Jehona Lushaku, kryetare e Grupit Parlamentar të Lidhjes Demokratike të Kosovës, tha se partia e saj është e gatshme të japë kontribut në zgjedhjen e presidentit të Kosovës.

Duke folur pas seancës plenare të Kuvendit të Kosovës, ku u miratua Deklarata për aktgjykimin e Speciales, Lushaku njoftoi se liderët e të gjitha partive politike janë takuar.

Ajo u bëri thirrje forcave politike të tregojnë vullnet për ta zgjedhur presidentin dhe për të shmangur mbajtjen e zgjedhjeve të reja.

“Liderët e të gjitha partive janë takuar për të bashkërenduar veprimet e ardhshme të shtetit. Në agjendë ishin disa procese të rëndësishme, përfshirë çështjen e presidentit, si dhe koordinimi lidhur me këtë deklaratë. Synimi është që për secilin problem të gjendet sa më shpejt një zgjidhje. Si parti, kemi deklaruar se zgjedhjet duhet të shmangen, por kjo varet nga vullneti i të gjitha partive politike. Nuk mund ta zgjedhim presidentin e Kosovës të vetëm, megjithatë jemi të gatshëm të kontribuojmë në themelimin e këtyre institucioneve. Në këtë fazë nuk mund të themi se jemi pro ose kundër”, u shpreh ajo.

Lushaku komentoi gjithashtu Deklaratën e propozuar nga PDK-ja, e cila u miratua në Kuvend.

Ajo tha se LDK-ja përkrah çdo vendim që Kuvendi i Kosovës do të marrë lidhur me katërshen në Hagë dhe në mbështetje të UÇK-së.

“E kuptojmë plotësisht përgjegjësinë tonë institucionale për të çmuar e nderuar kontributin e vajzave dhe djemve tanë në Ushtrinë Çlirimtare të Kosovës, në luftën për çlirimin e vendit dhe për lirinë që gëzojmë sot. Prandaj, kemi detyrim ta mbështesim dhe ta nderojmë luftën tonë çlirimtare. Duam të kontribuojmë që Kosova të jetë e pavarur e e lirë dhe institucionet e saj të pavarura të funksionojnë, duke garantuar drejtësi për të gjithë qytetarët”, tha Lushaku.

The post Lushaku: LDK-ja është e gatshme të ndihmojë në zgjedhjen e presidentit të Kosovës appeared first on Albeu.com.