Gjatë gjashtë muajve të parë të këtij viti, Policia e Kosovës ka evidentuar 51 raste të armëmbajtjes pa leje në komunat veriore. Zbulimi i armëve, kryesisht në objekte të braktisura, vazhdon të jetë pjesë e operacioneve policore në këtë pjesë të vendit.

Sipas zëvendëskomandantit të Policisë për rajonin e veriut, Veton Elshani, në këto 51 raste janë identifikuar 18 persona të dyshuar, ndërsa për personat e tjerë hetimet janë ende në proces. Ai vlerësoi se shifrat nuk dëshmojnë rritje të rrezikshmërisë, por pasqyrojnë bashkëpunimin e përmirësuar të qytetarëve të veriut me Policinë.

Elshani tha se largimi i çdo arme nga veriu nënkupton më shumë siguri për këtë zonë. Sipas tij, armatimi i zbuluar në shtëpi të braktisura nuk duket se lidhet me ndonjë grup të organizuar, ndërsa rëndësi të veçantë ka që këto armë të mos përdoren në raste të dhunës në familje, grabitjeve apo lëndimeve të lehta dhe të rënda trupore.

Policia nuk e përjashton që në veriun e Kosovës të gjenden edhe sasi të tjera armësh. Elshani theksoi se institucionet e sigurisë reagojnë sa herë që pranojnë informacione për armatim dhe se nuk ekziston asnjë zonë në veri ku Policia nuk mund të ndërhyjë ose ku nuk ka qasje.

Ai shtoi se bashkëpunimi me qytetarët është rritur krahasuar me vitin 2023, çka, sipas tij, e ndihmon Policinë të veprojë dhe të gjejë armë në çdo vend për të cilin ka informacione.

Për disa prej rasteve, pronarët e armëve ose të dyshuarit janë identifikuar, ndërsa në rastet e tjera hetimet vijojnë. Elshani sqaroi se personat e kërkuar mund të vendosen në listat e Policisë së Kosovës për intervistim dhe se procedurat hetimore nuk ndërpriten derisa të gjenden personat përgjegjës. Shumica e 51 rasteve, sipas tij, kanë të bëjnë me shtëpi të braktisura ku nuk ka pasur persona të pranishëm.

Në aksionet e zhvilluara në veri janë zbuluar armë të llojeve të ndryshme, nga armët e shkurtra dhe të gjata te pushkët e gjuetisë, pushkët M48 dhe kallashnikovët. Elshani tha se në këtë pjesë të vendit ka pasur shumë armatim, ndërsa origjina e tij nuk është gjithmonë e qartë, pasi një pjesë mund të ketë mbetur nga lufta ose të ketë hyrë më vonë në Kosovë.

Ai përmendi se Policia ka gjetur edhe armë të prodhuara në vitet 2020/2021. Për Policinë, sipas Elshanit, prioritet mbetet ruajtja e rendit dhe qetësisë publike, si dhe ofrimi i shërbimeve për të gjithë qytetarët e veriut.

Trajtimi i personave që gjenden me armë varet edhe nga vendimi i prokurorit. Në rastet kur një qytetar e lajmëron vetë armën dhe bashkëpunon me Policinë, prokurori njoftohet dhe personi mund të lirohet në procedurë të rregullt. Po ashtu, janë evidentuar raste me armë gjuetie me leje të skaduara ose jo valide, të cilat nuk janë vlerësuar si rrezik për sigurinë e përgjithshme nëse personi mbetet i lirë.

Në rastet e dhunës në familje, personat arrestohen pavarësisht nëse arma gjendet tek ata. Arrestimi mund të ndodhë edhe në raste të lëndimeve të lehta apo të rënda trupore, kur vlerësohet se ekziston mundësia e përsëritjes së veprës. Elshani theksoi se ligji përcakton rastet kur një person duhet të mbahet, ndërsa vendimin përfundimtar e merr prokurori.

Gazetari serb Branislav Krstiq vlerësoi se problemi i armatimit në veri duhet trajtuar në një kuadër më të gjerë. Ai ngriti çështjen se kush i armatosi serbët, nëse ky proces ka pasur miratim nga KFOR-i apo forcat ndërkombëtare të sigurisë, si dhe si ka kaluar një sasi e madhe armatimi përmes pikave kufitare, përkatësisht administrative.

Sipas Krstiqit, do të kishte qenë vendimtare që në një moment të merrej një vendim i përbashkët, përmes të cilit pala që i armatosi serbët do të obligohej t’i çarmatoste ata brenda një ose dy muajsh. Ai tha se, në vend të kësaj, rastet e veçuara kanë mbetur për t’u trajtuar nga shteti i Kosovës dhe aparati i tij policor.

Krstiq konsideroi se sasi të vogla të armëve individuale ose municionit mund të jenë mbetje të ish-veteranëve të luftës dhe të zhvillimeve të dekadave të fundit në Ballkan. Megjithatë, sipas tij, shqetësim mund të paraqesë ekzistenca e bunkerëve ose depove me sasi më të mëdha armësh.

Ai tha se Kosova është e armatosur dhe se një aksion për dorëzimin vullnetar të armëve mund të sillte rezultate. Krstiq kujtoi se KFOR-i, që nga ardhja e misionit ndërkombëtar paqeruajtës, ka organizuar në disa raste nisma për dorëzim armësh, të cilave u janë përgjigjur qytetarët e Kosovës. Sipas tij, nuk dihet nëse një nismë e tillë do të kishte efekt në veri, pasi serbët nuk e kanë pasur këtë mundësi.

Ai përmendi gjithashtu nivelin e armatosjes së qytetarëve shqiptarë në rajonin e Metohisë, përkatësisht në Rrafshin e Dukagjinit, në Drenicë dhe në Podujevë. Krstiq tha se shteti i Kosovës duket se fillimisht ka orientuar kërkimin dhe konfiskimin e armëve drejt personave që potencialisht mund ta cenojnë stabilitetin e vendit në një periudhë të afërt. Sidoqoftë, ai vlerësoi se edhe armatimi në jug të lumit Ibër mund të shndërrohet në një problem serioz afatgjatë për sigurinë e të gjithë qytetarëve të Kosovës.

Sipas Krstiqit, qytetarët në veri nuk kanë arsye të ndihen më pak të sigurt për shkak të armëve të zbuluara ose armëve që mund të ekzistojnë ende. Ai iu referua raporteve të Policisë së Kosovës, duke thënë se në veri nuk ka pasur asnjë vrasje mes qytetarëve dhe asnjë incident të armatosur.

Në të njëjtën kohë, ai theksoi se në Prishtinë, Gjilan dhe Ferizaj ndodhin pothuajse çdo muaj incidente të armatosura. Krstiq tha se fokusi i forcave policore në veri është i arsyeshëm, duke marrë parasysh incidentin në kanal (Ibër-Lepenc) dhe ngjarjet në Banjskë. Sipas tij, sasitë e armëve në veri nuk mund të rrezikojnë stabilitetin as të shtetit dhe as të qytetarëve në këtë pjesë të Kosovës.

Krstiq vlerësoi se armatimi i gjetur mund të ketë prejardhje të ndryshme. Një pjesë, sipas tij, mund të jenë pajisje të mbetura nga policia ose ushtria e Jugosllavisë, përkatësisht e Serbisë, dhe trashëgimi e civilëve të mobilizuar gjatë bombardimeve të Jugosllavisë.

Ai theksoi se ekzistenca e armëve dhe pajisjeve më të reja është veçanërisht shqetësuese. Në këtë rast, tha Krstiq, Policia duhet të hetojë nëse armatimi mund të jetë pjesë e ndonjë plani për aksione destabilizuese brenda Kosovës, apo nëse bëhet fjalë për pajisje të një projekti të vjetruar që, me konsolidimin e sovranitetit të Kosovës në veri, ka mbetur pa pronarë dhe pa përdorim real.

Zbulimi i armëve në veriun e Kosovës vijon të trajtohet nga institucionet e sigurisë. Policia e Kosovës deklaron se ndërhyn për çdo informacion që merr për armatim të fshehur, ndërsa autoritetet vlerësojnë se situata e sigurisë nuk është përkeqësuar. Njohësit e zhvillimeve në veri, ndërkaq, theksojnë nevojën për të zbardhur prejardhjen e armëve dhe për të verifikuar nëse ekzistojnë sasi më të mëdha armatimi.

The post Policia evidenton 51 raste të armëmbajtjes pa leje në veri, mbetet e mundur prania e armëve të tjera appeared first on Albeu.com.

Sipas IGJEO në qarqet Kukës, Dibër, Elbasan, Korçë dhe Gjirokastër pritet nivel rreziku i ulët, ndërsa nё disa qarqe pritet nivel rreziku lokalisht i lartë konkretisht: qarku Shkodër, qarku Tiranë, qarku Berat dhe qarku Vlorë.

Por, IGJEO thekson se rreziku më i lartë pritet ditën e nesërme.

Sot pasdite dhe nesër nuk priten reshje, ndërsa temperaturat minimale dhe maksimale të ajrit pritet të arrijnë në bregdet: 21 / 31 °C, në vendet e ulëta: 19 / 34 °C, në vendet malore: 13 / 27 °C.

Ndërsa era sot dhe nesër era pritet të fryjë e lehtë deri mesatare, për momente në zonat malore dhe bregdet deri e fortë.

The post Jepet alarmi në Shqipëri: Sot dhe nesër pritet nivel i lartë rreziku për zjarre në këto qarqe appeared first on Albeu.com.

Në një paraqitje të përbashkët para mediave, përfaqësues të Policisë së Kosovës, Agjencisë për Menaxhimin e Emergjencave, Agjencisë Pyjore të Kosovës, Institutit Hidrometeorologjik të Kosovës dhe Departamentit të Pylltarisë theksuan se çdo zjarrvënie, qoftë e qëllimshme apo e shkaktuar nga pakujdesia, do të trajtohet seriozisht dhe sipas legjislacionit në fuqi.

Drejtori i Përgjithshëm i Policisë së Kosovës, Gazmend Hoxha, tha se qytetarët duhet të veprojnë me përgjegjësi gjatë stinës së nxehtë, duke kujtuar se Kodi Penal parashikon dënime nga gjashtë muaj deri në 10 vjet burg për veprën penale të zjarrvënies.

Sipas tij, gjatë viteve 2025 dhe 2026, Policia e Kosovës ka kryer 1.222 intervenime në raste zjarresh, ka hapur 258 raste penale dhe ka arrestuar 37 persona.

Hoxha theksoi se kjo konferencë u organizua edhe si apel publik për kujdes gjatë verës, por edhe për të bashkërenduar veprimet mes institucioneve, në mënyrë që të ketë sa më pak zjarre dhe dëmet nga rastet e raportuara të mbahen në minimum. Ai shtoi se personat që identifikohen dhe arrestohen nga Policia e Kosovës për këto raste dërgohen në prokurori për procedura të mëtejshme, ndërsa për zjarrvënien, sipas nenit 322, dënimi i paraparë është nga gjashtë muaj deri në 10 vjet.

Ai bëri të ditur gjithashtu se, në krahasim me vitin 2024, rastet e raportuara të zjarrvënieve të qëllimshme kanë shënuar rritje nga 264 në 469 raste në vitin 2025, ose rreth 70 për qind më shumë.

U.d. i drejtorit të Agjencisë për Menaxhimin e Emergjencave, Shefki Avdullahu, deklaroi se institucioni që ai drejton e ka ngritur nivelin e gatishmërisë në të gjitha strukturat.

Ai nënvizoi se vetëm në sezonin e kaluar në Kosovë janë evidentuar 11.466 vatra zjarri, çka sipas tij kërkon përfshirje të gjerë të institucioneve si në nivel qendror, ashtu edhe lokal.

Avdullahu tha se qendrat operative emergjente punojnë pa ndërprerje, 24 orë në ditë dhe 7 ditë në javë, ndërsa qendrat rajonale të menaxhimit emergjent bëjnë monitorim të vazhdueshëm dhe koordinohen me nivelin lokal. Ai theksoi se të gjitha rastet e zjarrvënieve, pa dallim nëse janë të qëllimshme apo pasojë e pakujdesisë, do të trajtohen në përputhje të plotë me ligjin në fuqi. Sipas tij, personat përgjegjës do të përballen me masat ndëshkuese dhe procedurat ligjore pa asnjë përjashtim, duke e cilësuar këtë si një mesazh të qartë të angazhimit shtetëror për mbrojtjen e rendit publik dhe mjedisit. Megjithatë, ai theksoi se asnjë mekanizëm institucional nuk mund të japë efekt të plotë pa bashkëpunimin e qytetarëve.

Avdullahu përsëriti se përgjegjësit do të përballen me ndëshkimet përkatëse dhe u bëri thirrje qytetarëve të mos ndezin zjarre në hapësira të hapura, të mos djegin mbeturina dhe çdo rast ta lajmërojnë në numrin emergjent 112.

Nga ana tjetër, hidrologu i lartë në Institutin Hidrometeorologjik të Kosovës, Bashkim Kastrati, tha se ky institucion i ndjek në kohë reale kushtet meteorologjike përmes 24 stacioneve automatike, të cilat furnizojnë me të dhëna platformën kombëtare për menaxhimin e zjarreve pyjore.

Kastrati u shpreh se Instituti Hidrometeorologjik i Kosovës, gjatë situatave me temperatura të larta, e shton vazhdimisht vigjilencën përmes njoftimeve që i publikon për opinionin e gjerë, por edhe për informimin e institucioneve.

U.d. i drejtorit ekzekutiv të Agjencisë Pyjore të Kosovës, Menderes Ibra, bëri të ditur se gjatë vitit 2025 nga zjarret janë përfshirë 2.230 hektarë pyje, prej të cilëve 1.37- hektarë ishin pyje shtetërore dhe 863 hektarë pyje private.

Ai tha se pasojat e zjarreve nuk maten vetëm me humbjen ekonomike.

Sipas Ibrës, raste të paraqitura ka pasur 34 në rajonin e Prishtinës, 20 në rajonin e Mitrovicës, 3 në rajonin e Pejës, 44 në rajonin e Prizrenit, 6 në rajonin e Ferizajt dhe 32 në rajonin e Gjilanit. Ai theksoi se dëmet në pyje janë shqetësim i madh jo vetëm për Agjencinë Pyjore, por për të gjithë shoqërinë, pasi përveç djegies së pyjeve dhe humbjes ekonomike, ato sjellin edhe shkatërrim të florës dhe faunës, rrënim të burimeve ujore, ndikim në lirimin e dioksidit të karbonit dhe ndryshim të cilësisë së ajrit.

Drejtori i Departamentit të Pylltarisë, Tahir Ahmeti, tha se temperaturat e larta dhe niveli i ulët i lagështisë në tokë e shtojnë ndjeshëm rrezikun për shpërthimin e zjarreve, ndaj kërkohet më shumë koordinim institucional dhe bashkëpunim me qytetarët.

Ahmeti deklaroi se vendi po hyn në një periudhë me temperatura të larta dhe lagështi të ulët të tokës, çka krijon potencial të madh për zjarre. Ai theksoi se, në aspektin legjislativ, ligji për pyjet përcakton se ndezja e zjarreve apo e këtyre mjediseve me drunj sanksionohet me ligj dhe të gjithë personat që kryejnë një veprim të tillë përballen me fuqinë e ligjit. Sipas tij, masat parandaluese për mbrojtjen e pyjeve nga zjarri përcaktohen përmes planeve menaxhuese dhjetëvjeçare dhe institucionet që menaxhojnë pyjet e kanë obligim ligjor t’i kenë dhe t’i zbatojnë ato sipas përshkrimit. Ai shtoi se varësia nga kushtet klimatike e bën këtë proces mjaft kompleks, pasi pyjet kanë qenë gjithmonë ndër ekosistemet më të rrezikuara nga degradimi si pasojë e zjarrit.

Ahmeti rikujtoi gjithashtu se ligji ndalon ndezjen e zjarrit brenda një distance prej 500 metrash nga pyjet, përveç në hapësirat e posaçme të përcaktuara për këtë qëllim, ndërsa theksoi se shkelësit do të ndëshkohen sipas sanksioneve të parashikuara me ligj.

The post Autoritetet ngrenë alarmin për sezonin e zjarreve dhe kërkojnë vigjilencë maksimale gjatë verës appeared first on Albeu.com.

Këto deklarata ai i dha gjatë një stërvitjeje ushtarake dhe prezantimit të armatimit të Ushtrisë së Serbisë. Aktiviteti u mbajt më 28 qershor në aeroportin ushtarak në Batajnicë, pranë Beogradit, si edhe në poligonin Pasulanske Livade në Serbinë qendrore, në kuadër të festës shtetërore dhe fetare të Vidovdanit.

Në një prononcim për “Bota sot”, ish-hetuesi Agim Rexhepi vlerëson se njoftimet e Vuçiqit për armatim të ri nuk duhet të trajtohen si një proces i zakonshëm modernizimi, por si një zhvillim që kërkon shqetësim dhe vigjilencë, sidomos në dritën e sulmit në Banjskë.

Sipas Rexhepit, Serbia po e vazhdon kursin e militarizimit dhe po mban gjallë një retorikë kërcënuese, prandaj këto lëvizje duhet të merren seriozisht nga institucionet e Kosovës dhe partnerët ndërkombëtarë.

“Deklaratat e presidentit serb Aleksandar Vuçiq për shtimin e arsenalit ushtarak, përfshirë raketat kineze CM-400 dhe blerjen e avionëve të rinj luftarakë, nuk mund të shihen si një zhvillim i izoluar teknik apo si modernizim i zakonshëm i ushtrisë. Kur këto deklarata vijnë nga një shtet që ende refuzon ta njohë pavarësinë e Kosovës, që vazhdon retorikën kërcënuese ndaj fqinjëve dhe që nuk ka dhënë përgjegjësi për sulmin terrorist të Banjskës në shtator të vitit 2023, atëherë ato përbëjnë një arsye legjitime për vigjilencë dhe shqetësim.

Kosova nuk udhëhiqet nga frika, por nga analiza e fakteve. Faktet tregojnë se Serbia, në vend që të ndërtojë besim përmes dialogut dhe bashkëpunimit rajonal, vazhdon të investojë në militarizim dhe në retorikë që shpesh synon demonstrimin e forcës. Askush nuk mund të harrojë se në Banjskë pamë një sulm të organizuar mirë, me armatim të rëndë dhe strukturë paramilitare, i cili dëshmoi se kërcënimet ndaj sigurisë së Kosovës nuk janë vetëm teorike, por kanë marrë formë konkrete.

Prandaj, kur pas atij episodi dëgjohen paralajmërime për shtim të raketave dhe avancim të kapaciteteve ushtarake, është krejt normale që institucionet e Kosovës dhe partnerët ndërkombëtarë t’i analizojnë me seriozitet. Problemi nuk është vetëm posedimi i armëve, por mënyra se si ato shoqërohen me një diskurs politik që shpesh prodhon tensione dhe synon presion ndaj fqinjëve”, thotë ai.

Rexhepi thekson më tej se afrimi ushtarak i Serbisë me Kinën sjell një element të ri rreziku për Ballkanin, pasi Beogradi po zgjeron lidhjet me aktorë jashtë orientimit euroatlantik.

Ai nënvizon se një zhvillim i tillë ngre pikëpyetje serioze për stabilitetin në rajon.

“Bashkëpunimi ushtarak i Serbisë me Kinën paraqet gjithashtu një dimension të ri të sigurisë në Ballkan. Në një kohë kur shumica e vendeve të rajonit kanë orientim euroatlantik dhe investojnë në ndërveprueshmëri me NATO-n, Serbia po zgjeron bashkëpunimin ushtarak me aktorë që kanë interesa gjeopolitike të ndryshme nga ato të Bashkimit Evropian dhe Aleancës Atlantike. Kjo krijon shqetësime jo vetëm për Kosovën, por edhe për stabilitetin rajonal.

Megjithatë, Serbia duhet ta kuptojë se koha kur mund të ushtrohej presion ushtarak ndaj Kosovës ka përfunduar. Kosova sot është shtet me institucione funksionale të sigurisë, me një polici profesionale, me një Forcë të Sigurisë që po zhvillohet sipas standardeve të NATO-s dhe, mbi të gjitha, me mbështetjen e palëkundur të aleatëve strategjikë, në radhë të parë të Shteteve të Bashkuara të Amerikës dhe të misionit të NATO-s në Kosovë, KFOR”, deklaron ai.

Në fund, Rexhepi shprehet se Qeveria e Kosovës nuk është nxitëse e konflikteve, por as nuk pranon cenimin e sovranitetit dhe të rendit kushtetues, duke vepruar në bashkërendim me partnerët ndërkombëtarë, veçanërisht pas sulmit në Banjskë.

Sipas tij, paqja në rajon nuk ndërtohet me armatosje, por me njohje reciproke dhe me respekt për shtetet. Ai shton se për sa kohë Serbia i jep më shumë përparësi forcimit ushtarak sesa krijimit të besimit politik, do të vazhdojë të shkaktojë shqetësim në rajon, ndërsa Kosova do të vijojë forcimin e sigurisë në koordinim me aleatët.

“Qeveria e Kosovës ka dëshmuar se nuk provokon konflikte, por nuk toleron as cenimin e rendit kushtetues dhe të sovranitetit të vendit. Reagimi profesional i institucioneve pas sulmit në Banjskë tregoi se shteti është i aftë të mbrojë territorin dhe qytetarët e tij, duke vepruar në koordinim të plotë me partnerët ndërkombëtarë.

Paqja në Ballkan nuk ndërtohet me gara armatimi, por me njohje reciproke, respektim të sovranitetit dhe përgjegjësi për aktet e dhunës. Për aq kohë sa Serbia investon më shumë në demonstrimin e fuqisë ushtarake sesa në ndërtimin e besimit politik, do të vazhdojë të prodhojë shqetësime të arsyeshme për fqinjët e saj.

Kosova do të vazhdojë të investojë në siguri, në koordinim me aleatët e saj, jo për të kërcënuar askënd, por për të garantuar që askush të mos guxojë ta kërcënojë lirinë, sovranitetin dhe integritetin territorial të Republikës së Kosovës. Kjo është rruga e një shteti demokratik dhe përgjegjës, në kontrast me retorikën e militarizimit që dëgjohet periodikisht nga Beogradi” – përfundoi ai për “Bota sot”.

The post Vuçiq paralajmëron shtim të raketave kineze dhe blerje avionësh luftarakë, Rexhepi ngre alarmin për pasojat në rajon appeared first on Albeu.com.

Në një konferencë për media, menaxherja e programit në GLPS, Ema Pula, theksoi se 30 qershori përbën përfundimin e afatit të fundit që i jepte Kosovës mundësinë të shmangte humbjet financiare përmes realizimit të reformave të parapara.

Hulumtuesi i GLPS-së, Besar Gërgi, deklaroi se mungesa e institucioneve që funksionojnë plotësisht ka ndikuar drejtpërdrejt në ecurinë e zbatimit të reformave.

Sipas tij, vetëm pas publikimit të raporteve zyrtare nga Qeveria e Kosovës dhe Bashkimi Evropian do të qartësohet niveli i fondeve të përfituara, shuma e mjeteve të rrezikuara dhe reformat që kanë mbetur të parealizuara.

Gërgi shtoi gjithashtu se, duke pasur parasysh situatën aktuale në Kosovë, GLPS ka përgatitur disa rekomandime për të përmirësuar dhe përshpejtuar zbatimin e agjendës së reformave.

The post GLPS paralajmëron se Kosova mund të humbë në mënyrë të pakthyeshme 90.6 milionë euro nga Plani i Rritjes appeared first on Albeu.com.

Aktualisht, vetëm një korsi e gjysmë e rrugës është e hapur, ndërsa një gur gjigant ndodhet ende mbi asfalt, duke përbërë rrezik real për drejtuesit e mjeteve.

Ajo që bie më tepër në sy, një ditë pas ngjarjes së rëndë, është mungesa e autoriteteve në terren.

Nuk ka sinjalistikë paralajmëruese, as punonjës që të këshillojnë drejtuesit e mjeteve të ulin shpejtësinë në një segment që mbetet tejet i rrezikshëm.

Ndonëse për më shumë se 7-8 orë, gjatë ditës së dielë, mjete të rënda punuan pa ndërprerje për shembjen e skarpatës së dëmtuar dhe lirimin e rrugës, situata nuk është normalizuar plotësisht.

Në korsinë e bllokuar, mjetet e tonazhit të rëndë e kanë të pamundur shkëmbimin, duke krijuar tension dhe rrezik të shtuar për aksidente.

Mes personave që u përballën drejtpërdrejt me rrezikun është edhe banori i zonës, Safet Duka, i cili i shpëtoi për mrekulli masivit të gurëve që u shkëput nga mali, në një moment që mund t’i kishte marrë jetën atij dhe nënës së tij.

Ai tregon se automjeti i tij u dëmtua nga gurët e parë që ranë në rrugë dhe kërkon dëmshpërblim nga firma që mirëmban aksin, si dhe masa urgjente nga autoritetet për të rikthyer sigurinë për përdoruesit e rrugës.

Ndërkohë, të dielën, Kreu i Autoritetit Rrugor Shqiptar, Ami Kozeli, mohoi që shembja e masivit të jetë shkaktuar nga punimet për zgjerimin e Korridorit VIII.

Megjithatë, fakt mbetet se shumë pranë segmentit të dëmtuar shihen mjete dhe punime aktive për gjurmën e re të rrugës, çka ka shtuar dyshimet dhe debatet mbi ndikimin e tyre në stabilitetin e terrenit.

Situata ka ngritur gjithashtu edhe shqetësime mjedisore. Ambjentalistët denoncojnë hedhjen e mbetjeve inerte në lumin Shkumbin, duke paralajmëruar pasoja serioze për ekosistemin dhe duke kërkuar ndërhyrje të menjëhershme nga institucionet përgjegjëse.

Në një nga akset më të rëndësishme kombëtare, që lidh juglindjen me pjesën tjetër të vendit, rreziku ende nuk ka kaluar. Drejtuesit e mjeteve lëvizin mes frikës dhe pasigurisë, ndërsa pritshmëritë për masa konkrete dhe prani shtetërore në terren mbeten ende pa përgjigje.

The post Rreziku mbetet i pranishëm në “Kthesat e Dragostunjës”, qarkullim me vështirësi dhe mungesë masash sigurie appeared first on Albeu.com.

Ai theksoi se tuneli i Murrizit paraqet rrezikshmëri, duke shtuar se çarjet vijnë si pasojë e mosplotësimit të kushteve të ndërtimit.

Ai përmendi gjithashtu edhe një ekspert grek, i cili ka theksuar se në këtë tunel ka mungesë çeliku.

Nazarko akuzoi gjithashtu ministrinë e Infrastrukturës se nuk lejon krijimin e Urdhrit të Inxhinierëve, një enti, që do të mundësonte analiza të pavarura.

“Për të konstatuar nga vijnë këto çarje duhet oponencë nga një ent tjetër i pavarur. Këtë shqetësim e kemi ngritur me dhjetëra herë. Ministria ka mbyllur të gjitha rrugët e komunikimit për krijimin e urdhrit të inxhinierit për të analizuar. Sot kemi mendimet e inxhinierëve të licensuar pranë ministisë së Infrastrukturës, dhe oponenca ëshë e njëanshme.

Është vërtet rrezik, vijnë për shkak të kushteve të ndërtimit të tunelit, eliminimit të të gjithë elementëve. Eksperti grek tha mungon çeliku, dikush mungojnë shtresat që bëjnë eliminimin e ujërvë nëntokësorë. Mungesa e këtyre elementëve që projektuesve iu duken elementare sjellin pasoja që kemi sot “, tha ai.

Duke u ndalur te bllokimi i aksit Librazhd-Përrenjas, ai theksoi se përveç ujërave, shkarjet kanë ardhur edhe për shkak të provokimit në pjesën lindore. Po ashtu ai theksoi se kompania nuk kishte marrë masa për të parandaluar rrëshqitjet.

“Rrëshqitja ka ardhur edhe për shkak të punimeve në pjesën e Korridorit 8, në pjesën lindore. Çdo vit kemi rrëshqitje gurësh e dherash por kjo nuk ishte rrëshqitje për shkak të ujërave nëntokësorë, por edhe e provokuar nga dora e njeriut. Përgjatë punimeve në Korridorin 8, dora e njeriut ka provokuar për shkak të gërmimeve dhe vibrimeve për ngjeshjen e rrugës”.

The post Inxhinieri Nazarko: Tuneli i Murrizit rrezik, çarjet vijnë për shkak të kushteve të ndërtimit appeared first on Albeu.com.

Një qytetar ka denoncuar në BalkanWeb situatën ku ndodhet ai dhe fqinjët e tij. Nga rrëshqitja e dheut banesat e tyre rrezikojnë që shumë shpejt të përfundojnë në greminë duke u rrezikuar kështu edhe jetën.

Ai ka shpjeguar se rrezikohen tetë banesa ndërsa fillesat e greminës së krijuar janë tashmë vetëm një metër larg shtëpisë së parë.

“Jam banor i fshatit Maleshovë, në rrethin e Përmetit, dhe po ju shkruaj me shqetësim të thellë dhe frikë reale për jetën e familjeve tona.
Si pasojë e reshjeve të mëdha, në fshatin tonë ka ndodhur një rrëshqitje masive dheu, e cila po përhapet në një sipërfaqe shumë të gjerë. Aktualisht 8 banesa ndodhen në rrezik të menjëhershëm, ndërsa në 3 prej tyre jetojnë familje, ku rrëshqitja ka mbërritur vetëm 1 metër larg themeleve.
Është krijuar një humnerë rreth 300 metra e gjatë dhe mbi 40 metra e thellë, që po zgjerohet vazhdimisht. Banesat lëkunden fort në çdo moment, duke krijuar ndjesinë e një tërmeti të pandalur dhe duke rritur rrezikun për shembje.
Kjo situatë është jashtëzakonisht alarmante dhe kërkon ndërhyrje të menjëhershme nga autoritetet përgjegjëse, për verifikim në terren, evakuim të banorëve dhe marrje masash emergjente, përpara se të humbasë ndonjë jetë njerëzore. Jeta e familjeve tona është në rrezik”, shkruan ai.

The post Ndihmë! Jetët tona janë në rrezik”/ Prag katastrofe në Përmet! Rrëshqitje masive dherash, 8 banesa buzë greminës, banori: Shtëpitë dridhen sikur bie tërmet appeared first on Albeu.com.

Një prej tyre, ka deklaruar për mediat se nuk largohen për shkak se aty kanë mallin e gjallë.

“Për ne që kemi bagëti është situatë shumë e keqe, nuk kemi ku vemi. Ja mallin do ta heqim, po silazhin ku ta çojmë, plus tokat që kemi marrë me qira. Ku do vete unë?

Deri tan s’na ka zënë, por po doli mua më zë 30 hektarë tokë. Kam ardhur me 2 nipërit, po e gdhijmë këtu. Me çfarë do i ushqejë djali këta? Këtu do ta kaloj natën, pastaj do iki të heq ato lopët nga stalla, t’i nxjerr në rrugë që të mos i zërë uji” tha ai për Euronews Albania.

The post Vjosa del nga shtrati, banorët refuzojnë të largohen: Do qëndrojmë këtu, kemi mallin appeared first on Albeu.com.

Sipas FMN rritja ekonomike pritet të mbetet e qëndrueshme në nivelin 3,5% në vitin 2025 dhe 3,6% në vitin 2026, e nxitur kryesisht nga konsumi privat dhe mbështetja e vazhdueshme e sektorit të turizmit.

FMN thekson se ekonomia shqiptare ka tejkaluar tashmë nivelin e saj para pandemisë, falë një kombinimi të përshtatshëm të politikave fiskale dhe monetare.

Inflacioni parashikohet të rritet gradualisht nga 2,2% në vitin 2025 drejt objektivit prej 3% në gjysmën e dytë të vitit 2026, në kushtet e një tregu pune të shtrënguar dhe rritjes së pagave.

Ndërkohë, deficiti i llogarisë korrente pritet të jetë 2,8% e PBB-së në vitin 2025 dhe të zgjerohet gradualisht në rreth 3,5% të PBB-së në afatin e mesëm, si pasojë e rritjes së importeve të nxitura nga të ardhurat më të larta dhe investimet publike kapitale.

FMN vlerëson se disiplina fiskale ka çuar në një ulje të ndjeshme të borxhit publik, i cili pritet të bjerë nën 50% të PBB-së, ndërsa rezervat e forta valutore kanë përmirësuar ndjeshëm pozicionin e jashtëm të vendit.

Në këtë kontekst, qeveria shqiptare po avancon reforma të guximshme me synimin për të siguruar anëtarësimin në Bashkimin Evropian deri në vitin 2030.

Megjithatë, FMN paralajmëron se rreziqet për perspektivën ekonomike janë zhvendosur drejt kahut negativ, për shkak të një mjedisi të jashtëm më të paqëndrueshëm.

Tensionet gjeopolitike, përshkallëzimi i masave tregtare, luhatjet e çmimeve të mallrave dhe paqëndrueshmëria në tregjet financiare globale mund të ndikojnë negativisht te partnerët kryesorë tregtarë të Shqipërisë dhe kërkesa e jashtme.

Në planin e brendshëm, rënia e popullsisë në moshë pune mund të thellojë mungesat në tregun e punës dhe të ushtrojë presione inflacioniste.

Për të ruajtur stabilitetin makroekonomik dhe për të mbyllur boshllëqet e reformave me Bashkimin Evropian, FMN thekson se reformat e brendshme në kohë janë thelbësore.

Prioritet mbetet ruajtja e rezervave fiskale përmes mobilizimit të qëndrueshëm të të ardhurave, përmirësimit të administrimit tatimor dhe modernizimit të sistemit të taksës së pronës, si dhe rritja e transparencës dhe cilësisë së shpenzimeve publike.

Në lidhje me politikat fiskale, FMN vlerëson se rritja e presioneve mbi shpenzimet, nëse nuk adresohen në kohë, mund të rrezikojë qëndrueshmërinë fiskale, veçanërisht përtej vitit 2030, për shkak të ndryshimeve demografike, detyrimeve për mbrojtjen dhe shpenzimeve që lidhen me klimën.

Për të ruajtur rezervat fiskale, FMN rekomandon reforma të favorshme për rritjen në anën e të ardhurave, përmirësim të cilësisë së shpenzimeve dhe rritje të transparencës fiskale.

Në këtë kuadër, FMN komenton edhe nismën e “Paqes Fiskale”.

“Marrëveshja ‘Paqja Fiskale’, e cila ofron falje borxhesh dhe rivlerësim preferencial të pasqyrave financiare, rrezikon të minojë progresin e mëparshëm në administrimin dhe përputhshmërinë tatimore”, thuhet në deklaratëne Bordit të FMN-së.

Në fushën e politikës monetare, FMN vlerëson se qëndrimi aktual i Bankës së Shqipërisë është i përshtatshëm, por thekson se banka qendrore duhet të jetë e gatshme të reagojë shpejt ndaj zhvillimeve të tregut, veçanërisht nëse efektet dytësore nga rritja e pagave rezultojnë më të forta se sa pritej.

FMN rekomandon gjithashtu fleksibilitet më të madh të kursit të këmbimit dhe mbështetje më të madhe te normat e interesit për ruajtjen e stabilitetit të çmimeve.

Sa i përket sektorit financiar, FMN nënvizon nevojën për monitorim të kujdesshëm të rreziqeve që lidhen me kreditimin në pasuri të paluajtshme, ekspozimet ndaj valutës së huaj dhe borxhin sovran, si dhe forcimin e kuadrit prudencial dhe të mbikëqyrjes bankare.

Në planin afatmesëm, FMN thekson se arritja e konvergjencës së të ardhurave me Bashkimin Evropian kërkon reforma të thella strukturore, veçanërisht në rritjen e produktivitetit, zhvillimin e kapitalit njerëzor, përmirësimin e tregut të punës, forcimin e qeverisjes dhe luftën kundër korrupsionit.

Konsultimi i ardhshëm sipas Nenit IV pritet të zhvillohet sipas ciklit standard 12-mujor.

The post Raporti për Shqipërinë/ FMN paralajmëron: Paqja Fiskale rrezikon të minojë progresin në administrimin tatimor appeared first on Albeu.com.