Profesori i drejtësisë, Kadri Kryeziu, ka reaguar për zhvillimet lidhur me procesin e zgjedhjes së presidentit, pas kundërshtimit të gjashtë deputetëve të LDK-së ndaj votimit të Bekim Sejdiut.

Sipas Kryeziut, marrëveshja e arritur mes Lëvizjes Vetëvendosje dhe LDK-së për kandidaturën e Bekim Sejdiut nuk mund të zbatohet më, pasi nuk sigurohen votat e nevojshme për zgjedhjen e tij.

“Mendoj se marrëveshja ndërmjet LVV-së dhe LDK-së për Bekim Sejdiun ka përfunduar, sepse nuk ka vota të mjaftueshme. Prandaj, kjo çështje është e mbyllur. Më vjen keq për Bekimin”, ka deklaruar Kryeziu.

Ai ka shprehur kritika edhe ndaj mënyrës se si partitë politike po e trajtojnë këtë situatë, duke nënvizuar nevojën për përgjegjshmëri dhe bashkëpunim mes institucioneve.

“Ne, si elitë intelektuale, e kemi obligim të kërkojmë zgjidhje dhe t’i ndihmojmë aktorët politikë, pasi ndodhemi përballë një situate të pazgjidhur. Populli është i mirë, po ashtu edhe organet e shtetit, ushtria, policia, AKI-ja e të tjera, por partitë nuk janë në rregull. Nuk veprohet në këtë mënyrë. Janë jo serioze, pra parti për të cilat nuk dihet se çfarë mund të bisedohet. Edhe këto tema kërkojnë seriozitet dhe me shtetin nuk bëhet shaka”, është shprehur ai.

Gjatë komentimit të situatës, profesori i drejtësisë ka folur edhe për figurën që duhet të përfaqësojë presidenti i vendit.

“Presidenti duhet të jetë një intelektual dhe, sapo merr detyrën, ai ka kompetenca”, ka thënë Kryeziu.

Kritikat më të drejtpërdrejta ai i ka adresuar ndaj LDK-së dhe drejtimit të saj.

“LDK-ja nuk është aspak serioze. Si mundet një parti të lidhë marrëveshje pa u koordinuar brenda saj me deputetët, të cilët janë faktori kryesor për zgjedhjen e presidentit? Me sa di unë, Lumir Abdixhiku është profesor dhe duhet të japë dorëheqje menjëherë, duke e lënë drejtimin e partisë. Kështu nuk bëhet. Një parti duhet të ketë lidership, ndërsa deputetët duhej të bindeshin dhe të konsultoheshin paraprakisht”, ka deklaruar Kryeziu.

Qëndrimet e tij janë bërë publike në një periudhë kur procesi i zgjedhjes së presidentit po has pengesa brenda LDK-së, çka ka vështirësuar sigurimin e votave të nevojshme për kandidatin e propozuar.

The post Kadri Kryeziu kërkon largimin e Abdixhikut: Marrëveshja për presidentin nuk mund të bëhej pa deputetët appeared first on Albeu.com.

Para nisjes së mbledhjes së Kryesisë së Lidhjes Demokratike të Kosovës (LDK), anëtari i saj Visar Azemi deklaroi se nuk ekziston asnjë shkarkim për kryetarin e partisë, Lumir Abdixhiku.

Azemi: Nuk ka shkarkim të Abdixhikut e as të askujt

“Nuk ka shkarkim të Abdixhikut e as të askujt. Do të diskutojmë për rezultatin e fundit dhe tema të tjera”, tha shkurt Azemi.

Në të njëjtën kohë, edhe anëtarja e Kryesisë së LDK-së, Sibel Halimi, bëri të ditur para mbledhjes se ajo nuk e ka nënshkruar iniciativën për largimin e Lumir Abdixhikut nga drejtimi i partisë.

Ajo sqaroi se në takim do të trajtohen rezultati i zgjedhjeve dhe çështja e formimit të institucioneve, ndërsa la të hapur mundësinë që kjo temë të diskutohet edhe te pika të ndryshme.

Halimi: Nuk e kam nënshkruar

“Nuk e kam nënshkruar. Besoj që përgjegjësia duhet të merret nga të gjitha palët të LDK dhe besoj që nuk është e mjaftueshme vetëm angazhimi i kryetarit të LDK-së. Ne kemi rëndin e ditës dhe do të diskutojmë për çështjen e rezultati të zgjedhjeve gjithsesi edhe për çështje të cilat lidhen në formimin e institucioneve, si dhe natyrisht do të diskutojmë për shumë çështje të tjera për partin. Në rend dite nuk kemi pika e fundit e rendit të ditës është te ndryshme dhe besoj që aty do ta diskutojmë”, tha ajo.

Disa ditë më parë, KosovaPress raportoi se në Lidhjen Demokratike të Kosovës ka nisur mbledhja e nënshkrimeve për thirrjen e një kuvendi të jashtëzakonshëm të partisë, pas rezultatit jo të mirë në zgjedhjet e fundit.

Sipas burimeve të KosovaPress nga njëra prej degëve të LDK-së dhe nga delegatë që tashmë kanë dhënë nënshkrimet e tyre, numri i nënshkrimeve të mbledhura deri tani është rreth 150, ndërsa dihet se LDK ka gjithsejtë 355 delegatë.

The post Anëtarë të Kryesisë së LDK-së mohojnë shkarkimin e Abdixhikut para mbledhjes appeared first on Albeu.com.