Përfaqësues të Partisë Demokratike të Kosovës (PDK) dhe Aleancës për Ardhmërinë e Kosovës (AAK) janë mbledhur sërish të premten në sallën plenare të Kuvendit të Kosovës, nga ku kanë kërkuar vazhdimin e seancës konstituive.

Në ambientet e Kuvendit janë vërejtur gjithashtu edhe përfaqësues të ambasadës së Shteteve të Bashkuara të Amerikës në Kosovë.

Dy subjektet politike, PDK-ja dhe Aleanca, kanë përsëritur në vazhdimësi kërkesën e tyre për rifillimin e seancës konstituive.

Ndërkohë, bllokada politike vijon të pengojë konstituimin e Kuvendit dhe krijimin e institucioneve të reja të vendit.

The post PDK dhe AAK rikthehen në Kuvend, kërkojnë rifillimin e seancës konstituive appeared first on Albeu.com.

Ushtruesja e detyrës së presidentes së Kosovës, Albulena Haxhiu, ka bërë të ditur se gjatë së premtes do të publikojë datën për seancën konstituive të Kuvendit. Sipas saj, mbledhja pritet të organizohet brenda javës së parë të muajit gusht.

Në një paraqitje vonë të së martës në Prizren, ajo theksoi se do të bëjë njoftimin zyrtar të premten për të saktësuar momentin e saktë të seancës. Haxhiu shpjegoi se nuk është nxituar me caktimin e datës, me qëllim që subjekteve politike t’u lihej hapësira e nevojshme për të biseduar rreth zgjedhjes së presidentit të ardhshëm.

Ajo i ka vlerësuar pozitivisht takimet e deritanishme, duke përmendur bisedimet e zhvilluara mes kryeministrit dhe kryetarit aktual të Lëvizjes Vetëvendosje, Albin Kurti, me përfaqësues të PDK-së dhe LDK-së. Megjithatë, Haxhiu rikujtoi se Lidhja Demokratike e Kosovës i ka ndërprerë përkohësisht këto takime për arsye të çështjeve të brendshme, por nuk deshi të ndërhyjë në punët e partive të tjera, duke theksuar rëndësinë e rifillimit sa më të shpejtë të dialogut për të arritur një marrëveshje për presidentin e ri.

Lidhur me spekulimet për ndonjë marrëveshje të fshehtë mes Albin Kurtit dhe Lumir Abdixhikut për formimin e institucioneve, përfshirë edhe çështjen e presidentit, Haxhiu i hodhi poshtë ato kategorikisht. Ajo konfirmoi se në takimin e fundit ishin të pranishëm kryeministri Kurti, ministri i Financave Hekuran Murati, si dhe nga ana tjetër Abdixhiku dhe Vjosa Osmani Sadriu, por theksoi se bisedimet ishin përqendruar në hapat e ardhshëm, pa u finalizuar asnjë marrëveshje konkrete.

The post Albulena Haxhiu njofton se të premten përcakton datën e mbledhjes konstituive të Kuvendit appeared first on Albeu.com.