Shoqatat deklarojnë se Kuvendi nuk ka miratuar ndryshimet e nevojshme për pagat e gjyqtarëve dhe prokurorëve.

Me vendimin nr. 15, datë 17.02.2026, Gjykata Kushtetuese pranoi kërkesën për shfuqizimin e neneve 1 dhe 2, pika 2, të ligjit nr. 33/2023, datë 25.05.2023 “Për një ndryshim në ligjin nr. 96/2016 “Për statusin e gjyqtarëve dhe prokurorëve në Republikën e Shqipërisë”, të ndryshuar”. Kërkesa ishte paraqitur nga Unioni i Gjyqtarëve dhe më pas iu bashkua edhe Shoqata Kombëtare e Gjyqtarëve.

Sipas shoqatave, Gjykata vlerësoi se ndryshimet e miratuara nga Kuvendi kishin cenuar statusin financiar të magjistratëve, pasi kishin sjellë një ulje të fshehur të pagave. Në të njëjtin vendim u përcaktuan edhe kriteret kushtetuese mbi të cilat duhej të hartohej formula e re e pagave, ndërsa Kuvendit iu la kohë deri më 31 korrik 2026 për të miratuar ndryshimet ligjore përkatëse.

“Me mbarimin e afatit të lënë në dispozicion, konstatojmë se nga ana e Kuvendit nuk është vepruar me miratimin e ndryshimeve ligjore”, thuhet në reagimin e përbashkët të organizatave të magjistratëve.

Shoqatat theksojnë se mungesa e veprimit nga Kuvendi nuk ka krijuar boshllëk ligjor, pasi Gjykata Kushtetuese ka përcaktuar paraprakisht mënyrën e zbatimit në këtë situatë. Për këtë arsye, duke nisur nga 1 gusht 2026, pagat e magjistratëve duhet të përllogariten sipas formulës që i referohet pagës së funksionarit të administratës së lartë publike, në përputhje me vendimin nr. 35/2022 të Gjykatës Kushtetuese.

E njëjta formulë duhet të zbatohet edhe në mënyrë prapavepruese për periudhën nga 1 prill 2023 deri më 31 korrik 2026. Shoqatat kanë bërë të ditur se do të ndjekin nga afër zbatimin e vendimit nr. 15, datë 17.02.2026, ndërsa u kanë kërkuar institucioneve dhe zyrtarëve përgjegjës të respektojnë detyrimet që burojnë nga neni 132, pika 1, i Kushtetutës së Republikës së Shqipërisë.

Unioni i Gjyqtarëve, Shoqata Kombëtare e Gjyqtarëve dhe Shoqata e Prokurorëve të Republikës së Shqipërisë shprehen se do të vijojnë të jenë të bashkuara në këtë qëndrim dhe do të monitorojnë çdo hap të ndërmarrë për zbatimin e vendimit. Ato kanë ritheksuar gjithashtu gatishmërinë për të bashkëpunuar në mënyrë konstruktive me institucionet përgjegjëse, me synim garantimin e standardeve kushtetuese dhe të statusit të magjistratit.

The post Kuvendi nuk ndryshoi ligjin brenda afatit, shoqatat kërkojnë zbatimin e formulës së re për pagat e magjistratëve appeared first on Albeu.com.

Në deklaratën e saj, shoqata u shpreh se e ka ndjekur me vëmendje këtë çështje dhe e konsideron atë një prej kërkesave të qarta dhe unanime të Konferencës së Gjyqtarëve, të zhvilluar më 9 tetor 2025.

Gjyqtarët e pritën pozitivisht vendimmarrjen e Këshillit të Qarkut Shkodër, duke e cilësuar atë si një hap të rëndësishëm drejt përmbylljes së procedurës administrative për njohjen dhe dhënien e këtij statusi.

Po ashtu, Shoqata Kombëtare e Gjyqtarëve, u bëri thirrje edhe institucioneve të tjera përgjegjëse që ta finalizojnë sa më shpejt procesin e njohjes dhe dhënies së statusit “Dëshmori i Atdheut” për gjyqtarin Kalaja, i cili u vra më datë 6 tetor në krye të detyrës.

Sipas tyre, ky është trajtimi i duhur dhe i ligjshëm për çdo person që humb jetën gjatë ushtrimit të detyrës.

The post Shoqata Kombëtare e Gjyqtarëve mbështet statusin “Dëshmor i Atdheut” për Astrit Kalanë appeared first on Albeu.com.

Ish-zëvendëskryeministrja Belinda Balluku, po hetohet nga SPAK për ‘shkelje të barazisë në tendera’ për Unazën e Madhe dhe për tunelin e Llogarasë, ndërkohë që GJKKO e pezulloi atë nga detyra.

Pas këtij vendimi, kryeministri veproi duke kundërshtuar vendimin, ndërsa e çoi çështjen në Gjykatën Kushtetuese.

Në reagimin e Shoqatës së Gjyqtarëve, çdo deklaratë në lidhje me çështjet e gjyqësorit, është presion politik.

“Ndarja dhe balancimi i pushteteve është një nga parimet themelore të demokracisë, prandaj pavarësia e pushtetit gjyqësor, arbitrit final për zgjidhjen e të gjitha mosmarrëveshjeve, përbën një gur themeli për ndërtimin e shtetit të së drejtës. Kjo pavarësi vihet në rrezik jo vetëm nga veprime konkrete që synojnë kufizimin e sferës së kompetencave të këtij pushteti, por edhe nga çdo akt ose deklaratë që perceptohet si kërcënim ose presion politik ndaj veprimtarisë gjyqësore apo që ul reputacionin e organeve të drejtësisë në sytë e publikut dhe, në këtë mënyrë, minon besimin e tij tek këto organe”, thuhet në reagim.

Reagimi:

Shoqata Kombëtare e Gjyqtarëve të Republikës së Shqipërisë ka ndjekur me vëmendje prej disa ditësh komunikimin publik të Kryeministrit të vendit lidhur me çështjen gjyqësore në ngarkim të Zëvendëskryeministres dhe njëkohësisht Ministres së Infrastrukturës dhe Energjisë, e cila është duke u shqyrtuar në të njëjtën kohë nga Gjykata Kushtetuese, si dhe nga gjykatat e posaçme. Shoqata shpreh shqetësimin dhe indinjatën lidhur me qasjen që kreu i pushtetit ekzekutiv ka zgjedhur të bëjë për këtë problematikë, e cila është pjesë e juridiksionit të pushtetit gjyqësor. Nën petkun e ankesës për uzurpimin e pushteteve ekzekutiv dhe legjislativ nga ai gjyqësor në të vërtetë fshihet një mesazh presioni ndaj organeve të drejtësisë që kanë për shqyrtim çështjen në fjalë. Gjithashtu, mesazhe të tilla të përditshme të ushqyera ndaj publikut të gjerë synojnë të krijojnë një klimë mosbesimi ndaj pushtetit gjyqësor dhe mund të përdoren më tej si pretekst për marrjen e masave erozive ndaj këtij të fundit.

Shoqata rithekson se ndarja dhe balancimi i pushteteve është një nga parimet themelore të demokracisë, prandaj pavarësia e pushtetit gjyqësor, arbitrit final për zgjidhjen e të gjitha mosmarrëveshjeve, përbën një gur themeli për ndërtimin e shtetit të së drejtës. Kjo pavarësi vihet në rrezik jo vetëm nga veprime konkrete që synojnë kufizimin e sferës së kompetencave të këtij pushteti, por edhe nga çdo akt ose deklaratë që perceptohet si kërcënim ose presion politik ndaj veprimtarisë gjyqësore apo që ul reputacionin e organeve të drejtësisë në sytë e publikut dhe, në këtë mënyrë, minon besimin e tij tek këto organe. Komisioni Evropian ne raportet për Shqipërisë ka adresuar si shqetësim vazhdimin e përpjekjeve te ndërhyrjes dhe presionit ndaj sistemit gjyqësor nga zyrtarë të lartë publikë dhe politikanë.

Gjyqtarët janë të pavarur dhe i nënshtrohen vetëm Kushtetutës dhe ligjeve e si të tillë qëllimi i misionit të tyre nuk është fitimi i pëlqimit të shumicës së publikut apo një pjese të tij, por zbatimi me fanatizëm i vullnetit të sovranit të shprehur në këto akte. Vendimet gjyqësore mund të jenë të papëlqyeshme për disa subjekte, por kjo nuk i bën ato ilegjitime, pasi sistemi demokratik i qeverisjes vepron brenda kufijve që i përcaktohen nga standardet e shtetit të së drejtës dhe zbatuesit finalë të këtyre standardeve janë gjyqtarët. Në këtë kuadër, Shoqata Kombëtare e Gjyqtarëve të Republikës së Shqipërisë fton dhe i kërkon secilit zyrtar të lartë të dy pushteteve të tjera që të respektojë pavarësinë e gjyqtarëve në vendimmarrjen e tyre dhe të distancohet nga çdo sjellje që e cenon atë. Ndërhyrja në veprimtarinë e gjyqtarëve gjatë zhvillimit të procedurave gjyqësore përbën formën më të rrezikshme në shkeljen e parimit të ndarjes së pushteteve, pasi ka si qëllim deformimin e vendimmarrjes nëpërmjet formave të ndryshme të presionit.

The post Deklaratat e Ramës për Ballukun, reagon Shoqata Kombëtare e Gjyqtarëve: Presion politik ndaj veprimtarisë gjyqësore appeared first on Albeu.com.

Reagimi:

Shoqata Kombëtare e Gjyqtarëve të Republikës së Shqipërisë ka ndjekur me mjaft vëmendje dhe interes të gjithë procesin e hartimit të dokumentit analitik të hartës së re gjyqësore të përgatitur nga Këshilli i Lartë Gjyqësor, në konsultim dhe bashkëpunim edhe me aktorë të tjerë të procesit.

Reforma në sistemin e drejtësisë, e mbështetur që në krye të herës nga ana e Shoqatës me mendime dhe nisma propozuese, si një ndër qëllimet e saj kryesore ka ndërtimin e një pushteti gjyqësor efiçent, në pikëpamje kohore, cilësore dhe ekonomike. Për ta realizuar këtë lipset projektimi i një strukture gjyqësore që ta maksimizojë këtë qëllim si dhe një shpërndarje e studiuar e burimeve njerëzore në këtë aspekt.

Edhe pse procesi i vettingut krijoji boshllëqe të mëdha në pushtetin gjyqësor kjo nuk e zbehu aspak, përkundrazi e shtoi vendosmërinë e subjekteve të angazhuara në procesin e skicimit të hartës së re gjyqësore, e cila do të shërbejë jo vetëm për të zbutur sado pak pasojat e këtij procesi të nevojshëm për sistemin e drejtësisë, por edhe për t’i dhënë vendit një shërbim gjyqësor sa më cilësor në të ardhmen. Shoqata Kombëtare e Gjyqtarëve të Republikës së Shqipërisë vlerëson maksimalisht punën gati tre vjeçare të udhëhequr deri më tani nga Këshilli i Lartë Gjyqësor lidhur me analizën dhe projektimin e hartës së re gjyqësore.

Gjithashtu, Shoqata shprehet se harta e re do t’i përgjigjet më së miri nevojave të qytetarëve për dhënien e një drejtësie cilësore dhe në kohë të barabartë për të gjithë. Specializimi i gjyqtarëve dhe ecja me shpejtësi të njëjtë e çështjeve të ngjashme, në të gjithë gjykatat e Republikës, përbën një synim dhe sfidë që do të përmbushet pa më të voglin dyshim nga riorganizimi gjyqësor i parashikuar në këtë dokument. Për këtë shkak, ajo mbështet dhe inkurajon miratimin sa më parë të këtij dokumenti me rëndësi strategjike për të tashmen dhe të ardhmen e drejtësisë në vendin tonë.

Së fundi, Shoqata shprehet e angazhuar që, si gjithmonë, të mos e kursejë ndihmën e saj për çdo iniciativë që çon në përmirësimin e standardit të dhënies së drejtësisë në vendin tonë.

The post Shoqata Kombëtare e Gjyqtarëve: Harta e re gjyqësore do t’i përgjigjet më së miri nevojave të qytetarëve appeared first on Albeu.com.