Prishtina ka bërë publik zyrtarisht afrimin përfundimtar të mesfushorit ofensiv Albin Krasniqi.

Pas një periudhe gjashtëmujore si i huazuar nga skuadra ukrainase Kolos, drejtuesit e klubit kryeqytetas kanë vendosur të blejnë kartonin e futbollistit nga Kaçaniku.

Lajmi u konfirmua sot (e mërkurë) nga klubi më i trofeshëm në Kosovë, i cili njoftoi firmosjen e kontratës me Krasniqin, një lojtar që edhe më herët ka qenë pjesë e Prishtinës dhe ka fituar trofe me këtë skuadër.

“Rrugëtimi i Albin Krasniqit me fanellën bardhekaltër vazhdon. Mesfushori ofensiv ka nënshkruar kontratë me Prishtinën, pasi në pjesën e dytë të sezonit të kaluar ishte pjesë e skuadrës si i huazuar nga klubi ukrainas Kolos”.

“Krasniqi rikthehet zyrtarisht te bardhekaltërit, ekip me të cilin fitoi Kupën e Kosovës në vitin 2025. Gjatë pjesës pranverore të sezonit të kaluar, ai regjistroi 16 paraqitje, shënoi 2 gola dhe kontribuoi me 1 asistim”.

“Në total, Albini ka zhvilluar 77 ndeshje me fanellën e Prishtinës, në të gjitha garat”, thuhet në njoftimin e Prishtinës.

The post Prishtina zyrtarizon marrëveshjen e përhershme me Albin Krasniqin appeared first on Albeu.com.

FC Ballkani ka vijuar punën për kompletimin e skuadrës para sezonit të ri, teksa ka bërë zyrtare dy ardhje të reja në mbrojtje.

Ekipi nga Suhareka ka prezantuar mbrojtësin e majtë nga Bregu i Fildishtë, Abou Dosso, si edhe portierin Ardit Nika, të cilët i bashkohen formacionit portokalli e zi për të rritur nivelin e konkurrencës dhe cilësinë brenda grupit.

Dosso është 30 vjeç dhe së fundmi ka qenë pjesë e Zimbru Chișinău. Ai pritet të jetë një alternativë me peshë për Ballkanin në repartin defensiv, duke ofruar eksperiencë dhe siguri në anën e majtë të mbrojtjes.

Klubi i ka uruar mirëseardhje futbollistit nga Bregu i Fildishtë, duke i dëshiruar suksese dhe fitore me fanellën portokalli e zi.

Po ashtu, Ballkani ka konfirmuar edhe transferimin e Ardit Nikës. Portieri 28-vjeçar vjen te skuadra për të shtuar garën mes shtyllave dhe për t’i dhënë stafit teknik një tjetër mundësi të rëndësishme për edicionin e ri.

Nika konsiderohet si një vlerë shtesë për ekipin në ndeshjet që e presin Ballkanin, ndërsa nga klubi ka marrë urimet për mirëseardhje dhe shumë suksese në këtë aventurë të re.

Me afrimet e Dosso dhe Nikës, FC Ballkani po vazhdon formësimin e skuadrës për sezonin e ardhshëm, me objektivin që të paraqitet konkurrues në të gjitha garat.

The post Ballkani zyrtarizon afrimet e Dosso dhe Nikës për sezonin e ri appeared first on Albeu.com.

FC Prishtina ka bërë edhe një hap në ndërtimin e ekipit për sezonin e ri, duke konfirmuar transferimin e mesfushorit të ri Arjanit Fazlija.

21-vjeçari vjen te bardhekaltrit pas formimit të tij në futbollin gjerman. Së fundmi ai ishte pjesë e Greuther Fürth, ndërsa më parë ka luajtur edhe me ekipin U19 të Bayer Leverkusen. Fillimet e tij në futboll lidhen me akademinë e Viktoria Köln.

Fazlija ka qenë gjithashtu pjesë e grupmoshave të Përfaqësueses së Kosovës, ku ka mbajtur fanellën e Kosovës U15, U17, U19 dhe U21.

Te klubi nga kryeqyteti, ardhja e tij konsiderohet një investim me peshë në kuadër të planeve për të ndërtuar një skuadër sa më konkurruese për edicionin e ardhshëm.

Pas prezantimit, mesfushori foli për emocionet që po përjeton pas transferimit te një prej klubeve me traditë në futbollin e Kosovës.

“Është nder për mua të luaj për këtë klub me histori të pasur dhe për tifozët e tij të mrekullueshëm. Do të jap gjithçka për ekipin dhe kryeqytetin, në mënyrë që ta festojmë së bashku suksesin. Forca Prishtina!”, deklaroi Fazlija.

FC Prishtina pritet që edhe gjatë ditëve në vijim të bëjë lëvizje të tjera në këtë afat kalimtar, ndërsa vazhdon përgatitjet për sfidat e sezonit të ri. /

The post FC Prishtina zyrtarizon Arjanit Fazlijën, talentin e Kosovës U21 appeared first on Albeu.com.

Drita, kampione e Kosovës, e ka bërë zyrtar rikthimin e qendërmbrojtësit Hajdin Salihu, duke shtuar forcë në prapavijë për sezonin e ardhshëm.

Pas eksperiencës jashtë vendit, 24-vjeçari kthehet në Gjilan me synimin që të ndihmojë skuadrën në arritjen e objektivave në garat vendore dhe ato ndërkombëtare.

Salihu kishte luajtur për Dritën në edicionin 2023/24, ndërsa në verën e vitit 2024 u transferua te ekipi ukrainas LNZ Cherkasy për 250 mijë euro.

Edicionin e kaluar ai e zhvilloi në huazim te Polonia e Varshavës, ndërsa pas mbylljes së qëndrimit te klubi polak vendosi të rikthehet në futbollin e Kosovës dhe sërish te Drita.

Rikthimi i mbrojtësit është konfirmuar nga klubi gjilanas përmes një njoftimi zyrtar të publikuar në rrjetet sociale.

“FC DRITA ka kënaqësinë të ju njoftojë me përforcimin tonë të ri Hajdin Salihu, i cili rikthehet për të veshur sërish fanellën bardhekaltër dhe për të forcuar repartin e mbrojtjes me cilësinë, karakterin dhe përvojën e fituar në arenën ndërkombëtare. Mirë se u ktheve në shtëpi, Hajdin! Le të shkruajmë bashkë kapituj të rinj të historisë së Dritës”, thuhej në njoftimin e Dritës.

Gjatë karrierës së tij, Salihu ka luajtur edhe për Lokomotivën e Zagrebit, Laçin dhe Llapin, duke krijuar përvojë si në futbollin vendor, ashtu edhe në atë ndërkombëtar.

The post Drita e rikthen në skuadër mbrojtësin qendror Hajdin Salihu appeared first on Albeu.com.

Pas disa ditësh polemikash dhe paqartësish për të ardhmen e tij, Bleart Tolaj ka dalë me një reagim publik, ku ka marrë mbi vete përgjegjësinë për situatën e krijuar dhe ka bërë të ditur se zyrtarisht i përket Gjilanit, ndërsa me pajtimin e të gjitha palëve do të luajë edhe dy ndeshje në Evropë me Ballkanin.

Sulmuesi, i cili për disa ditë ishte në qendër të diskutimeve në opinionin sportiv në Kosovë, ka vendosur të japë sqarimin e tij lidhur me ngjarjen që shkaktoi shumë debat në futbollin kosovar.

Paqartësia nisi në momentin kur Gjilani e prezantoi zyrtarisht Tolajn si afrim për sezonin e ri, ndërsa jo shumë kohë më pas Ballkani njoftoi se kishte rinovuar kontratën me të. Këto dy komunikata zyrtare prodhuan konfuzion të madh dhe nxiten reagime të shumta nga tifozët dhe komentuesit e futbollit.

Nëpërmjet një postimi në rrjetet sociale, Tolaj ka kërkuar mirëkuptim nga publiku, duke pranuar se konfuzioni i krijuar është përgjegjësi e tij dhe duke nënvizuar se në asnjë moment nuk ka synuar të krijojë vështirësi për ndonjërin prej klubeve.

Ai ka sqaruar se është zyrtarisht futbollist i Gjilanit, por se me mirëkuptimin e të gjitha palëve do të aktivizohet me Ballkanin në dy ndeshjet e ardhshme të Ligwn e Konferencës, përpara se t’i bashkohet plotësisht skuadrës gjilanase.

Po ashtu, sulmuesi ka shprehur falënderim të veçantë për Ballkanin, duke vlerësuar drejtuesit, stafin, bashkëlojtarët dhe tifozët për mbështetjen e deritanishme, ndërsa mirënjohje ka shprehur edhe për Gjilanin për besimin që i është dhënë.

Postimi pa ndërhyrje i Bleart Tolaj

Dua t’i drejtohem opinionit publik për të sqaruar situatën që është krijuar ditëve të fundit rreth meje.

Së pari, dua të bëj të qartë se unë zyrtarisht jam lojtar i Gjilanit. Jam i lumtur për këtë hap në karrierën time dhe i përkushtuar maksimalisht për të dhënë gjithçka për fanellën e klubit.

Ndjej obligim ta pranoj se përgjegjësia për konfuzionin e krijuar bie mbi mua. Më vjen keq që situata u zhvillua në këtë mënyrë dhe që krijoi paqartësi në opinion. Nuk kam pasur asnjëherë qëllim të krijoj polemika apo të vendos ndonjë klub në një pozitë të vështirë.

Ballkani, duke e parë situatën e krijuar dhe duke menduar mbi të gjitha për të mirën time dhe vazhdimësinë e karrierës sime, ka treguar mirëkuptim dhe më ka liruar. Ky është një veprim që e vlerësoj jashtëzakonisht shumë dhe do t’i jem gjithmonë mirënjohës klubit, drejtuesve, stafit, bashkëlojtarëve dhe tifozëve për gjithçka që kemi përjetuar së bashku.

Me mirëkuptimin e të gjitha palëve, do të angazhohem për ta ndihmuar Ballkanin në dy ndeshjet e radhës në Conference League. Pas përfundimit të këtij angazhimi, do t’i bashkohem plotësisht Gjilanit, ku do të jem i fokusuar maksimalisht për të dhënë më të mirën dhe për të justifikuar besimin që më është dhënë.

Falënderoj sinqerisht të dy klubet për korrektësinë dhe respektin që kanë treguar ndaj meje. Ballkani do të ketë gjithmonë një vend të veçantë në zemrën time dhe jam i bindur se marrëdhënia jonë do të mbetet gjithmonë e bazuar në respekt, mirënjohje dhe miqësi. Do të mbesim gjithmonë miq, duke i uruar njëri-tjetrit vetëm suksese në rrugëtimin tonë.

Kërkoj mirëkuptim nga të gjithë për situatën e krijuar dhe shpresoj që me këtë sqarim të mbyllet çdo keqkuptim. Tani fokusi im është vetëm te futbolli, puna dhe respektimi i çdo detyrimi që kam marrë përsipër.

Faleminderit për mbështetjen.

The post Bleart Tolaj sqaron situatën: Jam lojtar i Gjilanit, por do ta ndihmoj Ballkanin në dy ndeshje evropiane appeared first on Albeu.com.

SC Gjilani ka prezantuar një tjetër afrim për edicionin e ri, pasi ka bërë të ditur marrëveshjen me portierin Marijan Coric, i ardhur nga Llapi.

Klubi bardhekuq njoftoi se nga sot Coric është zyrtarisht pjesë e ekipit gjilanas, ndërsa kontrata e tij është nënshkruar deri në vitin 2028.

Me ardhjen e tij, skuadra pret më shumë rivalitet dhe zgjedhje shtesë në repartin e portës.

Në komunikatën e klubit thuhet se qëllimi i këtij transferimi është që lojtari të ndihmojë ekipin në arritjen e synimeve për sezonin e ardhshëm.

“Me cilësitë, përvojën dhe mentalitetin konkurrues që sjell, Coric vjen për të rritur konkurrencën brenda ekipit dhe për të kontribuar në realizimin e objektivave të Sport Club Gjilanit”, thuhet në njoftimin e klubit.

Gjilani i ka dëshiruar mirëseardhje portierit të ri, duke theksuar bindjen se ai do të ketë një peshë të rëndësishme me fanellën kuqe e bardhë.

“Mirë se erdhe në Gjilan, Marijan! Suksese me ngjyrat kuq e bardhë!”, përfundon komunikata e klubit.

The post Gjilani zyrtarizon Marijan Coric, portieri firmos deri në vitin 2028 appeared first on Albeu.com.

FC Prishtina ka konfirmuar një tjetër afrim për edicionin e ri, teksa ka zyrtarizuar transferimin e portierit me përvojë, Artan Iljazi.

Iljazi, 27 vjeç dhe 191 centimetra i gjatë, vjen te skuadra pas angazhimit të tij të fundit me Ballkanin.

Portieri gjatë karrierës së tij ka qenë pjesë edhe e klubeve të njohura nga Maqedonia e Veriut, si Shkëndija, Shkupi dhe Gostivari, duke krijuar kështu një bagazh të rëndësishëm në futbollin rajonal.

Menjëherë pas formalizimit të transferimit, Iljazi tha se ndihet i lumtur për hapin e ri në karrierën e tij.

“Jam shumë i lumtur që i bashkohem FC Prishtinës. Është nder të jem pjesë e klubit më të madh në vend. Falënderoj drejtuesit për besimin dhe premtoj se do të jap maksimumin në çdo ndeshje për këtë fanellë. Mezi pres të luaj para Plisave dhe së bashku të festojmë shumë suksese. Forca Prishtina!”, deklaroi ai.

Gjatë këtij afati kalimtar, Prishtina ka larguar portierët Ardit Nika dhe Agron Kolaj. //

The post Prishtina e bën zyrtar afrimin e portierit Artan Iljazi appeared first on Albeu.com.

Futbolli kosovar ka prodhuar një episod të pazakontë, me Bleart Tolajn që është shfaqur në dy njoftime zyrtare të publikuara nga dy klube të ndryshme brenda një intervali shumë të shkurtër kohor.

Në fillim, SC Gjilani e prezantoi Tolajn si lojtarin më të ri të ekipit, duke bërë të ditur se ai kishte firmosur pas mbylljes së sezonit dhe se do t’i bashkohej projektit të klubit për të ardhmen. Prezantimi madje u bë edhe me fanellën e Gjilanit të veshur.

Megjithatë, pak çaste më pas, ngjarja mori drejtim tjetër. FC Ballkani publikoi një komunikatë zyrtare ku njoftoi se Tolaj ka vazhduar bashkëpunimin me klubin nga Suhareka, duke rinovuar kontratën për edhe dy vite të tjera.

Në deklarimin e Ballkanit u theksua se sulmuesi mbetet pjesë e projektit të tyre, ndërsa u vu në pah edhe besimi i ndërsjellë, si dhe rëndësia e tij në synimet e klubit.

Nga ana tjetër, Gjilani e kishte paraqitur atë si një përforcim për edicionin e ardhshëm, duke krijuar kështu një rrethanë të çuditshme ku i njëjti futbollist është bërë “zyrtar” nga dy skuadra pothuajse në të njëjtin moment.

Tashmë mbetet për t’u parë se si do të marrë zgjidhje kjo çështje kontraktuale, teksa për momentin Bleart Tolaj ndodhet në qendër të një prej situatave më të pazakonta të afatit kalimtar në futbollin kosovar.

The post Superliga në kaos: Gjilani e paraqet si afrim të ri, Ballkani njofton rinovimin e Bleart Tolajt për dy vite appeared first on Albeu.com.

Faton Seferi ka dhënë dorëheqje nga detyra e nënkryetarit të FC Drenicës, ndërsa ka bërë të ditur edhe largimin nga marrëveshja që kishte për qëllim privatizimin dhe zhvillimin e klubit.

Në një letër të gjatë me tone emocionale, drejtuar qytetarëve të Drenicës, tifozëve, futbollistëve, stafit dhe bashkëpunëtorëve, ai shpjegon se ky vendim ka ardhur pas një viti të mbushur me përkushtim, sakrifica, sfida dhe zhgënjime, por edhe me dashuri të madhe për klubin dhe këtë rajon.

Seferi ka sqaruar se angazhimi i tij në FC Drenica nisi pasi miku i tij Betim Dajaku i kërkoi në Gjermani që ta ndihmonte klubin. Më pas, përmes Betim Dajakut, u organizua një takim me nënkryetarin e atëhershëm të Komunës së Skenderajt, z. Sami Lushtaku, dhe Kryetarin e atëhershëm Fadil Nura, ku iu paraqit gjendja e klubit dhe iu kërkua ta merrte përsipër këtë sfidë.

Ai tregon se në të njëjtën periudhë edhe partneri i tij, Dr. Thomas Wüstefeld, kishte shfaqur interes për të investuar në futbollin e Kosovës dhe dëshironte të kishte një Klub Futbolli, pasi vinte nga ajo fushë, kishte qenë edhe bashkëpronar tek HSV Hamburg dhe me të pritej të vinin sponsorë me emër të madh si Adidas etj.

Seferi thekson se vendosi të vijë në Kosovë, por jo për shkak të futbollit. Sipas tij, kthimi kishte të bënte me dëshirën për të jetuar në vendin e tij, pranë familjes, për të investuar në ekonomi dhe për të ndërtuar jetën në Kosovë, ndërsa futbolli, siç shprehet ai, erdhi krejt papritur.

Ai pranon se kur mori përgjegjësinë për FC Drenicën nuk ishte njeri i futbollit dhe nuk kishte përvojë në menaxhimin e një klubi, por shton se kishte vullnet për të punuar me ndershmëri, përkushtim dhe dashuri për vendin e tij, Kosovën.

Sipas Seferit, me kalimin e muajve u bë e qartë se vështirësitë e klubit nuk ishin vetëm sportive. Ai nënvizon se Drenica ka nevojë për shumë më tepër investime dhe se futbolli kosovar kërkon mbështetje shumë më të madhe.

Ai sqaron se marrëveshja fillestare parashihte që të merrte përsipër deri në 400.000 euro borxhe, ndërsa pjesa tjetër do të mbulohej nga Komuna. Mirëpo, pas auditimeve të gjata, doli se detyrimet financiare ishin dukshëm më të mëdha sesa ishte thënë në fillim, çka e bëri shumë të vështirë zbatimin e marrëveshjes.

Pavarësisht kësaj, Seferi thotë se nuk u ndal dhe investoi para nga xhepi i tij. Ai shkruan se shleu një pjesë të konsiderueshme të borxheve të vjetra dhe financoi komplet klubin pa e pasur në pronësi, pasi ishte koha e zgjedhjeve komunale dhe Komuna nuk mundi ta vendoste në asamble për votim.

Në të njëjtën kohë, ai priste që partneri i tij të niste investimet e premtuara dhe që Komuna ta fillonte procesin e privatizimit. Më pas, sipas tij, u kuptua se marrëveshja juridikisht nuk mund të realizohej në atë moment, sepse sipas ligjit privatizimi i një klubi mund të bëhej vetëm gjatë muajit qershor. Ai thotë se këtë nuk e kishte sqaruar më herët, pasi kishte menduar se, përderisa komuna e kishte shkruar në marrëveshje që klubi privatizohet brenda 120 ditësh, atëherë kjo ishte e lejueshme me ligj, ndërsa ai e mori klubin më 1 korrik 2025.

Kjo, sipas tij, nënkuptonte edhe një vit tjetër pritje. Seferi shkruan se një vit të tërë ia kushtoi FC Drenicës, jo familjes, jo bizneseve të tij dhe jo jetës private.

Ai shton se kur partneri i tij nuk iu përgjigj thirrjes për të investuar sipas marrëveshjes dhe nuk ishte më në gjendje ta bënte këtë, ndërsa pa edhe se institucionet nuk kishin mundësi reale për ta çuar përpara projektin, e kuptoi se kjo nuk ishte fusha e tij.

Megjithatë, Seferi thotë se nuk u largua në atë moment. Ai shkruan se qëndroi, sepse ndërkohë Drenica ishte bërë pjesë e zemrës së tij dhe kishte më së shumti nevojë për të. Ai përmend lojtarët, trajnerët, kryesinë, tifozët, familjet dhe qytetarët, duke thënë se të gjithë e bënë të ndihej si njëri prej tyre.

Në fund të sezonit, sipas tij, u arrit diçka që pak kush e besonte: FC Drenica mbeti në Superligë. Ai vlerëson sidomos pjesën e dytë të kampionatit si dëshmi të asaj që mund të arrijë një klub kur ka organizim, disiplinë dhe zemër.

Seferi kujton gjithashtu përmbytjen që, siç shprehet ai, e shkatërroi fushën e klubit për herë të dytë. Sipas tij, asokohe ministri Çeku i premtoi nga Ministria e Kulturës, e Rinisë dhe Sportit se shteti do të ndërhynte menjëherë dhe se nuk duhej të investonin më.

Për këtë arsye, ai shkruan se ndeshjet si vendas i zhvilluan në Malishevë, ku humbën energji, para dhe pikë. Kur pa se ndihma nuk po vinte, Seferi thotë se vendosi sërish të investojë nga mjetet e tij për restaurimin e fushës, në mënyrë që FC Drenica të mund të luante në shtëpinë e vet.

Ai falënderon ministrin e ri të Sportit për premtimin për renovimin e zhveshtoreve dhe objekteve përcjellëse sipas projektit të përgatitur, duke shtuar se beson sinqerisht që ky premtim do të mbahet dhe se Drenica nuk do të lihet më pas dore.

Po ashtu, Seferi falënderon Federatën dhe Kryetarin Agim Ademi, për të cilin thotë se ishte gjithmonë pranë klubeve dhe i qasshëm në çdo kohë. Ai shton se është porositur ndriçimi për stadiumin e Drenicës dhe se Drenica do të jetë njëra ndër stadiumet e para që do të përfitojë nga projekti për ndriçimin e fushave të futbollit. Gjithashtu, sipas tij, pas vërshimeve u premtua ndihmë nga UEFA dhe ai shpreson që ajo ndihmë të vijë tani për Drenicën, pasi të gjitha pajisjet janë shkatërruar nga vërshimet.

Në letrën e tij, Seferi shprehet se gjithmonë ka ndier se Drenica ka merituar më shumë. Ai thekson se kjo trevë ka dhënë jashtëzakonisht shumë për Kosovën dhe se historia e saj është histori sakrifice. Sipas tij, vetëm familja Jashari është simbol i lirisë së këtij shteti, prandaj Drenica meriton më shumë investime, më shumë vëmendje dhe më shumë mbështetje.

Ai shkruan se mund të jetë futur në këtë rrugëtim për shkak të disa miqve, por nuk qëndroi për ta. Sipas tij, ai qëndroi për lojtarët, tifozët dhe për të mos e lënë klubin në mes të rrugës.

Seferi thotë se po largohet vetëm sepse ka arritur në përfundimin se nuk mund të japë më atë që klubi ka nevojë. Ai përsërit se nuk është njeri i futbollit dhe se FC Drenica meriton njerëz që mund ta çojnë edhe më larg.

Pavarësisht dorëheqjes, ai premton se çdo zotim personal që u ka dhënë lojtarëve, stafit apo kujtdo tjetër do ta mbajë dhe se edhe në të ardhmen, sa herë të ketë mundësi, do ta ndihmojë FC Drenicën.

Në fund, Seferi falënderon familjen e tij, për të cilën thotë se sakrifikoi një vit të tërë të jetës së tyre, si dhe të gjithë anëtarët e Kryesisë, futbollistët, trajnerët, sponsorët dhe tifozët që nuk e humbën asnjëherë besimin.

Ai falënderon edhe Komunën e Skenderajt, e cila, sipas tij, pavarësisht vështirësive, në fillim kishte vullnet të mirë për ta ndihmuar klubin.

Seferi shprehet i bindur se pas konstituimit të institucioneve të reja do të gjenden zgjidhje për borxhet historike të të gjitha klubeve sportive ndaj ATK-së dhe për investimet që, sipas tij, futbolli kosovar i meriton.

Ai shton gjithashtu se beson që vizioni i përgatitur për FC Drenicën nuk do të ndalet dhe shpreson që ata që do të vijnë pas tyre do ta vazhdojnë atë rrugë.

Në përmbyllje, Seferi shprehet se po largohet nga funksioni, por jo nga zemra e Drenicës, duke shtuar se Drenica do të mbetet gjithmonë pjesë e jetës së tij. Ai i falënderon të gjithë për besimin, respektin dhe dashurinë që i kanë dhënë gjatë këtij viti.

The post Faton Seferi largohet nga posti i nënkryetarit të FC Drenicës dhe tërhiqet nga plani për privatizimin e klubit appeared first on Albeu.com.

Klubi nga Theranda e komunikoi sot (e enjte), gjatë ditës, transferimin e dytë për këtë verë. Bëhet fjalë për sulmuesin Lorik Dobratiqi.

“FC Ballkani ka kënaqësinë të prezantojë sulmuesin anësor Lorik Dobratiqi, i cili ka nënshkruar kontratë trevjeçare me ekipin tonë dhe do të jetë pjesë e klubit deri në verën e vitit 2029”.

“Dobratiqi luan në krahun e majtë të sulmit. Pritet të shtojë konkurrencën, por edhe cilësinë në repartin ofensiv të ekipit tonë! Mirë se vjen në familjen e madhe të FC Ballkanit, Lorik!”, thuhet në njoftimin e Ballkanit.

Tre herë kampionët e Kosovës, ndërkohë, para disa ditësh kishin konfirmuar edhe transferimin e mesfushorit Edvin Kuç, i cili ka qenë kapiten dhe njëri nga lojtarët më të rëndësishëm në epokën e artë të Ballkanit.

The post Ballkani zyrtarizon ardhjen e Lorik Dobratiqit appeared first on Albeu.com.