Ndërsa Kupa e Botës 2026 vijon ende, deri në këtë pikë 13 përzgjedhës kanë humbur vendin e punës. Shkaqet kanë qenë të ndryshme: disa janë shkarkuar menjëherë pas një ndeshjeje, të tjerë janë larguar pas eliminimit, ndërsa në disa raste pesha nuk ka ardhur vetëm nga rezultatet, por edhe nga klima e krijuar rreth skuadrës.

Ja cilët janë trajnerët që janë ndarë deri tani nga kombëtaret e tyre në Botërorin 2026, që po zhvillohet në Shtetet e Bashkuara të Amerikës, Kanada dhe Meksikë.

Roberto Martinez (Portugali)

Pas disfatës 1-0 kundër Spanjës në fazën e 1/8-tës, Roberto Martinez bëri të ditur largimin nga stoli i Portugalisë. Ai tha se kishte ardhur me objektivin për të fituar Kupën e Botës dhe se, pa e arritur këtë, nuk kishte kuptim të vijonte. Kështu u mbyll periudha e tij trevjeçare e gjysmë, ku veçohet fitimi i Ligës së Kombeve 2025 dhe dy kualifikime në çerekfinale, por pa shkuar në asnjë finale në pesë turne madhorë si trajner.

Sabri Lamouchi, Herve Renard (Tunizi)

Botërori i Tunizisë u shndërrua në një rrëmujë të plotë. Sabri Lamouchi u largua nga detyra pas humbjes 5-1 përballë Suedisë. Në vendin e tij erdhi Herve Renard, por as ai nuk mundi të përmbysë situatën, pasi skuadra u mund edhe nga Japonia dhe Holanda. Me përfundimin e aventurës së Tunizisë, edhe Renard zgjodhi të largohej.

Javier Aguirre (Meksikë)

Mandati i Javier Aguirre përfundoi pas humbjes 3-2 ndaj Anglisë në fazën e 1/8-tës. Largimi i tij ishte parashikuar më herët, teksa Rafael Marquez ishte bërë gati për ta pasuar. Aguirre u nda me kombëtaren me ndjenjë krenarie, pasi e drejtoi Meksikën drejt paraqitjes së saj më të mirë në Kupën e Botës pas shumë vitesh.

Steve Clarke (Skoci)

Menjëherë pasi Skocia u eliminua në fazën e grupeve, Steve Clarke paraqiti dorëheqjen, edhe pse vetëm pak javë më parë kishte zgjatur kontratën. Ai largohet si tekniku më i suksesshëm i epokës moderne të futbollit skocez, duke rikthyer përfaqësuesen në Kampionatin Evropian dhe në Kupën e Botës pas dekadash mungese.

Hong Myung-bo (Koreja e Jugut)

Për Hong Myung-bo, aventura mori fund pas daljes në fazën e grupeve. Përtej rezultateve jo bindëse, ai hasi edhe kritika të forta publike dhe kërcënime, ndërsa emërimi i tij kishte qenë i diskutueshëm që në nisje.

Ronald Koeman (Holandë)

Eliminimi nga Maroku me penallti solli fundin e qëndrimit të Ronald Koeman. Fillimisht ai mbrojti vendimet e veta taktike, por të nesërmen vendosi të japë dorëheqjen. Tekniku holandez pranoi zhgënjimin për dështimin në Botëror dhe theksoi se kishte ardhur momenti për ta mbyllur mandatin.

Carlos Queiroz (Gana)

Carlos Queiroz mori drejtimin e Ganës vetëm disa muaj përpara Kupës së Botës dhe arriti ta çojë ekipin në fazën eliminatore për herë të parë që nga viti 2010. Sidoqoftë, pas humbjes me Kolumbinë në 1/16-tën e finales, portugezi njoftoi se po largohej, duke kërkuar më tepër investime për zhvillimin e futbollit në vend.

Sebastian Beccacece (Ekuador)

Pas humbjes ndaj Meksikës në fazën e 1/16-tës, Sebastian Beccacece u largua me mbylljen e kontratës së tij. Argjentinasi e la skuadrën pasi e kishte kualifikuar në Botëror dhe e kishte çuar në raundin eliminator për herë të parë në 20 vjet.

Miroslav Koubek (Çeki)

Pas përfundimit të Çekisë në vendin e fundit të grupit, Miroslav Koubek u nda nga kombëtarja. Sipas vetë trajnerit, vendimi u ndikua edhe nga klima e krijuar nga mediat, pavarësisht faktit se ai e kishte rikthyer ekipin në Kupën e Botës pas dy dekadash.

Marcelo Bielsa (Uruguai)

Dihej paraprakisht se Marcelo Bielsa do të largohej pas Botërorit, por eliminimi i shpejtë dhe konfliktet me lojtarët e bënë fundin e tij edhe më të hidhur. Argjentinasi e pranoi se nuk arriti të sillte rezultatet që priteshin prej tij.

Jamal Sellami (Jordani)

Jamal Sellami e çoi Jordaninë në Kupën e parë të Botës në historinë e saj dhe mori gjithashtu shtetësinë jordaneze. Megjithatë, pas tre humbjeve në fazën e grupeve, ai vendosi të largohej, duke mbyllur një periudhë historike për futbollin e vendit.

Julian Nagelsmann (Gjermani)

Pas eliminimit të Gjermanisë nga Paraguai me penallti, Julian Nagelsmann njoftoi dorëheqjen, ndonëse mediat gjermane raportuan se në të vërtetë bëhej fjalë për një shkarkim të kamufluar. Pas afro tre vitesh në krye të përfaqësueses, ai largohet, ndërsa si pasues pritet Jurgen Klopp.

Trajnerët që mund të largohen së shpejti

Kjo listë mund të zgjatet në një kohë shumë të shkurtër. Hugo Broos ka sinjalizuar dorëheqjen pas eliminimit të Afrikës së Jugut, Zlatko Daliç duket pranë fundit të ciklit të tij me Kroacinë, ndërsa Vladimir Petkoviç ndodhet nën presion të fortë në Algjeri dhe largimi i tij shihet vetëm si çështje kohe.

The post Botërori 2026 ka sjellë deri tani 13 largime trajnerësh, Roberto Martinez mbyll listën e fundit appeared first on Albeu.com.

Steve Clarke nuk është më në krye të Skocisë. Menjëherë pas eliminimit nga Botërori 2026, trajneri 62-vjeçar i paraqiti dorëheqjen Federatës Skoceze të Futbollit, duke marrë mbi vete përgjegjësinë e plotë për dështimin në Kupën e Botës.

Në Botërorin 2026, Skocia bënte pjesë në Grupin C së bashku me Brazilin, Marokun dhe Haitin. Skocezët arritën të fitonin vetëm ndaj Haitit me rezultatin 1-0, ndërsa në dy ndeshjet e tjera dolën të mundur. Pikërisht humbja e fundit 3-0 përballë “Seleçao” çoi edhe te vendimi i Clarke për t’u larguar.

Clarke mori drejtimin e përfaqësueses skoceze në maj të vitit 2019 dhe gjatë periudhës së tij në stol e udhëhoqi kombëtaren britanike në 81 ndeshje. Bilanci i tij përfshin 38 fitore, 14 barazime dhe 29 humbje.

The post Steve Clarke largohet nga Skocia, trajneri 62-vjeçar dorëhiqet pas dështimit në Botërorin 2026 appeared first on Albeu.com.

Ky rezultat e ka vështirësuar ndjeshëm pozitën e Skocisë në grup dhe ka rritur dyshimet për një kualifikim historik në fazën me eliminim direkt, pasi tani fati i skuadrës varet nga ecuria e ndeshjeve të tjera.

Në Miami, Brazili mori një fitore të qartë me Vinicius Junior që shënoi dy herë dhe Matheus Cunha që shtoi golin e tretë, ndërsa të tre golat erdhën pas gabimeve në mbrojtjen skoceze.

Pas kësaj humbjeje, Skocia mbeti në vendin e tretë të Grupit C me golavarazh -3, duke pritur tashmë rezultatet në grupet e tjera për të kuptuar nëse mund të renditet mes tetë skuadrave më të mira të vendeve të treta.

Pas ndeshjes, Clarke, që kishte shpresa të mëdha për një kualifikim historik, nuk arriti ta fshihte dëshpërimin në intervistën për BBC.

Ai u duk i tensionuar dhe i përmbajtur gjatë bisedës që zgjati vetëm 23 sekonda me prezantuesen Eilidh Barbour.

“Nuk e bëmë më të lehtë për veten, kaq është,” tha Clarke.

Kur u pyet pse Brazili e kishte pasur të lehtë të shënonte, ai shtoi: “Ne ua dhamë golat, ua dhamë ndeshjen që donin. Zhgënjyese.”

I pyetur për situatën e ndërlikuar të kualifikimit, trajneri skocez nuk pranoi të zgjatej më shumë: “As nuk dua të mendoj për këtë. Më vjen keq, nuk po mendoj për këtë”, u shpreh ai, para se të largohej nga intervista.

Tani, Skocia duhet të presë përfundimet në grupet e tjera për të parë nëse do të shkruajë historinë me një kualifikim të mundshëm në fazën eliminatore të Botërorit.

The post Steve Clarke i zhgënjyer pas disfatës ndaj Brazilit, e ndërpret intervistën pas 23 sekondash appeared first on Albeu.com.