Në vendin e dytë me 67 vota ishte Ministria e Tregtisë, Penny Mordaunt dhe në vendin e tretë ishte Sekretarja e Jashtme Liz Truss me 50 vota. Ndërsa nga gara janë eleminuar Kancelari Nadhim Zahawi dhe ish-sekretari i shëndetësisë Jeremy Hunt.

Ata që janë ende në garë do të përballen me një raund tjetër votimi të enjten. 160 mijë anëtarë konservatorë do vendosin se cilin kandidat duan të bëjnë kreun e partisë dhe kryeministrin e ardhshëm dhe rezultati do të shpallet më 5 shtator.

Sunak, i cili u largua nga posti i kancelarit javën e kaluar tha për BBC se ndihej ” shkëlqyeshëm” për rezultatin. Ndërsa Mordaunt tha se ishte “shumë e nderuar” nga mbështetja që kishte marrë dhe një zëdhënëse e Truss tha: “Tani është koha që kolegët të bashkohen pas kandidatit që do të ulë taksat, do të japë ndryshimin e vërtetë ekonomik që na nevojitet që nga dita e parë dhe do të sigurojë humbjen e Putinit në Ukrainë”./albeu.com

The post Pasuesi i Boris Johnson, Rishi Sunak kryeson raundin e parë të votimit appeared first on Albeu.com.

Por diferenca e partisë së presidetit ishte vetëm me një grusht votash.

Sipas vlerësimeve, të cilat u bënë të ditura në orët e para të ditës së sotme, fraksioni i mazhorancës presidenciale duket se ka mbledhur rreth 20 mijë vota më shumë se “Bashkimi Popullor” i liderit të së majtës franceze Jean-Luc Melanson. Më konkretisht, koalicioni i Macron ka mbledhur 25,75% të votave kundrejt 25,66% të të majtës.

Megjithatë, më shumë se një në dy votues (midis 52% dhe 53% e popullsisë) nuk shkuan në qendrat e votimit të dielën, një rekord i ri që nënvizon  indiferencën franceze ndaj  një votimi që u la në hije nga zgjedhjet presidenciale.

“E vërteta është se partia presidenciale ka humbur,” tha Jean-Luc Melanson të dielën mbrëma, duke u bërë thirrje forcave të tij që të “shpërthejnë” në raundin e dytë të zgjedhjeve parlamentare.

Megjithatë sipas ekpertëve, Melanson mund të ndikohet nga mungesa e një grupi votash në raundin e dytë dhe abstenimi i fortë i regjistruar veçanërisht tek të rinjtë dhe klasa punëtore.

The post Me vetëm “një grusht” votash në raundin e parë, Macron fiton zgjedhjet parlamentare në Francë appeared first on Albeu.com.

Për të tretën herë në 20 vitet e fundit, një kandidat i së djathtës ka kaluar në balotazh të zgjedhjeve presidenciale të Francës, një zhvillim që ka shkaktuar shumë ankth në qarqet liberale në të gjithë Europën dhe më gjerë.

Francezët nuk kanë shumë simpati për presidentët e tyre, dhe shpesh i shohin zgjedhjet si një mundësi për t’i dhënë një goditje të mirë presidentit aktual. Vetëm dy janë rizgjedhur që nga viti 1965. Duke pasur parasysh këtë, numri i votave të Emmanuel Macron më 10 prill ishte afër një triumfi, raporton abcnews.al.

Me 27.9%, ishte rezultati më i lartë në raundin e parë i arritur nga çdo zyrtar aktual që nga viti 1988 dhe pothuajse 4% më shumë se ai në 2017. Kjo është dëshmi e kompetencës me të cilën ai ka qeverisur, duke rritur punësimin dhe produktivitetin dhe duke përmirësuar trajnimin dhe edukimin duke shmangur fatkeqësitë e mëdha, pavarësisht pandemisë.

Ashtu si në vitin 2017, Macron do të përballet me Marine Le Pen në balotazh. Le Pen e fokusoi fushatën e saj në çështjet si çmimet e energjisë dhe emigracioni. Pas disfatës së saj të mëparshme, ajo ndryshoi emrin e partisë së saj nga Balli Kombëtar, të cilin e kishte trashëguar nga babai i saj, në Tubimi Kombëtar. Megjithatë, në raundin e parë ajo mori 23.2%. të votave.

Macron ka më shumë mundësi për të fituar një mandat të dytë. Presidenti duhet të marrë shumicën e votave të kandidatëve kryesorë të eliminuar; Le Pen duhet të rrëmbejë votat e ekstremit të djathtë Eric Zemmour.

Pra, zgjedhjet do të përcaktohen nga votat e Jean-Luc Mélenchon, i cili mori një 22% të votave. Mélenchon u ka thënë mbështetësve të tij se “asnjë” nga votat e tij nuk do të shkojë për Le Pen. Shumica do ta kritikojë atë për shkak të urrejtjes së tyre ndaj ish-bankierit në Elysee dhe zemërimit ndaj privimit të zonave rurale të mbetura të Francës, qyteteve post-industriale dhe lagjeve të varfra urbane, raporton abcnews.al.

Por Le Pen duhet të marrë pjesën më të madhe të votave të Mélenchon për të fituar, dhe kjo do të jetë e vështirë. Megjithatë, sondazhet e The Economist tregojnë për një garë të ngushtë në 53-47%. Bazuar në këtë, modeli ynë elektoral i jep Le Pen një në pesë shans për të fituar, pothuajse të njëjta me atë që u përball Donald Trump sipas disa vlerësimeve në zgjedhjet e vitit 2016 në Amerikë.

Macron duhet të bëjë fushatë të fortë për të minimizuar gjasat që diçka tronditëse të ndodhë në Francë më 24 prill. Votuesit francezë nuk duhet të kenë asnjë dyshim: fitorja e Le Pen do të ishte një fatkeqësi për Francën dhe Europën.

Le Pen në të kaluarën ka shprehur mbështetjen për Trump dhe Vladimir Putin dhe ende mbështet Viktor Orbanin autokratikin e Hungarisë. Ajo dëshiron të largojë Francën nga struktura e integruar e komandës së NATO-s dhe të ndalojë veshjen e muslimaneve (hixhab).

Ajo ka hequr dorë nga thirrja e saj që Franca të largohet nga euro, por do të përpiqet t’u japë përparësi qytetarëve francezë në fondet dhe punët e qeverisë, dhe t’i japë përparësi ligjit francez. Një fitore e Le Pen-it do t’i jepte zemër edhe të djathtës gjetkë në Europë, veçanërisht në Itali, e cila do të mbajë zgjedhjet vitin e ardhshëm.

BE-ja do të përballet me një krizë të rëndë. Protestat e mëdha, ndoshta të dhunshme, mund të mbushin rrugët e Francës. Çfarëdo që të ndodhë në raundin e dytë, fakti që më 10 prill një rekord prej 58% votuan për ekstremet e djathtë dhe të majtë është një shenjë se Franca është e përçarë dhe e pakënaqur.

Në politikën presidenciale, dy partitë kryesore të së majtës dhe të djathtës që formuan pothuajse të gjitha qeveritë e saj që nga viti 1958 janë “zhdukur”– kandidatët e tyre morën më pak se 7% mes tyre.

Nëse shansi katër në pesë i jep vërtet Macron mandatin e tij të dytë, ai duhet ta përdorë atë për të trajtuar shkaqet rrënjësore të kësaj ndarjeje dhe pakënaqësie. Ruleta ruse nuk është një lojë që luhet vazhdimisht.

The post Emmanuel Macron doli më mirë seç pritej në raundin e parë të zgjedhjeve në Francë appeared first on Albeu.com.

Sipas rezultateve preliminare të publikuara nga organizatat joqeveritare në Serbi, IPSOS/CeSid, kandidati i Partisë Përparimtare Serbe dhe presidenti aktual i Serbisë, Aleksandar Vuçiq, ka fituar 59.8 për qind të votave në zgjedhjet presidenciale të mbajtura më 3 prill.

Këto të dhëna dalin pas përpunimit të 55.6 për qind të votave, që i japin Vuçiqit edhe një mandat pesëvjeçar në krye të Serbisë.

Presidenti mund të zgjidhet në rundin e parë nëse merr më shumë se 50 për qind të votave të vlefshme. Në të kundërtën, dy kandidatët me më së shumti vota përballen në rundin e dytë të balotazhit.

Sipas rezultateve preliminare të publikuara nga IPSOS/CeSid, në bazë të 62.5 për qind të votave të përpunuara, lista “Aleksandar Vuçiq – Së bashku mund të bëjmë gjithçka” ka fituar më së shumti vota në zgjedhjet parlamentare, përkatësisht 43.6 për qind.

Ndërkaq, koalicioni opozitar “Të bashkuar për fitore” pritet të dalë partia e dytë parlamentare me 12.9 për qind të votave.

Partneri i koalicionit të SNS-së, Partia Socialiste e Serbisë, sipas rezultateve paraprake, ka fituar 11.6 për qind të votave.

Koalicioni NADA pritet të fitojë 5.4 për qind, teksa koalicioni “Ne duhet” 4.3 për qind, Dveri 4 për qind dhe Zavetnici 3.9 për qind të votave.

Të dielën, më 3 prill, qytetarët serbë votuan në zgjedhjet presidenciale dhe parlamentare, teksa zyrtarët zgjedhorë thanë se dalja në zgjedhje mund të jetë deri në 60 për qind të votuesve.

Kjo është një shifër më e lartë e pjesëmarrjes në zgjedhje, krahasuar me zgjedhjet parlamentare të vitit 2020, kur kishin votuar 48.8 për qind e votuesve.

Në zgjedhjet e Serbisë të drejtë vote kanë pasur 6.5 milionë votues.

Përfaqësuesit e Komisionit të Zgjedhjeve në Serbi njoftuan se nuk do të shpallin rezultatet preliminare të zgjedhjeve gjatë natës së zgjedhjeve. Kjo është hera e parë që ky komision njofton për një vendim të tillë. Opozita ka kritikuar vendimin e komisionit duke e cilësuar si të paprecedent.

Komisioni tha se do të shpallë rezultatet të hënën më 4 prill deri në orën 20:00.

Parregullsi në zgjedhje

Vëzhguesit e zgjedhjeve në Serbi kanë raportuar parregullsi të shumta në disa qendra të votimit.

Misioni vëzhgues i organizatës joqeveritare CRTA ka dorëzuar në polici shtatë kallëzime penale për parregullsi.

Siç tha përfaqësuesi i kësaj organizate, këto parregullsi përfshinin blerjen e votave në qendrat e votimit, mbajtjen paralele të listave të votuesve, cenimin e fshehtësisë së votimit, si dhe praninë e personave të paautorizuar në vendvotime.

Lideri i njërës prej partive opozitare “Lëvizja Qytetarët e Lirë” (PSG), Pavle Grboviq, ka raportuar për sulm fizik në afërsi të një qendre të votimit.

Ai ka pretenduar se është sulmuar nga anëtarët e partisë në pushtet, Partisë Përparimtare Serbe (SNS), derisa tha se ka pësuar lëndime në kokë. SNS i mohoi këto pretendime.

Ndërkaq, Ministria e Punëve të Brendshme përmes një njoftimi tha se Grboviq nuk i është përgjigjur thirrjes për të ardhur në polici dhe për të dhënë deklaratë me rastin e incidentit.

Kryetari i Komisionit të Zgjedhjeve tha në konferencën për shtyp se në qendra të caktuara votimi janë regjistruar përplasje të “aktivistëve të ndryshëm partiakë” dhe se për këtë kanë raportuar mediat.

Ai u bëri thirrje të gjitha partive politike që “të qetësojnë gjakrat” dhe “ta kalojnë pjesën tjetër të ditës së zgjedhjeve në paqe”.

Tetë kandidatë për president

Votuesit në Serbi të dielën kanë votuar për zgjedhjet presidenciale, me presidentin populist Aleksandar Vuçiq –i cili mburret për lidhjet e tij personale me presidentin rus, Vladimir Putin teksa Rusia vazhdon pushtimin e paprovokuar të Ukrainës – që pritet të fitojë një mandat tjetër pesëvjeçar në krye të shtetit.

Për president kanë kandiduar tetë persona.

Ndërkaq, pesë vjet pasi fitoi mandatin e parë si president, Vuçiq vazhdon të jetë forca dominuese në Serbi, duke predikuar paqe dhe stabilitet në një kohë kur Evropa po përballet me konfliktin më të madh që prej Luftës së Dytë Botërore.

Vuçiq paralajmëron dorëheqje nga kryesimi i partisë

Por, kritikët e tij thonë se ai ka rritur kontrollin e pushtetit përmes kontrollit të mediave dhe Qeverisë, deri në atë pikë saqë muajin e kaluar, tregoi se 43 për qind e të anketuarve u shprehën se nuk besonin se zgjedhjet e 3 prillit do të jenë të lira apo fer.

“Në vitet e fundit, partia në pushtet Partia Përparimtare Serbe ka cenuar në mënyrë të vazhdueshme të drejtat politike dhe liritë civile, duke ushtruar presion mbi mediat e pavarura, mbi opozitën dhe organizatat e shoqërisë civile”, tha Freedom House në vlerësimin e tij të fundit për Serbinë, duke e renditur shtetin në vendin e 62-të nga 100 shtete në indeksin e lirisë për vitin 2021.

Sfiduesi kryesor i Vuçiqit në këto zgjedhje është ish-shefi i ushtrisë Zdravko Ponosh – një gjeneral në pension, që doli si befasi si kandidat i kampit opozitar pro Bashkimit Evropian.

Ponosh, 60 vjeç, është “kandidat i qendrës së djathtë dhe duket se opozita dëshironte të gjente një person i cili do të mund të ishte një kandidat i mirë për atë që konsiderohet në skenën politike në Serbi, që anon nga e djathta”, tha Bojan Klacar, drejtor menaxhues i agjencisë së sondazheve Qendra për Zgjedhje të Lira dhe Demokraci.

Një sondazh i Institutit për Çështje Evropiane, me seli në Beograd, ka parashikuar se Vuçiq do të fitojë në rundin e parë duke marrë 60 për qind të votave dhe Ponosh do të dalë i dyti me 18 për qind.

Gara për Parlamentin serb

Votuesit më 3 prill po ashtu votuan për zgjedhjet parlamentare, në të cilat, Partia Përparimtare Serbe (SNS) po ashtu pritet të dominojë. Njëkohësisht u mbajtën zgjedhjet lokale për disa komuna, përfshirë edhe për kryeqytetin serb, Beogradin.

Në zgjedhjet parlamentare serbe morën pjesë edhe partitë shqiptare, të cilat garuan me dy lista: Koalicioni i Shqiptarëve të Bashkuar dhe Alternativa Demokratike Shqiptare – me gjithsej 20 kandidatë.

Serbët nga Kosova shkojnë në Serbi për të votuar

Ndërkaq, serbët në Kosovë, me shtetësi të dyfisht votuan në komunat brenda Serbisë, pasi Qeveria e Kosovës nuk lejoi që këto zgjedhje të mbahen brenda territorit të shtetit. Kosova tha se i kishte kërkuar Serbisë që t’i dërgonte kërkesë Qeverisë në Prishtinë për mbajtjen e zgjedhjeve, por Beogradi nuk pranoi.

Të dielën në mëngjes, më shumë se 25 autobusë u panë në stacionin e autobusëve në Mitrovicë të Veriut, për të transportuar serbët për të votuar në Rashkë.

Rashka është një nga komunat në Serbi, pranë kufirit me Kosovën, ku rreth 100,000 qytetarë serbë që jetojnë në Kosovë, do të mund të ushtrojnë të drejtën e tyre të votës.

Transport i organizuar është bërë edhe në Graçanicë, një komunë e banuar me shumicë serbe, që gjendet pranë Prishtinës.

Transporti i qytetarëve për në Serbi është bërë nën organizimin e komunave serbe, si ato që funksionojnë së sistemin e Kosovës, po ashtu ato në sistemin e Serbisë.

Shtetet e Quint-it kishin shprehur “zhgënjim të madh” me vendimin e Qeverisë së Kosovës për moslejimin e mbajtjes së zgjedhjeve serbe./REL

The post Vuçiç shpall fitoren në zgjedhjet e Serbisë që në raundin e parë appeared first on Albeu.com.