Ndërtimi i autostradës Kërçovë-Ohër parashikohet të përfundojë deri në maj të vitit të ardhshëm, bëri të ditur drejtori i Ndërmarrjes Publike për Rrugët Shtetërore, Koce Trajanovski.

I ftuar në emisionin “Tema e Ditës” në TV Sitel, Trajanovski deklaroi se prej vitit 2024 është shënuar një avancim i madh në realizimin e këtij projekti rrugor.

Sipas tij, nga 57 kilometrat e përgjithshëm të autostradës, tashmë janë lëshuar për qarkullim rreth 37 deri në 38 kilometra. Ai tha se në segmentin e mbetur vijojnë punimet intensive, ndërsa aksi nga Izvori, përmes tunelit, deri në Vrbjani pritet të vihet në funksion deri në fund të tetorit.

Trajanovski theksoi se afati për kompletimin e të gjithë autostradës, në maj të vitit të ardhshëm, nuk ka ndryshuar. Ai sqaroi se projekti po zhvillohet sipas dinamikës së përcaktuar me kredinë e tretë për ndërtimin, ndërsa faza përfundimtare përfshin edhe zgjidhje të reja teknike për galeritë, të cilat nuk ishin pjesë e projektit fillestar.

Autostrada Kërçovë-Ohër financohet përmes tre kredive dhe vlera e saj e përgjithshme, sipas Trajanovskit, do të arrijë rreth 800 milionë euro.

Ai njoftoi gjithashtu se me ritëm të kënaqshëm po përparojnë edhe punimet në segmentet që realizohen nga kompania “Bechtel and Enka”, përfshirë rrugët Prilep-Manastir, Tetovë-Gostivar dhe Gostivar-Bukojçan.

Sa i takon aksit Kërçovë-Bukojçan, Trajanovski tha se aktualisht po zhvillohet procedura për përzgjedhjen e kontraktorit, ndërsa nisja e punimeve ndërtimore pritet në shtator.

The post Trajanovski: Autostrada Kërçovë-Ohër pritet të mbyllet në majin e vitit të ardhshëm appeared first on Albeu.com.

Po ndërmerren hapa konkretë për amendimin e pesë ligjeve, me qëllim krijimin e bazës ligjore për Sistemet Inteligjente të Transportit (SIT) në rrjetin rrugor të vendit. Kjo nismë, që buron nga angazhimet në kuadër të agjendës reformuese, po zhvillohet në partneritet të ngushtë me Delegacionin e Bashkimit Evropian në Shkup.

Ministri i Transportit dhe zëvendëskryeministri, Aleksandar Nikolloski, bëri të ditur se ndryshimet ligjore janë në rrjedhë e sipër dhe përfshijnë gjithashtu bashkëpunimin me Ministrinë e Punëve të Brendshme dhe atë të Vetëqeverisjes Lokale. Ai i bëri këto komente gjatë ceremonisë së prezantimit të mjeteve të reja për Inspektoratin Shtetëror të Transportit, të cilat janë dhuruar nga Bashkimi Evropian.

Nikolloski theksoi se, falë një granti prej 13 milionë eurosh nga mekanizmi mbështetës për Ballkanin Perëndimor dhe në bashkëpunim me Bankën Botërore, tashmë ka nisur puna për vendosjen e këtyre sistemeve inteligjente në Korridorin 10. Sipas tij, procedurat me Bankën Botërore dhe Bashkimin Evropian janë drejt finalizimit, ndërsa në një fazë të dytë, vëmendja do të përqendrohet edhe në Korridorin 8.

Ministria përkatëse ka shpallur tenderin për këtë projekt, ku kanë konkurruar gjashtë kompani ndërkombëtare. Tashmë është finalizuar dokumentacioni teknik për instalimin e pajisjeve për kontrollin e peshës së automjeteve në lëvizje (WIM), për mbikëqyrjen e transportit të lëndëve të rrezikshme (HAZMAT) dhe për matjen e cilësisë së ajrit përgjatë Autostradës A1 (E75), pjesë e Korridorit 10.

Paralelisht, po përgatitet dokumentacioni për Qendrën Nacionale për Menaxhimin e Komunikacionit (NCUS), e cila do të jetë përgjegjëse për monitorimin, mbikëqyrjen dhe administrimin e trafikut dhe lëvizshmërisë në të gjithë rrjetin rrugor shtetëror. Kjo qendër do të sigurojë informacione për përdoruesit e korridoreve mbi kushtet e rrugëve, gjendjen e trafikut dhe udhëtimet. Ajo parashikohet të vendoset brenda ambienteve të Ndërmarrjes Publike për Rrugë Shtetërore në Petrovec.

Implementimi i SIT-ve pritet të sjellë përmirësime të ndjeshme në shërbimet e transportit, duke ofruar të dhëna në kohë reale për udhëtarët, rritur sigurinë përmes sinjalistikës moderne dhe paralajmërimeve për aksidente, si dhe duke reduktuar kohën e udhëtimit dhe emetimet e gazrave ndotës.

The post Hapen rrugë ligjore për implementimin e sistemeve inteligjente të transportit në Maqedoni appeared first on Albeu.com.

Nga nesër e deri më 31 gusht, në rrugët shtetërore të Republikës së Maqedonisë së Veriut do të hyjë në fuqi ndalimi i lëvizjes për automjetet e rënda mbi 15 ton gjatë fundjavave dhe në periudhat me temperatura shumë të larta.

Kjo masë synon të përmirësojë qarkullimin, sidomos në drejtim të qendrave turistike, si edhe të rrisë mbrojtjen e përdoruesve të rrugës në kushte të temperaturave të larta.

Sipas planifikimit, kufizimet në trafik do të zbatohen të premteve pasdite, si edhe të shtunave dhe të dielave, me synim uljen e ngarkesës në qarkullim dhe forcimin e sigurisë rrugore gjatë sezonit veror.

Po ashtu, në rast të valëve të të nxehtit, ndalimi mund të vendoset edhe gjatë ditëve të javës, nga e hëna deri të enjten, në orët më të nxehta të ditës, nga ora 11:00 deri në 17:00.

Kjo ndalesë nuk do të vlejë për automjetet që transportojnë ushqime, naftë, kafshë, ndihmë humanitare dhe ngarkesa të tjera thelbësore.

The post Nga nesër nis kufizimi veror për qarkullimin e mjeteve të rënda në rrugët e Maqedonisë së Veriut appeared first on Albeu.com.