Organizata terroriste Houthi, e mbështetur nga Irani, ka ndërmarrë një valë sulmesh me dronë dhe raketa kundër anijeve tregtare dhe ushtarake që nga 19 nëntori, si reagim ndaj operacioneve ushtarake izraelite në Rripin e Gazës.

Anijet tregtare janë detyruar të përdorin rrugën detare të Kepit të Shpresës së Mirë të Afrikës së Jugut. Kjo rrugë detare është rreth 14 ditë më e gjatë dhe më e kushtueshme se kalimi përmes Detit të Kuq dhe Kanalit të Suezit.

Danimarka, ku ka selinë kompania e transportit detar “Maersk MAERSKb.CO” po dërgon fregatën 139 metra të gjatë për të marrë pjesë në operacionet për mbrojtjen e anijeve tregtare.

Ministri i Mbrojtjes së Danimarkës, Troels Lund Poulsen, foli për shtypin nga bordi i fregatës përpara nisjes së saj nga baza detare Korsor. Ai tha se e “kanë gabim ata që mendojnë se ne do të rrimë duarkryq dhe të lejojmë lëvizjen Houthi që të terrorizojë tregtinë e lirë botërore”.

Javën e kaluar rebelët Houthi qëlluan me tre raketa balistike drejt një anije transporti që lundronte nën flamurin amerikan, të operuar nga firma Maersk.

Fregata është e pajisur me raketa amerikane kundër anijeve të tipit Harpoon dhe raketa tokë-ajër të modelit ESSM, por nuk ka aftësi mbrojtëse kundër raketave balistike, tha kreu i Komandës së Marinës Daneze, Henrik Ryberg.

Fregata me një ekuipazh prej rreth 175 marinarësh do të fillojë operacionet në Detin e Kuq, sapo parlamenti danez të miratojë një rezolutë për dërgimin e anijes luftarake në zonë, çka pritet më 6 shkurt. Fregata nuk do të marrë pjesë në ofensivën kundër rebelëve të udhëhequr nga Shtetet e Bashkuara, tha ministri.

Rreth 2500 anije të kompanive daneze të transportit detar kalojnë në vit përmes Detit të Kuq, një rrugë tregtare që përbën rreth 15% të trafikut të anijeve në botë.

The post Fregata daneze drejt Detit të Kuq për të ndihmuar operacionet e udhëhequra nga Shtetet e Bashkuara appeared first on Albeu.com.

Gjatë një takimi në Tajlandë, të dy zyrtarët ranë dakord që të punojnë për të planifikuar një telefonatë mes Presidentit Joe Biden dhe udhëheqësit kinez Xi Jinping.

Takimet në Bangkok të premten dhe të shtunën, që pasojnë bisedimet mes dy presidentëve në nëntor në Kaliforni, vijnë pas fitores së zgjedhjeve presidenciale në Tajvan nga një kandidat i partisë në pushtet që kundërshtohet nga Pekini.

Ndërkohë zyrtarët ushtarakë amerikanë dhe kinezë kanë rifilluar një dialog i cili u ngri pas incidentit me balonat kineze mbi Shtetet e Bashkuara.

Bisedimet në Tajlandë u zhvilluan ndërsa rebelët Houthi në Jemen, të mbështetur nga Irani, vazhdojnë të kërcënojnë transportin global në Detin e Kuq.

Një zyrtar i lartë amerikan tha se gjatë bisedimeve zoti Sullivan përmendi ndikimin e madh ekonomik të Kinës ndaj Iranit dhe theksoi efektin destabilizues të sulmeve të lëvizjes Houthi ndaj tregtisë globale.

Zyrtari vuri në dukje se Kina ka bërë thirrje publike për uljen e tensioneve, por tha se ishte shumë herët për të gjykuar nëse Pekini po e përdorte ndikimin diplomatik ndaj Iranit për këtë çështje. Zyrtari foli në kushte anonime.

Ministria e Jashtme kineze citoi zotin Wang të ketë thënë se Uashingtoni duhet t’i qëndrojë angazhimit për të mos e mbështetur pavarësinë e Tajvanit.

Ministri Wang tha se zgjedhjet e Tajvanit, të fituara nga Lai Ching-te, zëvendëspresidenti aktual, nuk e ndryshojnë qëndrimin kinez se ishulli është pjesë e Kinës dhe se sfida më e madhe në marrëdhëniet SHBA-Kinë është çështja e “pavarësisë së Tajvanit”, thuhet në një deklaratë të ministrisë.

Presidenti Biden ka thënë se nuk e mbështet pavarësinë, por në bazë të një ligji amerikan, Shtetet e Bashkuara duhet t’i ofrojnë një mbrojtje të besueshme Tajvanit dhe çdo kërcënim ndaj ishullit ta trajtojë me përparësi.

The post SHBA i kërkon Pekinit të ushtrojë trysni ndaj Iranit lidhur me sulmet e grupit Houthi appeared first on Albeu.com.

Huthët po kryejnë sulme ndaj anijeve për shkak të luftës së Izraelit kundër Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – në Rripin e Gazës.

Deklarata e lëshuar nga QatarEnergy erdhi pasi u raportua për një shpërthim afër dy anijeve të regjistruara në SHBA, që po bartnin mallra për Qeverinë amerikane. Anijet po lundronin në ngushticën afër Jemenit. Nga ky shpërthim nuk është raportuar për dëme apo të lënduar. Asgjë grup deri më tani nuk e ka marr përgjegjësinë për këtë sulm, por dyshimet janë se sulmi u krye nga Huthët.

Anijet me dërgesa të gazit të lëngshëm natyror nga Katari janë vonuar para se të niseshin drejt Gjirit të Adenit dhe Detit të Kuq. Në këtë zonë, Huthët kanë kryer sulme. Rruga që kalon nëpër Gjirin e Adenit dhe Detit të Kuq është një rrugë kyçe detare nga Azia dhe Lindja e Mesme për dërgesat e energjisë për në Evropë.

Katari, që ka shërbyer si një ndërmjetës kyç midis Hamasit dhe Izraelit, ka thënë se ende asnjë anije e tij nuk është sulmuar. Në deklaratën nga prodhuesi shtetëror, QatarEnergy, u tha se “prodhimi vazhdon i papenguar dhe zotimi ynë për të ofruar furnizime të qëndrueshme të gazit të lëngshëm natyror për konsumatorët tanë vazhdon të jetë i palëkundur”.

“Përderisa ngjarjet që po zhvillohen në Detin e Kuq mund të ndikojnë sa u përket afateve të disa dërgesave, pasi që anijet duhet të ndryshojnë rrugën, dërgesat me gaz të lëngshëm natyror nga Katari po menaxhohen me blerësit tanë”, u tha në deklaratë.

Në deklaratë u sugjerua se dërgesat e QatarEnergy tani po udhëtojnë përmes Kepit të Shpresës së Mirë të Afrikës, duke zgjatur kohën e transportit.

Huthët kanë nisur sulmet ndaj anijeve në Detin e Kuq që nga nëntori i vitit të kaluar, duke thënë se sulmet janë në përgjigje të ofensivës izraelite në Rripin e Gazës.

SHBA-ja dhe Britania kanë kryer disa runde të sulmeve ajrore ndaj Huthëve, në kundërpërgjigje të sulmeve të rebelëve jemenas ndaj anijeve.

The post Katari thotë se nga sulmet e Huthëve po preken dërgesat me gaz appeared first on Albeu.com.