Një zyrtar policor i trafikut është suspenduar nga Policia e Kosovës pas një incidenti të ndodhur para fillimit të protestës së sotme të organizuar nga OVL-UÇK-ja në Prishtinë.

Rasti ndodhi kur pjesëtarët e policisë tentuan ta ndalonin ish-deputeten Aida Dërguti, nën dyshimin se kishte shkelur rregullat e komunikacionit teksa po kalonte rrugën për t’iu bashkuar protestës.

Ndërhyrja policore nxiti kundërshtimin e protestuesve dhe më pas situata degjeneroi në përplasje mes tyre dhe zyrtarëve të Policisë së Kosovës.

Zëdhënësi i Policisë së Kosovës, Baki Kelani, konfirmoi se zyrtari i trafikut është suspenduar në lidhje me këtë ngjarje.

Në përgjigje të kërkesës për sqarim, Kelani tha se masa është marrë në përputhje me udhëzimet dhe procedurat përkatëse, pasi zyrtari ishte përfshirë në një rast para nisjes së protestës së sotme në kryeqytet.

The post Suspendim i një zyrtari të trafikut pas incidentit me Aida Dërgutin para protestës së OVL-UÇK-së appeared first on Albeu.com.