Sipas kursit zyrtar të këmbimit të Bankës së Shqipërisë, Euro u këmbye sot me 119.88 lekë, niveli më i ulët i të gjitha kohërave.

Agjentët e këmbimit valutor mendojnë se nënçmimi i mëtejshëm i Euros tashmë mund të shpjegohet kryesisht me faktorin sezonal. Sezoni veror sjell rritje të flukseve hyrëse valutore, tendencë e lidhur veçanërisht me turizmin. Rritja e ofertës rrjedhimisht ndikon në zhvlerësimin e kursit të këmbimit të Euros ndaj Lekut.

Burime nga tregu bëjnë të ditur për “Monitor” se në javët e fundit po vërehet një rritje e këmbimeve që kryhen nga bizneset e lidhur me turizmin, kryesisht nga agjencitë turistike. Sipas tyre, kjo është dëshmi e rritjes së prurjeve nga turizmi, por edhe një faktor që paralajmëron se sezoni veror do të jetë pozitiv dhe do të shoqërohet me rritje të mëtejshme të flukseve valutore. Zakonisht, kulmi i efekteve sezonale në kursin e këmbimit Euro-Lek shfaqet mes fundit të muajit korrik dhe fillimit të muajit gusht. Agjentët e këmbimit besojnë se këtë vit kursi i Euros me shumë të ngjarë do të prekë rekorde të reja historike në kahun rënës.

Me përjashtim të një periudhe të shkurtër gjatë muajit mars, kursi i këmbimit Euro-Lek këtë vit është shfaqur i qëndrueshëm, madje me një tendencë mbiçmuese të Lekut. Forcimi i Lekut në këtë periudhë ka qenë pjesërisht i papritur, kryesisht për shkak të inflacionit të lartë të mallrave të importuara dhe pritshmërive se shtrenjtimi importeve do të rriste nevojën për valutë dhe do të zhvlerësonte Lekun. Por, një gjë e tillë nuk ndodhur, edhe për shkak se në fakt bilanci i llogarisë korrente të vendit në tremujorin e parë të këtij viti është përmirësuar.

Sipas të dhënave nga Banka e Shqipërisë, deficiti i llogarisë korrente për tre muajt e parë të vitit kishte vlerën e 233 milionë Eurove, vlerë kjo 57% më e ulët krahasuar me tremujorin e fundit 2021 dhe 22% më e ulët krahasuar me të njëjtën periudhë të vitit të kaluar. Rritja e deficitit tregtar në mallra këtë tremujor është ngadalësuar ndjeshëm krahasuar me tremujorin IV 2021, ndërsa llogaria e shërbimeve ka rritur edhe më shumë kontributin e vet pozitiv.

Kontribuuesit kryesorë kanë qenë sektori i turizmit dhe i ai fasonerisë, që historikisht kanë luajtur një rol të rëndësishëm në ngushtimin e deficitit tregtar që ka vendi në mallra.

Sipas Bankës së Shqipërisë, të ardhurat nga turizmi për tremujorin e parë të vitit arritën në 409 milionë Euro, niveli më i lartë historik i regjistruar për këtë periudhë të vitit. Por, megjithatë bilanci neto në zërin e udhëtimeve pësoi rënie me 15% krahasuar me një vit më parë, sepse shpenzimet e shqiptarëve jashtë vendit u rritën me ritme edhe më të larta se shpenzimet e turistëve të huaj në Shqipëri./Monitor

Numri i konfirmuar i vdekjeve nga COVID-i është i barabartë me numrin e amerikanëve që humbën jetën gjatë Luftës Civile dhe Luftës së Dytë Botërore të marra së bashku. Është njëlloj sikur Bostoni dhe Pitsburgu të shfaroseshin.

“Është e vështirë të imagjinosh një milion njerëz të zhdukur nga kjo tokë”, tha Jennifer Nuzzo, e cila drejton një qendër të re pandemie në Shkollën e Shëndetit Publik të Universitetit Brown në Providence të shtetit Rhode Island. “Kjo ende po ndodh dhe ne po e lëmë të ndodhë”.

Shumë njerëz që kanë humbur të dashurit e tyre thonë se nuk mund të kthehen në normalitet. Ata dëgjojnë zërat e regjistruar të njerëzve të tyre të humbur ose shikojnë filmimet me ta. Kur njerëzit e tjerë shprehen se kanë mbaruar punë me virusin, ata mbushen me zemërim ose pikëllohen në heshtje.

“Normalitet. Unë e urrej atë fjalë”, thotë 55 vjeçarja Julie Wallace nga Elyria, Ohio, e cila humbi burrin e saj nga COVID-19 në vitin 2020. “Ne nuk mund të kthehemi kurrë në normalitet”.

Tre nga çdo katër vdekje u regjistruan tek grupmosha 65 vjeç e lart. Më shumë burra humbën jetën sesa gra. Në përgjithësi, shumica e të vdekurve ishin të bardhë. Por popullsitë me ngjyrë, hispanikët dhe indigjenët kanë pasur afërsisht dy herë më shumë gjasa të vdesin nga COVID-19 sesa popullsia e bardhë.

Shumica e vdekjeve ndodhën në zonat urbane, por vendet rurale që ishin kundër maskave në disa raste paguan një çmim të lartë.

Numri i vdekjeve, që nga shpërthimi i pandemisë e deri më sot, bazohet në të dhënat nga çertifikatat e vdekjes të mbledhura nga Qendra Kombëtare për Statistikat Shëndetësore të Qendrave për Kontrollin dhe Parandalimin e Sëmundjeve, CDC.

Por numri i saktë i jetëve të humbura nga COVID-19, në mënyrë të drejtpërdrejt ose indirekte, si rezultat i mbingarkesës së sistemit të kujdesit shëndetësor në vendin më të pasur në botë, besohet të jetë shumë më i lartë.

Shtetet e Bashkuara kanë numrin më të lartë të vdekjeve të raportuara nga COVID-19 sesa çdo vend tjetër, megjithëse ekspertët e shëndetit kanë shprehur dyshime prej kohësh se numri real i vdekjeve në vende si India, Brazili dhe Rusia është më i lartë se shifrat zyrtare.

Ky moment historik vjen pak më shumë se tre muaj që kur Shtetet e Bashkuara shënuan 900,000 të vdekur. Ritmi është ngadalësuar që nga rritja e madhe e dimrit e shkaktuar nga varianti Omicron.

Mesatarisht në Shtetet e Bashkuara rreth 300 njerëz humbasin jetën nga COVID-19, krahasuar me 3,400 në ditë gjatë janarit të vitit 2021.

Ndërkohë rastet e reja po shtohen përsëri, një rritje prej më shumë se 60% gjatë dy javëve të fundit në një mesatare prej rreth 86,000 në ditë. Niveli më i lartë i infektimeve arriti gjatë periudhës së dimrit me mbi 800,000 në ditë.

Një javë më parë, Katredalja Kombëtare e Uashingtonit i ra këmbanës 1,000 herë, një herë për çdo 1,000 vdekje. Presidenti Joe Biden dha urdhër të enjten që flamujtë të ulen në gjysmë shtizë dhe e quajti çdo jetë “një humbje të pazëvendësueshme”.

“Si komb, ne nuk duhet të mpihemi nga një pikëllim i tillë. Për t’u shëruar, duhet t’i ruajmë ata në kujtesën tonë”, tha Presidenti Biden.

Më shumë se gjysma e vdekjeve ndodhën pas daljes së vaksinës në dhjetor të vitit 2020. Dy të tretat e amerikanëve janë plotësisht të vaksinuar dhe gati gjysma e tyre kanë marrë të paktën një dozë përforcuese. Por kërkesa ka rënë dhe fushata për vaksinimin është goditur rëndë nga keqinformimi, mosbesimi dhe polarizimi politik.

Njerëzit e pavaksinuar kanë një rrezik 10 herë më të madh për të vdekur nga COVID-19 sesa të vaksinuarit plotësisht, sipas të dhënave nga CDC./VOA