Meqenëse radioterapia ofrohet vetëm në kryeqytet, shumë të sëmurë udhëtojnë nga qytete të ndryshme të vendit drejt Shkupit. Sipas dëshmive të disa pacientëve, pritja për terapinë mund të zgjasë deri në 12 orë, ndërsa radhët krijohen që në orët e hershme të mëngjesit.

“Problemi nuk janë mjekët, por sistemi dhe mungesa e organizimit. Do të ishte shumë më mirë nëse do të hapeshin qendra edhe në pjesën lindore dhe perëndimore të vendit”, tha një paciente.

Edhe Shoqata për mbështetjen e pacientëve me kancer “EZRA” e konsideron alarmante gjendjen në sistemin shëndetësor. Drejtoresha ekzekutive e kësaj shoqate, Liridona Beqiri, nënvizoi se pritjet e gjata nuk lidhen vetëm me organizimin, por dëshmojnë dështimin e sistemit për të ofruar shërbime shëndetësore.

Nga ana tjetër, Enti Shtetëror i Revizionit ka propozuar decentralizimin e trajtimit onkologjik, për të ulur kohën e pritjes dhe për të lehtësuar pacientët që vijnë nga qytete të tjera.

Sipas drejtorit të Klinikës së Onkologjisë, Igor Stojkovski, vetëm gjatë vitit 2025 janë evidentuar rreth 5.500 raste të reja me kancer, ndërsa klinika kryen afërsisht 38.000 deri në 39.000 aplikime të terapive onkologjike çdo vit.

The post Në Shkup, pacientët me kancer presin deri në 12 orë për të marrë terapinë appeared first on Albeu.com.

Aliu tha se për të ka peshë të veçantë që diskutimi për dhurimin e organeve po zhvillohet pikërisht në Gostivar, qytetin ku ka lindur. Sipas tij, ka çështje që nuk lidhen vetëm me politikën, por kërkojnë edhe humanizëm, besim dhe pjekuri morale të shoqërisë. Ai e cilësoi dhurimin e organeve si një prej atyre temave që shtrojnë një nga pyetjet më të thella për çdo shoqëri: në çastin më të vështirë, a jemi në gjendje të krijojmë shpresë për dikë tjetër?

Ministri theksoi se detyrë e institucioneve është të ndërtojnë besim dhe të krijojnë një sistem ku familja ta njohë paraprakisht vullnetin e të afërmit të saj. Sipas tij, dhurimi i organeve nuk duhet të diskutohet për herë të parë në korridoret e spitalit, në momente tragjike, por duhet të jetë një temë që trajtohet hapur dhe pa paragjykime në shtëpi, në familje, në shkolla, universitete, si dhe mes mjekëve dhe pacientëve.

Në këtë kuadër, ai bëri të ditur se Ministria e Shëndetësisë po zbaton një fushatë kombëtare të vazhdueshme për rritjen e ndërgjegjësimit, duke e konsideruar dhurimin e organeve si një proces të përhershëm edukimi. Krahas kësaj, po punohet për përfshirjen e mjekëve amë, shkollave, universiteteve, shoqatave të pacientëve dhe bashkësive fetare, me synimin që kjo temë të bëhet pjesë e një dialogu publik të informuar dhe të pjekur.

Njëkohësisht, sipas tij, po ofrohet mbështetje e vazhdueshme për ekipet e transplantimit, ndërsa është në përgatitje edhe një kornizë digjitale dhe ligjore ku vullneti i qytetarëve do të deklarohet qartë, do të regjistrohet në mënyrë të sigurt dhe do të respektohet në mënyrë konsekuente.

Aliu theksoi se është në procedurë ndryshimi dhe plotësimi i Ligjit për marrjen dhe transplantimin e pjesëve të trupit të njeriut për qëllime mjekimi, i cili tashmë është dorëzuar në Kuvend me procedurë të shkurtuar. Sipas tij, kjo tregon se shteti nuk e sheh dhurimin e organeve vetëm si një çështje morale, por edhe si prioritet publik.

Ai vlerësoi se Kuvendi dha një mesazh të fortë uniteti dhe konsensusi për forcimin e dhurimit të organeve, pasi deputetët e pushtetit dhe të opozitës votuan për nevojën e miratimit të ligjit me procedurë të shkurtuar. Ministri nënvizoi se kur bëhet fjalë për jetën, nuk ka pozitë e opozitë dhe as dallime politike që mund të jenë më të rëndësishme se detyrimi që shteti të qëndrojë në anën e humanizmit, dinjitetit dhe shpresës.

Sipas tij, ndryshimet e propozuara përbëjnë një hap të rëndësishëm drejt krijimit të një sistemi ku vullneti personal i qytetarëve do të shprehet më qartë, do të mbrohet më fort dhe do të respektohet në mënyrë më konsekuente. Ai sqaroi se me këto ndryshime ligjore, çdo qytetar madhor do të ketë mundësinë të deklarohet qartë te mjeku i tij amë nëse dëshiron të jetë dhurues organesh, duke krijuar kështu një pasqyrë më të qartë të qëndrimeve të qytetarëve dhe duke forcuar më tej besimin dhe informimin për këtë çështje.

Po ashtu, ndryshimet parashohin zgjerimin e mundësive për trajtim përmes zgjerimit të rrethit të dhuruesve të gjallë deri në shkallën e katërt të farefisnisë, me respektim të plotë të të gjitha standardeve etike, mjekësore dhe ligjore.

Ministri bëri të ditur se deklarimi do të realizohet përmes një moduli të ri digjital në sistemin “Termini im”, në mënyrë të sigurt dhe me verifikim të dyfishtë. Ai tha se çdo qytetar do të ketë të drejtën ta ndryshojë ose ta tërheqë vendimin e tij në çdo kohë. Sipas Aliut, kjo ka rëndësi për dy arsye: së pari, sepse respektohet liria personale dhe vullneti i secilit, dhe së dyti, sepse shteti më në fund do të dijë sa qytetarë dëshirojnë të jenë dhurues organesh.

Aliu shtoi se kështu do të kuptohet edhe se ku ka më shumë informim dhe ku ka frikë, mosbesim apo mungesë njohurish për dhurimin e organeve. Në fund, ai deklaroi se sapo sistemi të fillojë të zbatohet, ai vetë do të jetë i pari që do të regjistrohet si dhurues organesh.

The post Aliu: Sapo sistemi të nisë zbatimin, do të regjistrohem i pari si dhurues organesh appeared first on Albeu.com.