Fatmir Sheholli, ndaj të cilit Prokuroria Speciale e Republikës së Kosovës ka ngritur aktakuzë për spiunazh dhe shantazh, përmendet në këtë material edhe për deklaratat publike dhe paraqitjet mediale që lidhen me Milan Radoiçiqin.

Sipas aktakuzës, në dosjen e rastit është përfshirë një raport informues i Policisë së Kosovës, i hartuar nga të dhënat e siguruara në burime të hapura. Raporti përmban intervista, deklarime dhe dalje publike të Shehollit, të cilat Prokuroria i konsideron pjesë të materialit provues.

Një pjesë e veçantë e raportit trajton qëndrimet e Shehollit për Milan Radoiçiqin, i cili kërkohet nga drejtësia në Kosovë.

Aktakuza citon disa raste kur Sheholli kishte shprehur bindjen se Radoiçiqi ishte i pafajshëm në lidhje me hetimet për vrasjen e politikanit serb të Kosovës, Oliver Ivanoviq.

Në materialin e Prokurorisë thuhet se Sheholli kishte deklaruar gjithashtu se Radoiçiqit duhej t’i jepej mundësia të provonte pafajësinë e tij.

Prokuroria i referohet edhe paraqitjeve të tjera televizive, ku, sipas saj, Sheholli e kishte përshkruar Radoiçiqin si një figurë me ndikim pozitiv në veriun e Kosovës.

Këto qëndrime janë pasqyruar në raportin informues të Policisë së Kosovës, të cilin Prokuroria e ka dorëzuar si provë në aktakuzën për spiunazh.

Ndër materialet e përmendura në aktakuzë është edhe një dalje televizive e vitit 2023. Në atë rast, Sheholli zhvilloi një bisedë telefonike, të transmetuar drejtpërdrejt, me një person që në material identifikohet si Milan Radoiçiq.

Sipas Prokurorisë, telefonata u transmetua më 11 qershor 2023 në emisionin “Kojshia Show”.

Aktakuza thekson se gjatë bisedës u bënë deklarime për praninë e Radoiçiqit në territorin e Republikës së Kosovës, në një periudhë kur ndaj tij ishin në fuqi procedurat dhe masat e kërkimit nga organet e drejtësisë.

Krahas kësaj telefonate, në raportin e Policisë së Kosovës janë përfshirë edhe intervista, artikuj dhe materiale të tjera audio-vizuale që lidhen me paraqitjet publike të Shehollit.

Raporti informues, sipas aktakuzës, është përgatitur duke u mbështetur në të dhëna dhe materiale të publikuara në burime të hapura.

Prokuroria pretendon se këto materiale, të shqyrtuara së bashku dhe në raport me provat e tjera të çështjes, krijojnë dyshimin se Sheholli ka ushtruar në mënyrë të vazhdueshme ndikim mbi opinionin publik në mbështetje të interesave shtetërore dhe politikave të Serbisë.

Fatmir Sheholli akuzohet nga Prokuroria Speciale për spiunazh dhe shantazh. Ai gëzon prezumimin e pafajësisë deri në marrjen e një vendimi të formës së prerë nga gjykata.

The post Aktakuza ndaj Shehollit: Prokuroria përmend deklaratat dhe kontaktet e tij me Radoiçiqin appeared first on Albeu.com.