Policia e Kosovës është vënë në lëvizje pas një njoftimi për një mjet të dyshuar shpërthyes në Stacionin e Autobusëve në Prishtinë, të enjten pasdite.

Sipas zëdhënësit të Policisë së Kosovës për rajonin e Prishtinës, Enis Pllana, informacioni është pranuar rreth orës 16:30.

Menjëherë pas raportimit, njësitë policore kanë siguruar perimetrin dhe kanë marrë masat e nevojshme të sigurisë për trajtimin e situatës.

“Në vendin e ngjarjes janë angazhuar njësitet përkatëse policore, të cilat po trajtojnë informatën dhe po kryejnë kontrollet e nevojshme”, ka deklaruar Pllana.

Aktualisht nuk ka të dhëna të tjera për llojin e mjetit të dyshuar dhe as konfirmim nëse gjatë kontrolleve është gjetur ndonjë pajisje shpërthyese.

Informacionet e mëtejshme pritet të bëhen publike nga policia pasi të përfundojnë kontrollet.

The post Prishtinë, raportohet për mjet të dyshuar shpërthyes në Stacionin e Autobusëve appeared first on Albeu.com.