Çota ndërroi jetë në një spital në Tiranë, ku ndodhej nën kujdes mjekësor. Ai vuante prej vitesh nga një sëmundje e rëndë dhe për një periudhë të gjatë i ishte nënshtruar trajtimit me dializë, ndërsa e përballoi betejën shëndetësore me forcë dhe dinjitet.

Humbja e tij ka tronditur familjen, miqtë, ish-shokët e skuadrës, tifozët dhe mbarë komunitetin e Librazhdit. Besnik Çota vlerësohej jashtëzakonisht në qytet, si për kontributin e tij sportiv, ashtu edhe për cilësitë njerëzore.

Ai konsiderohej ndër futbollistët më të spikatur të dalë nga Sopoti i Librazhdit. Gjatë viteve ’90 u shqua si një prej lojtarëve më të mirë, duke luajtur në rolin e mesfushorit organizator dhe duke treguar teknikë të lartë, vizion në lojë dhe aftësi për të drejtuar skuadrën në fushë.

Me shiritin e kapitenit, Çota e udhëhoqi Sopotin në shumë përballje të rëndësishme. Paraqitjet dhe roli i tij në ekip e renditën mes emrave që kanë lënë gjurmë të forta në historinë e futbollit të Librazhdit.

Edhe pasi mbylli karrierën si lojtar, ai vijoi të qëndronte pranë futbollit duke zgjedhur rrugën e trajningut. Për shumë vite punoi me ekipet zinxhir të Sopotit, përpara se të drejtonte edhe skuadrën e parë.

Përvoja dhe përkushtimi i Besnik Çotës ndihmuan në edukimin dhe formimin e disa brezave të rinj futbollistësh. Ata që punuan me të e kujtojnë si një trajner të matur, korrekt dhe të palodhur.

Ndarja e tij nga jeta është një humbje e madhe për familjen, futbollin librazhdas dhe sportin shqiptar. Besnik Çota dha një kontribut të vyer për klubin e tij të zemrës dhe për të gjithë komunitetin sportiv.

Familjes Çota, të afërmve dhe komunitetit sportiv të Librazhdit u përcillen ngushëllimet më të sinqerta për këtë humbje të rëndë.

The post Futbolli librazhdas në zi, ndahet nga jeta Besnik Çota, ish-kapiten dhe ish-trajner i Sopotit appeared first on Albeu.com.