Rama tha se ka disa shpirtra të humbur brenda PS që duan Shqipëri të re dhe shprehu se mëzi pret që t’i sjellin draftin, por shtoi se ka frikë se nuk do të vijë kurrë.

“Është edhe një thirrje për një Shqipëri të re, dhe ka dhe disa shpirtra të humbur në partinë tonë, që duan një Shqipëri të re. Mezi pres që të na e sjellin draftin e Shqipërisë së re të shkruar. Por kam frikë se nuk do vijë kurrë, sepse Shqipëria e re është si të gjitha siluetat e flamingove, njërën prej të cilave e mbante Fatos Lubonja. Fatosi poshtë, flamingo lart dhe ‘hi hi hi hi Shqipëria e re’. Do kritikohemi e sulmohemi, por kemi detyrimin të mos zgjedhim rrugën e lehte, të mos zgjedhim të jemi popullorë, kur duhet të jemi të përgjegjshëm”, tha Rama.

Kujtojmë se para disa ditësh ish-ministrja e Jashtme, Elisa Spiropali, tha se duhet një marrëveshje e re për Shqipërinë.

Duke iu referuar protestave për projektin e Zvërnecit, ajo tha se është kollaj ti sillesh rrotull me fjalë boshe dhe konspiracione.

“Tani që të gjithë Makbethat vrasës dhe Hamletat dyshues kanë dalë sheshit dhe kanë hyrë në lojë, tani që vrasja është bërë, gjaku është derdhur, ndërgjegjet janë tronditur, gjumi është prishur, çfarë duhet bërë diçka tjetër? Jo diçka dosido. Diçka shekspiriane. Diçka e qëndrueshme. Diçka që po u bë, nuk zhbëhet”, tha Spiropali.

Teksa elaboroi termat e marrëveshjes së re për Shqipërinë, Spiropali tha se parlamenti s’duhet të jetë vetëm vendi ku miratohen vendime, por vendi ku dëgjohet shoqëria.

“Një marrëveshje ku republika parlamentare të ushtrojë të gjitha funksionet e saj përfaqësuese, kontrolluese dhe monitoruese, sepse demokracia dobësohet sa herë që një pushtet rritet më shpejt se kontrolli mbi të”, shkroi në Facebook ish-ministrja.

Postimi i plotë i Spiropalit:

Një Marrëveshje e re për Shqipërinë
Isha fëmijë kur nga pëshpërimat e familjarëve dhe ecejaket e farefisit mora vesh se në Sheshin Skënderbej diçka e pabesueshme, por e vërtetë kishte ndodhur.

Më vonë kuptova se diçkaja e jashtëzakonëshme që deri atë ditë nuk mund as të ëndërrohej, ishte një fakt kokëfortë, një realitet i prekshëm, një “herezi” që askujt nuk i lejohej ta shihte as në ëndërr: ishte një protestë spontane dhe e heshtur e qytetarëve të Tiranës kundër regjimit diktatorial të asaj kohe.

Protestat e zhurmshme dhe krijuese të këtyre ditëve, krahasuar me protestën e heshtur të atëhershme, nuk janë lapsus psikologjik, nuk janë déjà vu, nuk janë lajthitje cerebrale. Janë fakte sa të ndryshme dhe të ngjashme, që në kohën dhe rrethanat e tyre, kanë secila rëndësinë dhe efektet e veta, për të nxjerrë mësimet respektive, dhe, si të tilla, duhen shqyrtuar me seriozitetin dhe përgjegjësinë që meritojnë.
What’s done cannot be undone. Ç’u bë, nuk mund të ç’bëhet, thotë Lady Makbeth në skenën somnambul tek ecën në gjumë me qiri në dorë.

Është kollaj protestave të sotme t’u sillesh rrotull me llafe boshe, me konspiracione dhe hamëndje shterpe: Cilin krim kreu Lady Makbethi, pse i iku gjumi, pse ngrihej natën somnambul, pse mbante qiri në dorë?
Tani që të gjithë Makbethat vrasës dhe Hamletat dyshues kanë dalë sheshit dhe kanë hyrë në lojë, tani që vrasja është bërë, gjaku është derdhur, ndërgjegjet janë tronditur, gjumi është prishur, çfarë duhet bërë diçka tjetër? Jo diçka dosido. Diçka shekspiriane. Diçka e qëndrueshme. Diçka që po u bë, nuk zhbëhet.
Për fat, kjo pyetje ka përgjigje.

Çka duhet bërë sot është një marrëveshje e re për Shqipërinë.
Çdo epokë ka pyetjen e vet themelore. Për shumë vite pyetja e Shqipërisë ishte si të ndërtonte shtetin. Sot pyetja është tjetër. Si ta bëjë shtetin më të madh se pushteti dhe Institucionin më të fortë se ai që e ushtron pushtetin. Pikërisht këtu fillon nevoja për një marrëveshje të re për Shqipërinë.

Shqipëria ka hyrë tashmë në një fazë të historisë së saj ku sfida më e madhe nuk është më ndërtimi i pushtetit. Pushteti është ndërtuar. Institucionet ekzistojnë. Administrata ekziston. Ligjet ekzistojnë. Ekonomia është më e fortë se dikur. Demokracia është më e konsoliduar se në vitet e para të tranzicionit. Shqipëria e ka rritur reputacionin e saj në botë dhe duhet ta mbrojë me çdo kusht emrin e saj. Sfida e kohës sonë është diçka tjetër.

Është aftësia e pushetit për të vendosur kufij brenda vetvetes.
Për më tepër se tridhjetë vjet Shqipëria ka jetuar me ankthin e mungesës. Mungonin institucionet. Mungonin rrugët. Mungonin investimet. Mungonte siguria. Mungonte shteti. Breza të tërë u rritën me bindjen se problemi kryesor i vendit ishte, në mos mungesa e shtetit, dobësia e shtetit.

Sot për herë të parë po përballemi me një pyetje tjetër. Çfarë ndodh kur pushteti bëhet më i fortë se mekanizmat e po atij shteti që duhet ta kontrollojnë. Çfarë ndodh kur problemet e administratës shtohen më shpejt se llogaridhënia. Çfarë ndodh kur stabiliteti fillon të ngatërrohet me shkaqe dhe pasoja pa lidhje, të pa adresuara.
Kjo është arsyeja pse Shqipëria ka nevojë për një marrëveshje të re me vetveten.
Një marrëveshje ku forca e shtetit të mos matet vetëm nga ajo që ndërton, por edhe nga pakësimi i aftësisë për të kontrolluar, ose ajo që me vetdijë pranon të mos kontrollojë. Një marrëveshje ku institucionet që mbikëqyrin pushtetin të jenë po aq, dhe më të afta se vetë pushteti.

Një marrëveshje ku parlamenti të mos jetë vetëm vendi ku miratohen vendime, por vendi ku dëgjohet shoqëria.
Një marrëveshje ku republika parlamentare të ushtrojë të gjitha funksionet e saj përfaqësuese, kontrolluese dhe monitoruese, sepse demokracia dobësohet sa herë që një pushtet rritet më shpejt se kontrolli mbi të.
Në zemër të kësaj marrëveshjeje qëndron një ide e thjeshtë. Askush nuk është mbi ligjin dhe askush nuk është nën ligjin. Të tre pushtetet duhet të qëndrojnë brenda kufijve të tyre kushtetues. Drejtësia duhet të ketë forcën të hetojë dhe gjykojë. Parlamenti duhet të ketë forcën të kontrollojë. Qeveria duhet të ketë forcën të qeverisë. Por asnjëri nuk duhet të marrë pushtetin e tjetrit. Sepse aty fillon deformimi i shtetit.

Një shoqëri demokratike nuk matet vetëm nga qeveria që ka. Matet edhe nga opozita që prodhon. Opozita nuk është aksident i sistemit. Nuk është pengesë për zhvillimin. Nuk është problem për stabilitetin. Opozita është shqisa që paralajmëron kur pushteti humbet kontaktin me realitetin. Shoqëritë që humbin opozitarizmin nuk humbin vetëm debatin. Humbin aftësinë për të korrigjuar vetveten.

Prandaj Shqipëria ka nevojë për më shumë garë, dhe jo për më pak. Ka nevojë për një sistem të ri zgjedhor që prodhon përfaqësim real dhe jo vetëm riprodhim të elitave ekzistuese. Ka nevojë për zgjedhje ku qytetari të ndjejë se vota e tij ndryshon ekuilibrat, dhe jo vetëm statistikat. Ka nevojë për një kulturë politike ku rotacioni nuk shihet si katastrofë dhe fitorja nuk shihet si pronësi.

Po aq e rëndësishme është liria e medias. Sepse nuk ka demokraci të fortë me media të pabesueshme. Nuk ka qytetar të lirë pa informacion të lirë. Nuk ka kontroll mbi pushtetin kur informacioni bëhet i varur nga pushteti ose dezinformimi. Shqipërisë i duhet një hapësirë publike ku gazetari të mos ketë nevojë për leje për të pyetur dhe ku media të mos ketë nevojë për favore për të mbijetuar.

Në të njëjtën mënyrë duhet të ndryshojë edhe marrëdhënia mes ekonomisë dhe politikës. Vitet e ardhshme nuk do të fitohen nga ai që ka më shumë asete. Do të fitohen nga ai që ka më shumë dije. Nga ai që ka më shumë teknologji. Nga ai që ka më shumë ide. Shqipëria nuk mund të mbetet një vend ku afërsia me pushtetin vlen më shumë se aftësia për të krijuar vlerë. Një ekonomi moderne fillon në momentin kur fiton ai që prodhon më mirë e më lirë, dhe jo ai që favorizohet nga pushteti.

Kjo lidhet drejtpërdrejt me brezin e ri. Shqipëria nuk ka më luksin të humbasë njerëzit e saj më të aftë. Gara, merita, mundësia, dhe jo kontrolli, janë thelbi i ndryshimit. Çdo i ri që largohet nuk merr me vete vetëm një vend pune. Merr me vete energji, dije, kreativitet dhe të ardhme. Vendi ka nevojë të krijojë kushte që mendja, puna dhe talenti të kenë më shumë vlerë se lidhja, ndërhyrja, inventarizimi apo privilegji.
Po aq vendimtare është cilësia e shërbimeve publike. Arsimi nuk mund të vazhdojë të trajtohet si sektor administrativ. Ai është fabrika ku prodhohet e ardhmja e vendit. Ai është thelbi i gjithçkaje që na rrethon, në të tashmen dhe në të ardhmen. Shëndetësia nuk mund të matet vetëm me shifrat e investimeve, godina, mjete etj.

Ajo matet me sigurinë që ndien qytetari kur ka nevojë për të. Një shtet modern nuk ndërtohet vetëm me llaç e tulla. Ndërtohet me dije, shëndet, besim dhe dinjitet.
Pikërisht këtu fillon edhe beteja kundër korrupsionit. Jo vetëm në sallat e gjyqeve. Jo vetëm në dosjet hetimore. Por në kulturën e përditshme të shtetit. Korrupsioni është bindja e ngulitur se rregulli mund të anashkalohet pa pasoja. Se ligji mund të negociohet. Se pushteti mund të përdoret si privilegj. Se abuzimi mund të normalizohet dhe të glorifikohet. Lufta kundër tij është mbi të gjitha një betejë morale për mënyrën si e kuptojmë shtetin.

Shqipëria ka hyrë në një moment ku nuk i duhet të provojë se dëshiron të ecë përpara. Këtë e ka dëshmuar. Ka nevojë të tregojë se di të ndërtojë një shtet që funksionon edhe kur pushteti ndryshon, edhe kur interesat përplasen, edhe kur askush nuk e vëren.

Një vend nuk bëhet europian kur bind të tjerët për atë që europian është. Bëhet europian kur qytetarët e tij ndihen të mbrojtur nga e drejta, të respektuar nga shteti, të lirë për të ndërtuar jetën e tyre pa kërkuar leje nga askush.
Kjo është marrëveshja e re të cilën Shqipëria duhet ta realizojë brenda vetes.

The post Teza e Spiropalit për një marrëveshje të re për Shqipërinë, Rama thumbon ish-ministren: Mezi pres që të na sjellin draftin, por kam frikë se s’do vijë kurrë appeared first on Albeu.com.

Gjithashtu ai e cilësoi një skandal, teksa theksoi se raporti ka burokraci.

Berisha tha se ky raport përmbante vetëm një performancë që nxihej nga figura e “Ramës dhe Lubisë” (Belinda Ballukut).

“Kemi paraqitur sot në Parlament raportin mbi integrimin në BE, që nga alfa në omega, nga fjala e parë te e fundit, është mashtrim dhe vetëm mashtrim. Ky është akt jashtëzakonisht i rëndë, në një moment të rëndësishëm për shqiptarët dhe Shqipërinë. Paraqisni një raport që nuk guxoni as ta lexoni, në mënyrë antikushtetuese vendosni që të mos lexohet ky raport, nuk ka akt më jo serioz se sa ky. Ndaj urdhëroj të tërhiqet menjëherë raporti. Raporti është fund e krye mashtrime e burokarci. Përsa i përket performancës janë të gjitha trillime. Nxijnë nga një figurë, Rama dhe Lubia”, tha Berisha mes të tjerash.

Gjithashtu, ai iu drejtua edhe ish-ministres dhe deputetes Elisa Spiropali, duke e pyetur se si kishte mundësi që Balluku e quante Ramën pallosh dhe ai e mbronte, kurse atë që e quante Skënderbe e flaku.

“E kanë mbushur me mashtrime të dashur qytetarë, nuk guxojnë t’i dalin zot raportit, skandal. Nuk arrini gjer këtu. Keni detyrime ndaj qytetarëve. Të dalë këtu e të lexohet raporti. Si mund të diskutoj unë kur është një raport që s’e dinë qytetarët. Të flasësh për integrimin dhe në raport qytetarët të mos dinë çfarë është thënë. Çfarë jeni ju, mafie, po! Dhe ju që po më shihni atje, do u bëj një pyetje unë këtu, si ka mundësi që ajo e quan Pallosh i Gjatë dhe ai bën gjithçka për ta mbrojtur, kurse ti e quan Skënderbeg dhe të flak. Cila është arsyeja?”, tha ai.

The post Berisha thumbon Spiropalin: Balluku e quan “pallosh i gjatë” dhe Rama e mbron, ndërsa ti e quan “Skënderbe” dhe ai të flak appeared first on Albeu.com.

Noka i tha Spiropalit se i duket si “Nafija” tek filmi i njohur komedian “Gjuetia e fundit”, që zbaton urdhrat e “Sillos” njësoj si në kohën e komunizmit.

Noka tha se ‘mosbindja civile’ do të vazhdojë dhe se maxhoranca do të ikë. Sipas Nokës, maxhoranca do një parlament monist dhe se deputetët e PS zbatojnë thjesht urdhrat e Sulltanit.

“Vetëm mosbindja civile është rruga për t’u marrë vesh me ju. Flisni me gjuhë bolshevike. Ajo zonja atje ka marrë rolin e Nafijes te Gjuetia e fundit. Sillo vendoste dhe Nafia zbatonte urdhrat. Vetëm e keni vjedhur këtë vend, ne kemi ardhur sot t’ju çjerrim maskën. E keni trajtuar opozitën si armike. Nafija i shpalli menjëherë luftë opozitës, sepse kështu është urdhri. Ju doni monizëm, sepse Sulltani do skllevër.

Sulltani do një tufë me pengje, që të vjedhë pasuritë publike dhe pastaj thotë kanë ngrëne kumbulla pas shpine. Jemi këtu për betejë. Mosbindja civile do vazhdojë derisa t’ju krrejë. Ministri i Brendshëm duhet të japë përpegjësi para ligjit, zonja Nafija duhet të japë dorëheqje, se kanë futur policinë në parlament. Na dukeni si miza, asnjëri prej jush nuk na hyn në sy”, tha Flamur Noka.

The post Flamur Noka ironizon Spiropalin: Je si “Nafija” që zbaton urdhrat e “Sillos”, ju na dukeni si miza appeared first on Albeu.com.

“Mos m’u drejtoni mua flisni për procedurë”, i tha kryeparlamentarja, ndërsa Shehaj u përgjigj: “Keni lajthitur, nuk caktoni ju se kujt i flas unë dhe për çfarë flas unë”.

Ndërsa Spiropali iu kthye duke thënë që “ju lutemi lini këto poza TikTok sepse nuk ngjit askund ky populizëm krejt bana’”.

Ndërkohë që Shehaj ka akuzuar ministrat e qeverisë socialiste se nuk po zbatojne urdhë rin e prokurorisë për sekuestron e mbetjeve të rrezikshme, gati 800 tone, të cilat janë në mes të detit ne anije dhe perbejne një rrezik për jetën e njerëzve.

Shehaj në Kuvend-Spiropalit: Zonja kryetare, nuk e di nëse e keni marrë vesh, nëse e ka marrë vesh kjo qeveri, por jashtë portit të Durrësit ndodhet një ngarkesë me mbi 100 kontenierë që prokuroria e Durrësit ju ka kërkuar ta sekuestroni.

Ky është urdhëri i ekzekutimit të kësaj ngarkese që është në mes të detit. Prokuroria e Durrësit, dyshon që në ata kontenierë ndodhen 800 ton mbetje toksike që rrezikojnë shëndetin e qytetarëve dhe ju duhet ta kishit sekuestruar.

Mministri i brendshëm duhet të japi llogari, pse nuk zbaton urdhërin e prokurorisë. Ky është urdhëri ku e thotë qartë.

Tani, unë e kuptoj që situata është bërë qesharake dhe ju talleni jo vetëm me qytetarët po edhe me institucionet, me ping-pongun “jo po janë në mes të detit kshuqë si t’ja bëjmë ti sekuestrojmë në mes të detit”. Por është e qartë se çfarë kërkon prokuroria. Prokuroria i kërkon kësaj qeverie, sepse nuk ka skandal më të madh se ky që përfshin të gjithë qeverinë. Nga Ministria e Infrastrukturës, te Ministria e Mjedisit, te Ministria e Brendshme, te Minstria e Financave, të cilët duhet të kontrollonin dhe janë në këtë urdhër.

I kërkohet Autoritetit Portual, është urdhër ekzekutiv, Kapitenerisë së Portit, Degës së Doganës, Drejtoria Vendore për Kufirin dhe Emigracionin, Drejtoria Vendore e Policisë, Drejtoria e Hetimit Doganor, janë të gjithë, duhe te zbatoni ligjin. Duhet të respektoni urdhërin e prokurorisë.

Mirë që nuk jepni përgjigje, mirë që nuk shpjegoni, mirë që nuk bëni transparencë me çfarë keni bërë, por të paktën respketoni rudhërin e prokurorisë. Është e qartë përse nuk e bëni. Sepse duhet të fshihni trafikun ndërkombëtar me mbetje toksike që keni bërë nga porti i Durrësit. Sepse nëse do ishte një gjë shumë e thjesht siç tentuat ta bënit, sikur ishin të gjitha mbetje të Kurimit, ça problemi ka atëherë? Pse nuk e sekuestroni ngarkesën? Pse nuk bëhet testimi? Për një arsye shumë të thjeshtë, sepse jeni të gjithë të përfshirë.

Zbatoni urdhërin, mos u bëni qesharakë, mos shkelni ligjin haptas, zbatoni urdhërin e prokurorisë!

Shehaj, replika me Ballen: Nuk e di sesi po flet Taulant Balla tani, po flet si i akuzuar? Sepse ato plehra toksike janë trafikuar nga porti i Durrësit ndërkohë që Balla ishte ministër i Brendshëm. Dhe siç e thashë ky është skandali që përfshin më shumë nga ju, jeni direkt të përfshirë, të gjithë. Është Taulant Balla se ishte ministër i brendshëm.

Kjo gjë nuk ju takon më ju, tani i takon prokurorisë. Ju lejuat që 102 kontenierë me mbetje toksike të trafikoheshin nga porti i Durrësit. Nuk duam të dimë më asgjë prej jush, ju nuk na jepni dot asnjë informacion. Deh nëse do na jepni do gënjeni se do mbroni veten tuaj, ne sot presim të dimë të vërtetën nga prokuroria. Presim që ju mos të pengoni prokurorinë. Ju lejuat trafikimin e mbetjeve, lejuat që të ngrihej një skemë midis Shqipërisë, Kroacisë dhe Tajlandës.

Tani ju thoni ka nevoj për kohë! Arsye për të penguar hetimin mund të gjeni sa të doni dhe për këtë nuk e kemi fare merak. Këtë aftësi e keni. Dhe lërëni këto broçkullat. Ka një urdhër që ka 5 ditë që ka dalë nga prokuroria dhe kërkon sekuestrimin dhe vendosjen në kontroll të mbetjeve toksike që janë jashtë portit të Durrësit dhe duhet të veproni sa më shpejt, sepse kur keni patur nevoj ju i keni bërë brenda pak orësh. I harraut inceneratorët sesi firmoseshin 11 vendime a 15 brenda ditës menjëherë? Kurse kur bëhet fjalë për të lejuar prokurorinë që të zbardhë këtë aferë ndërkombëtare, trafikim mbetjesh toksike nëpër botë, keni nevoj për kohë.

Zbatoni urdhërin e prokurorisë. Pikë. Lërini broçkullat.

Shehaj replika me ministren Kumbaro:

Tani, për ministren Kumbaro.
Zonja minstre, meqë thatë që ju jeni drejtuar gjithmonë nga interesi i qytetarëve, ishte interesi i qytetarëve që ju shtyu të zvogëlonit Parkun e Butrintit dhe ti jepnit atë pikën e vogël kolegut tuaj që të ndërtonte resort zonja ministre?

Po kur shpallët zonjën Xhaçka nëpërmjet të afërmve të saj investitor strategjik, edhe aty ishte interesi i qytetarëve znj. Ministre, ajo ju drejtoi apo vjedhja?

Tani, kthehemi te çështja. Zonja minstre, një pyetje për ju: jeni thirrur ju zonja minstre apo vartësit tuaj në prokurorinë e Durrësit të jepnit llogari për trafikimin e mbetjeve toksike? Jeni thirrur? Do ta bëni publike jeni thirrur apo jo? Sepse ne harrojmë që po flasim për një aferë ku jeni të përfshirë të gjithë. Janë trafikuar nga porti i Durrësit mbetje toksike zonja ministre. Për këtë dyshon dhe po heton prokuroria.

Dhe kur dyshon dhe ju heton prokuroria, ju heshtni dhe ata hetojnë dhe ju zbatoni urdhërin dhe ju nuk e pengoni prokurorinë. Këtë duhet të bëni, kur kapeni duke vjedhur, kur kapeni duke trafikuar mbetje toksike, duhet të heshtni dhe të zbatoni urdhërin e prokurorisë dhe të bëheni gati të jepni llogari. Jeni kapur të gjithë, nga Balla te Balluku, të gjithë, tek ish drejtori i portit, jeni të gjith të përfshirë. Keni 5 ditë që mbani mbetje toksike në mes të detit sepse doni të ndaloni hetimin, doni të ndikoni në hetim.

Jepni llogari, lejoni prokurorinë dhe lërnini broçkullat dhe budallëqet, se çfarë I keni bërë këtij populli ju nuk I ka bërë askush tjetër. Keni larguar 1\3 e popullsisë.

Shehaj, debat me ministrin Hoxha:

Zonja ministre, përrallat me çaj dhe me blegtarë lëri për njëherë tjetër, tani po flasim për 800 ton mbetje toksike pastaj do flasim për mjalt.

Nuk ke nevoj të ikësh zonja minstre, pse ikën? Kishe debat? Hajde, apo s’ta mban? Nuk ta mban? Hajde fol për mbetjet. Kam gjëra të tjera për të thënë por do ti thonë kolegët.

Tani, çështja është që unë i qëndroj fakteve zoti ish minstër i brendshëm. Dhe faktet janë që ju ishit ministër i brendshëm kur u trafikuan mbetje toksike në bazë të dyshimeve që ka prokuroria. Unë i qëndroj fakteve dhe fakt është që kjo qeveri duhet të japi përgjigje.

Ju flisni për gjithçka, për mjalt, për bletë, për gjithçka, vetëm për këtë nuk flisni. Se jeni të përfshirë. Ëshët fakt që një kompani e licensuar nga ministria ka trafikuar mbetje toksike, është fakt që prokuroria, nëse e keni kaq për zemër bashkëpunimin me prokurorinë, ju ka dhënë një urdhër që ju nuk po e zbatoni deri më sot. Dhe është fakt që nuk kemi asnjë datë, nuk ka asnjë transparencë në lidhje me zbatimin e atij urdhërit.

Zoti ministër, kur keni ndërmend ta zbatoni urdhërin e prokurorisë? Mos vallë kam të drejtë unë si përfaqësues i opozitës të mendoj që kjo vonesë dhe kjo kohë që ju po kërkoni të fitoni po e përdorni për të ndikuar dhe për të fshehur zbardhjen e këtij hetimi? Nuk e di se çfarë po gatuani. Ju jeni mjeshtra për këtë punë.

Dhe ky ështe thelbi: jeni të gjithë të përfshirë, kanë 3 muaj ato mbetje po lundrojnë nëpër botë, tani janë para portit të Durrësit.

Ça problem keni? Që ngrita këtë çështje? Që ju bëni sikur nuk shikoni?

Është e qartë që kjo qeveri po mundohet në çdo mënyrë të fshehë skandalin, të manipulojë hetimin. Keni muaj të tërë që askush nuk flet, nuk ka një deklaratë nga një përfaqësues i qeverisë t’ju shpjegoj qytetarëve shqiptarë çfarë dreqin po bëni me mbetjet toksike që janë në mes të detit?

Lërini broçkullat dhe budallëqet se kush jam unë për të shmangur thelbin se keni 20 vjet që e bëni. Thelbi është ky: qytetarët duan të dinë pse pengoni prokurorinë të zbatojë dhe të ekzkeutoni urdhërin e prokurorisë dhe kur keni ndërmend ta bëni? Dhe mos zbatimi I urdhërit të prokurorisë është shkelje penale, duhet të dilni drejtësisë nëse nuk zbatoni urdhërin.

The post Mbetjet e rrezikshme/ Shehaj debat me Spiropalin, Ballën, Kumbaron dhe Hoxhën: Ju keni lajthitur, prokuroria ka urdhëruar sekuestron, zbatojeni appeared first on Albeu.com.

Deputeti Luan Baçi që pretendon se u kërcënua me armë nga një efektiv policie në territorin e Kuvendit të Shqipërisë, selia blu ka dalë me një vendim unanim.

“Grupi Parlamentar i PD kallëzim penal në SPAK për Kryetaren e Kuvendit, Ministrin e Brendshëm, Drejtorin e Përgjithshëm të Policisë, Drejtorin e Policisë së Tiranës, disa punonjës të paidentifikuar policie: U futën persona ta armatosur në Kuvend, kanosën me armë deputetët”, thuhet në njoftimin e zyrës së shtypit të PD-së.

Deputeti Luan Baçi, deklaroise, po futej në parlament kur polici i u bë gati të nxirrte armën.

The post PD kallëzon në SPAK kryeparlamentaren, ministrin e Brendshëm dhe disa drejtues policie appeared first on Albeu.com.