Ajo shtoi se “mesazhe të ngjashme kanë dërguar edhe deputetët e parlamentit europian”.

Sipas Nikola Zirojeviq të Partisë Social Demokrate “është e qartë se përmes regjistrimit po kërkohen të bëhen manipulime etnike”.

“Situata aktuale është e tillë që regjistrimi është planifikuar të bëhet pa asnjë
marrëveshje me opozitën. Gjithçka që kanë pasur në vitin 2011, tashmë opozita nuk e ka”, tha zoti Zirojeviq.

Nënkryetarja e Partisë Liberale Jelena Markoviq tha se forca politike që përfaqëson nuk do të lejojë që popullatën e Malit të Zi ta regjistrojnë ata që ajo i quajti “shërbëtorë të Aleksandër Vuçiçit”.

“Nuk do të pranojmë që shërbëtorët e tij të na numërojë, sepse ky regjistrim po përgatitej të përsëritej si në vitin 1918 dhe Mali i Zi të asimilohej kulturalisht”, tha zonja Markoviq.

Partitë opozitare dhe disa shoqata të shoqërisë civile në Mal të Zi e konsiderojnë procesin e përgatitjes së regjistrimit të popullsisë në kundërshtim me dispozitat ligjore dhe si keqpërdorim të të drejtave themelore të njeriut.

Të gjitha partitë opozitare dhe partitë e pakicave kanë kërkuar shtyrjen e procesit të regjistrimit ose bojkotimin e tij.

Të mërkurën Parlamenti Europian miratoi një rezolutë për Malin e Zi ku ndër të tjera thuhej se “tensionet e larta politike dhe polarizimi kanë sjellë ngecjen e procesit të anëtarësimit të vendit në Bashkimin Europian”.

Pro rezolutës votuan 529 deputetë, 51 kundër ndërsa 53 të tjerët abstenuan.

Deputeti i parlamentit europian dhe raportuesi për Malin e Zi, Tonino Picula si dhe deputeti socialist Pedro Marques, paraqitën gjithashtu amendamente në raport, duke kërkuar që regjistrimi i ardhshëm i popullsisë, të shtyhet. Ata thanë se procesi duhet të zhvillohet në përputhje me standardet e BE-së dhe vetëm pasi të përfundojë ngërçi politik në vend.

The post Qytetarë dhe opozita kërkojnë shtyrjen e regjistrimit të popullsisë në Mal të Zi appeared first on Albeu.com.