Mitrovica po pret Samitin Ndërkombëtar Rinor për Paqe 2026, ku janë mbledhur të rinj nga vende dhe komunitete të ndryshme. Veprimtaria, e përqendruar te paqja, bashkëjetesa, liria, barazia dhe sfidat e rinisë, nisi me interpretimin e valleve tradicionale shqiptare nga grupi i Asamblesë “Shqipet e Vogla”.

Kryeministri i Kosovës, Albin Kurti, gjatë fjalimit të tij u kërkoi të rinjve të qëndrojnë të lidhur me parimet e lirisë, barazisë dhe së vërtetës.

Ai paralajmëroi se dashuria për kombin mund të marrë një drejtim të rrezikshëm kur shndërrohet në urrejtje ndaj popujve të tjerë. Sipas Kurtit, ky transformim ushqen ultranacionalizmin autoritar, ndërsa autokratët përpiqen të ndikojnë pikërisht te brezat e rinj.

Kurti: Dashuria për kombin nuk duhet të prodhojë urrejtje

“Liria që gëzojmë është fituar nga njerëz që e kanë dashur atë me gjithë forcën e tyre. Por në momentin kur dashuria për kombin tënd kthehet në urrejtje ndaj një kombi tjetër, ajo shndërrohet në ultranacionalizëm autoritar. Pikërisht këtë përhapin autokratët. Gjenerata juaj është hapësira ku ata përpiqen të ushtrojnë ndikimin e tyre dhe pyetja është se si do të arrijnë t’ju bindin juve.

Qëndroni të palëkundur te liria, barazia dhe e vërteta. Humbja e tyre ndodh lehtë, ndërsa rikthimi është i vështirë. Çdo brez duhet t’i përzgjedhë sërish këto vlera dhe të vendosë se cila prej tyre do të ndikojë në llojin e botës që do të ndërtojë shekulli i 21-të. Nga megatrendët kryesorë, teknologjia po përparon me ritëm të shpejtë, ndërsa inteligjenca artificiale po ndryshon më shumë se çdo gjë tjetër”, tha Kurti.

Sejdiu: Mbetjet e 23 intelektualëve tregojnë përmasat e krimit shtetëror

Duke folur për të kaluarën e Mitrovicës, ish-presidenti i Republikës së Kosovës, Fatmir Sejdiu, tha se qyteti deri në vitin 1990 përfaqësonte një qendër të rëndësishme industriale, kulturore dhe sportive.

Sejdiu përmendi gjithashtu zbulimin e mbetjeve të 23 intelektualëve, të zhdukur gjatë vitit 1999. Ai deklaroi se ky zbulim dëshmon pasojat e rënda dhe dhimbjet e shkaktuara nga krimet e luftës.

“Duhet të kujtojmë se deri në vitin 1990, Mitrovica ishte një qendër e madhe industriale dhe kishte peshë të veçantë në jetën kulturore e sportive. Politika agresive e Millosheviqit e shkatërroi këtë qytet, duke u shoqëruar me krime dhe vrasje të civilëve të pafajshëm.

Gjatë këtyre ditëve, në rrethin e Mitrovicës, u zbuluan mbetjet e 23 intelektualëve të zhdukur nga regjimi serb në vitin 1999. Ky rast tregon se sa të thella dhe të pashërueshme janë plagët e lëna nga krimi shtetëror”, deklaroi Sejdiu.

Icka: Uroj që nga Mitrovica të largoheni me miq të rinj

Drejtoresha Ekzekutive e YSP Balkan dhe Koordinatorja e OKB-së për IAYSP EUME, Dr. Ejona Icka, i ftoi pjesëmarrësit që ditët e samitit t’i përdorin për të zgjeruar njohjet, për të dëgjuar rrëfime të ndryshme dhe për t’i rishikuar bindjet e tyre.

“Uroj që përtej paneleve dhe punëtorisë, ky samit t’ju sjellë edhe diçka të bukur e të thjeshtë. Do të doja që secili prej jush të takonte dikë nga një shtet tjetër, ndoshta një person që nuk e kishte imagjinuar se do ta njihte.

Uroj të dëgjoni një histori që ndryshon nga e juaja, ose një rrëfim që në një mënyrë ju ngjan. Shpresoj që idetë, këndvështrimet dhe bindjet tona të vihen në diskutim, por edhe të forcohen ato vlera për të cilat jemi mbledhur këtu.

Mbi të gjitha, shpresoj që një person që sot është i panjohur, nga një komunitet apo vend tjetër, të largohet nga Mitrovica jo më si i huaj, por si miku juaj”, tha Icka.

Samiti Ndërkombëtar Rinor për Paqe 2026 po mbahet në Mitrovicë me pjesëmarrjen e të rinjve nga vende dhe komunitete të ndryshme. Synimi i tij është të nxisë dialogun, mirëkuptimin dhe krijimin e lidhjeve mes brezave të rinj.

The post Kurti në Mitrovicë: Liria, barazia dhe e vërteta duhet të mbrohen nga të rinjtë appeared first on Albeu.com.