Zëvendëskryeministrja dhe Ministrja e Drejtësisë në detyrë, Donika Gërvalla, qëndroi sot në Shtëpinë Muze të shkrimtarit Ymer Elshani në Poklek të Drenasit, ku bëri homazhe për jetën, krijimtarinë dhe flijimin e njërit prej shkrimtarëve dhe intelektualëve më të spikatur shqiptarë, i vrarë së bashku me pjesën më të madhe të familjes nga forcat serbe gjatë luftës në Kosovë.

Ministrja Gërvalla u shpreh se “Shtëpia muze e shkrimtarit Ymer Elshani është ai vendi që dëshmon se historia e popullit tonë liridashës nuk shkruhet vetëm me data e ngjarje, por edhe me jetët dhe veprat e atyre që i dhanë shpirt ndërgjegjes kombëtare”.

Ajo theksoi më tej se regjimet gjenocidale nuk kanë frikë vetëm nga armët, por edhe nga librat, mendimi i lirë dhe nga njerëzit që i japin shpirt e vetëdije një kombi, siç ishte Ymer Elshani.

“Serbia nuk synoi vetëm jetët e shqiptarëve, por, edhe intelektualët, shkrimtarët dhe krijuesit tanë. Prandaj, dhe vrasja e tij dhe e familjes së tij gjatë luftës ishte pjesë e politikës gjenocidale të Serbisë, e cila nuk synoi vetëm shkatërrimin fizik të shqiptarëve, por edhe goditjen e mendimit, kulturës dhe kujtesës sonë kolektive. Në Poklek të Drenasit, ai u vra nga forcat serbe bashkë me bashkëshorten, katër djemtë, nënën dhe shumë civilë të tjerë”, deklaroi Ministrja Gërvalla.

Duke folur për figurën e Elshanit, ajo tha se ai ishte ndër emrat më të rëndësishëm të letërsisë shqipe për fëmijë dhe të rinj, një autor që përmes veprës së tij formoi breza të tërë me dashuri për gjuhën, kulturën dhe identitetin shqiptar.

Gërvalla shprehu gjithashtu falënderim të veçantë për Teuta Elshanin, vajzën e shkrimtarit dhe të vetmen të mbijetuar të familjes, për angazhimin e saj në ruajtjen e trashëgimisë familjare, duke mundësuar që shtëpia e Ymer Elshanit të kthehet në muze dhe në një dëshmi të përhershme të çmimit të rëndë që populli i Kosovës pagoi për liri.

“Dhe pikërisht, kujtimi për Ymer Elshanin është kujtimi i çmimit të lartë të lirisë sonë dhe një zotim i përhershëm për ta mbrojtur Republikën e Kosovës edhe më fort e me dinjitet, me të vërtetën historike, të ndërtuar mbi sakrificën dhe mbi gjakun e gjithë atyre që ranë për lirinë e saj”, tha Ministrja Gërvalla.

The post Donika Gërvalla nderon figurën e Ymer Elshanit gjatë vizitës në Shtëpinë Muze në Poklek të Drenasit appeared first on Albeu.com.

Lajmin e rëndë e ka ndarë botuesja Irena Toci, përmes një postimi në faqen e saj në “Facebook” .

“Me hidhërim të thellë ju njoftojmë për largimin nga jeta të DORIAN KONGOLIT, djalit të shtrenjtë të autorit të madh Fatos Kongoli, në moshën 47-vjeçare.

DORIAN KONGOLI, jetonte e punonte në NJU-JORK prej më shumë se 25 vite. Aty kishte ndërtuar familjen e tij të mrekullueshme dhe karrierën e tij të shkëlqyer në radhët e policisë nju-jorkeze.

Prej disa vitesh, ai është shfaqur në faqen e Amazon.com edhe si autor romanesh, të botuara me pseudonimin Dorian Keys:

– Imprint legacy, 2019

– Morning star, 2020

– Yesterday’s Tomorrow: Big Brother Has Evolved, 2022

Në shqip ka qarkulluar deri tani vetëm një nga romanet e tij, titulluar “TRANSPLANTI I JETËS” (TOENA, 2020).

Në proces botimi është edhe romani i tij i fundit “E ardhmja e së djeshmes: Vëllai i Madh ka ndryshuar pamje”.

Pritja për t’i dhënë lamtumirën e fundit dhe për t’u takuar me Fatos e Liri Kongoli do të kryhet në mjediset e Shtëpisë Alba, në rrugën e Durrësit

E premte, 31 tetor paradite 10:00-13:00; pasdite 17:00-20:00

E shtunë, 1 nëntor paradite 10:00-13:00; pasdite 17:00-20:00

Shpirti i tij pushoftë në paqen e përjetshme!”, shkruan Toci.

The post E trishtë/ Ndahet nga jeta djali i shkrimtarit Fatos Kongoli appeared first on Albeu.com.