Seanca për shpalljen e verdiktit të shkallës së parë ndaj katër ish-krerëve të Ushtrisë Çlirimtare të Kosovës do të nisë nesër në orën 10:00.

Hashim Thaçi, Kadri Veseli, Rexhep Selimi dhe Jakup Krasniqi pritet të dalin para trupit gjykues në Gjykatën Speciale në Hagë.

Pak orë para këtij vendimi historik, autoritetet holandeze kanë forcuar praninë e policisë përpara ndërtesës së gjykatës.

Gjatë qëndrimit të ekipit të KosovaPress në Hagë, oficerët policorë u kërkuan qytetarëve shqiptarë që ndodheshin pranë objektit të largoheshin.

Sipas njërit prej policëve, urdhri i komandantit ishte që askush të mos qëndronte më shumë se dy minuta përpara ndërtesës, edhe pse ajo ndodhet në pronë publike.

“Nëse qëndroni këtu për dy minuta është në rregull, por nëse jo, atëherë duhet të lëvizni andej. Nuk lejohet (qëndrimi). Kaq është, kjo është arsyeja. Nuk lejohet të qëndroni përpara Tribunalit, duhet të shkoni në atë drejtim. Kjo është ajo që po ua them. Për informacione, mund ta kontaktoni zëdhënësin e policisë. Nëse doni, mund të shkoni në Manifeld, pasi atje do të mbahet një demonstratë më vonë”, tha polici holandez, raporton KosovaPress.

The post Masa të shtuara sigurie në Hagë para vendimit për ish-krerët e UÇK-së appeared first on Albeu.com.

Më 16 shtator, Dhomat e Specializuara të Kosovës në Hagë pritet të shpallin aktgjykimin ndaj ish-presidentit Hashim Thaçi, ish-kryeparlamentarëve Jakup Krasniqi dhe Kadri Veseli, si edhe ish-deputetit Rexhep Selimi. Ata përballen me akuza për krime lufte dhe krime kundër njerëzimit, ndërsa të katërt janë deklaruar të pafajshëm për të dhjetë pikat e aktakuzës.

Për të njëjtën datë janë paralajmëruar protesta, ndaj Ambasada Amerikane në Prishtinë u ka kërkuar shtetasve të Shteteve të Bashkuara që të mos lëvizin pranë zonave ku pritet të zhvillohen tubimet.

Njoftimi i ambasadës ka shtuar shqetësimet në opinionin publik se, varësisht nga përmbajtja e vendimit të Gjykatës Speciale, mund të ketë protesta të dhunshme dhe trazira në Kosovë dhe në rajon.

Profesori i shkencave të sigurisë, Avni Islami, në një deklaratë për “Bota sot”, u bëri thirrje qytetarëve të Republikës së Kosovës që të tregojnë qetësi, maturi dhe vigjilencë.

Sipas Islamit, Serbia është duke përdorur lajme të rreme për të krijuar përshtypjen se në Kosovë do të ketë trazira, si pjesë e një lufte hibride. Ai vlerëson se këto përpjekje nuk do të kenë sukses përballë pjekurisë së qytetarëve.

Islami deklaroi se, vetëm pak orë përpara shpalljes së verdiktit për krerët e UÇK-së, propaganda dhe shërbimet inteligjente serbe, përfshirë BIA-n dhe struktura të tjera, janë aktivizuar në një nivel të paparë më herët.

Ai tha se në media dhe në rrjetet sociale po qarkullojnë deklarata të bujshme dhe informacione të pavërteta për trazira të sajuara në Kosovë. Sipas tij, ky skenar, së bashku me stërvitjet e fundit të ushtrisë serbe pranë kufirit të Kosovës, përbën një luftë të mirëfilltë hibride, e cila do të dështojë falë pjekurisë së popullit.

Duke paralajmëruar kundër provokimeve dhe dezinformatave, profesori kërkoi nga qytetarët që të ruajnë qetësinë dhe të veprojnë me maturi.

Ai theksoi se qytetarët nuk duhet t’u besojnë informacioneve të rreme që synojnë të shkaktojnë panik, ndërsa bashkëpunimin dhe besimin e tyre ndaj institucioneve e cilësoi si mbrojtjen më të fuqishme.

Sipas Islamit, Agjencia Kosovare e Inteligjencës, AKI, dhe Policia e Kosovës ndodhen në gatishmëri të plotë dhe janë të forta e të pathyeshme. Ai shtoi se çdo përpjekje e agjenturave të huaja ose e elementeve destabilizuese për të nxitur provokime dhe për të cenuar rendin kushtetues do të neutralizohet menjëherë, duke nënvizuar se siguria e Republikës së Kosovës është e garantuar dhe e pacenueshme.

Edhe eksperti i sigurisë Valdet Hoxha foli për pritshmëritë rreth vendimit, duke vlerësuar se aktgjykimi i Gjykatës Speciale ndaj katërshes së UÇK-së po ndiqet me interes të madh si në Kosovë, ashtu edhe në arenën ndërkombëtare.

Hoxha shpjegoi për “Bota sot” se kjo çështje mund të shërbejë si precedent për raste të një natyre të ngjashme në të ardhmen.

Sipas tij, përvoja e drejtpërdrejtë e qytetarëve të Kosovës në luftën çlirimtare mund t’i shtyjë ata të shfaqin emocionet dhe pritshmëritë që kanë ndaj këtij procesi. Kjo, siç tha ai, mund të krijojë në opinion perceptimin se një aktgjykim eventual jo-lirues mund të pasohet nga tensione dhe trazira në vend.

Eksperti e konsideroi planin operativ të Policisë së Kosovës për 16 shtatorin si një veprim standard procedural dhe operacional. Ai theksoi se kjo masë është e nevojshme për sigurinë, por nuk paragjykon rezultatin dhe nuk lidhet në asnjë mënyrë me vendimmarrjen e pavarur të Gjykatës Speciale.

Në përfundim, Hoxha u shpreh optimist për aktgjykimin, duke thënë se pret që trupi gjykues të marrë një vendim të pavarur dhe të pandikuar, pa u dhënë besim pretendimeve të ngritura nga prokuroria.

Ai argumentoi se lufta e UÇK-së ishte e drejtë dhe çlirimtare, e imponuar nga pushtimi i egër dhe dhuna e Serbisë. Hoxha shtoi se ajo ishte mbi të gjitha një luftë vullnetare, e përkrahur nga partnerët ndërkombëtarë të udhëhequr nga SHBA-ja, të cilët morën pjesë në mënyrë aktive në çlirimin, pavarësinë dhe shtetndërtimin e Kosovës.

The post Vendimi në Hagë ngre shqetësime për sigurinë në Kosovë, ekspertët apelojnë për qetësi dhe shmangie të provokimeve appeared first on Albeu.com.

Ajo prezantoi prioritetet kryesore të udhëzimit për vitin shkollor 2026-2027, duke veçuar ndalimin e përdorimit të telefonëve celularë gjatë procesit mësimor, zbatimin e Kodit të Etikës për mësuesit dhe stafet arsimore, si dhe krijimin e një atmosfere mikpritëse për nxënësit që në ditën e parë.

Kumbaro tha se institucionet arsimore duhet të veprojnë mbi të njëjtat parime dhe rregulla, duke ruajtur rezultatet e arritura gjatë vitit të kaluar, por edhe duke korrigjuar problematikat e evidentuara.

Sipas saj, këtë vit vëmendje e veçantë do t’i kushtohet komunikimit, i cili duhet të jetë pikënisja e punës në shkolla.

Ministrja riktheu në vëmendje edhe rregullin për ndalimin e celularëve, duke theksuar se zbatimi i tij duhet të nisë me mësuesit.

Ajo kujtoi gjithashtu se, një vit më parë u miratua Kodi i Etikës për mësuesit, oficerët e sigurisë dhe punonjësit e shërbimit psikosocial. Kumbaro sqaroi se ky kod nuk lidhet vetëm me paraqitjen, por veçanërisht me mënyrën e komunikimit.

Sipas udhëzimit të ri, dita e parë e shkollës do të ketë një karakter njohës dhe prezantues. Nxënësit do të njihen me shkollën, mësuesin, librat dhe shokët e klasës, në mënyrë që nisja e vitit të jetë sa më e qetë dhe mirëpritëse.

Gjatë takimit u diskutua edhe çështja e sigurisë në shkolla. Kumbaro informoi prindërit dhe opinionin publik se të dhënat e kamerave inteligjente, të instaluara në shkollat e përfshira në projektin “Smart City”, do të monitorohen nga Qendra e Monitorimit pranë Policisë së Shtetit.

Projekti është zbatuar fillimisht si pilot në 20 shkolla të Tiranës dhe Kamzës. Kamerat janë të projektuara për të identifikuar rreziqe të ndryshme, përfshirë tymin e cigares, objektet e përcaktuara në katalog si të rrezikshme dhe fytyrat e personave të raportuar si me rrezikshmëri.

Ministrja nënvizoi se kjo teknologji shërben vetëm si mbështetje dhe nuk mund të zëvendësojë vëmendjen apo komunikimin brenda zinxhirit të sistemit arsimor.

Një tjetër risi e këtij viti është nisja e programit “Pas Shkolle”, i cili do të zbatohet në 408 institucione arsimore në të gjithë vendin.

Programi synon t’u sigurojë nxënësve të arsimit të mesëm të ulët dhe të lartë aktivitete krijuese e socializuese, si dhe t’i largojë nga përdorimi i dëmshëm i teknologjisë.

Ndërkohë, në institucionet arsimore ka filluar shpërndarja e teksteve shkollore. Ato do të ofrohen falas për nxënësit e arsimit të mesëm të ulët, ndërsa tekstet për klasat I-V do të jenë të reja çdo vit.

The post Kumbaro para drejtuesve të shkollave në Tiranë: Viti i ri nis me komunikim më të mirë, siguri dhe rregulla të qarta appeared first on Albeu.com.

Gjatë takimeve u diskutua për masat parandaluese ndaj ngjarjeve kriminale, monitorimin e vazhdueshëm të konflikteve dhe denoncimeve të qytetarëve, si dhe për identifikimin dhe arrestimin e personave që mbajnë armë zjarri ose merren me shpërndarjen e lëndëve narkotike.

Vëmendje iu kushtua gjithashtu lokalizimit dhe kapjes së personave të shpallur në kërkim, luftës kundër krimeve mjedisore dhe mënyrës së komunikimit me qytetarët, e cila duhet të karakterizohet nga etika dhe profesionalizmi.

Një pjesë e rëndësishme e diskutimeve lidhej me sigurinë në shkolla. Drejtues Madhor Hita e cilësoi këtë çështje si prioritetin kryesor të Policisë së Shtetit dhe kërkoi që, me nisjen e procesit të ri mësimor, shërbimet policore të angazhohen maksimalisht në bashkëpunim me oficerët e sigurisë në shkolla.

Qëllimi i këtij angazhimi është mbrojtja e nxënësve dhe krijimi i kushteve për zhvillimin e një procesi mësimor të qetë dhe të sigurt.

Shefave të Komisariateve iu kërkua që ta ndjekin çdo ditë situatën në shkolla dhe të merren drejtpërdrejt me çdo problem të raportuar nga institucionet arsimore që lidhet me sigurinë e nxënësve.

Sektorët e Narkotikëve, strukturat “Shqiponja” dhe shërbimet Operacionale do të përqendrohen në perimetrat e sigurisë së shkollave, për të penguar praninë e personave që synojnë të shesin lëndë narkotike ose të përfshihen në konflikte me nxënësit.

Për përmirësimin e sigurisë në rrugë, Drejtori i Përgjithshëm kërkoi shtimin e kontrolleve dhe monitorimit të qarkullimit rrugor, duke përfshirë edhe përdorimin e mjeteve inteligjente. Masat synojnë parandalimin e aksidenteve dhe reagimin e menjëhershëm ndaj shkeljeve të konstatuara.

Skender Hita u kërkoi drejtuesve të mbajnë përgjegjësi të drejtpërdrejtë për gjendjen e sigurisë në territoret që mbulojnë, të ndjekin nga afër problematikat dhe të garantojnë një përgjigje të shpejtë e profesionale ndaj shqetësimeve të qytetarëve.

Ai kërkoi gjithashtu që drejtorët e qarqeve dhe shefat e Komisariateve të presin qytetarët, t’i dëgjojnë për problematikat që mund të zgjidhen nga Policia dhe të jenë pjesë aktive e zgjidhjes së tyre. Hita theksoi se edhe vetë pret çdo qytetar që kërkon të takohet me të.

Takimet me strukturat e Policisë do të vijojnë në të gjitha Drejtoritë Vendore të Policisë, si edhe në Drejtoritë Vendore për Kufirin dhe Migracionin.

The post Skender Hita mbledh drejtuesit e Policisë në Elbasan, Berat dhe Kukës: Prioritet siguria në shkolla dhe parandalimi i krimit appeared first on Albeu.com.

Më 25 gusht 2026, Prokuroria Speciale e Kosovës ngriti aktakuzë kundër Fatmir Shehollit, duke e akuzuar atë për spiunazh dhe shantazh.

Rasti ka sjellë në qendër të vëmendjes një dilemë që shteti nuk mund ta injorojë më: a mbaroi spiunazhi me përfundimin e konfliktit, apo thjesht mori trajta të reja?

Sipas ekspertit të sigurisë Drizan Shala, aktivitetet spiunazhiste nuk u ndërprenë me luftën, por u transformuan, duke vënë në shënjestër institucionet, proceset politike, infrastrukturën jetike dhe të dhënat e ndjeshme.

Shala thekson se nga këndvështrimi i sigurisë kombëtare, operacionet e inteligjencës nuk kanë një datë mbylljeje të prerë. Pas vitit 1999, mjedisi i sigurisë në Kosovë ka ndryshuar thellësisht, e bashkë me të kanë evoluar edhe teknikat e grumbullimit të informacionit, rekrutimit të burimeve dhe ushtrimit të ndikimit.

Gjatë periudhës së luftës, shënjestra kryesore ishin të dhënat ushtarake, strukturat e UÇK-së dhe aftësitë operative. Ndërsa sot, objektivat janë bërë më të ndërlikuara: institucionet shtetërore, infrastruktura kritike, proceset politike, informacionet e klasifikuara, lidhjet ndërkombëtare dhe pikat e dobëta brenda sistemit, shpjegon ai.

Për këtë arsye, një rast i dyshuar spiunazhi nuk duhet trajtuar thjesht si një çështje personale. Ai kërkon një analizë më të gjerë në kuadër të kundërzbulimit: kush e do informacionin, çfarë lloj të dhënash kërkohen, cilat kanale përdoren, kujt i dërgohen raportimet dhe cili është qëllimi strategjik përfundimtar.

Shala paralajmëron se Kosova nuk përballet më me modelin e spiunazhit të viteve ’90, por me një formë më të fshehtë, të shpërndarë dhe të vështirë për t’u zbuluar. Sipas tij, spiunazhi bashkëkohor nuk ka më nevojë për një agjent tradicional me dosje sekrete; mjafton aksesi në informacion, ndërtimi i një marrëdhënieje besimi, ndikimi mbi një individ apo institucion dhe kalimi gradual i të dhënave me rëndësi strategjike.

Më tej, eksperti nënvizon se mbrojtja e sigurisë kombëtare duhet të fillojë edhe nga brenda institucioneve dhe se pengesa kryesore mbetet identifikimi në kohë i rrjeteve të spiunazhit, para se ato të arrijnë të depërtojnë dhe të forcohen.

Nga rasti Sheholli, Shala thotë se duhet nxjerrë një mësim më i gjerë: siguria kombëtare nuk mbrohet vetëm në vijat kufitare, por edhe brenda institucioneve, në fushën e informacionit, teknologjisë dhe në hapësirat e ndikimit. Ai shton se 26 vjet pas konfliktit, sfida e vërtetë e kundërzbulimit nuk është thjesht të ekspozohet një rrjet pasi ai është zbuluar, por të dallohen sinjalet e hershme përpara se ai të konsolidohet, përpara se një burim të futet në institucion dhe përpara se informacioni strategjik të dalë jashtë sistemit.

Në përfundim, eksperti thekson se në luftën moderne të inteligjencës, agjenti nuk paraqet gjithmonë kërcënimin më të madh; rreziku më i lartë është rrjeti që askush nuk e ka vërejtur me kohë.

The post Aktakuza për spiunazh ndaj Shehollit rikthen debatin për kërcënimet e heshtura ndaj sigurisë së Kosovës appeared first on Albeu.com.

Zyra Kombëtare e Auditimit ka bërë publike rezultatet e auditimit me titull “Siguria e nxënësve në shkollat publike në Kosovë”, i cili përfshin klasat VI-XII dhe periudhën 2022-2025.

Gjatë tryezës së diskutimit, drejtoresha e Auditimit, Ariana Gjonbalaj, deklaroi se 33% e 771 nxënësve të anketuar në Gjakovë, Ferizaj dhe Prishtinë kanë pohuar se janë përballur me dhunë ose bullizim.

Të dhënat e auditimit tregojnë gjithashtu se 15% e nxënësve të përfshirë në anketë nuk ndihen të lirë t’i raportojnë raste të tilla.

Në këtë tryezë u trajtuan edhe kërkesat që paraqiten më shpesh, mes tyre kontrolli i nxënësve, shtimi i kamerave dhe rojeve, ndërmarrja e masave disiplinore, organizimi i aktiviteteve kundër bullizimit, si dhe rritja e mbështetjes nga mësimdhënësit dhe psikologët.

The post ZKA për sigurinë në shkolla: 33% e 771 nxënësve të anketuar raportuan dhunë ose bullizim appeared first on Albeu.com.

Një 25-vjeçare shtatzënë u vra më 24 gusht në Malishevë. Për kryerjen e krimit dyshohet bashkëshorti i saj.

Rasti rikthen në vëmendje pyetjen nëse ndryshimet ligjore dhe masat e ndërmarra vitet e fundit kanë sjellë siguri më të madhe për gratë në Kosovë.

Afro katër vjet më herët, një tjetër grua shtatzënë u vra në oborrin e Qendrës Klinike Universitare të Kosovës në Prishtinë. Edhe në atë rast, dyshimet ranë mbi bashkëshortin e viktimës.

Vrasja e një 35-vjeçareje në nëntor të vitit 2022 shkaktoi protesta dhe shtoi trysninë ndaj institucioneve, të cilave iu kërkua të ndryshonin mënyrën e parandalimit dhe trajtimit të dhunës ndaj grave.

Pas kësaj, u miratuan ndryshime ligjore, u vendosën afate më të shkurtra për hetimin dhe gjykimin e rasteve të dhunës në familje, ndërsa 600 mijë euro u ndanë për krijimin e një sistemi elektronik që do të monitoronte personat ndaj të cilëve gjykatat vendosin masa mbrojtëse.

Megjithatë, vrasja e 24 gushtit tregon se mbetet e hapur çështja se sa ndikim kanë pasur realisht këto masa në mbrojtjen e grave.

Të dhënat e Policisë së Kosovës, të siguruara nga Radio Evropa e Lirë, tregojnë se gjatë katër vjetëve të fundit janë vrarë 11 gra. Tri prej këtyre rasteve kanë ndodhur deri më tash këtë vit.

Në pjesën më të madhe të rasteve, të dyshuarit apo autorët kanë qenë bashkëshortët e viktimave, ndërsa pas tyre renditen baballarët dhe djemtë.

Sipas organizatave që mbrojnë të drejtat e grave, sfida nuk lidhet më vetëm me ekzistencën e ligjeve. Problemi qëndron edhe te zbatimi i tyre: monitorimi i rasteve të raportuara, respektimi i urdhrave mbrojtës, shpejtësia e reagimit institucional dhe pasojat kur institucionet dështojnë.

Arrita Rezniqi nga Instituti i Kosovës për Drejtësi (IKD) thotë se rastet e raportuara të dhunës në familje nuk po mbikëqyren në nivelin e nevojshëm.

Luljeta Demolli, drejtoreshë ekzekutive e Qendrës Kosovare për Studime Gjinore, vlerëson se vrasjet e grave duhet të shpallen urgjencë kombëtare.

Problemet e vazhdueshme pranohen edhe në vlerësimin e fundit të Strategjisë Kombëtare për Mbrojtje nga Dhuna në Familje dhe Dhuna ndaj Grave, ku, krahas përparimit, evidentohen mangësi në funksionimin e sistemit.

Raporti i publikuar në vitin 2026 përmend mospërputhje të të dhënave ndërmjet institucioneve, dallime në qasjen në shërbime nga një komunë në tjetrën dhe zbatim me ritme të ndryshme të masave nga drejtësia, shërbimet sociale dhe sistemi shëndetësor.

Sistemi elektronik u bë funksional pas 20 muajsh

Një prej mjeteve që synonte të rriste mbrojtjen e grave ishte monitorimi elektronik.

Në prill të vitit 2023, disa muaj pas vrasjes së gruas shtatzënë në oborrin e QKUK-së, Qeveria e Kosovës ndau 600 mijë euro për projektin “Sistemi i monitorimit elektronik”.

Sipas vendimit zyrtar, fondet do të përdoreshin për financimin e projektit gjatë atij viti.

Megjithatë, sistemi nuk u prezantua publikisht deri më 10 dhjetor të vitit 2024, rreth 20 muaj pasi ishin ndarë paratë.

Gjatë prezantimit, kryeministri Albin Kurti deklaroi se hallkat elektronike do t’u vendoseshin në dorë ose në këmbë personave të dyshuar apo të dënuar për dhunë.

Projekti ishte konceptuar edhe si instrument për mbrojtjen e viktimave të dhunës në familje.

Nëse personi i monitoruar do t’i afrohej viktimës në kundërshtim me urdhrin mbrojtës, sistemi duhej ta sinjalizonte policinë në nivel lokal dhe qendror, duke i dhënë mundësi të ndërhynte.

Të dhënat e deritanishme, megjithatë, flasin për një përdorim të kufizuar të këtij mekanizmi.

Një dokument i Ministrisë së Punëve të Brendshme tregon se deri në prill të vitit 2025 gjykatat kishin nxjerrë vetëm tetë aktvendime për monitorim elektronik, të cilat po zbatoheshin nga Policia e Kosovës.

Nuk ka të dhëna se sa prej këtyre vendimeve kishin të bënin me dhunën në familje.

Gjithashtu, nuk dihet numri i personave që ndodhen aktualisht nën mbikëqyrje elektronike.

Në përgjigjen e saj për Radion Evropa e Lirë, Policia e Kosovës tha se monitorimin elektronik të urdhrave mbrojtës e zbaton që nga dhjetori i vitit 2024 dhe se sistemi funksionon në të gjitha drejtoritë rajonale të policisë.

Personat, të cilëve gjykata ua kufizon lëvizjen, pajisen me byzylykë elektronikë. Sipas policisë, sistemi përfshin edhe gjurmues GPS, të cilët vendosen te palët në procedurë.

Policia deklaroi se disponon numër të mjaftueshëm byzylykësh dhe gjurmuesish GPS për monitorimin në kohë reale të rasteve.

Megjithatë, ajo nuk bëri të ditur sa persona po monitorohen dhe as sa prej rasteve kanë lidhje me dhunën në familje.

Rezniqi thotë se mungesa e këtyre statistikave e bën të vështirë të vlerësohet nëse mekanizmi po e arrin qëllimin për të cilin është krijuar.

Sipas saj, edhe vendosja e një pajisjeje elektronike nuk mjafton nëse një alarm nuk pasohet nga reagimi i menjëhershëm i institucioneve.

“Nuk mjafton vetëm byzylyku – në këto raste është e nevojshme të ketë reagim të menjëhershëm të policisë, në mënyrë që të shmanget çdo lloj rreziku për viktimën”, thotë Rezniqi për Radion Evropa e Lirë.

Afatet u shkurtuan, por mbetet problem zbatimi

Monitorimi elektronik nuk ishte reforma e vetme e ndërmarrë pas rasteve tragjike.

Në nëntor të vitit 2023, Kosova ndryshoi Kodin e Procedurës Penale, duke i cilësuar rastet e dhunës në familje dhe dhunimit si çështje që duhet të trajtohen me përparësi.

Ndryshimet parashikuan që hetimet për këto vepra të mbyllen brenda një viti nga nisja e tyre. Kur çështja është e ndërlikuar, afati mund të zgjatet edhe gjashtë muaj.

Për herë të parë u përcaktuan edhe afate të veçanta për gjykimin: 60 ditë në rastet kur çështja shqyrtohet nga një gjyqtar i vetëm dhe 90 ditë kur ajo trajtohet nga një trup gjykues.

Këto periudha janë më të shkurtra se afatet e përgjithshme të mëparshme, me synimin që rastet e dhunës në familje të mos mbeten gjatë në sistemin e drejtësisë.

Por Rezniqi vlerëson se vetëm shkurtimi i afateve nuk e prek thelbin e problemit.

Ajo thotë se rastet e dhunës në familje zakonisht trajtohen brenda një kohe relativisht optimale, ndërsa vështirësia kryesore lidhet me identifikimin dhe menaxhimin e rrezikut, si dhe me zbatimin e mekanizmave që institucionet i kanë tashmë në dispozicion.

Rezniqi thekson se përgjegjësia duhet të shqyrtohet edhe në mënyrën se si sistemi i drejtësisë i dënon autorët e vrasjeve të grave.

“Kemi parë raste kur autorët e vrasjes së grave janë dënuar me burgim të përjetshëm në shkallë të parë. Disa prej këtyre vendimeve janë konfirmuar edhe në instanca më të larta, ndërsa në raste të tjera vendimet janë kthyer në rigjykim ose janë ndryshuar. Prandaj, është e nevojshme të ketë konsistencë në trajtimin e këtyre rasteve”, thotë Rezniqi.

Demolli vë në dukje një tjetër mangësi: shteti nuk ka një mekanizëm që do të analizonte çdo vrasje të një gruaje për të gjetur nëse sistemi kishte dështuar dhe në cilën hallkë kishte ndodhur kjo.

Ajo e konsideron këtë analizë veçanërisht të rëndësishme kur viktima ka raportuar më parë dhunë ose u është drejtuar institucioneve për mbrojtje.

“Shumica e grave të vrara kanë kërkuar më herët ndihmë nga institucionet, prandaj duhet të ketë llogaridhënie kur një grua që ka kërkuar mbrojtje, përfundon e vrarë. Të përcaktohet ku po dështon sistemi: policia, prokuroria, gjykatat, shëndetësia apo institucionet e tjera”, thotë Demolli.

Vrasjet e grave në përmasa globale

Raporti më i fundit i përbashkët i UN Women dhe Zyrës së Kombeve të Bashkuara për Drogën dhe Krimin (UNODC) thotë se rreth 50 mijë gra dhe vajza u vranë nga partnerët intimë ose pjesëtarët e familjes gjatë vitit 2024.

Mesatarisht, kjo përkthehet në 137 gra dhe vajza të vrara çdo ditë.

Këto raste përbënin rreth 60 për qind të të gjitha vrasjeve të qëllimshme të grave dhe vajzave gjatë atij viti.

Raporti thekson se dukuria shfaqet në çdo rajon të botës, ndërsa paralajmëron se shifrat reale mund të jenë më të larta, për shkak të mungesës së statistikave të plota në shumë vende.

Vrasja e rëndë në Kosovë dënohet me së paku dhjetë vjet burgim ose me burgim të përjetshëm.

I dyshuari për vrasjen në Malishevë po merr trajtim në spital për plagët që, sipas raportimeve, dyshohet se ia ka shkaktuar vetes me armë zjarri.

Ngjarja u kritikua dhe u dënua nga përfaqësues të shoqërisë civile, zyrtarë dhe ish-zyrtarë shtetërorë.

“Shoqëria jonë nuk mund të jetë e sigurt përderisa gratë nuk janë të sigurta as në shtëpitë e tyre”, tha, ndër të tjera, ushtruesja e detyrës së presidentit të Kosovës, Albulena Haxhiu.

Por rëndësia e këtij deklarimi do të vlerësohet edhe nga veprimet që do të ndërmerren pasi reagimet publike të përfundojnë.

The post Ligjet u forcuan, por gratë vazhdojnë të mos jenë të sigurta appeared first on Albeu.com.

Zëvendësdrejtori i Policisë së Kosovës për rajonin e veriut, Veton Elshani, ka vlerësuar se gjendja e sigurisë në këtë pjesë të vendit është e qetë dhe stabile. Megjithatë, sipas tij, situata vazhdon të jetë delikate për shkak të veprimeve ose vendimeve të mundshme politike.

Elshani bëri të ditur se Policia e Kosovës është e shtrirë në të gjithë veriun dhe se aktualisht nuk përballet me ndonjë problem të veçantë në aspektin e sigurisë. Ai shtoi se, nëse do të ndodhte ndonjë incident, institucioni që përfaqëson ka kapacitetet e nevojshme për t’u marrë me të.

“Në veri situata është e qetë, stabile, por edhe më tej delikate. Ndjeshmëria lidhet kryesisht me veprime apo vendime të mundshme politike, pasi në aspektin e sigurisë Policia e Kosovës është e pranishme në të gjithë rajonin dhe nuk ka ndonjë çështje të veçantë për t’u theksuar”, ka deklaruar Elshani.

Sipas zëvendësdrejtorit, forca policore aktualisht ka numër të mjaftueshëm pjesëtarësh për ta menaxhuar situatën në veri.

Ai veçoi gjithashtu shtimin e pjesëtarëve të komunitetit serb në radhët e Policisë së Kosovës. Elshani tha se pas një mungese të madhe të personelit policor nga kjo përkatësi etnike, numri i tyre tashmë ka arritur në 151.

“Me personel policor qëndrojmë shumë mirë. Për një kohë kemi pasur mungesë të konsiderueshme të policëve kosovarë të përkatësisë etnike serbe, ndërsa tani kemi 151 pjesëtarë serbë. Në total, rreth 450 policë janë të mjaftueshëm për rajonin e veriut, ku niveli i kriminalitetit nuk është i lartë dhe ku çështjet lidhen më shumë me politikën sesa me krimin. Ne e menaxhojmë situatën dhe jemi të gatshëm të reagojmë në çdo rast”, u shpreh ai.

Duke komentuar vendimin e Bashkimit Evropian për t’i hapur rrugë hapjes së urës së Ibrit, Elshani tha se urat kanë për qëllim t’i afrojnë njerëzit dhe jo t’i ndajnë ata.

Ai theksoi se, përpara urës kryesore, në veri ekzistojnë edhe disa ura të tjera, ndërsa kalimi i njerëzve, mallrave dhe automjeteve në to nuk paraqet asnjë problem. Sipas tij, në këtë zonë nuk ka rrezik të veçantë, pasi Policia është e pranishme në çdo pjesë dhe ndërhyn ndaj të gjithë qytetarëve, pavarësisht nëse janë shqiptarë, serbë apo të përkatësive të tjera etnike.

“Urat i bashkojnë njerëzit, nuk i ndajnë. Nuk dua të jap një qëndrim të veçantë për urën kryesore, por në veri nuk ka asnjë rrezik, sepse Policia është e pranishme kudo. Ne reagojmë ndaj qytetarëve kosovarë të çdo përkatësie etnike, ruajmë rendin dhe qetësinë publike. Në këtë rast ka më shumë retorikë politike sesa çështje reale të sigurisë”, ka deklaruar Elshani për Ekonomia Online.

Ai foli edhe për kërcënimet e adresuara ndaj pjesëtarëve të Policisë së Kosovës në veri, duke thënë se ata janë përballur me situata të tilla gjatë katër viteve të fundit dhe tashmë janë mësuar me to.

“Prej katër vitesh jemi në atë zonë dhe jemi përballur me kërcënime të vazhdueshme, si ‘ju vrasim sot’ apo ‘ju vrasim nesër’. Deri tani nuk na kanë vrarë. Policia vazhdon ta kryejë detyrën e saj dhe qytetarët nuk kanë arsye të shqetësohen, sepse nëse paraqitet nevoja për reagim, ne do të jemi aty”, ka thënë Veton Elshani, zëvendësdrejtor i Policisë së Kosovës për rajonin e veriut.

The post Elshani: Veriu i qetë dhe stabil, por mbetet i ndjeshëm ndaj zhvillimeve politike appeared first on Albeu.com.

Kryeprokurori i Shtetit, Zejnulla Gashi, zhvilloi një takim me Drejtorin e Policisë së Kosovës, Kolonel Gazmend Hoxha, i cili shoqërohej nga bashkëpunëtorët e tij.

Në nisje të takimit, Hoxha e përgëzoi Gashin për marrjen e detyrës së re si Kryeprokuror i Shtetit.

Biseda u përqendrua te nevoja për zgjerimin e bashkëpunimit institucional mes Prokurorit të Shtetit dhe Policisë së Kosovës, në funksion të fuqizimit të sundimit të ligjit në Republikën e Kosovës.

Dy drejtuesit ranë dakord që komunikimi dhe koordinimi i vazhdueshëm ndërmjet institucioneve të tyre të intensifikohen. Ata e cilësuan këtë bashkërendim si thelbësor për shkëmbimin efektiv të informacioneve, harmonizimin e veprimeve hetimore dhe trajtimin sa më profesional të rasteve penale, duke respektuar kompetencat ligjore të secilit institucion.

The post Kryeprokurori Gashi takohet me drejtorin e Policisë, Gazmend Hoxha appeared first on Albeu.com.

Pas 27 vitesh, Policia e Kosovës ka filluar të marrë në dorë përgjegjësinë për sigurinë në urën kryesore mbi lumin Ibër, në Mitrovicë.

Burime të televizionit bëjnë të ditur se, duke nisur nga sot, institucionet e Kosovës kanë nisur sigurimin e urës, e cila për një periudhë të gjatë ka qenë nën kujdesin e misioneve ndërkombëtare të sigurisë.

Kalimi i kësaj përgjegjësie përbën një tjetër etapë në procesin e transferimit të detyrave të sigurisë te institucionet e Kosovës.

Për vite me radhë, ura mbi lumin Ibër ka qenë një prej pikave më të ndjeshme të sigurisë në Mitrovicë, si dhe një simbol i ndarjes së qytetit.

The post Policia e Kosovës nis marrjen e sigurisë së urës së Ibrit pas 27 vitesh appeared first on Albeu.com.