipëria ka pozicion strategjik. Por ky potencial nuk shfrytëzohet vetë. Duhet një politikë ekonomike që e mbështet dhe nuk e pengon”, u shpreh ajo.

Në të njëjtën kohë, Tabaku vuri në dukje se mungesa e investimeve produktive lidhet drejtpërdrejt me klimën e biznesit dhe me mungesën e sigurisë ligjore.

“Sot kemi më shumë investime që lidhen me pasuri të paluajtshme dhe më pak investime në prodhim dhe industri. Ky është një sinjal që modeli nuk funksionon”, theksoi ajo.

Në takim ishte gjithashtu një nga figurat politike më me ndikim të spektrit konservator gjerman, Joachim Pfeiffer, ish-deputet i Bundestagut dhe zëdhënës për ekonominë dhe energjinë për grupin CDU/CSU.

Në përmbyllje, Tabaku theksoi se Shqipëria ka nevojë për një ndryshim të qartë kursi ekonomik, ku investimet e huaja – veçanërisht ato gjermane – të mos jenë thjesht prezencë, por motor real zhvillimi.

“Ne duhet të kalojmë nga një ekonomi që konsumon, në një ekonomi që prodhon. Nga një ekonomi që shpërblen privilegjin, në një ekonomi që shpërblen punën dhe investimin e ndershëm”, përfundoi ajo.

The post Shqipëria nuk mund të vazhdojë me këtë model ekonomik/ Jorida Tabaku me bizneset gjermane: Duhen tërhequr investime që ndërtojnë industri appeared first on Albeu.com.

Në nisje të interpelancës së thirrur ndaj kryeministrit Edi Rama, i cili refuzoi të paraqitej dhe delegoi përgjigjen tek ministrja Delina Ibrahimaj, që u bë edhe “mollë sherri” në seancë pas debateve e tensioneve për këtë mungesë, Tabaku e përkufizoi evolucionin e qeverisjes si një kalim “nga korrupsioni i vogël tek korrupsioni i madh, tek kapja e shtetit dhe më pas tek privatizimi i tij”.

Sipas saj, Korporata e Investimeve nuk është krijuar për të tërhequr investime, por si një strukturë paralele që operon jashtë rregullave të tregut dhe ligjit.

“Justifikimi për investitorët e huaj ka qenë vetëm fasadë për ngritjen e një shteti privat brenda shtetit publik”, u shpreh ajo.

Tabaku theksoi se ligji që krijoi Korporatën e përjashton atë nga procedurat e prokurimit publik dhe nga standardet e transparencës, duke krijuar një hapësirë ku “nuk ka garë, nuk ka tenderë dhe nuk ka llogaridhënie”.

Sipas saj, vendimet për pasuritë publike merren përmes marrëveshjeve të mbyllura, ndërsa institucionet shtetërore sillen sikur këto prona janë private.

Deputetja ngriti një sërë pyetjesh mbi funksionimin e Korporatës, duke kërkuar transparencë për inventarin e pronave të transferuara, vlerën e tyre të tregut, kriteret e përzgjedhjes së partnerëve privatë dhe mekanizmat e kontrollit financiar.

Ajo kërkoi gjithashtu informacion mbi buxhetin, shpenzimet, të ardhurat dhe mungesën e publikimit të bilanceve vjetore.

Në mënyrë të veçantë, Tabaku ngriti shqetësime për projekte konkrete, si transferimi i Pallatit të Kongreseve dhe shembja e objekteve publike për ndërtimin e kullave, duke vënë në pikëpyetje interesin publik të këtyre vendimeve.

Një tjetër shqetësim i ngritur prej saj ishte mungesa e konkurrencës reale në përzgjedhjen e projekteve dhe investitorëve.

Sipas Tabakut, konkurset për projektet janë “procedura formale”, ndërsa vendimmarrja përqendrohet tek kryeministri dhe një rreth i ngushtë aktorësh të lidhur me qeverinë.

Ajo e lidhi drejtpërdrejt këtë model me procesin e integrimit europian, duke theksuar se konkurrenca e lirë, transparenca në prokurime dhe akses i barabartë për bizneset janë detyrime thelbësore ndaj Bashkimit Europian.

“Sot askush nuk mund të thotë nëse investitorë seriozë europianë apo amerikanë kanë përfituar projekte nga kjo Korporatë”, u shpreh ajo.

Në përfundim, Tabaku paralajmëroi se përmes një sërë ligjesh dhe mekanizmash — nga investitorët strategjikë tek projektet infrastrukturore dhe Korporata e Investimeve — po krijohet një sistem paralel që prodhon “ishuj paligjshmërie dhe korrupsioni”, duke e vendosur këtë strukturë në krye të një piramide që, sipas saj, përvetëson pasuritë publike në dëm të interesit qytetar.

The post Nga korrupsioni tek privatizimi i shtetit/ Jorida Tabaku: Korporata e Investimeve si instrument i kapjes së pronave publike appeared first on Albeu.com.

Sipas Tabakut, rritja e çmimeve nuk është një zhvillim i rastësishëm, por pasojë e një modeli ekonomik të deformuar.

Ajo thekson se ekonomia shqiptare është kthyer në një “ekonomi të pakicës”, ku privilegjet dhe favorizimet për një grup të vogël kanë zëvendësuar konkurrencën dhe prodhimin real.

The post Jorida Tabaku: Çmimet e larta janë pasojë e taksave dhe një sistemi të kapur, ekonomia e pakicës po varfëron shumicën appeared first on Albeu.com.

Tabaku thekson se për 12 vite me radhë, qeveria ka mohuar ndikimin e taksave në çmimin e karburantit, ndërsa sot, përballë rritjes së çmimeve mbi 200 lekë, detyrohet të ndërhyjë.

Sipas saj, kjo tregon qartë se barra fiskale ka qenë një nga faktorët kryesorë që ka mbajtur çmimet në nivele të larta.

Ajo nënvizon se Shqipëria vijon të ketë një nga çmimet më të larta të karburanteve, jo vetëm në rajon por edhe krahasuar me vendet e Bashkimit Europian, duke argumentuar se rreth 60% e çmimit përbëhet nga taksat.

Sipas Tabakut, kjo situatë ka ndikuar drejtpërdrejt në rritjen e kostos së jetesës, pasi çmimi i karburantit reflektohet në çdo produkt dhe shërbim që konsumojnë qytetarët.

Në reagimin e saj, Tabaku ngriti gjithashtu shqetësimin për strukturën e tregut, duke theksuar se një numër i kufizuar kompanish dominojnë sektorin, ndërsa mungesa e konkurrencës reale dhe ndërhyrjeve rregullatore ka përkeqësuar situatën.

Ajo akuzon qeverinë se, në vend që të ndërmerrte masa për të mbrojtur qytetarët, ka përfituar nga rritja e çmimeve përmes të ardhurave më të larta në buxhet.

Deputetja e PD kërkoi që çështja e çmimit të karburanteve dhe taksave të larta të diskutohet në mënyrë transparente në Parlament, duke theksuar se qytetarët kanë qenë ata që kanë mbajtur barrën kryesore të kësaj politike.

Sipas saj, është e domosdoshme një qasje e re që garanton çmime më të drejta dhe një treg më të hapur në funksion të konsumatorit.

The post Jorida Tabaku: Qeveria pranon se taksat rrisin çmimin e karburanteve appeared first on Albeu.com.

Tabaku publikoi një grafik të bazuar në të dhënat e INSTAT, sipas të cilit numri i shqiptarëve që jetojnë jashtë vendit është rritur ndjeshëm gjatë dy dekadave të fundit.

Në vitin 2001 rreth 800 mijë shqiptarë jetonin jashtë vendit, ndërsa sot kjo shifër ka arritur në rreth 1.46 milion, një rritje prej 82%. Në të njëjtën kohë, popullsia rezidente në vend ka rënë me rreth 20%.

Sipas saj, ndërkohë që vendi po përballet me largim të vazhdueshëm të qytetarëve, administrata publike ka arritur nivelet më të larta të 23 viteve të fundit.

Aktualisht, sipas të dhënave të publikuara, administrata ka rreth 185,400 punonjës.

Tabaku thekson se edhe raporti i punonjësve të administratës për çdo 1,000 banorë është rritur ndjeshëm. Nga 62 punonjës për çdo 1,000 banorë që ishte më parë, sot ky raport ka arritur në 79.

Deputetja e PD e krahason këtë tregues me mesataren e Bashkimit Europian, e cila sipas saj llogaritet rreth 60–65 punonjës publikë për çdo 1,000 banorë, duke nënvizuar se Shqipëria tashmë ka një raport më të lartë se vendet e BE-së, pavarësisht se ekonomia është shumë më e vogël dhe popullsia është në rënie.

Tabaku argumenton se situata tregon një model të gabuar zhvillimi, ku në vend që të krijohen mundësi për të mbajtur shqiptarët në vend, po ndërtohet një shtet gjithnjë e më i madh mbi një shoqëri gjithnjë e më të vogël.

The post Jorida Tabaku: Shqipëria zbrazet, shteti rritet, emigracioni arrin në 82%, administrata në rekord historik punësimesh appeared first on Albeu.com.

Tabaku u shpreh se konflikti në Gjirin Persik ka krijuar presion në tregjet globale të energjisë, por shumë vende në Evropë dhe në Ballkanin Perëndimor po marrin masa për të frenuar rritjen e çmimeve dhe për të mbrojtur qytetarët.

Sipas saj, në Shqipëri situata është ndryshe, pasi çmimet rriten menjëherë sapo ka tensione ndërkombëtare, ndërkohë që qeveria nuk ndërhyn për të mbrojtur konsumatorët.

“Pse rriten çmimet menjëherë të nesërmen e një konflikti botëror? Sepse kjo situatë është përgatitur prej vitesh. Qeveria shqiptare e ka lënë tregun e karburanteve të zhvillohet si një moçal, i kapur nga një pakicë dhe pa konkurrencë reale”, u shpreh Tabaku.

Ajo theksoi se një nga arsyet kryesore të çmimeve të larta, është pesha e madhe e taksave në çmimin final të karburantit.

Sipas Tabakut, rreth 60% e çmimit të karburanteve në Shqipëri përbëhet nga taksat, duke e bërë këtë një barrë të rëndë për qytetarët dhe bizneset.

Deputetja e PD shtoi gjithashtu, se problemi lidhet edhe me mungesën e kontrollit të tregut dhe me tolerimin e një strukture të mbyllur që pengon konkurrencën.

“Barra e parë janë taksat e larta. Barra e dytë është shteti që nuk kontrollon, shteti që hesht dhe që nuk lejon konkurrencën”, theksoi ajo.

Në përfundim, Tabaku deklaroi se rritja e çmimeve të karburanteve po transferohet drejtpërdrejt në ekonominë familjare të shqiptarëve dhe po rëndon koston e jetesës.

The post Rritja e çmimit/ Jorida Tabaku: Tregu i karburanteve është lënë të zhvillohet si moçal, i kapur nga një pakicë appeared first on Albeu.com.

Tabaku e lidh nismën e re me Ligjin për Investimet Strategjike, i cili në perceptimin publik është identifikuar si ligji përmes të cilit janë dhënë asete të rëndësishme si porte, aeroporte dhe zona turistike pa garë të hapur.

Sipas saj, projektligji i ri krijon një mekanizëm shtesë privilegji, duke parashikuar që subjektet që kanë përfituar statusin “investitor strategjik” të kenë të drejtën të marrin edhe porte, sërish pa konkurrim.

“Kushdo që ka marrë një investim strategjik tashmë do të ketë të drejtën të marrë edhe portin – pa garë”, shprehet Tabaku, duke theksuar se fjala kyçe e kësaj skeme është mungesa e konkurrencës.

Deputetja demokrate argumenton se kjo qasje thellon përqendrimin e aseteve publike në pak duar dhe dëmton parimin e ekonomisë së tregut. Sipas saj, sot në ekonominë shqiptare “praktikisht nuk ka garë”, ndërsa bizneset e zakonshme nuk kanë mundësi reale të konkurrojnë për projekte madhore.

Në reagimin e saj, Tabaku ngre gjithashtu shqetësimin se nisma bie ndesh me angazhimet e marra nga qeveria në kuadër të procesit të integrimit europian, përfshirë zotimin për shfuqizimin e Ligjit për Investimet Strategjike. Ajo e konsideron kontradiktore faktin që, ndërkohë që flitet për afrimin me standardet e Bashkimit Europian, paraqiten ligje që sipas saj cenojnë transparencën dhe konkurrencën.

“Kjo e ka shkatërruar ekonominë. Pastaj dëgjojmë përrallat e përditshme për investimet e huaja. Si mund të vijnë investimet e huaja kur në ekonomi nuk ka garë”?- deklaron Tabaku, duke sfiduar narrativën e qeverisë për rritje të investimeve.

Në përfundim, ajo bën thirrje për ndryshim të modelit aktual të menaxhimit të aseteve publike, duke theksuar se rikthimi i garës dhe transparencës është i domosdoshëm për një ekonomi funksionale dhe për respektimin e standardeve europiane.

The post Ligji i ri për portet strategjike thellon modelin pa garë/ Jorida Tabaku: Dëmton ekonominë e tregut dhe bie ndesh me integrimin europian appeared first on Albeu.com.