Sistemi, i cili nuk kufizohet thjesht te kamerat e zakonshme, theksoi gjatë prezantimit të projektit ministri i Brendshëm Besfort Lamallari përfshin radarë me preçizion të lartë dhe sensorë inteligjentë zhurmash të shtrirë në 24 qytete kryesore, 28 pika të kalimit kufitar dhe fillimisht në 20 shkolla të Tiranës.

Përmes një qendre të re të komandës dhe kontrollit, softueri i fuqizuar nga inteligjenca artificiale përpunon në pak sekonda gigabajt të tëra informacioni, imazhe dhe audio nga 873 lokacione operative.

Çdo sjellje e dyshimtë, duke filluar nga shkeljet e rregullave të qarkullimit, mbajtja e armëve në mjedise publike, e deri te prania e personave të rrezikshëm ose potencialisht terroristë në afërsi të kufijve apo shkollave, detektohet në kohë reale.

Sistemi gjeneron alarme të menjëhershme duke udhëzuar patrullat më të afërta të policisë për të ndërhyrë para se të ndodhin ngjarje të rënda.

Faza e parë e këtij projekti është fokusuar tek 20 shkollat më të frekuentuara të kryeqytetit. Qëllimi kryesor është krijimi i një mjedisi plotësisht të sigurt ku nxënësit mund të fokusohen tek arsimimi i tyre pa asnjë kërcënim të jashtëm, duke i garantuar prindërve qetësi të plotë gjatë orarit mësimor.

Zbatimi i këtij ekosistemi të integruar, i cilësuar nga autoritetet si një kapërcim epokal për sigurinë publike në vend, vjen pas një rruge të gjatë me pengesa, spekulime dhe vonesa burokratike.

Megjithatë, mbështetja e drejtpërdrejtë nga kreu i qeverisë ka bërë të mundur thyerjen e atij që u cilësua si një “mur absurd” ndaj inovacionit, duke e sjellë Shqipërinë një hap më afër standardeve evropiane të sigurisë.

The post Besfort Lamallari: Inteligjenca artificiale merr në dorë sigurinë e rrugëve dhe shkollave appeared first on Albeu.com.