shqetesime Archives - Albeu.com

Pezullimi i marrëveshjes së grurit nga Rusia, rriten shqetësimet për furnizimin ushqimor global

E S — Sun, 30 Oct 2022 17:02:19 +0000

Presidenti amerikan Joe Biden paralajmëroi se uria globale mund të rritet për shkak të pezullimit nga Rusia të një marrëveshjeje të ndërmjetësuar nga OKB-ja për të lejuar kalimin e sigurt për anijet që transportojnë grurë ukrainas. Zoti Biden foli disa orë pasi Rusia njoftoi se do të ndalonte menjëherë pjesëmarrjen në marrëveshje, duke pretenduar se Ukraina ndërmori një sulm me dron të shtunën kundër anijeve të flotës ruse të Detit të Zi në brigjet e Krimesë së pushtuar. Ukraina e ka mohuar sulmin, duke thënë se Rusia ka goditur gabimisht me armët e veta.

Marrëveshja për grurin që u nënshkrua në korrik ka bërë të mundur eksportin e sigurt nga portet ukrainase të më shumë se 9 milionë tonëve grurë me 397 anije.

Sekretari i Përgjithshëm i OKB-së Antonio Guterres është “thellësisht i shqetësuar” për pezullimin e marrëveshjes dhe shtyu udhëtimin e tij në Algjer për Takimin e Nivelit të Lartë të Lidhjes Arabe me një ditë për t’u marrë me këtë çështje, tha të dielën një zëdhënës i OKB-së.

“Sekretari i Përgjithshëm vazhdon të angazhohet në kontakte intensive që rikthimin e Rusisë tek marrëveshja” tha në një deklaratë zëdhënësi i OKB-së Stephane Dujarric.

Zoti Guterres u kishte kërkuar të premten Rusisë dhe Ukrainës të rigjallëronin marrëveshjen. Zoti Guterres u kërkoi gjithashtu vendeve të tjera, kryesisht në Perëndim, të përshpejtojnë heqjen e pengesave që bllokojnë eksportet ruse të grurit dhe plehrave kimike.

Sekretari i Përgjithshëm i OKB-së nënvizoi urgjencën e rinovimit të marrëveshjes që skadon më 19 nëntor, “për të kontribuar në sigurinë ushqimore në mbarë botën dhe për të zbutur vuajtjet që kjo krizë e kostos globale të jetesës po shkakton tek miliarda njerëz”, tha zëdhënësi Dujarric.

Marrëveshja e grurit ka arritur të ulë 15 për qind çmimet globale të ushqimeve, nga kulmi i tyre në mars, sipas Kombeve të Bashkuara.

Presidenti ukrainas Volodymyr Zelenskyy e quajti vendimin rus të parashikueshëm dhe tha se Moska e ka përkeqësuar qëllimisht krizën ushqimore që nga shtatori. Aktualisht, rreth 176 anije të ngarkuara me grurë nuk po lejohen të lundrojnë nga portet e Ukrainës, tha ai.

“Është ushqim për më shumë se 7 milionë konsumatorë. Pse një grusht njerëzish diku në Kremlin mund të vendosin nëse do të ketë ushqim në tryezat e qytetarëve në Egjipt apo Bangladesh?” tha ai të shtunën në fjalimin drejtuar vendit.

Një anije me 40,000 ton drithëra e nisur për në Etiopi në kuadër të programit të ndihmës së Kombeve të Bashkuara nuk mund të largohej nga Ukraina të dielën si rezultat i pezullimit të marrëveshjes nga Rusia, tha Oleksandr Kubrakov, ministri i infrastrukturës i Ukrainës. Shefi i politikës së jashtme të Bashkimit Evropian, Josep Borrell, i kërkoi Rusisë të anulojë vendimin e saj në një postim në Twitter të dielën.

Edhe Ministri i Mbrojtjes i Turqisë, Hulusi Akar është në bisedime me homologët e tij në Moskë dhe Kiev në përpjekje për të rigjallëruar marrëveshjen, tha ministria të dielën. Ai u ka kërkuar palëve që të shmangin çdo “provokim” që mund të ndikojë në vazhdimin e marrëveshjes, thuhet në një deklaratë.

“Inspektimi i anijeve të ngarkuara me grurë që presin pranë Bosforit do të vazhdojë sot dhe nesër,”- thuhet në deklaratë./REL

The post Pezullimi i marrëveshjes së grurit nga Rusia, rriten shqetësimet për furnizimin ushqimor global appeared first on Albeu.com.

Uzuni “dridh” Kombëtaren, rrezikon ndeshjet me Izraelin dhe Islandën

E S — Mon, 19 Sep 2022 14:29:03 +0000

Sulmesi më në formë i momentit në kombëtare, Myrto Uzuni ka shqetësuar së fundmi Edi Rejan.

Uzuni i cila ka krijuar një marrëdhënie të ngushtë me golin në këtë fillim sezoni me Granadan në La Liga 2 pasi ka shënuar 6 gola në 6 ndeshjet rrezikon dy ndeshjet me Izraelin dhe Islandën pasi ka shfaqur disa shqetësime dhe është mbajtur në mbikqyrje nga stafi i kombëtares.

Ka ende disa kohë deri në sfidën e 24 shtatorit dhe shpresa është që ai të jetë gati, por situata e beratasit do të monitorohet nga dita në ditë./albeu.com

The post Uzuni “dridh” Kombëtaren, rrezikon ndeshjet me Izraelin dhe Islandën appeared first on Albeu.com.

SHBA heziton të lirojë fondet për Afganistanin për shkak të shqetësimeve lidhur me terrorizmin

E S — Thu, 18 Aug 2022 06:16:28 +0000

Që nga evakuimi i dhjetëra mijëra aleatëve afganë pas tërheqjes së forcave amerikane nga ky vend një vit më parë, Departamentit i Shtetit është ngarkuar me detyrën e ofrimit të ndihmave humanitare për afganët që jetojnë nën regjimin taleban, të cilët tani po përballen me mungesa serioze ushqimore. Pavarësisht garancive të dhëna nga talebanët, Shtetet e Bashkuara ende nuk janë të gatshme, që në një të ardhme të afërt t’i lirojnë fondet e ngrira të bankës qendrore të Afganistanit.

Grupet e të drejtave të njeriut dhe organizatat e ndihmave humanitare thonë se situata për afganët është shumë e rëndë dhe disa prej tyre janë detyruar të shesin organet e tyre, ose fëmijët e tyre për të mbijetuar. Një vit pas tërheqjes së trupave dhe diplomatëve amerikanë, Shtetet e Bashkuara janë ende donatori më i madh i ndihmave humanitare për Afganistanin. Fereshta Abbasi është eksperte për Afganistanin në organizatën Human Rights Watch.

“Sipas statistikave të fundit që ka publikuar Programi Botëror i Ushqimit, 90 për qind e afganëve po përballen me pasiguri ushqimore një vit pas marrjes së pushtetit nga talebanët. Njerëzit po vdesin nga uria. Pra, ata nuk kanë asgjë për të ngrënë”, thotë ajo.

Talebanët festuan të hënën një vjetorin e marrjes së pushtetit nga qeveria e mbështetur nga Shtetet e Bashkuara në Kabul, duke thënë se ata dëshirojnë të kenë marrëdhënie të forta politike dhe ekonomike me të gjitha vendet e rajonit dhe botës.

Por administrata e Presidentit Biden ka ngritur dyshime rreth garancive të ofruara nga talebanët, duke përmendur vrasjen muajin e kaluar të udhëheqësit të Al-Kaidës, Ayman al-Zawahiri, në një sulm amerikan me dron në një shtëpi ku ai strehohej në zemër të Kabulit.

Zëdhënësi i Departamentit të Shtetit Ned Price tha se administrata e Presidentit Biden nuk është e gatshme që në një të ardhme të afërt t’i lirojë fondet e ngrira në Shtetet e Bashkuara të bankës qendrore të Afganistanit, por ajo ka negociuar me bankën për muaj të tërë në përpjekje për të gjetur një zgjidhje për këtë çështje.

“Tani ne po analizojmë mekanizmat që mund të vendosen për t’u siguruar që këto 3.5 miliardë dollarë të përdoren në mënyrë efektive për të ndihmuar popullin e Afganistanit dhe që ato të mos devijohen për përdorim nga grupet terroriste ose për arsye të tjera”, thotë zëdhënësi i Departamentit të Shtetit, Ned Price.

Ekspertët i thanë Zërit të Amerikës se fakti që udhëheqësi i Al-Kaidës po jetonte në mes të Kabulit me familjen e tij i ka dhënë një goditje përpjekjeve për lirimin e fondeve të bllokuara.

“Duke marrë parasysh atë që ndodhi me al-Zawahrin, tani Shtetet e Bashkuara do të marrin një qëndrim edhe më të ashpër dhe nuk do të bien dakord për asnjë lloj marrëveshjeje për t’i kaluar ato fonde përsëri në kontrollin afgan, nëse nuk ekziston një mekanizëm i qartë, që do t’ia kufizonte mundësinë talebanëve për të kontrolluar mënyrën e përdorimit të tyre. Talebanët do të mbajnë një qëndrim të ashpër. Talebanët, për arsye politike, duhet të sigurojnë legjitimitetin e udhëheqësve të tyre”, thotë Michael Kugelman nga Qendra Wilson.

Ekspertët thonë se komuniteti ndërkombëtar, përfshirë Shtetet e Bashkuara, duhet të rrisin ndihmën humanitare për civilët afganë. Por ata gjithashtu po u bëjnë thirrje talebanëve që të rishqyrtojnë përparësitë e tyre dhe të trajtojnë nevojat themelore të njerëzve në vend që të kufizojnë më tej të drejtat e grave në Afganistan./VOA

The post SHBA heziton të lirojë fondet për Afganistanin për shkak të shqetësimeve lidhur me terrorizmin appeared first on Albeu.com.

Keni të ftohtë në çdo moment? Mësoni arsyet për çfarë duhet të shqetësoheni

A M — Mon, 03 Jan 2022 08:42:48 +0000

Njerëzit e ndjejnë të ftohtin dhe të nxehtin në mënyra të ndryshme, por disa prej kanw ftohtë gjatë gjithë kohës dhe nuk e dinë pse. Për të gjithë ju që keni mornica sa herë që të jetë pak më freskët, mw poshtw gjeni disa arsye pse mërdhini kaq shumë dhe çfarë të bëni për këtë.

Gjëndra tiroide mund të mos funksionojë mirë

Hipotiroidizmi është një kusht gjatë të cilit gjëndra tiroide nuk prodhon mjaftueshëm hormon dhe kjo pastaj mund të çojë në intolerancë të të ftohtit. Hormonet tiroide ndihmojnë në rregullimin e metabolizmit dhe temperaturës, dhe kur kemi mungesë të tyre, fillojmë të kemi të ftohtë.

Simptoma të tjera të hipotiroidizmit përfshin lodhje dhe rrahje të ulëta të zemrës. Si ta rregulloni këtë? Shkoni tek mjeku. Një ekzaminim mjekësor mund t’ju ndihmojë ta gjeni nëse keni sasinë e nevojshme të hormoneve tiroide në trup.

Ndoshta s’po pini mjaft ujë

Uji e rritë metabolizmin, duke e ndihmuar trupin të shkrijë ushqimin dhe të krijojë energji dhe nxehtësi. Nëse jeni të dehidratuar, mund t’ju mungojë kjo energji dhe nxehtësi e cila e ngroh trupin. Si ta rregulloni këtë? Pini më shumë ujë.

Mund të keni anemi

Anemia është një tjetër kusht shëndetësor që mund t’ju bëjë të keni këmbë dhe duar të ftohta. Anemia ndodh kur trupi ka mungesë të qelizave të kuqe të gjakut, të cilat e dërgojnë oksigjenin në organe. Pastaj ka edhe anemi për shkak të mungesës së hekurit që ndodh gjatë shtatzënisë, menstruacioneve ose humbjes së gjakut dhe konsumimit të ulët të hekurit. Simptoma të tjera të anemisë përfshin lëkurë të zbehtë, rrahje të shpejta të zemrës, lodhje dhe kokëdhimbje.

Si ta rregulloni këtë? Nëse dyshoni se keni anemi, duhet të shkoni tek mjeku dhe t’i bëni testet e nevojshme.

Mund të mos jeni duke fjetur mjaftueshëm

Gjumi i mirë është tepër i rëndësishëm për rregullimin e temperaturës në trup, kështu që, nëse vazhdoni të dridheni nga të ftohtit, arsyeja mund të jetë mjaft e thjeshtë. Si ta rregulloni këtë? Rregullojeni orarin e gjumit dhe sigurohuni që jeni duke bërë gjumë mjaftueshëm për t’i rimbushur bateritë tua.

Fenomeni i Raynaudit

Fenomeni i Raynaudit apo thjeshtë Raynaudi, vërehet lehtë: i bën gishtat të marrin ngjyrë të bardhë ose të kaltër. Ky është një çrregullim i rrallë që prekë arteriet, duke reduktuar qarkullimin e gjakut në gishta dhe duke i bërë ata të ftohtë. Kur reduktohet qarkullimi gjakut, gishtat bëhen të zbehtë ose të kaltër, dhe kur gjaku kthehet ata bëhen prapë të kuq dhe fillojnë të kenë dhimbje, transmeton pergatit.com.

Si ta rregulloni këtë? Shkoni tek mjeku. Raynaudi mund të shkaktohet nga temperaturat e ftohta, stresi, kontakti me disa kimikate dhe faktorë të tjerë. Trajtimi përfshin ilaçe, operacion apo ndryshime në mënyrën e jetesës për t’i eliminuar shkaqet.

Jeni shumë të dobët (të hollë)

Kur jeni nënpeshë, nuk keni mjaftueshëm yndyra trupore për t’u izoluar nga të ftohtit. Nëse jeni duke humbur peshë me qëllim ose thjeshtë nuk po hani shumë vetë, kjo mund ta ‘thyejë’ metabolizmin tuaj dhe të ndikojë në rregullimin e temperaturës në trup.

Si ta rregulloni këtë? Hani shëndetshëm dhe një dietë të balancuar që i përshtatet moshës tuaj.

Mund të keni qarkullim të dobët të gjakut

Sëmundja e arteries periferike mund t’i bëjë arteriet të dështojnë të dërgojnë gjak në organe dhe inde, duke na bërë të ndjejmë të ftohtë. Kur grumbullohen pllaka në arterie (arterioskleroza), arteriet bëhen më të ngushta, duke ndikuar në rrjedhjen e gjakut në duar dhe këmbë, duke shkaktuar ftohje dhe mpirje.

Si ta rregulloni këtë? Shkoni tek mjeku. Trajtimi për sëmundjen e arteries periferike përfshin ndryshime në mënyrën e jetesës (si lërja e duhanit, për shembull) dhe trajtimi mjekësor, duke përfshirë edhe operacion në disa raste.

The post Keni të ftohtë në çdo moment? Mësoni arsyet për çfarë duhet të shqetësoheni appeared first on Albeu.com.