Çështja penale ndaj Kreshnik Halitit do të gjykohet sërish për herë të tretë, pasi Gjykata e Apelit miratoi ankesën e mbrojtjes dhe anuloi aktgjykimin ndaj tij.

Haliti ngarkohet se më 6 mars 2017, në rrugën “Myrvete Maksutaj” në Pejë, vrau shokun e tij M.Z. për shkak të një borxhi në vlerë prej 77 mijë eurosh.

Nga shkresat e rastit rezulton se Gjykata Themelore në Pejë, gjatë rigjykimit të dytë, më 1 dhjetor 2025 e kishte shpallur Halitin fajtor dhe i kishte caktuar një dënim unik prej 19 vjetësh burgim.

Aktgjykimi ishte kundërshtuar edhe nga Prokuroria Themelore në Pejë. Ankesa e saj mbështetej në pretendimet për shkelje të Ligjit Penal, në vendimin për sanksionin penal dhe në pjesën që lidhej me shpenzimet procedurale.

Prokuroria i kishte kërkuar Apelit ta ndryshonte vendimin e Themelores, ta shpallte Halitin fajtor për veprën penale “Vrasje e rëndë” dhe t’i shqiptonte një dënim më të ashpër. Si alternativë, duke u bazuar në rrethanat rënduese, ishte kërkuar dënim prej 20 vjetësh burgim.

Sa u përket shpenzimeve të procedurës, Prokuroria kishte propozuar që ato të përcaktoheshin saktë dhe të paraqiteshin në mënyrë të detajuar.

Ankesë ndaj vendimit për dënimin kishte paraqitur gjithashtu avokati Gëzim Kollçaku, në cilësinë e përfaqësuesit të autorizuar të palës së dëmtuar. Edhe ai kishte kërkuar nga Apeli ndryshimin e aktgjykimit dhe shqiptimin e një dënimi më të rëndë ndaj të akuzuarit.

Në anën tjetër, mbrojtësja e Halitit, avokatja Nushe Kuka-Mekaj, e kishte ankimuar vendimin për shkak të shkeljeve esenciale të dispozitave të procedurës penale, cenimit të Ligjit Penal, konstatimit të gabuar dhe jo të plotë të gjendjes faktike, si dhe vendimit për dënimin.

Kuka-Mekaj kishte kërkuar që vepra penale të rikualifikohej në “Vrasje e kryer në gjendje të tronditjes së fortë mendore” ose që klientit të saj t’i jepej një dënim më i butë. Në rast se aktgjykimi nuk do të ndryshohej, mbrojtja kishte propozuar që shqyrtimi gjyqësor të hapej në Gjykatën e Apelit.

Prokuroria e Apelit, përmes një shkrese, kishte propozuar që të miratoheshin ankesat e Prokurorisë Themelore dhe të palës së dëmtuar, ndërsa ankesa e mbrojtjes të refuzohej.

Gjetjet e Gjykatës së Apelit

Në vendimin e hartuar më 7 prill 2026, Apeli konstatoi se aktgjykimi i Gjykatës Themelore përmbante shkelje esenciale të dispozitave të procedurës penale, pasi në masë të madhe mungonin arsyet e qarta lidhur me faktet vendimtare.

Sipas shkallës së dytë, faktet kyçe në këtë çështje ishin përshkruar gjerësisht, por nuk ishte bërë një analizë e mirëfilltë e dëshmive të dëshmitarëve.

“Një vlerësim i tillë i përgjithësuar është i pamjaftueshëm, i papranueshëm”, thuhet në vendimin e Apelit.

Gjykata e Apelit vuri në dukje gjithashtu se Themelorja nuk kishte vlerësuar provat kundërthënëse. Në këtë kuadër përfshihen edhe mospërputhjet ndërmjet ekspertizave që trajtojnë gjendjen mendore të të akuzuarit.

Apeli nuk i shqyrtoi pretendimet e tjera të ngritura në ankesa, pasi arriti në përfundimin se aktgjykimi i shkallës së parë ishte përfshirë nga shkelje esenciale të procedurës penale dhe, për këtë arsye, duhej anuluar.

Në rigjykim, sipas udhëzimeve të Apelit, Gjykata Themelore duhet të veprojë në përputhje me vërejtjet e dhëna, të mënjanojë shkeljet esenciale procedurale dhe ta hartojë aktgjykimin sipas kërkesave ligjore.

Themelorja është udhëzuar që t’i administrojë përsëri të gjitha provat dhe, varësisht nga rrjedha e procedurës, të nxjerrë eventualisht edhe prova të tjera që mund të jenë të rëndësishme për përcaktimin e gjendjes faktike.

Në vendim kërkohet po ashtu që gjatë rigjykimit të sqarohet drejt dhe qartë gjendja e shëndetit mendor dhe psikik të Halitit në çastin kur janë kryer veprimet. Meqë ekzistojnë dy ekspertiza me përfundime të kundërta, Apeli ka kërkuar edhe urdhërimin e një super-ekspertize.

Vendimi i Apelit u mor nga kolegji gjyqësor i përbërë nga Skender Çoçaj, kryetar i kolegjit, si dhe Mentor Hajra e Arben Hoti, anëtarë.

Në gjykimin fillestar, më 4 korrik 2018, Gjykata Themelore në Pejë e kishte shpallur Kreshnik Halitin fajtor dhe e kishte dënuar me një dënim unik prej 22 vjetësh e gjashtë muajsh burgim.

Ky aktgjykim ishte anuluar më pas nga Gjykata e Apelit, me arsyetimin se përmbante shkelje të procedurës penale dhe se gjendja faktike nuk ishte vërtetuar plotësisht.

Në rigjykimin pasues, Gjykata Themelore në Pejë më 31 tetor 2023 i kishte shqiptuar Halitit, për veprën penale “Vrasje”, një dënim unik prej 20 vjetësh e gjashtë muajsh burgim.

Megjithatë, më 18 mars 2024, Apeli e kishte kthyer përsëri çështjen në rigjykim, duke miratuar ankesat e Prokurorisë Themelore në Pejë dhe të mbrojtësit të Halitit, avokatit Besnik Berisha.

Në rigjykimin e dytë, me vendimin e 12 dhjetorit 2025, Gjykata Themelore e dënoi të akuzuarin me një dënim unik prej 19 vjetësh burgim.

The post Rasti i vrasjes së shokut për borxhin prej 77 mijë eurosh kthehet për herë të tretë në rigjykim appeared first on Albeu.com.

Arlind Ahmeti dhe Agron Vllasaliu janë dënuar me nga 17 vjet burgim në rigjykimin e katërt për vrasjen e N.S., e ndodhur në qendër të Prishtinës në nëntor të vitit 2017. Në rigjykimin e tretë, Gjykata Themelore në Prishtinë u kishte shqiptuar atyre dënime me nga 16 vjet burgim.

Vendimi u bë publik të martën nga trupi gjykues i përbërë nga gjykatësi Ilir Foniqi dhe anëtarët Fatime Dermaku e Ertan Sejfulla, raporton “Betimi për Drejtësi“.

Gjykatësi Foniqi njoftoi se Ahmeti dhe Vllasaliu u gjetën fajtorë për veprën penale “Vrasje e rëndë në bashkëkryerje e kryer me dashje eventuale”, për të cilën secili u dënua me 15 vjet burgim. Për veprën “Armëmbajtje pa leje”, atyre iu shqiptuan dënime me nga 2 vjet e gjysmë burgim, ndërsa dënimi unik për secilin u caktua në 17 vjet burgim.

Masa e paraburgimit ndaj dy të akuzuarve është vazhduar.

Në seancën e shpalljes së aktgjykimit morën pjesë avokati Driton Musliu, mbrojtës i Vllasaliut, avokati Asdren Hoxha, mbrojtës i Ahmetit, si dhe e dëmtuara Shemsie Aliu-Sahiti. Dy të akuzuarit e ndoqën shpalljen nga burgu përmes video-lidhjes.

Pala e dëmtuar u udhëzua që kërkesën e saj ta realizojë në kontest të rregullt juridiko-civil.

Palët që nuk pajtohen me aktgjykimin mund të paraqesin ankesë brenda 30 ditësh nga pranimi i vendimit në formë të shkruar.

Historia gjyqësore e çështjes nisi me vendimin e Gjykatës Themelore në Prishtinë të 16 prillit 2019. Pasi e kishte rikualifikuar veprën penale, gjykata e shpalli Arlind Ahmetin fajtor për shtytje në vrasje të rëndë dhe i shqiptoi dënim unik prej 17 vjetësh burgim. Në atë kohë, Agron Vllasaliu ndodhej në arrati.

Në nëntor të vitit 2019, Gjykata e Apelit vendosi që lënda të kthehej për gjykim të ri në gjykatën e shkallës së parë, duke vlerësuar se aktgjykimi i 16 prillit 2019 ishte në kundërshtim me dispozitat ligjore.

Gjykata Themelore në Prishtinë nxori sërish aktgjykim dënues më 13 dhjetor 2022. Agron Vllasaliu dhe Arlind Ahmeti u dënuan atëherë me nga 21 vjet burgim për vrasjen e rëndë në bashkëkryerje të të ndjerit N.S., në vitin 2017 në Prishtinë.

Pas ankesave të përfaqësuesit të palëve të dëmtuara, avokatit Nexhmedin Sejdiu, mbrojtësve të Arlind Ahmetit, avokatëve Asdren Hoxha dhe Fitim Malokaj, si dhe mbrojtësit të Agron Vllasaliut, avokatit Florent Latifaj, Gjykata e Apelit më 23 mars 2023 e anuloi aktgjykimin e Gjykatës Themelore në Prishtinë. Çështja iu kthye sërish gjykatës së shkallës së parë për rigjykim.

Më 11 tetor 2024, Gjykata Themelore ua ricilësoi veprën penale në “Shkaktim të rrezikut të përgjithshëm” dhe i dënoi Ahmetin e Vllasaliun me nga 16 vjet burgim. Megjithatë, Gjykata e Apelit e ktheu përsëri rastin në rigjykim.

Në rigjykimin e tretë, më 20 tetor 2025, dy të akuzuarve iu shqiptuan sërish dënime unike me nga 16 vjet burgim. Gjykata Themelore e ricilësoi veprën nga “Vrasje e rëndë” në “Shkaktim të rrezikut të përgjithshëm” dhe për këtë vepër i dënoi me nga 12 vjet burgim. Për “Armëmbajtje pa leje”, secili mori dënim prej 4 vjetësh e 6 muajsh burgim.

Edhe ky vendim u anulua nga Gjykata e Apelit më 17 prill 2026. Duke aprovuar ankesën e Prokurorisë Themelore në Prishtinë, Apeli e riktheu çështjen në rigjykim në shkallën e parë.

Në aktakuzën e ngritur më 13 korrik 2021 thuhet se Agron Vllasaliu, më 24 nëntor 2017, në bazë të një marrëveshjeje paraprake me të pandehurin Arlind Ahmeti, e kishte privuar nga jeta N.S. dhe kishte vënë në rrezik jetën e Behar Sahitit, Lumbardh Kukajt, Freskim Farizit, R.K. dhe Mërgim Kqikut.

The post Rigjykimi i katërt për vrasjen në qendër të Prishtinës, Ahmeti dhe Vllasaliu dënohen me nga 17 vjet burg appeared first on Albeu.com.

“vendosi prishjen e vendimit nr. 39 (87-2025-261), datë 22.07.2025 të Gjykatës së Posaçme të Apelit për Korrupsionin dhe Krimin e Organizuar dhe vendimit nr.25, datë 13.03.2025, të Gjykatës së Posaçme të Shkallës së Parë për Korrupsionin dhe Krimin e Organizuar, për sa i përket pikës 4 të disponimit të Gjykatës së Posaçme të Shkallës së Parë për Korrupsionin dhe Krimin e Organizuar, lidhur me konfiskimin e pasurive të paluajtshme, dhe dërgimin e çështjes për rigjykim në Gjykatën e Posaçme të Shkallës së Parë për Korrupsionin dhe Krimin e Organizuar, me tjetër trup gjykues”, thuhet në vendim.

Goro është dënuar nga GJKKO për çështjen e tjetërsimit të tokave në zonën bregdetare të Himarës, teksa ka edhe një proces të dytë.

Vendimi i Gjykatës së Lartë:

“JORGO GORO

VEZIR GJIKOKAJ

SHOQERIA AG.TCC SH.P.K.

Neni 248 e 25, 257/a paragrafi i dyte, te Kodit Penal          -//-        

1.Mospranimin e rekursit të të gjykuarit Jorgo Goro, kundër vendimit nr. 39 (87-2025-261), datë 22.07.2025 të Gjykatës së Posaçme të Apelit për Korrupsionin dhe Krimin e Organizuar.

2.Prishjen e vendimit nr. 39 (87-2025-261), datë 22.07.2025 të Gjykatës së Posaçme të Apelit për Korrupsionin dhe Krimin e Organizuar dhe vendimit nr.25, datë 13.03.2025, të Gjykatës së Posaçme të Shkallës së Parë për Korrupsionin dhe Krimin e Organizuar, për sa i përket pikës 4 të disponimit të Gjykatës së Posaçme të Shkallës së Parë për Korrupsionin dhe Krimin e Organizuar, lidhur me konfiskimin e pasurive të paluajtshme, dhe dërgimin e çështjes për rigjykim në Gjykatën e Posaçme të Shkallës së Parë për Korrupsionin dhe Krimin e Organizuar, me tjetër trup gjykues”.

The post Gjykata e Lartë kthen për rigjykim në GJKKO dosjen e ish-kryebashkiakut të Himarës, Jorgo Goro! Ja për çfarë bëhet fjalë appeared first on Albeu.com.

Trupi gjykues i përbërë nga Ilir Panda, Albana Boksi dhe Medi Bici, prishën vendimin e Apelit të GJKKO të datës 27 nëntor 2020 dhe vendosën rikthimin e çështjes në të njëjtën gjykatë por me tjetër trupë gjykuese, duke kërkuar hetimin e tre gjyqtarëve.

Dritan Dajti, u dënua me burgim të përjetshëm nga Gjykata e Krimeve të Rënda për vrasjen e 4 punonjësve të policisë dhe ndodhet në qeli prej vitit 2008.

Por, në shkurt te vitit 2019 një trupë gjykuese pranë Apelit vendosi të shuante burgimin e përjetshëm për Dajtin duke e dënuar atë me 25 vite burg.

Tre gjyqtarët Skënder Damini, Aleks Nikolli dhe Petrit Aliaj në shumicë, vendosën të pranojnë kërkesën e Dajtit për gjykim të shkurtuar, ç`ka uli dënimin e tij me 1/3.

Ndërsa dy gjyqtarët e tjerë në pakicë ishin Fuat Vjerdha dhe Lindita Hoxha. Vendimi ishte i debatueshëm dhe madje në atë kohë shtyu prokurorin Klodian Braho të urdhëronte kontrolle në banesat e gjyqtarëve, nën dyshimin se ata mund të ishin përfshirë në korrupsion lidhur me vendimin lehtësues në favor të Dajtit.

Në operacionin e gushtit të 2009 për arrestimin e Dritan Dajtit, mbetën të vrarë efektivët Fatos Xhani, Altin Dizdari, Kastriot Feskaj, dhe Sajmir Duçkollari.

Në atë kohë, Dajti kërkohej për vrasjen e biznesmenit Agim Beqo, ngjarje e ndodhur në vitin 1999 në Tiranë.

The post Lehtësuan dënimin e Dritan Dajtit, Gjykata e Lartë kthen në Apel për rigjykim 3 gjyqtarët (EMRAT) appeared first on Albeu.com.

Me vendimin e saj, Gjykata e Lartë, ka urdhëruar kthimin e çështjes për rigjykim në Gjykatën e Posaçme të Apelit, por me një trup gjykues tjetër nga ai që kishte shqyrtuar më parë çështjen.

SPAK kishte kërkuar një vit burg me akuzën e fshehjes së pasurisë, por GJKKO-së e dënoi me 6 muaj, të cilat iu konvertuan në një vit shërbim prove.

Sipas SPAK, Bashkim Dedja, ka fshehur një apartament në formularin e vetëdeklarimit teksa ishte gjyqtari i parë që dënohej nga GJKKO, pasi nuk kaloi Vetting-un.

Ish-anëtari i Kushtetueses u shkarkua nga Vettingu, pasi nuk justifikonte një apartament në Durrës, ndërsa në prill të vitit 2021, gjykata vendosi sekuestrimin e tij.

The post Gjykata e Lartë rikthen për rigjykim në Apel çështjen ndaj ish-kreut të Kushtetueses, Bashkim Dedja appeared first on Albeu.com.

Vendimi u dha nga treshja e gjyqtarëve Albana Boksi, Medi Bici dhe Sokol Binaj, të cilët pas seancës të zhvilluar në dhomë këshillimi, vendosën të rikthejnë çështjen në Apel për rigjykim, tek i njëjti trupë gjykues.

Pasi shkalla e tretë e gjyqësorit të zbardhë vendimin, në Apelin e Posaçëm gjyqtari Engert Pëllumbi, do të marrë edhe njëherë në shqyrtim ankimin e Arbër Veliajt, i cili kundërshtoi vendimin e GJKKO për sekuestrimin e materialeve në banesën dhe zyrën e tij, si dhe për kontrollet e ushtruara në këto dy ambiente në kohën kur ai ndodhej jashtë vendit.

Në dhjetor të vitit të kaluar, agjentët e BKH me urdhër të SPAK dhe vendim të GJKKO, mësynë në banesën dhe zyrën e Arbër Veliajt, në kuadër të hetimeve që Prokuroria e Posaçme po kryente për vëllain e tij Erion Veliaj.

The post Gjykata e Lartë prish vendimin e Apelit të GJKKO-së për Arbër Veliajn, rikthehet për rigjykim appeared first on Albeu.com.