Bedri Hamza, kryetar i Partisë Demokratike të Kosovës, ka reaguar pas vendimit për ta shtyrë seancën konstituive të Kuvendit të Kosovës.

Seanca u shty me kërkesën e Albin Kurtit, lider i Lëvizjes Vetëvendosje (LVV), partisë fituese të zgjedhjeve, dhe njëherësh kryeministër në detyrë.

Në një prononcim për gazetarët në hollin e Kuvendit, Hamza e cilësoi këtë vendim si të papërgjegjshëm.

“Kjo është një shenjë e mungesës së seriozitetit nga partia që ka fituar shumicën e votave. Po shihet që vazhdojnë sjelljet e tyre të papërgjegjshme në raport me institucionet”, deklaroi Hamza.

Kur u pyet për mundësinë e një takimi me LVV-në, ai u përgjigj se PDK-ja nuk ka nevojë për takime “pa rezultat”.

“Nuk kemi nevojë të takohemi. Ne kemi deklaruar rolin tonë që do të jemi parti në opozitë”, tha Hamza.

The post Hamza kritikon shtyrjen e seancës: LVV po tregon mungesë serioziteti appeared first on Albeu.com.