Eksperti i sigurisë, Avni Islami, ka reaguar pas aktakuzës së ngritur ndaj Fatmir Shehollit, duke vlerësuar se ky rast duhet të shërbejë si paralajmërim për të gjithë ata që, sipas tij, veprojnë kundër interesave të Republikës së Kosovës.

Në reagimin e publikuar në Facebook, Islami është ndalur te pretendimet e përfshira në aktakuzë, veçanërisht te dokumenti i emërtuar “Top Secret 2”, i cili dyshohet se është gjetur në telefonin e të akuzuarit.

Sipas tij, përmbajtja e dokumentit përshkruan një plan që kishte për synim destabilizimin e Kosovës dhe dëmtimin e pozitës së saj në arenën ndërkombëtare, përmes ndërtimit të narrativave të ndryshme.

Islami shkruan se, që prej arrestimit të Fatmir Shehollit, të dyshuar për spiunazh, janë dhënë versione të ndryshme për rastin.

Megjithatë, ai pretendon se tashmë është e qartë që veprimtaria e Shehollit në aspektin operacional dhe analitik, e nisur që kur ishte pjesë e ish-UDB-së, nuk është ndërprerë.

Sipas ekspertit, një profesionist me përvojë dhe i nivelit të lartë në fushën e spiunazhit nuk ndahet lehtë nga betimi për ruajtjen e sekreteve dhe shërbimin ndaj një rrjeti të caktuar.

Ai pretendon gjithashtu se depërtimi i Shehollit në institucionet e larta nuk ka qenë i rastësishëm. Islami e lidh këtë me kamuflimin përmes miqësive me figura të rëndësishme shtetërore dhe paraqitjeve të shpeshta në media për çështje të ndjeshme, me qëllim krijimin e besimit dhe shmangien e dyshimeve.

Avni Islami vlerëson se, nga leximi i aktakuzës, dokumenti “Top Secret 2” paraqet një plan strategjik të fshehtë. Sipas tij, ky plan synonte përhapjen e radikalizmit islamik në Kosovë dhe rajon, duke përfshirë figura me ndikim nga sporti, muzika, mediat dhe politika.

Ai thotë se, bazuar në aktakuzën ndaj Fatmir Shehollit, plani kishte për qëllim destabilizimin e Republikës së Kosovës, paraqitjen e saj si vatër ekstremizmi dhe dëmtimin e rëndë të pozitës së saj ndërkombëtare.

Sipas reagimit, përmes nxitjes së aktiviteteve fetare dhe ndikimit te klerikët synohej ndërtimi i një narrative negative, nxitja e migrimit dhe ndryshimi i qëndrimit të vendeve perëndimore ndaj Kosovës.

Islami pretendon se plani përfshinte edhe spiunazhin ekonomik, si dhe diskreditimin e figurave politike e intelektuale. Ai shprehet se agjendat e Serbisë janë të njohura dhe se synimi mbetet goditja e Kosovës në disa dimensione, krijimi i një opinioni publik negativ dhe dobësimi i besimit të qytetarëve te institucionet vendase.

Eksperti i sigurisë vlerëson se zbardhja e dokumenteve sekrete tregon se institucionet e sigurisë po e kryejnë detyrën e tyre. Sipas tij, rasti duhet të përcjellë një mesazh të qartë se askush nuk mund të fshihet pas miqësive apo posteve të larta.

“Kushdo që merr guximin të punojë kundër Republikës së Kosovës, kushdo që bëhet pjesë e agjendave destabilizuese të Serbisë apo rrjeteve të spiunazhit, do të ketë të njëjtin fat”, ka shkruar Islami.

Ai ka deklaruar se Prokuroria Speciale, nën udhëheqjen e prokurorëve profesionistë si Bekim Kodraliu dhe në koordinim të plotë me AKI-në dhe Policinë e Kosovës, do të shkatërrojë çdo rrjet tradhtie.

“Koha e pandëshkueshmërisë ka mbaruar; secili që punon kundër shtetit tonë do ta marrë dënimin e merituar dhe do të përfundojë në burg!”, ka përfunduar Avni Islami.

The post Aktakuza ndaj Shehollit, Avni Islami: Dokumenti “Top Secret 2” zbulon planin për destabilizimin e Kosovës appeared first on Albeu.com.

Pas daljes në publik të hollësive nga aktakuza ndaj Fatmir Shehollit, profesori Enver Bytyçi ka reaguar me tone të ashpra, duke shprehur dyshimin se kjo çështje mund të përbëjë vetëm një segment të një skeme më të gjerë të propagandës së Serbisë në Kosovë.

Në reagimin e tij të dërguar për “Bota sot”, Bytyçi u bën thirrje organeve të drejtësisë që hetimet të përfshijnë edhe persona të tjerë. Sipas tij, ata mund të kenë marrë pagesa përmes Shehollit për të përhapur në media agjendën e Beogradit.

Bytyçi thotë se, sipas hetimeve, Fatmir Sheholli i ka paguar Milaim Zekës 2000 euro në emër të BIA-s serbe. Ai pretendon se pagesa ishte paraqitur si e lidhur me një organizatë perëndimore dhe synonte vetëm publikimin e një lajmi që u shërbente interesave serbe në Kosovë.

Profesori vlerëson se prokurorët dhe hetuesit që merren me çështjen Sheholli mund t’i identifikojnë pa shumë vështirësi personat që, sipas tij, janë financuar nga Serbia nëpërmjet Fatmirit për të promovuar agjendën serbe përmes mediave në Kosovë.

Ai pretendon se disa prej tyre kanë folur dhe vazhdojnë të flasin edhe sot si dhënës të Aleksandër Vuçiq. Bytyçi kërkon që të shqyrtohen artikujt e publikuar dhe materialet në YouTube, pasi, sipas tij, aty mund të gjenden analistët, gazetarët dhe mediat që janë paguar nga Beogradi.

Gjithashtu, ai sugjeron të shihet se cilët persona e akuzojnë, për shembull, gazetën “Bota sot” si gazetë serbe, duke pretenduar se pikërisht këta akuzues financohen nga BIA.

Në përfundim të reagimit, Bytyçi shprehet se një spiun në Kosovë apo në Shqipëri mund të dallohet lehtësisht, pasi, sipas tij, ai zbulohet vetë.

The post Rasti Sheholli/ Bytyçi kërkon të zbulohet rrjeti i dyshuar i të paguarve nga BIA serbe në Kosovë appeared first on Albeu.com.

Avokati Tomë Gashi ka komentuar aktakuzën e Prokurorisë Speciale të Kosovës ndaj Fatmir Shehollit, i dyshuar për bashkëpunim me Agjencinë e Sigurisë dhe Informacionit të Serbisë (BIA).

Reagimi i Gashit lidhet edhe me disa fotografi të publikuara së fundmi, në të cilat Sheholli shfaqet në të kaluarën përkrah personave të ndryshëm. Sipas tij, këto pamje ngrenë pikëpyetje për raportet mes tyre.

“Fotot po dëshmojnë!

Qysh bre qysh!

Edhe Komandanta edhe Dosta me Shpiunat e Serbisë!”, ka shkruar Gashi, transmeton “Bota sot”.

Çështja e dyshimeve për lidhje me strukturat serbe është rikthyer në qendër të vëmendjes pas aktakuzës së ngritur nga Prokuroria Speciale ndaj Shehollit.

Fotografitë janë përmendur nga Gashi si bazë për të shtruar pyetje rreth takimeve dhe marrëdhënieve të personave që shihen në to me Shehollin. Megjithatë, çdo pretendim për përfshirje ose bashkëpunim duhet të shqyrtohet përmes procedurave dhe provave të çështjes.

The post Tomë Gashi reagon pas aktakuzës ndaj Fatmir Shehollit: “Edhe Komandanta edhe Dosta me shpiunat e Serbisë… appeared first on Albeu.com.

Veprimet e Fatmir Shehollit më 26 shtator 2025 në Mitrovicën e Veriut janë përshkruar nga Prokuroria Speciale e Kosovës në aktakuzën ndaj tij për spiunazh.

Dokumenti i akuzës thotë se Sheholli, gjatë udhëtimit drejt Mitrovicës së Veriut, ishte i shqetësuar se mund të ndiqej. Në kuadër të përpjekjeve për ta fshehur aktivitetin e tij, ai i kishte thënë një familjari: “Edhe nëse m’ka përcjell dikush t’ja hupi…”.

Biseda mes Shehollit dhe një familjari të tij është zhvilluar në një automjet “Audi” dhe është regjistruar nga organet hetuese të Kosovës, në zbatim të Urdhëresës së Gjykatës për masën e veçantë hetimore “Monitorim i fshehtë i bisedave në vende private”.

Sipas urdhëresës gjyqësore, kjo masë e fshehtë është zbatuar gjatë datave 23.09.2025, 24.09.2025, 26.09.2025, 30.09.2025 dhe 01.10.2025, “duke zbatuar planin e BIA-së”.

Aktakuza e siguruar nga Klan Kosova përshkruan se, pasi arriti pranë Shkollës Teknike në Mitrovicën e Veriut më 26 shtator të vitit të kaluar, Sheholli u lidh me Bojan Dimiqin. Ky i fundit përshkruhet si zyrtar i lartë i BIA-s serbe dhe drejtor i Drejtorisë Kundër Terrorizmit dhe Krimit të Organizuar Ndërkombëtar.

Pak minuta më pas, sipas Prokurorisë Speciale, një person i veshur me kapelë të zezë ia hapi derën e makinës dhe i dorëzoi një fasikël të kaltër me materialin, si dhe 5,000 eurot për të cilat ishte marrë vesh me zyrtarin e BIA-s.

Pas marrjes së tyre, Sheholli e udhëzoi bashkëshorten ta fshihte materialin në trup, duke i thënë: “Qitash kat shkojna duhet me kqyr. Kqyr onash. Shtini ne gji aty ti”.

Më vonë, ata u ndalën në një qendër tregtare, ku, sipas aktakuzës, kontrolluan materialin dhe shumën e parave të dakorduar më herët.

Më poshtë paraqiten pjesë nga transkripta e raportit të masës së veçantë, që përfshijnë veprimet e përshkruara në aktakuzë, nga minuta 09:45 deri në 10:20. Në kohën reale 14:39:52, Fatmir Sheholli e telefonon Bojan Dimiqin:

Fatmiri: Une jom pertej rruges ne Parking te nje shkolle pikerisht pertej rruges ne hyrje te shkollës teknike ku shkruan kafebar Sindikat aty jam perpara.

Bojan Dimiq: a osht e fshehte diku a po shihet ne hyrje te shkolles teknike, ne rregull ne rregull.

Kur përfundon komunikimi me Dimiqin, Sheholli vijon të flasë me gruan e tij.

Fatmiri: mi sheh tabelat, qaj qe ka me ardh. I kallxova ku jom.

Gruaja e Fatmirit: Po ma mire … (nuk kuptohet).

Fatmiri: Jo jo qata ja dhash une ni qark me kqyr, (nuk kuptohet) me dal me ec deri qatje, a me nejt nkerr. Mka thon me nejt n kerr. Se kjo shkoll ka kamera. Krejt shihet kush pi len kerret ktu. Edhe knena kqyri flamurat t shkijeve n banesa. Edhe ktu flamur i shkijeve, se kjo osht shkoll e shkijeve nuk osht e jona.

Gruaja e Fatmirit: po de.

Fatmiri: kqyri tabelat krejt BG CC, veq qiky 01 edhe 02.

Gruaja e Fatmirit: i kuj osht zero dyshi.

Fatmiri: i Mitrovices i joni RKS. Na e kemi 01-sh. E ka edhe naj shka…

Gruaja e Fatmirit: (nuk kuptohet).

Fatmiri: po se ka dit ku jom aj oj grue, une qitash i kallxova. Tash aj e thrret ata, dej t’vjen njeri, e din tash ku ka mu taku. E qon najfar mjekroshi t’atina, i ka krejt me mjekra.

Aktakuza thotë se, ndërsa Sheholli ishte në telefon, në sekondën 00:36 të audioincizimit, që përkon me orën reale 14:45:42, dëgjohet hapja dhe mbyllja e derës së veturës nga personi me kapelë të zezë. Sipas zhurmave të regjistruara, në atë moment atij iu dorëzuan materiali që priste dhe paratë.

Fatmiri: (qesh) mu ke bo… po qe mthirri ky bash nqat vakt. Qitash kat shkojna duhet me kqyr. Kqyr onash. Shtini ne gji aty ti.

Prokuroria Speciale pretendon se kontrolli i telefonit të të pandehurit ka dëshmuar se, përpara këtyre zhvillimeve, ai kishte komunikuar me zyrtarin e BIA-s, Bojan Dimiq.

Aktakuza përfshin edhe komunikimet e datës 26.09.2025, të sistemuara sipas kohës reale UTC+2.

Në orën 11:44:12, është dërguar mesazhi: “u koliko mozes da budes, tursija ti je gotova”.

Përkthimi në shqip i mesazhit është: “Për sa mund të vish, turshitë tuaja janë gati”.

Sipas aktakuzës, me këtë mesazh Bojan Dimiq e ka informuar Fatmir Shehollin se materiali ishte gati. Pas marrjes së këtij njoftimi, Sheholli është nisur drejt Mitrovicës së Veriut.

Në orën 11:54:12, është dërguar mesazhi: “Da se cujemo jos jednom”.

Në shqip: “Do të flasim përsëri”.

Më pas, në orën 13:48:41, është dërguar mesazhi: “Salji tablice i auto”.

Përkthimi në shqip: “Dërgo targat dhe makinën”.

Sipas Prokurorisë, ky komunikim tregon se Dimiq i kishte kërkuar Shehollit targat dhe veturën. Më 26.09.2025, kur Sheholli ndodhej në Mitrovicën e Veriut për të marrë materialet, ai ia kishte dërguar paraprakisht zyrtarit serb të BIA-s, Bojan Dimiq, edhe fotografinë e automjetit të tij.

Po atë ditë, më 26.09.2025, në orën 13:50:13, i pandehuri krijoi një fotografi të veturës së tij “Audi”, me targa 01-XXX-OA.

Në bazë të transkriptës së masës së veçantë, aktakuza arrin në përfundimin se Fatmir Sheholli ia dërgoi më pas këtë fotografi Bojan Dimiqit.

The post Shtini n’gji” – Sheholli i tha gruas pas marrjes së materialit dhe 5 mijë eurove nga BIA appeared first on Albeu.com.

Sllamniku ka thënë se Ali Pashë Tepelena ka qenë ndër të parët që kanë pasur shërbim sekret.

“Si agjenci e parë e inteligjencës në botë konsiderohet se është selia e Ali Pashë Tepelenës në Janinë. Nga aty mendohet se është rregulluar çështja e informacionit në shekullin e XVII. Selia e tij ka qenë një strukturë e një shërbimi inteligjentë pasi që nuk ka pasur kancelari, zyre apo vend që nuk e ka pasur aty një njeri të saj. Pra Ali Pashë Tepelana ka qenë ndër të parët që kanë pasur shërbimin sekret”, deklaroi ai.

Edhe historiania Elena Kocaqi, e ftuar në “Shqipëria LIVE” e ka mbështetur këtë teori.

Sipas saj Ali Pashë Tepelena ka pasur një rrjet shumë të modernizuar spiunazhi për kohën, që i shërbente për të rruajtur pushtetin e tij, madje ai përdorte femra si spiune.

“Ka pasur një rrjet spiunazhi të fortë spese vetëm me atë rrjet mbante pushtetin. Spiunazhi dhe kundër spiunazhi kanë ekzistuar që kur kanë lindur shtetet. Por Ali Pasha për kushtet ku ishte dhe në kushtet që ishte Shqipëria në atë kohë, krijoi një rrjet shumë të fortë. Ai e donte për pushtetin e tij, por ai e krijoi. Ai arriti të kishte një formë më të modernizuar të spiunazhit për kohën. Sot spiunazhi botëror ngjan me format e rrjetit të Ali Pashës. Psh, sot spiunazhi rus përdor shumë femra si spiune, edhe Ali Pasha i përdor. Në disa raste, ky rrjet kapte dhe letrat e të tjerëve. I merrte dhe i rishkruante prapë, duke paraprirë konflikte. Këto ishin letra të spunazheve të të tjerëve.”-tha Elena Kocaqi.

The post “Përdorte femra si spiune”, historiania: Ali Pashë Tepelena krijoi shërbimin e parë sekret appeared first on Albeu.com.

“Kemi raporte për një balonë që fluturon mbi Amerikën Latine. Ne besojmë se ky është një tjetër balonë spiune kineze”, tha zëdhënësi i Pentagonit, Pat Ryder, pa dhënë një vendndodhje specifike.

Ministria e Jashtme e Kinës e quajti aksident hyrjen e një balone në hapësirën ajrore të SHBA-së. Në të njëjtën kohë, Pekini akuzoi politikanët dhe mediat në Shtetet e Bashkuara se kanë përfituar nga incidenti për ta diskredituar.

“Kina ka respektuar gjithmonë ligjin ndërkombëtar, sovranitetin dhe integritetin territorial të të gjitha vendeve”, tha Ministria e Jashtme kineze në një deklaratë.

Më herët gjatë ditës së djeshme, Sekretari amerikan i Shtetit, Anthony Blinken, foli në telefon me homologun e tij kinez Wang Yi për ta informuar për shtyrjen e vizitës së tij në Kinë, duke përmendur veprime të papërgjegjshme dhe shkelje të qartë të sovranitetit të Shteteve të Bashkuara.

Pekini shprehu keqardhjen e tij për këtë hyrje të paqëllimshme të balonës në hapësirën ajrore të SHBA-së, duke pretenduar se ajo shërben për qëllime kërkimore, kryesisht meteorologjike. /albeu.com

The post Një tjetër balonë “spiune”kineze shfaqet në qiell, këtë herë mbi Amerikën Latine appeared first on Albeu.com.

Të dyshuarit, njëri prej të cilëve ka nënshtetësi të një vendi të Amerikës së Jugut, vepronin me identitete të supozuara nga një zyrë me qira në Llubjianë, njoftoi gazeta Delo.

Ata janë akuzuar për spiunazh dhe përdorim të dokumenteve false dhe mund të përballen me deri në tetë vjet burg nëse dënohen, thuhet në raport. /albeu.com

The post Dyshohet se spiunonin për Rusinë, autoritetet sllovene arrestojnë dy persona appeared first on Albeu.com.

Përballë grupit hetimor, ajo ka thënë se është thjesht një blogere dhe jo spiune. Javën e shkuar, Ministrisë së Drejtësisë i ka mbërritur kërkesa ekstradimit, kaluar më pas për veprime të mëtejshme Prokurorisë së Përgjithshme.
Rusen e arrestuar në Shqipëri për spiunazh, në Rusi e kërkojnë se mori sekrete shtetërore. Kërkesën e ekstradimit të Rusisë do ta shqyrtojë Gjykata e Elbasanit gjatë javëve në vijim.

Të tre të arrestuarit e kësaj ngjarjeje vijojnë të jenë në burg me masën, e dhënë nga gjykata e Elbasanit arrest me burg lënë në fuqi edhe nga Apeli Durrësit më 20 Shtator.

The post U kap si spiune në Gramsh, Rusia kërkon ekstradimin e Svetlana Timofoeva appeared first on Albeu.com.

Rama foli dhe për akuzat e opozitës në lidhje me investimin në Portin e Durrësitm të cilin e konsiderojnë vjedhjen më të madhe në histori.

“Së pari nuk kam qenë asnjëherë dakord me këtë shenjën e barazisë. Natyrisht ju mund ta vendosni sa herë të doni por nuk jam dakord. ‘Ka pasur akuza të ndërsjellta’. Nuk është një vështirësi e madhe të bëhet dallimi mes komentit të një fakti dhe akuzave pa fakte. Që PD është financuar me para ruse për të rrëzuar qeverinë, nuk është një akuze, është një fakt i dokumentuar, për fat të keq. I zbuluar nga mediat në SHBA, i përqeshur gjerësisht nga shumëkush dhe i konfirmuar nga raporti i CIA-s. Ndërkohë, akuzat me serbë e me nuk e di çfarë tjetër, janë prodhime të një tërbimi të madh non-grtash dhe spiunësh për investimin më të madh të huaj në rajon, që do të jetë krenari kombëtare që do të transferojmë Durrësin dhe ekonominë e tij, do të transformojë ekonominë dhe do të rrisë vlerën e pasurive të patundshme dhe hotelerisë. Po ashtu do të rrisë punësimin jo vetëm në Durrës, por dhe në Tiranë. Dhe të ngresh akuza të tilla në hava është fatkeqësi e madhe kombëtare. E kemi bërë zgjedhjen. Ne jemi në anën e dinjitetit dhe krenarisë kombëtare, për këtë arsye nuk lë rast për ta lartësuar emrin e Shqipërisë në gjuhë të huaj, ndërsa ata ia ulin jo duke folur, por vetëm me ermin e tyre”, tha Rama./albeu.com

The post “Tërbim i madh non-gratash dhe spiunësh” Rama reagon për herë të parë për protestën e opozitës së bashkuar appeared first on Albeu.com.

Ligjvënësit e Uashingtonit po debatojnë mënyrat për t’i dhënë Amerikës avantazhin në garën e teknologjisë me Kinën…duke vlerësuar se presidenti kinez, Xi Jinping po i vështron dhe po shpreson që ata të jenë të pasuksesshëm.

Universitetet kërkimore amerikane janë vënë në vijë të parë të frontit.

Studimet tregojnë se mbi 75% e studiuesve të huaj në Shtetet e Bashkuara merren me kërkime shkencore. Shtetete e Bashkuara kanë nevojë për më shumë studiues vendas, që janë diplomuar në fusha shkencore.

“Shumë nga të huajt e diplomuar, ata me diploma doktorature, largohen nga vendi për shkak të çështjeve të emigracionit”, thotë ish-Zëvendës Sekretarja e Mbrojtjes, Kari Bingen.

Zonja Bingen është një nga 18 ish-zyrtarët e sigurisë kombëtare të SHBA-së që nënshkruan një letër, ku i bën thirrje Kongresit, të heqë kufizimet për emigrantët me diploma të avancuara në shkencë dhe teknologji.

“Nëse duam të fitojmë garën në teknologji, ne kemi nevojë për trurin më të mirë që është lindur në SHBA dhe nga e tërë bota”, thotë zonja Bingen.

Por ekspertët e sigurisë thonë se Kina po e shfrytëzon aktivisht mbështetjen e Amerikës tek talentet e huaja.

“Kina ka dërguar individë në SHBA si studiues, studentë, vizitorë të përkohshëm dhe ata kanë kopjuar amerikanët në institucionet akademike dhe institucione të tjera përmes programit të tyre që quhet “Mijëra të Talentuar” në përpjekje për të vjedhur pronën intelektuale amerikane”, thotë eksperti i sigurisë kombëtare, Jamil Jaffer.

Profesori 58-vjeçar i Universitetit Shtetëror të Ohajos, Song Guo Zheng pranoi se ai ishte përpjekur të rekrutonte talente kineze, por i kishte mbajtur përpjekjet të fshehura, që të mos humbiste miliona dollarë fonde nga qeveria amerikane për një program për të ndihmuar Kinën në fushën e mjekësisë. Ai tani po vuan tre vjet burg.

Drejtori i FBI-së, Christopher Wray dërgoi një paralajmërim urgjent për bizneset ditpët e fundit në një paraqitje të përbashkët me shefin e inteligjencës britanike, MI5.

“Qeveria kineze është e vendosur të vjedhë teknologjinë tuaj dhe ta përdorë atë për të dëmtuar biznesin dhe për të dominuar tregun tuaj”, tha zoti Wray.

Kina reagoi një ditë më pas.

“Këto vërejtje të zyrtarit të inteligjencës ekspozojnë plotësisht mentalitetin e tij të rrënjosur në Luftën e Ftohtë dhe paragjykimin ideologjik”, tha zëdhënësi i Ministrisë së jashtme të Kinës, Zhao Lijian.

Ish-këshilltari i Departamentit të Arsimit Dan Currell thotë se universitetet dhe entitetet që japin grante, duhet të zhvillojnë më shumë masa mbrojtëse për të mbrojtur kërkimet e rëndësishme shkencore.

“Në të vërtetë nuk ka një sistem për verifikimin e njerëzve që janë të përfshirë në programet kërkimore”, thotë zoti Currell.

Ekspertët thonë se zhvillimi i këtij sistemi tani është kritik për të ardhmen e Amerikës, pasi siç paralajmëron ish zëvendës sekretarja amerikane e mbrojtjes, mundësia për humbjen e garës teknologjike me Kinën është serioze./VOA

The post SHBA-së i duhen studiues të huaj, por rrezikohet nga spiunazhi appeared first on Albeu.com.