Skuadra e Teutës ka arritur më në fund të shijojë fitoren gjatë kësaj faze përgatitore, pas një vargu ndeshjesh ku nuk shkoi më shumë se barazimi. Djemtë e detit udhëtuan drejt Banskos në Bullgari, ku mposhtën minimalisht ekipin vendës të Krumovgradit, në kuadër të serisë së takimeve testuese përpara nisjes së sezonit të ri në Kategorinë Superiore.

Protagonisti absolut i sfidës ishte Sherif Kallaku. Mesfushori, që sapo është bashkuar sërish me durrsakët pas një eksperience me Vllazninë, shënoi golin e vetëm të ndeshjes, duke i dhënë kështu suksesin ekipit të drejtuar nga Edlir Tetova.

Ky triumf përfaqëson një injeksion të rëndësishëm besimi për trajnerin Tetova, i cili vijon punën për të nxjerrë potencialin maksimal nga grupi i lojtarëve që ka ndërtuar përmes operacioneve në merkaton e verës.

The post Teuta thyen ciklin e barazimeve, vendos Kallaku kundër Krumovgradit në Bansko appeared first on Albeu.com.

Teuta do të ketë në organikë Sherif Kallakun. Mesfushori 28-vjeçar i ka dhënë fund eksperiencës së tij me Vllazninë dhe ka zgjedhur të rikthehet edhe një herë në Durrës.

Marrëveshja është finalizuar dhe lojtari pritet t’i bashkohet shumë shpejt skuadrës së drejtuar nga Edlir Tetova. Vlen të kujtohet se “Newsport.al” kishte raportuar që më 17 qershor për kontaktet mes klubit durrsak dhe Kallakut.

Ndonëse në fillim drejtuesit e Vllaznisë nuk kishin ndërmend ta linin të largohej, madje i rinovuan edhe kontratën për një vit tjetër, pas diskutimeve të shumta kanë tërhequr qëndrimin, duke mos i dalë pengesë 28-vjeçarit në vijimin e karrierës.

Për Kallakun bëhet fjalë për një kthim të njohur te Teuta. Ai ka qenë pjesë e ekipit durrsak gjatë viteve 2018-2020, më pas edhe në vitin 2021 për një periudhë të shkurtër. Një tjetër rikthim e bëri në vitin 2023, kur luajti në gjysmën e dytë të sezonit.

Ishte pikërisht me Teutën, e cila në atë periudhë drejtohej nga trajneri Edi Martini, që mesfushori u shndërrua në një nga protagonistët e titullit kampion të fituar në sezonin 2019/2020.

The post Sherif Kallaku mbyll qëndrimin te Vllaznia dhe rikthehet sërish te Teuta appeared first on Albeu.com.

Interesimi i Teutës për 28-vjeçarin është i fortë, edhe pse nga ana formale ai vazhdon të jetë pjesë e Vllaznisë, pasi klauzola 1+1 në kontratën e tij është aktivizuar automatikisht.

Burime të besueshme për “Newsport.al” bëjnë me dije se presidenca e klubit shkodran ka vendosur të mos japë dritën jeshile për largimin e lojtarit, duke i mbyllur rrugën transferimit të tij në këtë moment.

Sipas asaj që parashikon kontrata, Kallaku duhet të qëndrojë te kuqeblutë deri në përfundim të sezonit të ardhshëm. Megjithatë, bisedimet nuk janë ndërprerë dhe drejtuesit e Vllaznisë, në kuadër të këtyre tratativave, kanë vendosur çmimin prej 200 mijë eurosh për kartonin e futbollistit.

Bëhet fjalë për një shumë të lartë për standardet ekonomike të futbollit shqiptar. Tashmë mbetet për t’u parë deri në mbyllje të këtij sesioni se si do të zhvillohet situata, me Kallakun që vijon të jetë mes Durrësit dhe Shkodrës.

The post Vllaznia bllokon Teutën për Sherif Kallakun, shkodranët kërkojnë 200 mijë euro appeared first on Albeu.com.