Këshilli Gjyqësor i Kosovës ka vendosur të mos e pranojë kërkesën e gjyqtarëve dhe pjesëtarëve të stafit mbështetës nga komuniteti serb për anulimin e dorëheqjeve dhe kthimin e tyre në vendet e punës.

Çështja u shqyrtua të enjten paradite, kur anëtarët e KGJK-së votuan për kërkesën. Me shumicë votash, Këshilli e hodhi poshtë atë dhe i rekomandoi ushtrueses së detyrës së presidentes, Albulena Haxhiu, që t’i lirojë gjyqtarët nga funksionet e tyre.

Institucioni e ka lidhur këtë vendim me dorëheqjet kolektive të paraqitura disa vite më parë nga gjyqtarët dhe stafi serb i sistemit të drejtësisë.

Qëndrimi i KGJK-së ka shkaktuar reagim edhe nga Bashkimi Evropian, i cili shprehu “keqardhje të thellë” për mosmiratimin e rikthimit të tyre në detyrë.

Profesori Kolë Krasniqi e konsideron të bazuar në aspektin juridik dhe të drejtë në planin institucional vendimin për të mos mundësuar rikthimin automatik të gjyqtarëve serbë që u larguan nga detyra në vitin 2022. Sipas tij, dorëheqjet nuk përfaqësonin hapa individualë të zakonshëm, por një veprim politik e kolektiv, i cili solli pasoja për institucionet.

Krasniqi thekson se pavarësia e gjyqësorit, si dhe zbatimi i Kushtetutës dhe ligjeve, duhet të mbeten parime themelore. Vendimi i KGJK-së u mor me nëntë vota për, një kundër dhe një abstenim, ndërsa emrat e gjyqtarëve iu propozuan Presidentes për lirimin formal nga detyra.

Sipas profesorit, një gjyqtar ushtron pushtet shtetëror dhe duhet të jetë i mbrojtur nga ndikimet politike e etnike, si dhe nga udhëzimet e çdo autoriteti që qëndron jashtë rendit kushtetues. Për këtë arsye, largimi i organizuar për motive politike dëmton besimin e qytetarëve te paanshmëria, stabiliteti dhe përkushtimi kushtetues i sistemit të drejtësisë. Ai vlerëson se nuk do të ishte e arsyeshme që pas afro katër vjetësh dorëheqjet, të cilat ishin deklaruar të parevokueshme, të anuloheshin pa marrë parasysh pasojat juridike dhe institucionale të krijuara.

Krasniqi thotë se vendimi duhet të përcjellë mesazhin se institucionet e drejtësisë nuk mund të braktisen për t’u përdorur si mjet presioni politik dhe më pas të rifitohet pozita automatikisht, pa procedurë, pa kontroll profesional dhe pa përgjegjësi individuale. Ai shton se autoriteti dhe pavarësia e KGJK-së forcohen, nëse arsyetimi i vendimit mbështetet qartë në Kushtetutë e ligj, zbatohet në mënyrë individuale dhe nuk përmban trajtim diskriminues.

Megjithatë, ai nënvizon se përkatësia etnike nuk duhet të shërbejë as si pengesë, as si avantazh. Për këtë arsye, sipas tij, duhet të zhvillohen konkurse të reja, të hapura dhe transparente. Ish-gjyqtarët serbë do të mund të aplikojnë si individë, duke iu nënshtruar të njëjtave kritere si kandidatët e tjerë, përfshirë kontrollin e integritetit, paanshmërisë, aftësive profesionale dhe mospërfshirjes në aktivitete politike.

Në periudhën afatshkurtër, vendimi mund të krijojë vështirësi në punën e gjykatave në veri dhe të përdoret politikisht nga Beogradi. Por, në perspektivë afatgjatë, profesori vlerëson se integrimi i qëndrueshëm nuk mund të arrihet përmes rikthimeve kolektive të dakordësuara politikisht, por përmes pjesëmarrjes individuale, respektimit të Kushtetutës dhe garës së barabartë.

Krasniqi përfundon se vendimi mund të kontribuojë në forcimin e shtetit ligjor vetëm nëse pasohet menjëherë nga përzgjedhja e gjyqtarëve dhe punonjësve të kualifikuar nga komuniteti serb, si dhe nga masa konkrete për t’u garantuar banorëve të veriut qasje efektive në drejtësi. Përgjegjësia, sipas tij, duhet të mbetet individuale, ndërsa integrimi i institucioneve duhet të vazhdojë të jetë objektiv strategjik i Republikës së Kosovës.

The post Profesori Krasniqi: Refuzimi i rikthimit të gjyqtarëve serbë në detyrë është juridikisht i arsyeshëm appeared first on Albeu.com.

Kraki ka bërë të ditur se, rreth një vit më parë, nuk pranoi të merrte pjesë në një debat televiziv në Shqipëri që kishte në qendër çështjen e shamisë islame në shkollat e Kosovës. Ai e konsideroi këtë temë përçarëse dhe tha se të nesërmen ajo u trajtua edhe nga disa media në Kosovë.

Deputeti ka kritikuar atë që e cilëson si “normalizim të injorancës”, ndërsa ka vlerësuar se rasti i Fatmir Shehollit tregon më shumë për shoqërinë sesa për veprimtarinë e tij. “Fatmir Sheholli u demaskua dhe na demaskoi”, ka shkruar Kraki.

Postimi i plotë:

Fatmir Sheholli na demaskoi

Para rreth një viti, mora një telefonatë nga një televizion në Shqipëri. Më pyetën nëse mund të merrja pjesë të nesërmen në një debat.

I pyeta se cila do të ishte tema dhe kush do të merrte pjesë.

Më thanë se diskutimi do të përqendrohej te shamia islame në shkollat e Kosovës.

U përgjigja se në atë periudhë kishim rreth 100 probleme dhe bllokada politike për të trajtuar. I pyeta se si ishte bërë kaq urgjente për opinionin tema e fesë.

U thashë qartë se pas shumë temave dhe debateve për Kosovën në mediat e Shqipërisë qëndrojnë shërbimet serbe. Në mënyrë miqësore u sugjerova të mos trajtonin tema të tilla, të cilat synojnë të krijojnë përçarje mes nesh.

Gjithashtu u thashë se me shumë gjasë “tema” do të merrej edhe nga media të tjera, pasi këto çështje përhapen përmes skenarëve sa më të gjerë.

Debatin e refuzova kategorikisht.

Të nesërmen, në T7 dhe TV Dukagjin, drejtuesit e emisioneve të drekës kishin hapur tashmë diskutimet për ndasitë fetare. Në studio ishin ftuar persona po aq anonimë sa edhe të paditur.

Sipas tij, objektivi ishte i njëjtë në Shqipëri dhe në Kosovë: fetarizimi i debatit dhe nxjerrja në pah e ndasive që, në realitet, tek ne nuk kanë ekzistuar kurrë. I shkrova personit nga Tirana dhe i dërgova lidhjet e debateve të njëjta që ishin zhvilluar në Kosovë.

E pyeta nëse e kuptonte se si po zhvillohej kjo çështje.

Ai u përgjigj se ishte një koincidencë interesante.

Tani, pas demaskimit të Fatmir Shehollit dhe atij plaku goran të BIA-s, këta skenarë janë bërë të qartë. Unë nuk kam pritur arrestimin e spiunëve për të kuptuar se shumë media, me dashje ose pa dashje, janë në shërbim të Serbisë.

E kam përsëritur shpesh se injoranca është armiku ynë më i madh. Siç ka teorikuar Hannah Arendt, aty ku mungon mendimi, gjen hapësirë e keqja. Dëshira për t’u paraqitur si dikushi, kur në të vërtetë je askushi, krijon liga mes askushëve. Tani këta askush po ndërtojnë një realitet paralel, ku nuk ekzistojnë as rregulla dhe as të vërteta.

Për këtë arsye, nuk mund të ketë ndërhyrje nga një gazetar i pacipë, i cili i jep hapësirë një psikopati gjatë një emisioni të mesditës për të përhapur teori konspirative se Kosova po bashkëpunon me Serbinë për zbulimin e armëve në veri.

Pikërisht për këtë, Kosova sot ndodhet përballë një rreziku më të madh se në vitin 2008, kur shpalli pavarësinë.

Sot jemi ne ata që e vëmë Kosovën në rrezik, sepse e kemi bërë të zakonshme injorancën në çdo fushë dhe për çdo çështje.

Prandaj, rasti i Shehollit është shumë më tragjik sesa vetë veprimtaria e tij në shërbim të Serbisë. Ky rast flet më shumë për ne sesa për Fatmirin, spiunin.

Në të vërtetë, Fatmir Sheholli u demaskua dhe njëkohësisht na demaskoi.

The post “Fatmir Sheholli na demaskoi” – Deputeti Kraki rrëfen debatin që refuzoi një vit më parë appeared first on Albeu.com.

Familjarët e Jetlira Foniqit, 25-vjeçares që dyshohet se është vrarë nga bashkëshorti i saj në Kërvasari të Malishevës, njoftimin për rastin e kanë marrë pas orës 02:00 të mesnatës.

Flamur Foniqi, djali i axhës së viktimës, deklaroi për KosovaPress se familja është e bindur se e reja është privuar nga jeta përmes vrasjes.

Ai tha se familja po pret raportin përfundimtar të Institutit të Mjekësisë Ligjore në Prishtinë, duke kërkuar që rasti të trajtohet me drejtësi të plotë.

“E ndjera është vajza e axhës, ndërsa lajmin për këtë rast tragjik e kemi marrë sot pas orës 02:00 të mesnatës. Nga informacionet që kemi marrë në mëngjes, ne si familje dimë dhe besojmë fuqishëm se bija jonë është privuar nga jeta. Mendojmë se ka ndodhur një vrasje dhe ky është qëndrimi ynë, ndërsa për konstatimet e tjera presim Institutin e Mjekësisë Ligjore në Prishtinë. Jemi në dhimbje, sepse bija jonë është privuar nga jeta, dhe nga këtu kërkojmë që të vendoset drejtësia e plotë”, tha ai për KosovaPress.

Policia e Kosovës ka bërë të ditur se 25-vjeçarja, e cila ishte në javën e 34-t të shtatzënisë, humbi jetën pasi u plagos me armë zjarri.

Sipas të dhënave policore, në dhomën e gjumit janë gjetur të lënduar viktima 25-vjeçare dhe bashkëshorti i saj 26-vjeçar. Si i dyshuar për rastin po trajtohet Egzon Bytyqi, 26 vjeç.

Zëdhënësja e Policisë për rajonin e Gjakovës, Vlera Krasniqi, i ka deklaruar KosovaPress-it se ngjarja është raportuar më 23 gusht 2026, rreth orës 23:20.

Të dy të plagosurve u është dhënë fillimisht ndihma e parë mjekësore, përpara se të dërgoheshin për trajtim në Qendrën Klinike Universitare të Kosovës.

Në vendin e ngjarjes, Policia ka gjetur dhe ka sekuestruar një armë zjarri, që dyshohet se është përdorur gjatë rastit.

Policia është njoftuar nga QKUK-ja rreth orës 01:10 se 25-vjeçarja kishte vdekur si rezultat i plagëve të pësuara.

The post Familja e Jetlira Foniqit kërkon zbardhje dhe drejtësi pas ngjarjes tragjike në Malishevë appeared first on Albeu.com.

Gjykata e Apelit ka pranuar ankesën e mbrojtjes dhe ka vendosur që çështja penale ndaj Endrit Nikës të kthehet për rigjykim dhe rivendosje. Nika ishte dënuar nga Gjykata Themelore në Prishtinë me 18 vjet burgim për vrasjen e një 27-vjeçareje nga Argjentina në hotelin “Sonoma”, në Fushë Kosovë.

Vendimin e ka bërë publik avokati Tomë Gashi, i cili aktualisht e përfaqëson Nikën.

Sipas Gashit, Prokuroria kishte kërkuar që i akuzuari të dënohej me burgim të përjetshëm, ndërsa Gjykata Themelore kishte caktuar dënimin prej 18 vjetësh burgim.

“Gjykata e Apelit ka aprovuar ankesën e mbrojtjes dhe ka vendosur që çështja të kthehet në rigjykim dhe rivendosje”, ka deklaruar Gashi.

Avokati e ka cilësuar vendimin si të rëndësishëm për mënyrën e zhvillimit dhe trajtimit të procesit penal.

“Ky vendim është i rëndësishëm, sepse në këtë proces penal e vërteta nuk mund të ndërtohet mbi supozime, interpretime apo paragjykime”, ka shkruar ai.

Gashi ka nënvizuar se përgjegjësia penale duhet të përcaktohet duke u mbështetur në prova.

“Ajo duhet të përcaktohet vetëm mbi PROVA”, ka theksuar avokati.

Pas vendimit të Gjykatës së Apelit, rasti do të shqyrtohet përsëri përmes procedurës së rigjykimit.

The post Apeli urdhëron rigjykimin e Endrit Nikës, i dënuar për vrasjen e 27-vjeçares argjentinase appeared first on Albeu.com.

Gjykata Themelore në Prishtinë ka shpallur aktgjykim fajësues ndaj katër personave të përfshirë në rastin “Toka 2”, duke i dënuar në total me 32 vjet burgim për vepra penale që lidhen me krimin e organizuar, keqpërdorimin e detyrës zyrtare dhe shpëlarjen e parave.

Vendimi, i shpallur të premten nga kryetari i trupit gjykues, Vesel Ismaili, përcakton dënimin prej 10 vjetësh burgim për Mehmet Prishtinën, 8 vjetësh për Dukagjin Emërllahin, 8 vjetësh për Avni Maxhunin dhe 6 vjetësh për Nexharije Hotin.

Prokuroria Speciale e Republikës së Kosovës e ka përshëndetur aktgjykimin, duke e konsideruar atë një hap të rëndësishëm në përpjekjet për luftimin e krimit të organizuar.

Përmes një komunikate pas vendimit, Prokuroria Speciale deklaroi se e mirëpret aktgjykimin fajësues ndaj katër të akuzuarve, transmeton KosovaPress.

“Ky vendim përfaqëson një zhvillim të rëndësishëm në përpjekjet e vazhdueshme institucionale për luftimin e krimit të organizuar”, thuhet në reagimin e Prokurorisë.

Nexharije Hoti, ish-gjyqtare komunale në Prishtinë, akuzohej në kuadër të rastit “Toka 2” për nxjerrje të kundërligjshme të vendimeve gjyqësore dhe keqpërdorim të detyrës zyrtare. Mehmet Prishtina dhe Dukagjin Emërllahi akuzoheshin se kishin ndihmuar në kryerjen e këtyre veprave penale, ndërsa Avni Maxhuni, bashkë me Emërllahin dhe Prishtinën, përballej edhe me akuzën për shpëlarje të parave.

The post Rasti “Toka 2”, katër të akuzuarit marrin gjithsej 32 vjet burgim appeared first on Albeu.com.

Ivan Niniq, përfaqësuesi ligjor i familjeve të viktimave të kafenesë “Panda” në Kosovë, i është drejtuar Prokurorit të Përgjithshëm të Shtetit në Serbi me kërkesën për ndërhyrje të menjëhershme dhe kontroll të jashtëzakonshëm mbi mënyrën se si Prokuroria për Krim të Organizuar po e trajton këtë çështje.

Sipas dokumentit të siguruar nga Radio Evropa e Lirë (REL), Niniq pretendon se institucioni i prokurorisë në Beograd prej më shumë se tri vjetësh nuk ka kthyer përgjigje ndaj propozimeve për të marrë në pyetje disa dëshmitarë lidhur me rastin, i cili vazhdon të mbetet i pazbardhur.

Një nga personat për të cilët kërkohet dëshmia është presidenti serb, Aleksandar Vuçiq. Ai ka deklaruar më parë se zotëron informacione për vrasjen e gjashtë të rinjve serbë, të kryer në vitin 1998 brenda një kafeneje në Pejë të Kosovës.

As Prokuroria për Krim të Organizuar dhe as Prokuroria e Lartë Publike nuk iu përgjigjën pyetjeve që REL-i u dërgoi për kërkesën e avokatit. Reagim nuk pati as nga kabineti i presidentit të Serbisë, Aleksandar Vuçiq.

Më 14 dhjetor, dy persona me maska hynë në kafenenë “Panda” në Pejë dhe hapën zjarr. Nga të shtënat humbën jetën nxënësit e shkollës së mesme Ivan Obradoviq, Zoran Stanojeviq, Svetisllav Ristiq, Dragan Trifoviq dhe Vukosav Gvozdenoviq, si edhe studentja Ivana Radoviq.

Në parashtresën dërguar Prokurorit të Përgjithshëm të Shtetit, Niniq nënvizon se gjatë vitit 2023 kishte kërkuar marrjen në pyetje të dy ish-drejtuesve të Sigurimit Shtetëror të Serbisë, Jovica Staniq dhe Franko Simatoviq. Qëllimi, sipas tij, ishte të kontrolloheshin informacionet indirekte të dëshmitarit Çedomir Jovanoviq, të lidhura me Simatoviqin dhe me dijeninë që ai mund të kishte për ngjarjen në “Panda”.

Po gjatë vitit 2023, avokati i propozoi Prokurorisë të merrte dëshminë edhe të Aleksandar Vuçiqit. Ky i fundit e përmendi për herë të parë vrasjen në “Panda” në vitin 2013, në periudhën kur mbante detyrën e zëvendëskryeministrit të parë të Qeverisë së Serbisë.

Në deklaratën e asaj kohe, Vuçiq tha se nuk kishte prova që krimi ishte kryer nga shqiptarët dhe paralajmëroi se opinioni publik serb do të përballej me zbulime tronditëse.

Në vitet që pasuan, ai është shprehur disa herë se për këtë çështje ekzistojnë disa informacione, por se provat nuk janë të plota.

Argumenti i Niniqit për marrjen në pyetje të Vuçiqit lidhet me postet shtetërore që ai ka ushtruar. Në kërkesë përmendet veçanërisht drejtimi i Byrosë për Koordinimin e Shërbimeve të Sigurisë që nga viti 2013, detyrë e cila i ka dhënë mundësi të ketë qasje në të dhëna veçanërisht të ndjeshme të sektorit të sigurisë.

Duke vepruar në emër të familjeve të të vrarëve, avokati i ka kërkuar Prokurorit të Përgjithshëm të Shtetit të miratojë një udhëzim detyrues për kryeprokurorin e Prokurorisë për Krim të Organizuar. Përmes tij do të urdhërohej që Vuçiq, Staniq dhe Simatoviq të merreshin urgjentisht në pyetje si dëshmitarë.

Më 27 korrik, Niniq i kërkoi gjithashtu Prokurorisë për Krim të Organizuar të kontrollonte pretendimet sipas të cilave Radomir Boban Baçoviq ishte ekzekutuesi i drejtpërdrejtë i masakrës.

Akuzat u publikuan më 18 korrik në Telegram, përmes një video-mesazhi të Millosh Medenicës, shtetasit malazez të arratisur nga drejtësia.

Medenica, i dënuar në Mal të Zi me 10 vjet burg për krim të organizuar, tha se Boban Baçoviq njihej që nga vitet ‘90 si person që kishte punuar për shërbimin e atëhershëm të sigurimit shtetëror. Ai pretendoi gjithashtu se, në vitin 1998, kur konflikti në Kosovë ishte përshkallëzuar, ky shërbim kishte hartuar një plan për inskenimin e një sulmi kundër civilëve serbë, me synimin që të krijonte legjitimitet për ndërhyrje ushtarake.

Krimi ndaj gjashtë të rinjve të nacionalitetit serb ndodhi në një periudhë tensionesh të forta ndëretnike në Kosovë, kur luftimet ndërmjet forcave serbe dhe Ushtrisë Çlirimtare të Kosovës (UÇK) kishin nisur tashmë.

Po atë ditë kur ndodhën vrasjet në “Panda”, disa pjesëtarë të UÇK-së u vranë në një pritë të forcave serbe, teksa transportonin armë nga Shqipëria.

Në atë kohë, sulmi në kafene u trajtua si hakmarrje dhe, si pasojë, në Pejë u arrestuan shqiptarë. Megjithatë, 12 muaj më vonë, gjykata në Beograd i liroi të gjithë për mungesë provash.

Në vitin 2013, Vuçiqi sinjalizoi se autorët e krimit “ndoshta nuk kanë qenë shqiptarët”.

Hetimet e Prokurorisë së Serbisë për rastin nisën në vitin 2016, por deri tani nuk kanë prodhuar asnjë rezultat.

The post Avokati kërkon mbikëqyrje të jashtëzakonshme ndaj Prokurorisë serbe për çështjen “Panda” appeared first on Albeu.com.

Në dëshminë e tij para gjykatës, Fatmir Ademi, drejtues i Departamentit të Kimisë dhe Biologjisë pranë Agjencisë së Kosovës për Forenzikë, sqaroi se analiza e ADN-së në lidhje me shpërthimin në kanalin “Ibër-Lepenc” është realizuar tërësisht në laboratorin e Prishtinës. Sipas tij, vetëm rezultatet përfundimtare u dërguan në Itali për një proces interpretimi.

Këto shpjegime ai i dha gjatë marrjes në pyetje nga ana e mbrojtësit të të akuzuarve, avokatit Nebojsha Vllajiq.

Avokati e pyeti dëshmitarin për arsyet se përse laboratori vendor nuk ishte në gjendje ta kryente vetë interpretimin, duke iu referuar deklaratave të mëhershme ku përmendej mungesa e metodave për ekzaminimin e mostrave të përziera të ADN-së. Ai theksoi se edhe vetë prokurori kishte konstatuar të njëjtën pengesë dhe si rrjedhojë, mostra ishte nisur drejt Italisë.

Ademi iu përgjigj se puna laboratorike nuk u zhvillua jashtë vendit dhe se destinacioni italian shërbeu vetëm për të dhënë një lexim më të saktë të të dhënave të përftuara. “E gjithë ekspertiza u krye në ambientet tona në Prishtinë; ne e nisëm dosjen në Itali vetëm për interpretim, për shkak se nuk zotëronim softuerin e nevojshëm për atë fazë specifike,” sqaroi ai. Gjithashtu, shtoi se edhe përpara mbërritjes së interpretimit nga jashtë, ekipi vendor kishte bërë një vlerësim paraprak të profileve të ADN-së, duke i krahasuar provat nga një prej dëshmive me profilin e një personi të shënuar si S1.

Në vijim të seancës, avokati kërkoi saktësim nëse çfarë u transportua konkretisht drejt Italisë—mostrat fizike apo thjesht të dhënat e analizës. Dëshmitari konfirmoi: “Ishin pikërisht rezultatet e analizave tona ato që u dërguan jashtë, me qëllim që të interpretoheshin nga specialistë që kishin programin e duhur.”

Lidhur me origjinën e gjurmëve gjenetike të personave nën hetim, Ademi dha detaje mbi zinxhirin e ruajtjes së provave. Ai shpjegoi se të gjitha mostrat mbërritën në laborator nëpërmjet kanaleve zyrtare, sipas protokolleve standarde për çështjet penale. Ato u sollën nga ana e hetuesisë, shoqëruar me urdhëresën e prokurorit dhe nuk u dorëzuan menjëherë në repartin e ADN-së, por fillimisht u regjistruan në sektorin e specializuar për pranimin dhe dorëzimin e dëshmive.

“Të gjitha hapat janë strikte dhe të mirëdefinuara,” deklaroi Ademi. “Seksioni i pranim-dorëzimit kontrollon me kujdes paketimin dhe përshkrimin e provave përpara se ato të kalojnë te ne, dhe ne i riverifikojmë sërish përpara fillimit të punës.” Ai shtoi se pas përfundimit, raporti final i ekspertizës i shkon prokurorit, ndërkohë që e gjithë dosja e punës arkivohet pranë divizionit të pranim-dorëzimit.

Në një moment tjetër të marrjes në pyetje, mbrojtësi i të pandehurit Millosh Deloviq, e pyeti dëshmitarin nëse ishte e saktë që ai kishte punuar me rreth 50 mostra për analiza të ADN-së në këtë rast, çka Ademi e pohoi shkurtimisht. Më pas ai u pyet se sa nga këto mostra ishin mbledhur direkt në vendngjarje. Duke u përpjekur të kujtonte shifrat, ai u përgjigj se, sipas tij, në total ishin shtatë dëshmi të siguruara nga pika e shpërthimit.

Pyetja pasuese e avokatit u përqendrua në lidhjen e drejtpërdrejtë me një prej të pandehurve. Ai donte të dinte nëse nga këto shtatë gjurmë të vendit të ngjarjes, të paktën njëra përputhej me profilin gjenetik të Dragisha Viqentijeviqit. Përgjigjja e dëshmitarit ishte e prerë: “Jo, nuk patëm asnjë përputhje.”

Kujtojmë se sipas dosjes së përgatitur nga Prokuroria Speciale, dyshohet se më 29 nëntor 2024, rreth orës 18:50, vëllezërit Dragisha dhe Jovan Viqentijeviq vendosën një sasi lënde plasëse në segmentin e kanalit të “Ibër-Lepencit” që gjendet në fshatin Varagë, Zubin Potok. Ky kanal është një arterie jetike për furnizimin me ujë të pijshëm si dhe për nevojat e Korporatës Energjetike të Kosovës.

Aktakuza, e firmosur nga prokurori special Bekim Kodraliu, përshkruan se vëllezërit, bashkë me disa persona të tjerë ende të paidentifikuar dhe pas një përgatitjeje të mëparshme, vepruan me qëllim të frikësimit serioz të popullatës dhe cenimit të sigurisë kushtetuese. Ata dyshohet se futën rreth 20 kilogramë trinitrotoluen brenda kanalit, të mbështjellë në një çantë dhe të mbërthyer me litar në një strukturë betoni.

Aty thuhet gjithashtu se aktivizimi i eksplozivit u bë me anë të një fitili me djegie të ngadaltë, duke gjeneruar një shpërthim të fuqishëm që dëmtoi rëndë strukturën e kanalit. Rrjedhimisht, furnizimi me ujë për disa komuna veriore dhe qendrore u ndërpre, duke vënë në rrezik edhe procesin e prodhimit të energjisë elektrike.

Prokuroria rendit se dëmi material i shkaktuar ndërmarrjes “Ibër-Lepenc” arrin vlerën e 376 mijë e 774 eurove e 70 centëve. Si rrjedhojë, vëllezërit akuzohen në bashkëkryerje për veprat penale “Rrezikimi i rendit kushtetues me shkatërrimin apo dëmtimin e instalimeve dhe pajisjeve publike” dhe “Kryerja e veprës terroriste”, në lidhje me dispozitat përkatëse të Kodit Penal.

Përveç kësaj, ata përballen edhe me akuzën për mbajtje të paligjshme të armëve. Gjatë bastisjeve të kryera në banesat e tyre në Zubin Potok dhe në fshatin Prevllak, forcat e rendit gjetën një arsenal të konsiderueshëm armatimi luftarak.

The post Ekspertiza e ADN-së për sulmin në “Ibër-Lepenc” u analizua në Prishtinë, rezultatet u interpretuan në Itali appeared first on Albeu.com.

Gjykata Themelore në Drenas pritet ta bëjë publik sot, në orën 11:30, aktgjykimin për rastin e kanosjes së kryetarit të Organizatës së Veteranëve të Luftës së UÇK-së, Hysni Gucati.

Gjatë seancës së 20 korrikut, i akuzuari Eqrem Avdullahu e kishte pranuar fajësinë për veprën penale të kanosjes dhe kishte kërkuar falje.

Pasi e aprovoi pranimin e fajësisë në seancën e zhvilluar të hënën, Gjykata Themelore në Drenas caktoi 23 korrikun për shpalljen e aktgjykimit në këtë çështje.

Detaje të tjera pritet të bëhen të ditura.

The post Sot jepet aktgjykimi për kanosjen ndaj Hysni Gucatit appeared first on Albeu.com.

Një video e publikuar së fundmi në Telegram nga Milosh Medenica ka rikthyer në qendër të debatit një nga ngjarjet më të errëta dhe të pazgjidhura të luftës në Kosovë. Medenica përmend emrin e Boban Baçoviqit si një prej të dyshuarve për ekzekutimin e gjashtë të rinjve serbë në lokalin “Panda” në Pejë, më 14 dhjetor 1998.

Baçoviqi, i lindur në Nikshiq të Malit të Zi, është cilësuar në disa raportime si një individ me lidhje të dikurshme me Shërbimin e Sigurimit Shtetëror të Serbisë (RDB). Kohët e fundit, emri i tij është lidhur edhe me grupin e dyshuar kriminal “Shkaljari”.

Sipas pretendimeve të shprehura në atë video, Baçoviqi dyshohet se ka qenë i përfshirë në një operacion të strukturave të sigurisë së Serbisë gjatë vitit 1998. Qëllimi i këtij operacioni, sipas Medenica-s, ishte të krijonte një justifikim për një ofensivë ushtarake dhe policore në Kosovë, teksa konflikti atje po acarohej.

“Boban Baçeviq njihet që nga vitet ’90 si bashkëpunëtor i ish-Shërbimit të Sigurimit Shtetëror. Në mënyrë specifike, në vitin 1998, kur përshkallëzimi i konfliktit në Kosovë ishte në kulm, RDB-ja projektoi një sulm ndaj civilëve serbë për të legjitimuar një ndërhyrje të armatosur. Ky mision, sipas këtij pretendimi, iu besua Boban Baçeviqit, i cili më 14 dhjetor 1998, së bashku me një person tjetër, kreu një vrasje brutale me armë automatike ndaj gjashtë të rinjve serbë në lokalin ‘Panda’, pesë prej të cilëve ishin të mitur dhe një i rritur,” pohoi Medenica në regjistrim.

Megjithatë, këto deklarata nuk janë konfirmuar nga organet e drejtësisë. Deri më tani, nuk ka asnjë aktakuzë zyrtare apo vendim gjyqësor që ta implikojë Baçoviqin në këtë ngjarje. Për pasojë, pohimet e shpërndara duhen konsideruar si të paverifikuara.

Masakra në kafenenë “Panda” ndodhi në mbrëmjen e 14 dhjetorit 1998, kur persona të armatosur qëlluan brenda lokalit në Pejë, duke vrarë gjashtë serbë të rinj dhe duke plagosur 15 të tjerë.

Menjëherë pas krimit, regjimi i Sllobodan Millosheviqit e shfrytëzoi ngjarjen për të hedhur fajin mbi shqiptarët dhe Ushtrinë Çlirimtare të Kosovës. Ky krim u bë pjesë e propagandës së Beogradit për t’i portretizuar shqiptarët si agresorë ndaj civilëve serbë dhe për të justifikuar shtimin e operacioneve të forcave serbe në terren.

Me kalimin e kohës, ky version zyrtar filloi të vihej në dyshim. Një moment kyç ishte viti 2013, kur Aleksandar Vuçiq, në atë kohë zv.kryeministër i Serbisë, deklaroi publikisht se nuk kishte asnjë provë që autorët e vrasjeve të ishin shqiptarë. Ai parashikoi gjithashtu se kur e vërteta për rastin “Panda” të dilte në dritë, opinioni publik serb do të ishte i befasuar.

Pas kësaj deklarate, Prokuroria për Krimin e Organizuar në Serbi hapi një hetim për zbardhjen e rastit. Megjithatë, edhe pse kanë kaluar vite, ky proces nuk ka çuar në asnjë padi penale dhe askush nuk është mbajtur përgjegjës për vrasjen e gjashtë të rinjve.

Pikërisht mungesa e një epilogu gjyqësor ka ushqyer për një kohë të gjatë dyshimet se atentati mund të ketë qenë një vepër e organizuar nga struktura të caktuara brenda shtetit serb, me synim për të ndikuar në ecurinë politike dhe ushtarake gjatë konfliktit në Kosovë.

Në analiza të ndryshme, hulumtime gazetareske dhe raportime mediatike janë përmendur edhe emra të tjerë ish-zyrtarësh të lartë të sistemeve të sigurisë së Serbisë, si Jovica Stanishiq, Franko Simatoviq (i njohur si “Frenki”), Radomir Markoviq dhe Milorad Ulemek (i njohur si “Legija”).

Gjithsesi, këta emra figurojnë vetëm në spekulime dhe analiza mbi një rol të mundshëm të shërbimeve në organizimin ose mbulimin e krimit. Asnjë prej tyre nuk është përballur me akuza formale apo dënime për masakrën në “Panda”.

Shumë studiues dhe analistë e konsiderojnë këtë rast si një shembull shumë të diskutueshëm të mënyrës se si, gjatë luftës në Kosovë, mund të jenë përdorur operacione të fshehta dhe mekanizma sigurie për qëllime politike dhe propagande.

Logjika pas këtyre analizave sugjeron se një sulm kundër serbëve, i paraqitur si vepër e shqiptarëve, do të forconte perceptimin e një popullate serbe të rrezikuar në Kosovë dhe do të siguronte mbështetje për veprimet e ashpra të regjimit të Beogradit.

Megjithatë, këto mbeten interpretime dhe nuk janë vërtetuar përmes një procesi të plotë gjyqësor apo një vendimi përfundimtar.

Gjatë viteve, vëzhgues të ndryshëm kanë tërhequr paralele edhe me krime të tjera të rënda në rajon, ku dyshohet për një gërshetim mes strukturave paralele, shërbimeve sekrete dhe rrjeteve kriminale me interesa politike.

Në këtë kuadër janë përmendur raste si vrasja e politikanit serb të Kosovës, Oliver Ivanoviq, apo sulmi i armatosur në Banjskë të Zveçanit, duke ngritur pyetje mbi funksionin e këtyre grupeve në arritjen e objektivave politike. Megjithatë, çdo rast ka hetimet dhe rrethanat e veta të veçanta, dhe lidhja e drejtpërdrejtë me rastin “Panda” mbetet në sferën e analizave, jo e fakteve të konfirmuara ligjërisht.

Për sa kohë që drejtësia nuk ka dhënë një vendim që identifikon fajtorët, masakra në kafenenë “Panda” mbetet një plagë e pashëruar e luftës në Kosovë.

Deklaratat e fundit të Milosh Medenica-s e kanë vënë sërish theksin mbi domosdoshmërinë e zbardhjes së plotë të kësaj ngjarjeje, gjetjes së autorëve dhe përcaktimit të përgjegjësive institucionale.

Pothuajse tre dekada pas vrasjes së të rinjve serbë në Pejë, familjarët e viktimave presin ende një përgjigje nga drejtësia se kush e kreu këtë krim.

Mungesa e një aktakuze dhe e një dënimi ka bërë që rasti “Panda” të vazhdojë të jetë subjekt i hetimeve të pambarim, analizave dhe postulateve të ndryshme, ndërkohë që përgjegjësit e vërtetë ende nuk janë vënë para drejtësisë.

The post Rasti “Panda” rikthehet në qendër të vëmendjes, dyshimet mbi përfshirjen e shërbimeve sekrete serbe rishfaqen appeared first on Albeu.com.

Pronari i një lokali në Han të Elezit është intervistuar nga Policia, pasi disa persona dyshohet se janë helmuar pas konsumimit të ushqimit në këtë biznes.

Sipas raportit policor, më 15.07.2026 një mashkull kosovar është marrë në pyetje në stacion policor në cilësinë e të dyshuarit.

Policia njoftoi se dyshimet lidhen me helmimin e disa personave, të cilët kishin konsumuar ushqim në lokalin e tij.

Hetimet për rastin janë në zhvillim. Prokurori është njoftuar dhe ka autorizuar inicimin e lëndës së rastit.

Ndërkohë, Agjencia e Ushqimit dhe Veterinarisë ka bërë të ditur se ka kryer kontrolle zyrtare emergjente, me qëllim që t’u ndihmojë institucioneve përgjegjëse në përcaktimin e shkaktarit të mundshëm dhe në mbrojtjen e shëndetit publik.

The post Helmimet e dyshuara në Han të Elezit, merret në pyetje pronari i lokalit appeared first on Albeu.com.