Për shkak të situatës, disa hotele janë evakuuar, ndërsa banorët dhe turistët kanë dalë me nxitim në rrugë.

Tërmeti kryesor, i cili goditi rreth orës 01:00 sipas kohës lokale, u pasua nga 12 lëkundje të tjera. Pamje të publikuara në rrjetet sociale tregojnë momentet e panikut, me turistë që largohen nga akomodimet duke mbajtur valixhet në duar.

Raportohet se shtëpi dhe automjete kanë pësuar dëmtime të mëdha, ndërsa në disa rrugë janë shfaqur çarje të thella si pasojë e lëkundjeve të forta.

Shërbimet e emergjencës në Andaluzia, kanë ndërhyrë në disa zona të prekura dhe kanë shpëtuar persona që kishin mbetur të bllokuar në ndërtesa të dëmtuara.

Autoritetet vijojnë vlerësimin e dëmeve dhe situatës në zonat e prekura.

The post Spanja goditet nga tërmeti, evakuohen turistët nëpër hotele! Shemben ndërtesa dhe dëmtohen makina appeared first on Albeu.com.

Gianni Infantino duket se po kapërcen çdo kufi në drejtimin e FIFA-s. Pas vendimeve skandaloze që lidhen me Kupën e Botës 2026, presidenti i institucionit më të rëndësishëm të futbollit botëror po vijon me lëvizje të tjera të diskutueshme.

Sipas informacioneve të publikuara nga “The Times”, Infantino po shqyrton mundësinë që Spanja të mos e organizojë finalen e Kupës së Botës. Edicioni në fjalë është parashikuar të zhvillohet në Spanjë, Portugali dhe Marok, por kreu i FIFA-s thuhet se ia ka propozuar Marokut mikpritjen e ndeshjes së madhe.

Kjo “skemë” lidhet edhe me faktin se Infantino është përballur me një “valë” sulmesh nga vendet europiane, të cilat nuk e dëshirojnë më në krye të FIFA-s. Ndërkohë, Maroku është shndërruar në aleatin më të fuqishëm të 56-vjeçarit në përpjekjen e tij për t’u rikandiduar.

The post Infantino me planin surprizues, synon t’ia heqë Spanjës finalen e Kupës së Botës appeared first on Albeu.com.

Gjatë një takimi në Bazën Ajrore të Farkës me ekipet e emergjencave, Rama deklaroi se në Francë dhe Spanjë qindra mijëra njerëz janë detyruar të lënë banesat e tyre për shkak të flakëve.

“Teksa ne jemi të mbledhur në këtë hangar të helikopterëve, në Francë dhe Spanjë mbi 300 mijë njerëz kanë lënë shtëpitë e tyre deri mbrëmë. Ndërkohë, mbi 55 mijë banorë janë evakuuar në zonat përreth Bordosë, ku flakët kanë hyrë deri në rrugicat e periferisë. Në Spanjë thuhet se është zjarri më i rëndë që ka njohur ndonjëherë Madridi në historinë e vet.

Në territorin e Francës flakët kanë shkrumbuar më shumë se 200 mijë hektarë, një sipërfaqe më e madhe se qyteti i Tiranës. Kolegët tuaj në këto vende po përjetojnë një ferr, duke bërë një sakrificë të paimagjinueshme për të ruajtur jetët dhe natyrën. Unë jam i bindur se askush nga ju që ushtroni këtë profesion, nuk i shihni ata si të huaj dhe si lajme nga bota, sepse është pamje e një lufte të përbashkët, në një klime të përbashkët, gjatë sezonit të një vere të përbashkët.

Kur sheh qindra mijëra njerëz që ikin të lemerisur me çfarë mund të marrin nëpër duar, është njësoj si të shohësh njerëzit tanë për shkak se rreziku dhe sfida është e njëjtë. Ndaj, dua që edhe me lejen tuaj në këtë sallë t’i përcjell solidaritet të gjithë kolegëve tuaj në Francë dhe Spanjë. Ne e kemi bërë edhe në të shkuarën falë jush dhe jemi gati të japim ndihmën tonë kur fqinjët kanë qenë në hall.

Edhe ata na kanë ndihmuar kur ne kemi qenë në të njëjtin hall. Ne kemi njerëzit tanë në Kanada, që nuk kursehen, duke ardhur këtu të pranishëm dhe duke trajnuar forcat tona këtu. Sot jemi të gjithë të qartë se zjarret e mëdha nuk janë më një përjashtim, janë rregulli i një klime të ndryshuar”, deklaroi Rama.

Kryeministri theksoi se Shqipëria ka përfituar ndihmë nga partnerët ndërkombëtarë në situata të ngjashme dhe është e gatshme të ofrojë mbështetje kur vendet mike përballen me emergjenca.

Sipas tij, zjarret masive nuk janë më një përjashtim, por pasojë e ndryshimeve klimatike, ndaj vendi duhet të jetë i përgatitur për t’u përballur me to.

“Ajo që po ndodh në Spanjë e Francë nuk është diçka që na bën të pyesim a mund të ndodhë te ne, por të pyesim sa të përgatitur jemi kur të ndodhë. Shqipëria është shumë më e vogël dhe nuk ka luksin të humbasë asnjë hektar pyll. Këtë vit ajo që kemi bërë ka qenë përgatitja. Është njësoj si një skuadër që stërvitet gjithë vitit për kampionatin botëror.

Jemi përpjekur të organizojmë të gjithë ndihmat që vijnë nga çdo instancë e mundshme. E reja e këtij viti është se Ministri i Shtetit për Pushtetin Vendor, që vjen nga eksperienca e pushtetit vendor, ka luajtur rolin e koordinuesit.

Kemi helikopterë që nga momenti në moment mund të bëhen nëntë të tillë. Kemi mbyllur procedurën për tre avionë që do të vijnë në fund të vitit dhe do të jenë pronë e shtetit shqiptar. Kemi një proces të dakordësuar që në momentin e një nevoje të veçantë të kemi në dispozicion avionë që vijnë nga ajo bazë ku po përgatiten të rinjtë”, tha kryeministri Rama.

The post Franca dhe Spanja të pushtuara nga zjarret, Rama nga Baza Ajrore e Farkës: Jemi gati t’u shkojmë në ndihmë appeared first on Albeu.com.

Nga Ermal Spahiu

Spanja u shpall kampione e botës pas finales dramatike ndaj Argjentinës, e cila nuk u vendos brenda kohës së rregullt. U deshën 120 minuta lojë që turneu të jepte verdiktin përfundimtar, me Ferran Torres që hyri nga stoli dhe realizoi golin vendimtar. Rrjeta e tij i dhuroi përfaqësueses iberike yllin e dytë dhe ndezi festën e tifozëve spanjollë në stadiumin “MetLife” të New York-ut.

Festa i takoi Spanjës së mbushur me yje, ndërsa Argjentina e Messit me shokë e mbylli me zhgënjim. Kështu u përcaktua “mbretëresha” e re e botës dhe mori fund një turne që prodhoi emocione që nga takimi hapës mes Meksikës dhe Afrikës së Jugut. Kampionati, i organizuar në tri shtete të ndryshme, solli ritëm dhe vështirësi si rrallëherë, ndërsa oraret i shtynë tifozët të sakrifikonin edhe gjumin.

Në harkun e 104 ndeshjeve, ky Botëror ofroi gjithçka: rekorde të reja, episode të pazakonta, risi, rezultate befasuese dhe lamtumirën me lot të disa prej ikonave të futbollit. Në të njëjtën kohë, një brez i ri dha shenjat e një kapitulli tjetër. Pas përfundimit të turneut, mbetet për t’u analizuar se çfarë mësimesh dha ai dhe deri në ç’masë realiteti përputhej me pritshmëritë.

SURPRIZAT

Italia nuk ishte pjesë e Botërorit për të katërtin turne radhazi. Bosnja eliminoi “Azzurrët” në fazën “playoff”, duke e zgjatur në 12 vite mungesën e tyre në kompeticionin më të rëndësishëm të futbollit. Zhgënjimet prekën edhe kombëtare të tjera prej të cilave pritej një ecuri më e gjatë. Turqia u ndal që në grupe, kurse Holanda, Gjermania dhe Brazili u eliminuan shumë më shpejt nga sa parashikohej.

KEPI I GJELBËR, DEBUTIM PËR T’U PASUR ZILI

Vetë pjesëmarrja e parë historike në një Botëror përbënte sukses për Kepin e Gjelbër, por paraqitja në fushë e tejkaloi këtë arritje. Kombëtarja debutuese tregoi guxim, dëshmoi se mund t’u marrë pikë skuadrave të mëdha dhe i vuri ato në vështirësi serioze. Udhëtimi nisi përballë Spanjës, që tashmë mban titullin e kampiones, dhe përfundoi kundër Argjentinës, finalistes tjetër të turneut. Një rastësi e bukur.

MEMET DHE FIGURAT KRYESORE

Një Kupë Bote nuk do të ishte e plotë pa episode pikante që marrin përmasa virale. Protagonistët në fushë prodhuan shumë të tilla dhe rrjetet sociale u kujdesën që asnjë moment të mos kalonte pa u vënë re. Gjithçka nisi me Wilton Sampaio, gjyqtarin brazilian të ndeshjes hapëse Meksikë – Afrikë e Jugut, i cili krijoi konfuzion përmes anglishtes së tij.

Nga ironitë e internetit nuk shpëtuan as Erling Haaland, “përplasja” mes Messit dhe Jude Bellingham, apo shishja e ujit që portieri i Anglisë, Jordan Pickford, përdori për gjuajtësit e penalltive. Lista vijoi edhe me shumë personazhe e episode të tjera, duke bërë që turneu të vendoste rekord edhe në këtë drejtim.

RREGULLI I RI, I NJOHUR SI “LIGJI PRESTIANNI”

Mbulimi i gojës gjatë qëndrimit në fushë solli 2 kartonë të kuq në këtë turne. Të ndëshkuarit ishin Miguel Amorim i Paraguait dhe Piero Hincapie i Ekuadorit. Masa u frymëzua në njëfarë mënyre nga incidenti i njohur mes Gianluca Prestianni dhe Vinicius Junior në ndeshjen e Champions League ndërmjet Benficës dhe Real Madrid. FIFA vendosi ta aplikonte këtë rregull edhe gjatë Kupës së Botës.

FUNDI I NJË EPOKE DHE FILLIMI I NJË TJETRE

Critiano Ronaldo, Leo Messi, Neymar, Luka Modric dhe Guillermo Ochoa janë ndër legjendat që kanë lënë kujtime të paharrueshme në futboll dhe veçanërisht në historinë e Kupës së Botës. I fundit që provoi shijen e hidhur të eliminimit ishte sulmuesi argjentinas, i cili humbi finalen dhe nuk arriti të fitonte trofeun e tij të dytë.

Më herët, të njëjtin zhgënjim e përjetuan CR7, “Ney” pas rikthimit në kombëtaren e Brazilit, portieri simbol i Meksikës dhe “veterani” kroat. Mbyllja e ciklit të tyre i hap rrugën një epoke tjetër të artë, të përfaqësuar nga emra si Lamine Yamal, Kylian Mbappe, Erling Haaland, Jamal Musiala dhe shumë të tjerë.

VALË LARGIMESH NGA STOLAT

Pas turneut, 17 trajnerë dhanë dorëheqjen ose u shkarkuan nga drejtimi i kombëtareve të tyre. Edhe kjo shifër përbën rekord, pasi nga Botërori i vitit 2022 u larguan 11 teknikë, ndërsa në 2014-tën ishin 8 dhe në 2006-tën 9.

TË ARDHURAT

FIFA gjeneroi 15 miliardë euro fitime, një rezultat i jashtëzakonshëm që përfshiu të gjithë sektorët e mundshëm. Organizimi i një ngjarjeje globale me përmasat e Botërorit pritet të prodhojë shifra të mëdha, por edicioni i zhvilluar në tri shtete të ndryshme tejkaloi çdo parashikim. Në përfundim, ky turne la një trashëgimi shumë më të gjerë sesa vetëm kurorëzimi i një kampioneje të re.

The post Nga triumfi i Spanjës te rekordet dhe surprizat: Bilanci i Botërorit me 104 ndeshje appeared first on Albeu.com.

Armand Duka, President i Federatës Shqiptare të Futbollit, i ka përcjellë urimet Presidentit të Federatës Spanjolle të Futbollit, Rafael Louzán, pasi Spanja fitoi titullin kampion në Kupën e Botës 2026.

Në mesazhin drejtuar homologut të tij, Duka nënvizon nivelin e shkëlqyer që përfaqësuesja spanjolle shfaqi nga fillimi deri në fund të turneut. Sipas tij, fitimi i trofeut ishte tërësisht i merituar dhe pasqyroi cilësinë, përkushtimin dhe vizionin që karakterizojnë futbollin spanjoll.

Presidenti i FSHF-së e cilëson rrugëtimin e Spanjës si të jashtëzakonshëm, ndërsa uron Federatën Spanjolle për triumfin në Kupën e Botës FIFA 2026. Ai thekson se skuadra spanjolle prodhoi futbollin më të mirë gjatë gjithë kompeticionit dhe e fitoi me meritë trofeun më prestigjioz të futbollit botëror.

Duka vlerëson gjithashtu punën e kryer për zhvillimin e futbollit në Spanjë dhe rezultatet e arritura prej tij në skenën ndërkombëtare, duke i dëshiruar Federatës Spanjolle vazhdimësi të suksesshme.

Në përmbyllje të mesazhit, Presidenti Duka i uron Rafael Louzán, ekipit kombëtar dhe të gjithë futbollit spanjoll arritje të tjera në vitet e ardhshme.

The post Armand Duka përgëzon homologun spanjoll Rafael Louzán pas triumfit historik në Botërorin 2026 appeared first on Albeu.com.

Edi Reja, ish-trajneri i Kombëtares shqiptare, ka analizuar finalen e Botërorit 2026, ku Spanja mposhti Argjentinën me rezultatin 1-0. Tekniku italian e përshkroi paraqitjen e “Furisë së Kuqe” si të shkëlqyer, ndërsa shprehu rezerva për mënyrën se si luajti skuadra argjentinase.

“Spanja që pashë ishte një skuadër e jashtëzakonshme dhe e kontrolloi ndeshjen nga minuta e parë deri tek e fundit. De La Fuente ia doli që një grup i mbushur me kaq shumë kampionë ta kthente në një ekip të vërtetë. Është kënaqësi t’i shohësh në harmoni, me të gjithë lojtarët që punojnë së bashku. Tek Argjentina ndodhte e kundërta, pasi ishin Mesi dhe shokët e skuadrës që punonin për të. Argjentinasit tentuan t’i trembnin kundërshtarët edhe ndaj Anglisë, por kundër Spanjës nuk ia dolën në asnjë moment”, u shpreh Reja.

“Enzo Fernandez e kishte marrë tashmë një karton të verdhë, ndaj çfarë synonte të arrinte me atë ndërhyrje absurde? Pas atij momenti, gjithçka u bë më e thjeshtë. Nuk besoj se Scaloni mund të kishte vepruar shumë më mirë, sepse në fund Argjentina u mund 1-0 në kohën shtesë. Mund vetëm ta duartrokas për rrugëtimin që e çoi drejt triumfit në një Kupë Bote dhe në dy Kupa të Amerikës”, deklaroi ish-trajneri i Kombëtares shqiptare, Edoardo Reja.

The post Reja vlerëson Spanjën pas finales së Botërorit: Dominoi nga fillimi në fund, Argjentina nuk arriti ta frikësonte appeared first on Albeu.com.

Përplasja e madhe e futbollit botëror u mbyll mbrëmë me triumfin e Spanjës ndaj Argjentinës, e cila u mposht me shifrat minimale 1-0 në stadiumin “MetLife”. Kështu, “Furia e Kuqe” u ngjit në majën e Kupës së Botës 2026.

Kryetari i bashkisë së Lezhës, Pjerin Ndreu, ka shpërthyer në një reagim të fortë në rrjetet sociale, i indinjuar nga sjellja e lojtarëve argjentinas. Sipas tij, prej kohësh nuk kishte hasur në një skuadër kaq të ashpër.

“Lojtarë më të pisët se këta të Argjentinës, ka vite që nuk kam parë”, shprehu ai hapur, duke lënë të kuptohet se qasja e tyre në fushë ishte krejtësisht antisportive dhe nuk i pëlqeu aspak përfaqësuesit socialist.

Vetë përfaqësuesja amerikano-jugore u duk pothuajse inekzistente në aspektin krijues, duke finalizuar goditjen e vetme në portë vetëm pasi kishin kaluar 115 minuta lojë. Megjithatë, toni fizik dhe ndërhyrjet e vrazhda të “Albiçelesteve” ishin elementët që duket se e nxorrën nga durimi kreun e Bashkisë Lezhë.

The post Reagim i ashpër i kryebashkiakut socialist pas finales së Botërorit 2026, Pjerin Ndreu: Argjentinasit, më të ndyrët që kam parë prej vitesh appeared first on Albeu.com.

Kombëtarja e Argjentinës synon të fitojë Kupën e Botës për herë të dytë radhazi dhe në përballjen vendimtare ndaj Spanjës në Nju Jork, futbollistët “Albiceleste” kanë një arsye më tepër për të kapërcyer pengesën e fundit drejt triumfit.

Bëhet fjalë për një tendencë shqetësuese që Lionel Messi dhe bashkëlojtarët e tij aspirojnë ta “fshijnë” përfundimisht nga fusha e lojës, e cila ndërlidhet me fatin e fituesve të Botërorit që dështojnë në finalen e turneut pasardhës.

PARADOKSI I KAMPIONËVE:

Argjentina – Në vitin 1986, nën udhëheqjen e legjendarit Diego Maradona, skuadra ngriti trofeun, por katër vjet më vonë u mposht në finalen e vitit 1990 nga Gjermania Perëndimore me rezultatin minimal 1-0.

Brazili – “Seleção” dominoi Shtetet e Bashkuara në finalen e vitit 1994, por në Botërorin e ardhshëm të vitit 1998, të organizuar nga Franca, pësuan një humbje të thellë 3-0 ndaj vendasve.

Franca – Të kaltrit siguruan titullin botëror në finalen e vitit 2018, por e dorëzuan atë në vitin 2022, kur Argjentina e udhëhequr nga “Pleshti” triumfoi pas ekzekutimit të penalltive.

The post Argjentina me një shtysë shtesë në finalen e Botërorit ndaj Spanjës, Messi kërkon të thyejë mallkimin e kampionëve në fuqi appeared first on Albeu.com.

Trofeu i Kupës së Botës 2026 do të vendoset sonte, kur Spanja dhe Argjentina të zbresin në fushën e stadiumit “MetLife” në New Jersey. Sfida finale nis në orën 21:00.

Përballë do të jenë dy kombëtaret që mbajnë pozicionet e para në renditjen e FIFA-s: Argjentina ndodhet në vendin e parë, ndërsa Spanja në të dytin. Takimi pritet të ofrojë futboll të nivelit të lartë dhe të tërheqë vëmendjen e miliona tifozëve në mbarë botën.

Spanja vjen në këtë përballje me statusin e kampiones në fuqi të Europës, pasi në gjysmëfinale kaloi Francën me shifrat 2-0. Argjentina, ndërkohë, është kampionia aktuale e botës dhe arriti në finalen e madhe pas fitores ndaj Anglisë, me synimin për të ruajtur titullin e fituar katër vite më parë.

Në fund të kësaj ndeshjeje do të shpallet kampionia e re e botës.

The post Spanja dhe Argjentina luajnë sonte finalen e Botërorit 2026 appeared first on Albeu.com.

Kampionati Botëror i Futbollit 2026 mbërrin në një pikë kyçe, pasi sonte në Teksas do të ndizet gjysmëfinalja e parë që vë përballë Francën dhe Spanjën. Ky duel i zjarrtë, i cili starton në orën 21:00, do të vendosë se cila prej dy fuqive elitare të futbollit ndërkombëtar prek finalen e shumëpritur.

Përfaqësuesja franceze, e kurorëzuar dy herë kampione e botës dhe aktualisht në vendin e tretë në klasifikimin e FIFA-s, mbërrin në këtë takim me një paraqitje solide gjatë turneut. Në kampin përballë ndodhet Spanja, fituese e trofeut në vitin 2010 dhe e dyta në renditjen botërore, e cila gjatë kompeticionit ka shpalosur një lojë të strukturuar dhe shumë efikase.

Transalpinët siguruan biletën për në këtë sfidë finale duke eliminuar Marokun me një fitore të pastër 2-0 në çerekfinale. Ndërkohë, “Furia e Kuqe” arriti të mbizotërojë përballë Belgjikës, duke fituar me rezultatin e ngushtë 2-1.

The post Fokusi tek Teksasi, sonte në orën 21:00 përplasen Franca dhe Spanja në gjysmëfinalen hapëse të Kupës së Botës 2026 appeared first on Albeu.com.