Mëngjesin e 24 korrikut 2026, autoritetet policore në Shkup u njoftuan për një ngjarje rrugore në magjistralen që lidh kryeqytetin me Pikëkalimin Kufitar Bllacë e Poshtme.

Sipas të dhënave nga Ministria e Punëve të Brendshme të Maqedonisë, në incident u përfshinë dy automjete me regjistrim kosovar. Njëra veturë, tip “Kia”, drejtohej nga K.C., 33 vjeç, ndërsa pas timonit të “Volkswagen Golf” ndodhej S.J., 61 vjeç, të dy nga Kosova.

Pas përplasjes, si drejtuesit e mjeteve ashtu edhe disa pasagjerë pësuan pasoja shëndetësore. Lëndime të rënda trupore morën të dy shoferët, si dhe S.J., 54 vjeçe dhe E.J., 20 vjeç, të cilët udhëtonin në automjetin “Volkswagen Golf”. Ndërkohë, dy bashkëudhëtarët e tjerë të po kësaj veture, B.H., 23 vjeç dhe B.I., 35 vjeç, kanë marrë plagë trupore. Të gjithë të aksidentuarit janë shtetas të Republikës së Kosovës.

Ekipet mjekësore i pranuan të plagosurit në Spitalin e Përgjithshëm “8 Shtatori” dhe në Qendrën e Urgjencës pranë kompleksit klinik “Nënë Tereza” në Shkup, ku u konstatuan dhe u trajtuan dëmtimet e tyre.

Prokurori publik ka dhënë urdhër që drejtuesi i makinës “Kia”, K.C., të ndalohet sapo të lirohet nga spitali. Po ashtu, njësiti hetimor i SPB Shkup ka kryer këqyrjen e vendit ku ndodhi aksidenti për të sqaruar rrethanat e plota të ngjarjes.

The post Gjashtë qytetarë nga Kosova pësojnë lëndime në përplasjen e dy veturave në aksin Shkup – Bllacë appeared first on Albeu.com.

Drejtori i Ndërmarrjes Publike për Rrugë Shtetërore, Koce Trajanovski, bëri të ditur sot se në muajin gusht pritet të nisë ndërtimi i pjesës së dytë të autostradës Shkup-Bllacë, ndërsa realizimi i punimeve do të zgjasë afërsisht katër vjet.

Sipas tij, ky projekt do të financohet përmes një granti në vlerë prej 30.8 milionë euro dhe një huaje prej 167.6 milionë euro.

Trajanovski sqaroi se segmenti i ri i autostradës do të ketë gjatësi 10.5 kilometra, ndërsa bashkë me 1.5 kilometrat e ndërtuar më herët, gjatësia totale e autostradës deri në kufi do të arrijë në 12 kilometra.

“Granti është 30,8 milionë euro, ndërsa kredia (huaja) është 167,6 milionë euro. Gjatësia e kësaj autostrade është 10,5 kilometra. Më parë janë ndërtuar 1,5 kilometra, kështu që gjatësia totale nga nyja Stenkovec pranë Shkupit deri te kufiri është 12 kilometra. Këto 10,5 kilometra, që janë objekt i huasë së sotme, do të kenë në të dy drejtimet nga dy korsi me gjerësi 3,5 metra dhe një shirit anësor prej 2,5 metrash. Gjerësia totale e rrugës do të jetë 27 metra”.

Ai theksoi se traseja kalon në terren kodrinor dhe malor, si pjesë e masivit të Malit të Zi të Shkupit, çka e bën ndërtimin jashtëzakonisht të vështirë. Për këtë arsye, projekti përfshin 5 tunele me dy gypa, me gjatësi të përgjithshme prej rreth 5 kilometra, 9 ura me gjatësi totale 2,5 kilometra, 11 mbikalime, 4 galeri për stabilizimin e pjerrësisë me gjatësi nga 1 kilometër secila, si dhe 9 mure mbajtëse, të cilat po ashtu do të shërbejnë për stabilizimin e pjerrësisë”.

“Presim që ndërtimi të fillojë në gusht të këtij viti. Sipas kontratës, periudha e ndërtimit është afërsisht 4 vjet. Është zgjedhur konsulenti, është zgjedhur kontraktori, ndërsa mbikëqyrja është në fazën e vlerësimit dhe presim që të zgjidhet së shpejti”, tha Koce Trajanovski, drejtor i Ndërmarrjes Publike për Rrugët Shtetërore.

The post Ndërtimi i autostradës Shkup – Bllacë nis në gusht, vlera e projektit 198.4 milionë euro appeared first on Albeu.com.