“Janë djegur, shkatërruar, demoluar dhe granatuar”.

Xhamia e ndodhur pranë Urës së Ibrit në Mitrovicë nuk i shpëtoi këtij shkatërrimi.

Sot, në atë hapësirë nuk ka mbetur asnjë gur themeli që të dëshmojë se aty ka ekzistuar dikur një objekt fetar.

Forcat serbe e dogjën tërësisht xhaminë gjatë vitit 1999.

Sipas Ramadan Shkodrës nga Bashkësia Islame e Kosovës, para luftës në Kosovë kishte rreth 400 xhami, ndërsa më shumë se gjysma e tyre pësuan dëmtime të ndryshme.

“Para luftës kanë qenë afërsisht 400 xhami. Prej tyre, 218 janë sulmuar, shkatërruar ose demoluar në forma të ndryshme. Këtu përfshihet selia e BIK-ut, xhamia e Llapit, ndërsa në Vushtrri është xhamia e Çarshisë, si dhe shumë xhami të tjera”, tregon Shkodra.

Ai shpjegon se në raste të caktuara objektivi nuk ishte vetëm rrënimi i xhamive, por edhe fshirja e çdo shenje që tregonte ekzistencën e tyre.

“Forcat serbe kanë dashur të krijojnë realitet të ri. Pasi i kanë minuar dhe shkatërruar objektet e trashëgimisë islame, e kanë niveluar tokën me ekskavator, në mënyrë që të humbiste çdo gjurmë dhe të krijohej një realitet i ri, ku mund të ndërtoheshin kisha ose objekte të tjera”, thotë ai.

Disa prej xhamive nuk u dëmtuan vetëm fizikisht, por u përdhosën edhe përmes shkrimeve me karakter nacionalist.

“Kemi pasur edhe përdhosje të objekteve të kultit. Në hapësirat e brendshme të xhamive janë shkruar grafite nacionaliste, grafite që shprehnin përkatësi ortodokse, si dhe mesazhe anti-shqiptare, anti-NATO, anti-SHBA dhe anti-Evropë”, u shpreh Ramadani.

Pjesa më e madhe e xhamive të dëmtuara gjatë luftës tashmë është restauruar.

Megjithatë, xhamia pranë Urës së Ibrit vazhdon të jetë e parestauruar.

Televizioni ka kërkuar një përgjigje edhe nga institutet për mbrojtjen e monumenteve, por ato nuk kanë kthyer përgjigje.

The post Forcat serbe synuan të krijonin një realitet të ri” – 218 xhami u dëmtuan ose shkatërruan gjatë luftës appeared first on Albeu.com.

Deputetja Fitore Pacolli ka reaguar për mbrojtjen e burimeve ujore në Kosovë, duke ndarë pamje nga shembja e një objekti të ngritur pranë një zone ujore.

Ajo ka vlerësuar se uji përbën një pasuri thelbësore dhe se ruajtja e tij duhet të jetë në qendër të vëmendjes.

“Degradimet dhe ndërtimet e papërgjegjshme përgjatë liqeneve dhe burimeve ujore nuk do t’i tolerojmë”, ka shkruar Pacolli.

Sipas deputetes, Kosova përballet me mungesë të pasurive ujore, ndërsa ndryshimet klimatike po e shtojnë pasigurinë për të ardhmen e tyre.

Pacolli ka nënvizuar se kujdesi për ujërat është detyrë e qytetarëve, institucioneve dhe gjithë kombit.

“Ato që i kemi sot duhet t’i ruajmë me kujdes, që t’ua lëmë edhe brezave që vijnë. Uji është jetë dhe do ta ruajmë si pasuri kombëtare”, ka shkruar ajo.

Postimit të saj i ka bashkëngjitur një video, ku duket një ekskavator duke rrënuar një objekt pranë një sipërfaqeje ujore.

The post Pacolli: Ujërat janë pasuri kombëtare, ndërtimet e papërgjegjshme nuk do të tolerohen appeared first on Albeu.com.

Në korrik të këtij viti, në afërsi të Liqenit të Ujmanit, u shembën 17 objekte pa leje që ishin ngritur në pronën e Ndërmarrjes Publike Hidroekonomike “Ibër-Lepenc”.

Operacioni për largimin e këtyre ndërtimeve u zhvillua nga Inspektorati i Ministrisë së Mjedisit, Planifikimit Hapësinor dhe Infrastrukturës.

Pas disa padive të paraqitura kundër ndërmarrjes “Ibër-Lepenc”, seanca gjyqësore ishte planifikuar për 12 gusht. Një ditë më vonë, ekipet e gjykatës shkuan në zonë për ta kryer procedurën e vendshikimit.

Daljen e gjykatës në terren e konfirmoi për KosovaPress zëdhënësja e Gjykatës Themelore të Mitrovicës, Hateme Haxhaj.

“Gjykata sot ka dalë në vendshikim në vendin ku u rrënuan objektet”, deklaroi shkurt Haxhaj.

Ndërkohë, disa media serbe, mes tyre edhe RTS-ja, kanë raportuar se Ministria e Bujqësisë, Pylltarisë dhe Zhvillimit Rural u ka kërkuar sot pronarëve të disa objekteve të tjera pranë Liqenit të Ujmanit që ta lirojnë pronën brenda dhjetë ditësh.

Sipas këtyre raportimeve, ekzistojnë dyshime se objektet janë ndërtuar pa leje në zonën e njohur me emrin “Međedi Potok”.

The post Gjykata e Mitrovicës inspekton terrenin pas rrënimit të objekteve në Ujman appeared first on Albeu.com.

Aleksandar Jakshiq nga Zubin Potoku dhe Branimir Mihajlloviq, me origjinë nga Vushtrria e me banim aktual në Mitrovicën e Veriut, thonë se brenda pak orësh humbën objektet pranë liqenit të Ujmanit, në të cilat kishin investuar për vite. Të dy janë të bindur se pronat u përkisnin atyre.

Ata deklarojnë se ndërtimet i kishin realizuar duke u mbështetur në dokumentacionin që posedojnë në sistemin juridik të Serbisë. Institucionet e Kosovës, ndërkaq, i trajtojnë objektet si ndërtime pa leje mbi tokën që menaxhohet nga ndërmarrja publike “Ibër-Lepenci”.

Pas rrënimeve, Jakshiqi dhe Mihajlloviqi kërkuan drejtësi edhe pranë institucioneve të Kosovës. Sipas tyre, nuk u është sqaruar se mbi cilën bazë ligjore kishte filluar largimi i objekteve. Ata thonë gjithashtu se nuk kishte vendim gjyqësor, ndonëse tashmë kishin nisur procedurën për përcaktimin e pronësisë.

Për Jakshiqin, shembja e hotelit “Jezero” në Ujman përfaqëson shumë më tepër sesa humbjen e një ndërtese. Ai thotë se, për vetëm disa orë, u shkatërrua ajo që familja e tij kishte krijuar gjatë pothuajse 20 vjetëve.

Në një deklaratë për Radion Evropa e Lirë, ai tha se së bashku me motrën dhe pjesëtarët e tjerë të familjes kishin hequr dorë nga shumë gjëra për ta ngritur hotelin. Sipas tij, familja kishte investuar gjithçka aty, ndërsa prindërit kishin vënë në atë objekt gjithë kursimet dhe mundin e tyre.

Kritikat e bashkësisë ndërkombëtare

Rrënimi i ndërtimeve në afërsi të liqenit të Ujmanit nxiti reagime kritike nga bashkësia ndërkombëtare, e cila u kërkoi autoriteteve kosovare ta ndalnin menjëherë aksionin. Kritika kryesore lidhej me faktin se pronarët, pasi ishin njoftuar të largoheshin nga pronat, kishin hapur procese gjyqësore. Për këtë arsye, u vlerësua se duhej pritur përfundimi i procedurave në gjykatë.

Drejtori i ndërmarrjes “Ibër-Lepenci”, Faruk Mujka, ka paraqitur një qëndrim tjetër. Ai tha se institucioni që drejton është i detyruar me ligj ta ruajë pronën nën administrimin e tij. Sipas Mujkës, informacionet e grumbulluara tregojnë se pjesa më e madhe e objekteve ishte ndërtuar gjatë viteve 2019 dhe 2020.

Ai argumentoi se këto ndërtime nuk mund të legalizoheshin nëpërmjet Ligjit për trajtimin e ndërtimeve pa leje, pasi ky ligj kishte hyrë në fuqi në shtator të vitit 2018.

Pronarët e kundërshtojnë këtë version, duke këmbëngulur se objektet e tyre ishin ngritur afro 20 vjet më parë dhe, rrjedhimisht, përpara hyrjes në fuqi të ligjit.

Humbja e tretë për Branimir Mihajlloviqin

Branimir Mihajlloviqi e përshkruan rrënimin si herën e tretë që mbetet pa gjithçka që kishte krijuar përgjatë viteve.

Ai ka lindur në Vushtrri, por u largua prej andej pas luftës së vitit 1999. Më pas u vendos në fshatin Frashër, afër Mitrovicës, ku kishte shtëpinë e familjes. Sipas tij, ajo shtëpi u dogj gjatë trazirave të marsit 2004.

Aktualisht, Mihajlloviqi banon në një apartament që i është dhënë për shfrytëzim nga Komuna e Mitrovicës së Veriut. Për këtë arsye, vikendica në afërsi të Ujmanit kishte për të një vlerë që shkonte përtej funksionit të një vendi për pushime.

Ai thotë se për 19 vjet kishte investuar gradualisht në të, duke kursyer edhe nga ushqimi për ta përfunduar ndërtimin.

Përplasja rreth pronësisë së tokës

Aleksandar Jakshiq këmbëngul se parcela ku ndodhej hoteli “Jezero” i takon familjes së tij dhe se objekti ishte ngritur në fillim të viteve 2000.

Ai pretendon se dokumentet që vërtetojnë pronësinë gjenden në sistemin juridik serb. Duke u bazuar në to, Jakshiqi ka hapur një kontest gjyqësor pranë institucioneve të Kosovës, ndërsa seanca e parë është planifikuar të mbahet më 12 gusht.

Sipas tij, vetëm gjatë ditëve të fundit kishte kuptuar se autoritetet e Kosovës ia kishin ndryshuar destinimin tokës ku ishte hoteli që në vitin 2018. Jakshiqi thotë se ky ndryshim tani e pengon të pajiset me dokumentet përkatëse në sistemin kosovar.

Ai kundërshton pretendimin se familja e tij e kishte uzurpuar pronën, duke pyetur se përse autoritetet nuk kishin vepruar gjatë gjithë këtyre viteve. Jakshiqi thotë se nuk do ta kishin nisur ndërtimin nëse toka nuk do të ishte e tyre dhe nëse nuk do të kishin pasur dokumentacion.

Sipas tij, familja nuk kishte marrë asnjëherë njoftim për ndryshimin e destinimit të parcelës. Ata pretendojnë se për këtë vendim mësuan vetëm pasi nisën të merrnin aktvendimet për rrënimin e objekteve përreth liqenit.

Branimir Mihajlloviqi, nga ana tjetër, deklaron se tokën e kishte marrë në shfrytëzim për 99 vjet në vitin 2006 nga ndërmarrja publike serbe “Srbijashume”, përkatësisht Ndërmarrja Publike e Serbisë për Menaxhimin e Pyjeve Shtetërore. Ai thotë se qiranë ia kishte paguar rregullisht kësaj ndërmarrjeje.

Gjatë vitit 2024, kur Kosova nisi mbylljen e institucioneve që vepronin brenda sistemit të Serbisë, me arsyetimin se ishin struktura paralele dhe të paligjshme, Mihajlloviqi u përpoq ta rregullonte statusin e pronës në sistemin juridik të Kosovës.

Vitin e kaluar ai dorëzoi kërkesë për legalizimin e objektit. Sipas Mihajlloviqit, ishte i gatshëm që në të ardhmen pagesën e qirasë t’ua bënte institucioneve kosovare.

Pavarësisht kësaj, vikendica iu rrënua më 21 korrik. Ndërkohë, ai mori edhe një gjobë prej 2.000 eurosh për ndërtim pa leje.

Mihajlloviqi kërkon të dijë përse institucionet e Kosovës zgjodhën që aksionin kundër ndërtimeve pa leje ta nisnin pikërisht në veri të vendit, zonë ku shumicën e popullsisë e përbëjnë serbët.

Pas reagimeve ndërkombëtare për rrënimet në Ujman, Ministria e Mjedisit, Planifikimit Hapësinor dhe Infrastrukturës deklaroi se ndërhyrja bën pjesë në një plan më të gjerë për mbrojtjen e burimeve ujore. Ministria paralajmëroi se largimi i ndërtimeve pa leje do të vazhdojë në të gjithë Kosovën.

Ministrja në detyrë, Fitore Pacolli, bëri të ditur se deri tani në zonën pranë liqenit të Ujmanit janë hequr 17 objekte.

Çfarë përcakton ligji për rrënimin?

Eksperti i çështjeve pronësore, Korab Dibra, kishte shpjeguar më herët për Radion Evropa e Lirë se neni 23 i Ligjit për Pronën Publike e përcakton qartë pamundësinë e përfitimit të pronësisë publike përmes posedimit afatgjatë ose ndërtimit të një objekti në kundërshtim me rregullat për të drejtën e ndërtimit.

Sipas Dibrës, kjo dispozitë e përjashton fitimin e pronësisë mbi një pronë publike kur ndërtimi është kryer pa leje, edhe nëse është dorëzuar një kërkesë për legalizimin e tij.

Ai ka shtuar se ligji i njeh ndërmarrjes “Ibër-Lepenci” si të drejtën, ashtu edhe detyrimin për ta mbrojtur pronën që menaxhon nga çdo ndërhyrje e paautorizuar e palëve të treta.

Megjithatë, Dibra ka theksuar se organi përgjegjës nuk mund ta zbatojë vendimin për rrënim për aq kohë sa një ankesë ose kërkesë për legalizim vazhdon të jetë në shqyrtim.

Ai ka sqaruar gjithashtu se ligji nuk i jep “Ibër-Lepencit”, apo ndonjë ndërmarrjeje tjetër publike, kompetencën për t’i shembur vetë objektet. Sipas tij, këtë përgjegjësi e kanë institucionet përkatëse: komuna për ndërtimet e kategorisë së parë dhe të dytë, kurse ministria kompetente për ato të kategorisë së tretë.

Meqë shtëpitë dhe vilat klasifikohen si objekte të kategorisë së parë, Dibra thotë se vetëm komuna mund të lëshojë leje ndërtimore dhe të marrë vendime për rrënimin e tyre.

Kryetari i Komunës së Zubin Potokut, Millosh Peroviq, kishte thënë më herët se organet komunale nuk kishin dhënë miratim për shembjen e shtëpive dhe vikendicave në Ujman. Ai kishte kërkuar që çështja të zgjidhej përmes një kompromisi.

Megjithëse pranon se nuk ka shumë shpresë për rezultatin e procesit gjyqësor mbi përcaktimin e pronësisë, Aleksandar Jakshiq thotë se do ta vazhdojë betejën. Ai paralajmëron se objekti do të ndërtohet sërish, madje më i bukur dhe më i mirë se më parë.

Të njëjtin vendim shpreh edhe Branimir Mihajlloviqi. Ai thotë se nuk ka ndër mend të largohet nga Kosova. / REL

The post Pas rrënimeve në Ujman, pronarët: Investimet e gati dy dekadave u zhdukën për disa orë appeared first on Albeu.com.

Avni Islami, njohës i çështjeve të sigurisë, ka theksuar se operacioni shtetëror për shembjen e objekteve të paligjshme në Kosovë mbështetet në parimet e shtetit ligjor dhe në barazinë e të gjithë qytetarëve para ligjit.

Islami bëri të ditur se ky operacion po zhvillohet në të gjithë territorin e vendit, duke përfshirë edhe komunën veriore të Mitrovicës, teksa vëmendja së fundmi është përqendruar në brezin rreth Liqenit të Ujmanit, një zonë ku janë gjetur shkelje të shumta të ligjeve të ndërtimit.

Sipas tij, përpjekjet për ta cilësuar këtë ndërhyrje si një veprim me ngarkesë politike janë të pabaza, pasi masat e marra gjejnë mbështetje të plotë në legjislacion dhe jo në përkatësinë etnike të personave të prekur.

Në një postim të detajuar, Islami shkroi se “respektimi i ligjit dhe trajtimi i njëjtë i qytetarëve, pa asnjë dallim etnik, përbëjnë shtyllat themelore të aksionit shtetëror për prishjen e ndërtimeve pa leje në Kosovë.”

Ai shtoi se “ky operacion, i cili tashmë ka prekur zona si Rugova, Brezovica dhe Batllava, po shtrihet në mbarë vendin, përfshirë edhe veriun e Mitrovicës.”

Islami theksoi se “fokusi i ndërhyrjeve më të fundit është vënë rreth Liqenit të Ujmanit, ku janë dokumentuar shumë raste të paligjshmërisë, disa prej tyre të lidhura me figura të larta politike të komunitetit serb.”

Në fund, ai nënvizoi se “megjithëse mediat zyrtare në Beograd janë munduar ta paraqesin këtë operacion si një lëvizje me prapavijë politike, ky qëndrim përplaset me realitetin në terren. Fakti që aksioni ka një bazë të fortë ligjore e bën të pavlefshme çdo përpjekje për propagandë dhe i lë këto pretendime pa asnjë argument juridik apo faktik.”

The post Avni Islami: Nuk ka motive etnike në aksionin e Ujmanit dhe veriut të Kosovës appeared first on Albeu.com.

Rrënimi i vilave pa leje në zonën përreth Liqenit të Ujmanit ka nxitur reagimin e analistit Viktor Buzhala, i cili e ka ndërlidhur aksionin me mënyrën se si institucionet janë sjellë ndaj Listës Serbe dhe personave të afërt me të.

Buzhala ka deklaruar se skena të tilla nuk mund të shiheshin gjatë qeverisjeve të mëparshme, pasi, sipas tij, në Ujman nuk shembeshin shtëpitë e ndërtuara pa leje, ndërsa vilat e Radojçiqëve vazhdonin të hidhnin shtat.

Në postimin e tij, ai ka shkruar se një situatë e tillë bëhet e mundur vetëm kur Listës Serbe nuk i jepet pushtet maksimal, kur nuk krijohet koalicion me të dhe kur nuk ndërmerret çdo veprim së bashku me këtë subjekt për rrëzimin e qeverisë.

Analisti ka shtuar se pamje të tilla shfaqen gjithashtu kur Radojçiqi dhe shokët e tij nuk janë partnerë biznesi.

The post Buzhala pas shembjes së vilave në Ujman: Dikur objektet e Radojçiqëve vetëm zgjeroheshin appeared first on Albeu.com.

Pas paraqitjes së dobët në zgjedhjet e fundit, brenda LDK-së kanë filluar lëvizje që synojnë ndryshime në krye të partisë.

Sipas burimeve nga brenda subjektit, po sigurohen nënshkrime për thirrjen e një kuvendi të jashtëzakonshëm, në të cilin pritet të vihet në shqyrtim edhe shkarkimi i kryetarit Lumir Abdixhiku.

Të njëjtat burime thonë se kjo nismë është ndërmarrë nga Gazmend Muhaxheri.

Ish-deputeti i LDK-së, Adem Salihaj, vlerëson se përçarjet e brendshme dhe iniciativa për largimin e Lumir Abdixhikut mund t’i shkaktojnë dëme serioze LDK-së.

Ai bën thirrje për një proces të ri zgjedhor në parti, ndërsa paralajmëron se konfliktet e brendshme mund ta çojnë subjektin drejt rrënimit.

“Lidhja Demokratike e Kosovës po hyn në një proces të rrezikshëm, i cili mund ta dëmtojë atë në mënyrë të pariparueshme. Peticioni ka për qëllim thjesht shkarkimin e Lumir Abdixhikut, jo zgjidhjen e problemit. Unë pata kërkuar para një viti që Lumir Abdixhiku të japë dorëheqje, atëherë ndoshta do të bëhej një zgjidhje pa tronditje të mëdha.

Situata sot është shumë e rrezikshme dhe e çon LDK-në drejt shkatërrimit. Zgjidhja nuk është te luftërat e brendshme, zgjidhja është te një proces i ri zgjedhor, që fillon nga nëndegët dhe zhvillohet pa tensione. Po ashtu, kam kërkuar disa herë që kryetari të zgjedhet me vota të drejtpërdrejta, jo kështu si është sot.

Lumir Abdixhiku u konsumua shpejt, por as këta që pretendojnë të bëhen kryetar, nuk ofrojnë asgjë më shumë.

Këto përplasje janë një paralajmërim i një rrënimi të ri të LDK-së. Të gjithë ne që e kemi dashur dhe e duam LDK-në duhet të jemi shumë të brengosur”, deklaroi Salihaj për “Bota sot”.

The post Adem Salihaj paralajmëron se LDK-ja po rrezikon të shkojë drejt shkatërrimit appeared first on Albeu.com.