Hapja e zyrave konsullore në Bujanoc dhe Shkodër është pjesë e një dakordësie parimore të arritur mes Shqipërisë dhe Serbisë për shtimin e pranisë diplomatike në të dyja vendet. Njoftimi u dha nga ministri i Jashtëm serb, Marko Gjuriç, duke nxitur menjëherë reagime në opinionin publik dhe në politikën shqiptare.

Gjatë një interviste për Radio Beogradin, Gjuriç deklaroi se kjo mirëkuptim ishte arritur në takimet me ministrin e ri të Jashtëm të Shqipërisë, Ferit Hoxha. Ai u shpreh i kënaqur me bisedimet dhe tha se palët kishin rënë dakord në parim për ngritjen e zyrave konsullore në Shkodër dhe Bujanoc, ndërsa nga Tirana ende nuk ishte bërë publik ndonjë njoftim zyrtar.

Ministria për Evropën dhe Punët e Jashtme e Shqipërisë dha një version më të rezervuar, duke sqaruar se diskutimet vazhdojnë dhe se ende nuk është arritur marrëveshja përfundimtare. Ferit Hoxha theksoi se procesi po zhvillohet duke u mbështetur në reciprocitet dhe kujtoi se Shqipëria ishte pala që kishte kërkuar fillimisht hapjen e një konsullate të përgjithshme në Luginën e Preshevës.

Në reagimin e tij, Hoxha e përkufizoi reciprocitetin si një parim bazë të raporteve ndërshtetërore dhe si mjet të politikës së jashtme për çuarjen përpara të interesave kombëtare. Sipas tij, ky parim nuk do të thotë domosdoshmërisht që palët të kenë përmbajtje, synime apo interesa të njëjta.

Ministri shqiptar shtoi se procedurat e nevojshme institucionale do të nisin sapo të arrihet mirëkuptimi përfundimtar. Ai vlerësoi gjithashtu se prania konsullore e Shqipërisë në Luginën e Preshevës është vonuar.

Analisti shqiptar nga Presheva, Refik Hasani, e konsideron të dëmshme nismën për hapjen e një konsullate serbe në Shkodër. Sipas tij, një përfaqësi e tillë nuk është e nevojshme, veçanërisht duke pasur parasysh rolin dhe synimet historike të Serbisë për pushtimin e Shkodrës.

Në një prononcim për “Bota sot”, Hasani tha se deklarata e ministrit të Jashtëm serb, Marko Gjuriq, për mundësinë e krijimit të konsullatës në Shkodër lidhet me qëllime, prapavija, predispozita dhe tendenca të njohura. Ai argumentoi se në Shkodër dhe në të gjithë Shqipërinë nuk ekziston fare minoritet serb, madje as në një numër të mjaftueshëm për të përbërë stafin e kësaj konsullate.

Hasani kujtoi se ngritja e një përfaqësie konsullore zakonisht arsyetohet nga prania e një numri të konsiderueshëm shtetasish të vendit dërgues. Sipas tij, nevoja konsullore në Shkodër mungon edhe për faktin se Serbia e ka tashmë ambasadën e saj në Tiranë. Ai vlerësoi se Beogradi vazhdon të shfaqë objektiva të tjera, me natyrë politike, diplomatike dhe qëllime të tjera.

Ndryshe e sheh Hasani mundësinë e hapjes së Konsullatës së Përgjithshme shqiptare në Bujanoc dhe ndikimin që ajo mund të ketë për shqiptarët e Preshevës, Bujanocit dhe Medvegjës. Ai e cilëson këtë hap shumë të vonuar, por kërkon që përfaqësia të mos mbetet vetëm simbolike dhe të ndërtohet mbi një qasje strategjike, pasi rëndësia e saj është e jashtëzakonshme.

Sipas analistit, konkretizimi duhet të ndodhë sa më shpejt dhe të mos paraqitet si përfundimi i një procesi, por si nisja e një strategjie të re. Ai theksoi se vetëm prania diplomatike nuk mjafton nëse nuk shoqërohet nga politika të koordinuara, të qarta dhe afatgjata për avancimin dhe mbrojtjen e të drejtave të shqiptarëve në Serbia.

Hasani tha se kjo konsullatë do të ofronte ndihmë përballë sfidave të shumta të mbijetesës dhe ruajtjes së substancës, si dhe për mbrojtjen e sakrificës e të kontributit të luftës së armatosur në raport me sfidat e së ardhmes. Sipas tij, çështja duhet të ndërkombëtarizohet në nivelin më të lartë.

Ai vlerësoi se Shqipëria amë ka detyrim moral, kombëtar dhe kushtetues për të ndërtuar një qëndrim të artikuluar, të drejtë, objektiv dhe institucional. Ky pozicion i Republikës së Shqipërisë, sipas Hasanit, duhet të përfshijë Referendumin e 1-2 marsit 1992, kryengritjen e armatosur të UÇPMB-së, e cila mbrojti varret e të parëve, pragun, dinjitetin dhe identitetin e kësaj krahine, si dhe Marrëveshjen e Konçulit.

Nga Shqipëria amë, Hasani pret përkrahje dhe veprime edhe për ngritjen e një zyre ndërlidhëse në Tiranë, të cilën e konsideron më se të domosdoshme. Ai kërkon gjithashtu që Tirana të avokojë dhe të lobojë pranë mekanizmave dhe instancave më të larta të BE-së dhe OKB-së.

Sipas tij, Shqipëria amë mund ta mbrojë më mirë frymën shqiptare pikërisht në këtë krahinë, e cila përbëhet nga një grup etnik autokton. Hasani e sheh këtë angazhim edhe si kontribut për garantimin e një të ardhmeje më të sigurt dhe më të ndritur për shqiptarët kudo.

Analisti deklaroi se institucionet përkatëse të Kosovës mund të reagojnë në përputhje me të drejtën ndërkombëtare, duke u mbështetur te të gjitha aktet, konventat dhe traktatet që shërbejnë si instrumente për rregullimin e këtyre çështjeve.

Ai shtoi se edhe partitë politike të përfaqësuara në Parlament kanë mundësi që, përmes rrugëve institucionale, të paraqesin fakte dhe dëshmi kundër hapjes së konsullatës në Shkodër, në mënyrë që çështja të dërgohet në instancat përkatëse, përfshirë ato ndërkombëtare.

Në përfundim, Hasani kërkoi që Shqipëria të realizojë fillimisht hapjen e Konsullatës së Përgjithshme në Bujanoc. Sipas tij, ky proces nuk duhet në asnjë rrethanë të kushtëzohet me ngritjen e një konsullate serbe në Shkodër.

Ai e mbështeti këtë kërkesë te përbërja e popullsisë së krahinës, duke theksuar se në Preshevë mbi 95% e banorëve janë shqiptarë etnikë dhe autoktonë, ndërsa në Bujanoc kjo përqindje është mbi 62%. Vetëm në Medvegjë, sipas tij, shqiptarët etnikë dhe autoktonë përbëjnë më pak se 50% të popullsisë.

Hasani tha se bëhet fjalë për një krahinë që duhet trajtuar vetëm në këtë mënyrë, pasi rajoni përbën një trup të vetëm, unitar, si shprehje gjeografike e pandashme. Përballë kësaj, ai përsëriti se propozimi për konsullatën serbe në Shkodër, ku nuk ka fare minoritet serb, pasqyron vazhdimin e objektivave të tjera politike, diplomatike dhe të qëllimeve të tjera.

The post Nga Presheva thirrje Tiranës: Konsullata në Bujanoc të hapet pa asnjë kusht appeared first on Albeu.com.

Ajo që nisi si një reagim ndaj zhvillimeve në Zvërnec është shndërruar në një lëvizje qytetare më të gjerë, me protesta të përditshme kundër qeverisë dhe asaj që organizatorët e cilësojnë si “kastë politike”.

Për më shumë se dy muaj, tubimet janë shoqëruar me marshime në rrugët kryesore të kryeqytetit dhe me thirrje të vazhdueshme për ndryshim politik.

Në protestën e një dite më parë, aktivistët deklaruan se nuk do të tërhiqen nga kauza e tyre. Ata përsëritën kërkesën për dorëheqjen e kryeministrit, ndërsa u shprehën se pakënaqësia qytetare po zgjerohet edhe në qytete të tjera të vendit për shkak të reformës së re territoriale, që sipas propozimit të mazhorancës pritet shkrirja e 15 bashkive.

Si çdo mbrëmje, edhe sot protesta pritet të nisë me fjalime para Kryeministrisë dhe të pasohet nga një marshim në rrugët e Tiranës. Organizatorët kanë bërë të ditur se mobilizimi do të vijojë çdo ditë deri në përmbushjen e kërkesave të tyre, duke theksuar se protesta nuk do të ndalet.

The post Shqiptarët nuk dorëzohen, 65 ditë protesta masive të pandërprera kundër qeverisë, kërkohet dorëheqja e Edi Ramës appeared first on Albeu.com.

Leona Krasniqi dhe Griselda Stragu, dy të reja me origjinë shqiptare, janë zyrtarisht pjesë e garës, duke synuar të shkëlqejnë në një nga skenat më të rëndësishme të bukurisë në Evropë, transmeton albinfo.ch.

Leona Krasniqi, e cila do të përfaqësojë qytetin e Antwerpenit me kodin MA29, vlerësohet për karakterin e saj, përkushtimin dhe ambicien. Ajo e konsideron pjesëmarrjen në “Miss Belgium” si më shumë sesa një konkurs bukurie, duke e parë atë si një mundësi për të promovuar vlerat, kulturën dhe identitetin shqiptar.

“Jam shumë e lumtur dhe mirënjohëse për këtë mundësi. Për mua, Miss Belgium nuk është vetëm një konkurs bukurie, por edhe një platformë për të promovuar vlerat, kulturën dhe angazhimin e të rinjve në shoqëri. Mbështetja e komunitetit shqiptar do të thotë shumë për mua”, ka deklaruar Leona.
Ndërkohë, edhe Griselda Stragu, me origjinë nga Shkodra dhe me banim në Belgjikë, është konfirmuar si kandidate në ‘Miss Belgium 2027’. Ajo synon të përfaqësojë me dinjitet rrënjët e saj shqiptare, duke dëshmuar se bukuria shkon përtej pamjes së jashtme dhe se puna, përkushtimi dhe vetëbesimi janë çelësi i suksesit.

Për Griselda Stragun, kjo garë është një mundësi për të promovuar kulturën dhe identitetin shqiptar në një skenë prestigjioze ndërkombëtare, ndërsa rrugëtimi i saj pritet të ndiqet me interes nga komuniteti shqiptar në Belgjikë dhe më gjerë.

Pjesëmarrja e dy shqiptareve në “Miss Belgium 2027” vjen në një kohë kur të rinjtë shqiptarë po shënojnë suksese të rëndësishme në fusha të ndryshme të jetës publike, profesionale dhe kulturore, duke dëshmuar integrim të suksesshëm dhe potencial të lartë.

The post Dy shqiptare në garën “Miss Belgium 2027”, Leona Krasniqi dhe Griselda Stragu synojnë kurorën prestigjioze appeared first on Albeu.com.

Lidhur me këtë çështje, për “Bota sot” ka folur publicisti Lis Bukuroca, i cili thotë se ironia e Ramës ka një synim të qartë: të largojë vëmendjen nga protesta që po zhvillohet në Tiranë.

Sipas Bukurocës, pas revoltës së ngritur kundër tij, Ramës i nevojitet një ndarje me shqiptarët jashtë Shqipërisë për të mbajtur veten politikisht.

“Mendoj se ironizimi i Edi Ramës ndaj shqiptarëve nga Kosova dhe Maqedonia e Veriut kishte një qëllim të qartë politik: ta relativizojë protestën dhe ta zhvendosë fokusin nga pakënaqësia reale brenda Shqipërisë te shqiptarët jashtë.

Pra, mesazhi i tij ishte: problemi nuk qëndron te qeverisja, por te perceptimet, emocionet kolektive dhe ndikimet e jashtme. I duhet një përçarje, paragjykime ndaj shqiptarëve jashtë, për të mbijetuar brenda.

Kjo është një strategji në politikë: kur rritet pakënaqësia e brendshme, krijohet narrativa se revolta po fryhet artificialisht nga rrjetet sociale, nga propaganda ose nga aktorë të jashtëm”.

Publicisti vlerëson gjithashtu se me këtë qasje, kryeministri po i nënçmon si protestuesit, ashtu edhe shqiptarët që jetojnë në trojet e tjera.

Ai thekson se interesimi i shqiptarëve për zhvillimet në Tiranë është diçka krejt natyrshme dhe plotësisht legjitime.

“Po, unë mendoj se me këtë qasje Rama po nënvlerëson jo vetëm protestuesit, por edhe të drejtën legjitime të shqiptarëve nga Kosova dhe trojet e tjera shqiptare për të shprehur solidaritet dhe shqetësim për zhvillimet në Shqipëri.

Shqipëria nuk është thjesht një shtet administrativ për shqiptarët jashtë kufijve të saj; ajo ka edhe peshë simbolike, kombëtare dhe emocionale. Për këtë arsye, interesimi i shqiptarëve jashtë Shqipërisë për atë që ndodh në Tiranë është i natyrshëm dhe legjitim”.

Sipas Bukurocës, tallja dhe ironia e përdorur nga Rama nuk janë të rastit, por pasqyrojnë më shumë pozitën e tij të vështirë politike sesa realitetin e protestuesve.

Në përfundim, ai u shpreh se kryeministri ndodhet në një situatë të rëndë për shkak të kësaj revolte popullore.

“Tallja dhe sarkazma ndaj tyre nuk mendoj se janë rastësore. Ato janë pjesë e një përpjekjeje për ta shfuqizuar kritikën dhe për ta paraqitur pakënaqësinë si të tepruar ose të importuar.

Por realiteti është ndryshe: burimi kryesor i revoltës nuk vjen nga jashtë Shqipërisë, por nga brenda saj; nga pakënaqësitë e akumuluara për standardin e jetesës, për mungesën e transparencës, për pengimin e drejtësisë, për korrupsionin, tenderët dhe krizën e besimit ndaj institucioneve.

Prandaj, reagimi i Ramës më shumë flet për pozitën e tij të vështirë politike sesa për protestuesit. Kur pushteti fillon ta zëvendësojë argumentin me ironi dhe sarkazëm, kjo shpesh tregon vështirësi për t’u përballur me thelbin e problemit.

Ai po mban ligjërata dhe nuk po merret me problemin! Rama është në gazep! E tregon sapo hap gojën!” – përmbylli Lis Bukuroca për “Bota sot”.

The post “Ironia nuk vjen kot” – Lis Bukuroca kritikon ashpër Ramën për deklaratën e fundit mbi shqiptarët e Kosovës appeared first on Albeu.com.

Prej një jave, ata flenë në sheshin përpara Bashkisë së Montpeljesë. Një tubim solidariteti u organizua të hënën në mbrëmje në Montpeje nga shoqatat “Un toit, un avenir et solidarité partagée”, të cilat i shoqërojnë dhe i mbështesin. Rreth 60 persona u mblodhën përpara Bashkisë.

Presidenti i Shoqatës ‘Solidarité Partagée’, e cila po e ndjek këtë familje prej javësh, tha për mediat franceze se, “Kjo situatë është e papranueshme. Fëmijët sëmuren nga të ftohtit. Është gjithmonë kështu. Kemi parë familje me fëmijë që qëndrojnë deri në katër muaj në rrugë. Kjo nuk është normale. Prefektura nuk po e bën pjesën e saj”.

Mediat franceze shkruajnë se, prefektura mban qëndrimin se kjo familje nuk është prioritet për përfitimin e strehimit emergjent.

Ky vendim justifikohet me faktin se familja ndodhet në situatë të parregullt dhe se Gjykata Administrative e Montpeljesë, më 8 dhjetor, ka rrëzuar kërkesën e tyre për të përfituar strehim emergjent.

Një tubim i ri solidariteti është parashikuar për të dielën, më 21 dhjetor, në orën 14:00, në sheshin përpara Bashkisë së Montpeljesë.

The post Emigruan për një jetë më të mirë, familja shqiptare fle në rrugët e Francës/ FOTOT appeared first on Albeu.com.

Tifozët e Kombëtare kanë “blinduar” çdo zonë të këtij stadiumi. Festa kuqezi ka nisur nëpër rrugë ndërsa flamujt dhe plisat janë ato që bien në sy.

Nuk kanë munguar as makinat e veshura me flamurin kuqezi ndërsa në Andorra këtë mbrëmje pritet të jenë të paktën 3 mijë shqiptarë.

The post Plisa dhe flamuj kuqezi, shqiptarët “pushtojnë” rrugët e Andorrës disa orë para ndeshjes së Kombëtares appeared first on Albeu.com.

Kreu i Shtetit vlerësoi rolin e Ahmetit si një ndër themeluesit e UÇK-së, ndërsa theksoi se tubimi i sotëm krah veteranëve në Tiranë dëshmon mbështetjen unanime të shqiptarëve ndaj luftës së drejtë për çlirimin e Kosovës.
“UÇK-ja bën krenar çdo shqiptar. Ajo është pjesë thelbësore e historisë sonë, sepse bëri një luftë të drejtë ndaj padrejtësisë shekullore”, vlerësoi Presidenti Begaj, i cili theksoi se UÇK-ja ka pasur gjithmonë mbështetjen e aleatëve tanë, pasi ka qenë një organizëm çlirues dhe jo okupues.

Gjatë bisedës me kreun e BDI-së Ali Ahmeti u diskutua edhe për faktorin shqiptar në rajon. Presidenti Begaj u shpreh për bashkëpunimin mes njëri-tjetrit dhe unitetin për çështjet që lidhen me identitetin kombëtar, paqen, sigurinë dhe prosperitetin e Ballkanit Perëndimor dhe integrimin Euroatlantik të tij.
Kreu i Shtetit garantoi mbështetjen e Shqipërisë ndaj faktorit politik shqiptar në rajon dhe përpjekjeve për të siguruar ndaj qytetarëve një jetesë sa më të mirë.

The post “UÇK-ja bën krenar çdo shqiptar”/ Në Tiranë për protestën, Presidenti Begaj pret në zyrë kreun e BDI-së appeared first on Albeu.com.

Personat që vendosin të largohen po e bëjnë këtë përmes kontratave të rregullta të punës, siç referohet nga shifrat e Eurostat për lejet e qëndrimit dhënë për herë të parë dhe arsyet e tyre.

Numri i individëve shqiptarë, që largohen për arsye punësimi, ka ardhur në rritje të ndjeshme vitet e fundit.

Eurostat raportoi se vetëm në 2022-2024, janë dhënë mesatarisht 20 mijë leje pune në vit, kryesisht në Itali, Greqi e Gjermani, nga rreth 3-4 mijë që jepeshin një dekadë më parë.

Që nga viti 2021, Bashkimi Europian, ka dhënë rreth 72 mijë leje qëndrimi për herë të parë për arsye punësimi për shtetasit shqiptarë.

Kjo shifër, që përfshin vetëm ikjet zyrtare, pa llogaritur ata të paregjistruar, që punojnë në të zezë, apo ata që ikin për punësim sezonal, është sa 13% e të punësuarve në sektorin privat jo bujqësor, sipas të dhënave të tjera të INSTAT.

Ikja në këto përmasa ka bërë që gjetja e fuqisë punëtore të bëhet një problem gjithnjë e më shqetësues, që po pengon planet e bizneseve vendase për të menaxhuar aktivitetin e përditshëm dhe mbi të gjitha për t’u zgjeruar me investime të reja.

Numri më i lartë i lejeve u dha në 2022, me rreth 22 mijë të tilla, por dhe në dy vitet në vijim janë dhënë mesatarisht 18-19 mijë lekë në vit.

Kryesojnë Greqia e Gjermania

Në vitin 2015, lejet e qëndrimit dhënë për arsye pune përbënin vetëm 4.5% të totalit, pasi pjesa më e madhe e tyre jepeshin, për arsye familjare (bashkim familjesh për emigrantët që ikën në vitet 2000).

Vala e re e emigracionit që nisi pas vitit 2016, ishte më e orientuar drejt punësimit. Në vitin 2024, sipas të dhënave të Eurostat, të përpunuara nga Monitor, rreth 29% e lejeve u dhanë për arsye punësimi, 51% për arsye familjare, 3.1% për arsye studimi dhe rreth 17% për arsye të tjera.

Në vitin 2024, Greqia kryesoi për numrin më të lartë të lejeve të dhëna për arsye punësimi, me 7.2 mijë.

Gjermania është bërë një destinacion gjithnjë e më i kërkuar, që je mesatarisht 4.5 mijë leje në vit dhe po tërheq kryesisht infermierë, mjekë e specialistë të teknologjisë së informacionit. Italia është shteti tjetër që vijon të janë rreth 3 mijë leje në vit.

Kroacia është një vend që po tërheq punonjës në ndërtim e në turizëm, me rreth 1.4 deri në 2 mijë lejë në vit. Një vend i preferuar ishte dhe Malta, në ndërtim e turizëm, por në 2024-n lejet e dhëna nga ky shtet u përgjysmuan në rreth 500.

Franca, që është pritësi më i madh i kërkesave për azil jep mesatarisht 400-500 leje për punë.

Tani ikja është përmes lejeve të punës, jo azilit

Numri i atyre që po ikin me leje pun,e është tashmë gati dy herë më i lartë se ata që kërkojnë të largohen përmes azilit.

Të dhënat e tjera të Eurostat bëjnë të ditur se në vitin 2022, kishte 15 mijë kërkesa për azil nga shtetasit shqiptarë në vendet e BE-së, në 2023 numri i tyre zbriti në 11 mijë dhe në 2024-n ishte 9.3 mijë./Monitor

The post Rreth 20 mijë shqiptarë në vit morën leje pune në BE, në tre vjet ikën 13% e të punësuarve në vend appeared first on Albeu.com.

Këto vonesa mund të vijnë, pasi atyre do t’u merren shenjat e gishtave dhe do t’u bëhet foro.

Më 12 tetor 2025 nis zbatimin Sistemi i Hyrje-Daljeve (EES), një mekanizëm i ri digjital kufitar që do të zëvendësojë vulat manuale të pasaportës me regjistrim elektronik në kufijtë e jashtëm të 29 vendeve europiane.

SchengenVisaInfo, ka publikuar një informacion të detajuar se çfarë do të ndryshojë për shtetasit që nuk janë pjesë e Bashkimit Europian, ku përfshihen dhe ata shqiptarë.

SchengenVisaInfo sqaron se për udhëtarët jo të BE-së, ky sistem i ri do të thotë: marrje shenjash të gishtërinjve, fotografi dhe kohë më të gjata përpunimi gjatë hyrjes/daljes (1.5 deri në 3 herë më shumë gjatë fazës fillestare të zbatimit).

Sistemi do të regjistrojë të gjithë shtetasit jo-BE që udhëtojnë në zonën Schengen për qëndrime afatshkurtra (deri në 90 ditë brenda çdo periudhe 180-ditore).

Sipas Komisionit Europian, EES do të zbatohet si për udhëtarët që kanë vizë, ashtu edhe për ata që përjashtohen nga viza.

EES do të mbledhë disa informacione si Imazhin e fytyrës (për të gjithë udhëtarët); Gjurmët e gishtave (vetëm për udhëtarët që nuk kanë vizë); Të dhënat biometrike të pasaportës; Datat dhe vendndodhjet e hyrjes/daljes.

Sistemi do të llogarisë automatikisht sa ditë keni qëndruar në zonën Schengen dhe sa ditë ju mbeten nga kuota prej 90 ditësh.

Të dhënat do të ruhen për 3 vjet (ose 5 vjet, nëse tejkaloni afatin e lejuar të qëndrimit).

Zbatimi do të jetë gradual. Vendet anëtare kanë afat deri më 10 prill 2026 për ta zbatuar plotësisht sistemin. Deri atëherë, në disa pika kufitare do të përdoret EES, ndërsa në të tjera do të vazhdohet me vulat tradicionale në pasaportë.

Sistemi i Hyrje/Daljeve (EES) do të zbatohet në 29 shtete europiane, duke përfshirë të 25 vendet anëtare të BE-së që janë pjesë e Shengenit, si edhe Islandën, Lihtenshtejnin, Norvegjinë dhe Zvicrën.

Jashtë këtij sistemi mbeten Irlanda dhe Qiproja, të cilat do të vazhdojnë të përdorin vulat e pasaportës. Për shembull, nëse fluturoni nga Dublini drejt Parisit, pasaporta ju vuloset kur dilni nga Irlanda dhe më pas skanohet në hyrje në Francë.

Kush duhet të regjistrohet në EES

Sistemi i ri i Hyrje/Daljeve (EES), do të përfshijë çdo shtetas të vendeve jashtë BE-së dhe zonës Shengen, që udhëton për qëndrime të shkurtra, deri në 90 ditë brenda një periudhe 180-ditore.

Në momentin e parë të regjistrimit, udhëtarët do të japin një foto të fytyrës në kohë reale, ndërsa ata që hyjnë pa vizë do të japin edhe katër gjurmë gishtash.

Për ata që udhëtojnë me vizë, gjurmët e gishtave nuk do të kërkohen sërish, pasi ruhen tashmë në sistemin VIS.

Fëmijët nën 12 vjeç nuk janë të detyruar të japin gjurmët e gishtave, por gjithsesi do të fotografohen.

Ky proces synon të përshpejtojë kalimet kufitare dhe të zëvendësojë sistemin e vjetshëm të vulave në pasaportë.

Gjatë regjistrimit të parë merret një foto në kohë reale e fytyrës dhe katër gjurmë gishtash për udhëtarët e përjashtuar nga viza.

Për mbajtësit e vizave, gjurmët e gishtave janë tashmë të regjistruara në sistemin VIS dhe nuk do të merren sërish për EES.

Fëmijët nën 12 vjeç përjashtohen nga dhënia e gjurmëve të gishtave, por gjithsesi do të fotografohen.

Në EES nuk regjistrohen qytetarët e BE-së, vendeve të SEE (Norvegji, Islandë, Lihtenshtejn) dhe Zvicrës, si edhe ata të Irlandës dhe Qipros.

Përjashtohen gjithashtu poseduesit e lejeve të qëndrimit ose vizave afatgjata (D), si dhe qytetarët e Andorrës, Monakos, San Marinos dhe Vatikani. Nga regjistrimi përjashtohen edhe diplomatët, krerët e shteteve, personeli i NATO-s, si dhe punëtorët kufitarë apo ekuipazhet e anijeve, avionëve dhe trenave ndërkombëtarë.

Pikat kryesore të sistemit të Hyrje-Daljeve (EES)

Fillimi: 12 tetor 2025 (zbatim i pjesshëm deri më 10 prill 2026)

Kush duhet të regjistrohet: Shtetasit jo-BE që vizitojnë për më pak se 90 ditë

Biometria: Foto për të gjithë + 4 gjurmë gishtash për udhëtarët pa vizë

Përjashtohen: Qytetarët e BE/SEE/Zvicrës, poseduesit e lejes së qëndrimit, si dhe shtetasit e Monakos, Andorrës, San Marinos dhe Vatikanit

Afati i ruajtjes së të dhënave: 3 vjet normalisht, 5 vjet nëse tejkalon afatin e qëndrimit

Ku zbatohet: 29 shtete europiane (vendet Shengen/SEE dhe Zvicra)

Përjashtime: Irlanda dhe Qiproja vazhdojnë me vulosje pasaporte

Koha e përpunimit: Pritet të zgjasë 1.5 deri 3 herë më shumë se vulosja aktuale e pasaportës

Kostoja: Pa pagesë (regjistrimi në EES nuk ka tarifë)./Monitor

The post Aktivizohet EES/ Europa digjitalizon kufijtë nga 12 tetori: Udhëtarët shqiptarë mund të hasen me vonesa në kufi appeared first on Albeu.com.

Këngëtarja e njohur emocionoi publikun me praninë e saj në skenë dhe aftësitë e saj të pafundme në vallëzim, ndërsa teatri ishte plot me fansa që nuk pushonin së kënduari dhe duartrokituri. Mediat sociale u përmbytën me video dhe pamje të mbrëmjes.

Ndër videot që u bënë virale në TikTok, spikati një moment në të cilin Eleni Foureira po përpiqej t’i argetonte fansat.

“Prit, e kam unë. I bëj të gjitha vetë… Jam shqiptare”, tha ajo me shaka, duke bërë që fansat e saj të qeshin

The post Në mes të koncertit, Eleni Foureira deklaron me krenari: Unë i bëj të gjitha, jam shqiptare appeared first on Albeu.com.