Sipas një njoftimit të FSHF-së, sulmuesi i Kombëtares, Rey Manaj, gjeti sërish rrugën e rrjetës me skuadrën e tij Al Sharjah, duke shënuar golin e dytë në fitoren 2-0 ndaj Al Dhafra.

Ky ishte goli i tij i dytë për këtë sezon me fanellën e klubit arab.

FSHF cilëson se Nazmi Gripshi po kalon një formë të jashtëzakonshme me FC Astana.

Në fitoren 5-3 ndaj Aktobe, ai realizoi nga pika e bardhë, duke e çuar në 16 numrin e golave sezonal në kampionatin kazak dhe duke kryesuar renditjen e golashënuesve.

Gjithashtu, rrugën e rrjetës e gjeti edhe Jasir Asani, i cili i dha fitoren skuadrës së Esteghlal FC ndaj Mes Rafsanjan me një gol vendimtar në minutën e 11-të të takimit.

Në njoftim thuhet se në Turqi, Arlind Ajeti, ishte protagonist me një asist në barazimin 1-1 të Bodrumspor në transfertë ndaj Erokspor.

Qendërmbrojtësi kuqezi shërbeu saktë për Fredy në minutën e 29-të, duke zhbllokuar rezultatin.

Në Itali, Ylber Ramadani, u shpall lojtari më i mirë i ndeshjes në takimin mes Leçe dhe Sassuolo, të mbyllur në barazim 0-0.

Mesfushori kuqezi shkëlqeu me një performancë shumë të mirë dhe ndikim të madh në mesfushë.

Sipas FSHF-së, moment i veçantë ka qenë edhe për Arbër Hoxhën, i cili e nisi si titullar ndeshjen Dinamo Zagreb – Osijek, ndërsa para takimit mori çmimin si “Lojtari i Muajit” në kampionatin kroat, në vlerësim të paraqitjeve të tij të shkëlqyera dhe kontributit të madh për skuadrën e tij.

Një tjetër lajm pozitiv, ishte rikthimi në fushë i Ardian Ismajlit, që ka lënë pas dëmtimin dhe mori disa minuta në fitoren e Torinos ndaj Napolit.

Titullarë këtë javë ishin gjithashtu Thomas Strakosha, Enea Mihaj, Berat Gjimshiti, Medon Berisha, Juljan Shehu, Kristjan Asllani, Qazim Laçi, Adrion Pajaziti, Mirlind Daku dhe Taulant Seferi.

The post Paraqitjet e legjionarëve, Arbër Hoxha shpallet lojtari i muajit në Kroaci appeared first on Albeu.com.