Me një karrierë të ndërtuar për dekada në gastronomi dhe turizëm, Kolë Nushi ka ushtruar veprimtarinë e tij në Zvicër, Kosovë dhe Ulqin, duke ndërthurur përvojën e fituar jashtë vendit me traditën shqiptare të mikpritjes.

Rexhep Kryeziu

Ekspert i vreshtarisë dhe verarisë

I lindur me prejardhje nga Vranishta, ish-Vraniçi, e Gjakovës, Nushi e nisi orientimin e tij profesional në fushën e hotelerisë dhe turizmit. Vitet e formimit dhe të punës në Zvicër e pajisën me njohuri mbi mënyra të ndryshme organizimi dhe standarde pune në sektorin e shërbimeve.

Angazhimi i tij në gastronomi dhe turizëm daton që nga viti 1986, periudhë prej së cilës ai ka zhvilluar aktivitetin në tri hapësira: Zvicër, Kosovë dhe Ulqin.

Për Nushin, gastronomia nuk ka qenë vetëm çështje shërbimi, por edhe një mënyrë për të përcjellë mikpritjen dhe elementet e traditës shqiptare.

Një rol të veçantë në restorantet e tij ka zënë vera, e cila është përfshirë si pjesë e rëndësishme e ofertës gastronomike. Përzgjedhja e saj, së bashku me disa detaje të ambienteve, lidhet me trashëgiminë e vreshtarisë dhe verëtarisë në trojet shqiptare.

Ndër bizneset ku ai ushtron veprimtarinë është edhe “Noki Beach”, i vendosur në bregdetin e Ulqinit.

Emërtimi i këtij lokali ka një domethënie familjare. “Noki Beach” mban emrin e babait të Nikollës, Noki, duke e lidhur drejtpërdrejt biznesin me historinë e familjes.

Në hyrje të restorantit janë vendosur dy fuçi të mëdha lisi, të cilat shërbejnë si pjesë dekorative dhe përcjellin lidhjen e ambientit me kulturën e verës.

Mes produkteve të ofruara gjenden edhe verëra të prodhuara nga varietete tradicionale shqiptare, përfshirë Katerroshin dhe Vrançin.

Përvoja profesionale e marrë në Zvicër ka qenë një nga shtyllat kryesore të rrugëtimit të Nushit. Ai është përpjekur që njohuritë dhe praktikat e fituara atje t’i zbatojë në aktivitetet e tij në gastronomi dhe turizëm.

Organizimi i punës, cilësia e shërbimit dhe komunikimi me klientët janë ndër faktorët që ndikojnë në mënyrë të drejtpërdrejtë në funksionimin e një biznesi të këtij lloji.

“Noki Beach” përfaqëson një nga hapësirat ku kjo përvojë është përshtatur me një mjedis turistik në bregdetin e Ulqinit.

Lokali vizitohet nga pushues nga Kosova, pjesëtarë të diasporës shqiptare dhe turistë nga vende të ndryshme europiane, ndër të cilët edhe nga Zvicra, Austria dhe Gjermania.

Veprimtaria e Kolë Nushit përfshin disa dekada punë në hoteleri, gastronomi dhe turizëm. Rruga e tij ka nisur nga Vranishta, ka vijuar në Zvicër dhe Kosovë, për t’u shtrirë më pas edhe në Ulqin.

Pavarësisht mjediseve të ndryshme ku ka punuar, aktiviteti i tij ka ruajtur lidhjen me prejardhjen dhe trashëgiminë familjare.

Rasti i Nushit tregon se përvoja e krijuar jashtë vendit mund të përshtatet dhe të vihet në shërbim të veprimtarive të zhvilluara në hapësirat shqiptare.

The post Nga përvoja zvicerane te biznesi në Ulqin: Rruga profesionale e Kolë Nushit në gastronomi dhe turizëm appeared first on Albeu.com.